Għallem Lil Uliedek

Sem Ra l-​Ħażen taʼ Żewġ Dinjiet

IT-​TIFEL taʼ Noè, Sem, salva mit-​tmiem taʼ dinja waħda u għex biex jara oħra. Taf għaliex l-​ewwel dinja li Sem għex fiha nqerdet u kif hu u l-​bqija tal-​familja tiegħu setgħu jibqgħu jgħixu għal ġo dinja oħra?— a Ejja ħa nitkellmu dwar dan.

Il-​Bibbja tgħid li meta Sem kien żgħir, “il-​ħażen tal-​bniedem” kien kbir. Kulma kienu jaħsbu dwaru n-​nies kien ‘ħażin il-​ħin kollu.’ Allura, taf x’għamel Alla?— Hu ġab dilluvju li kines dik id-​dinja mill-​agħar. L-​appostlu Pietru kiteb: “Id-​dinja taʼ dak iż-​żmien inqerdet meta ġiet mgħarrqa bl-​ilma.”—Ġenesi 6:5; 2 Pietru 3:6.

Qed tifhem għaliex Alla qered dik id-​dinja?— In-​nies kienu ħżiena u kienu jaħsbu dwar dak li hu ‘ħażin il-​ħin kollu.’ Ġesù tkellem dwar dan. Hu qal li “qabel id-​dilluvju” n-​nies kienu qed jieħdu pjaċir “jieklu u jixorbu” kif ukoll “jiżżewġu u . . . jingħataw fiż-​żwieġ.” Ġesù żied: “Ma tawx kas sakemm ġie d-​dilluvju u kinishom ilkoll.”—Mattew 24:37-​39.

Taʼ xiex ma tawx kas dawn in-​nies?— Missier Sem, Noè, kien “predikatur tal-​ġustizzja” imma n-​nies ma semgħux minn dak li kien qed jgħidilhom. Noè semaʼ minn Alla u bena arka, speċi taʼ vapur li kellu jżomm lilu u lill-​familja tiegħu qawwijin u sħaħ matul id-​Dilluvju. Kienu biss Noè, il-​mara tiegħu, uliedhom—Sem, Ħam, u Ġafet—u n-​nisa tagħhom li taw kas taʼ x’riedhom jagħmlu Alla. Il-​bqija għamlu dak li riedu huma, għalhekk Ġeħova kinishom permezz tad-​Dilluvju.—2 Pietru 2:5; 1 Pietru 3:20.

Wara xi sena mindu beda d-​Dilluvju, Sem u l-​familja tiegħu ħarġu mill-​arka għal fuq art niexfa. In-​nies il-​ħżiena kienu nqerdu kollha, imma l-​affarijiet malajr inbidlu. Kangħan, it-​tifel taʼ Ħam, ħu Sem, għamel xi ħaġa tant ħażina li Noè qal: “Misħut ikun Kangħan.” Nimrod, in-​neputi taʼ Ħam, kien ħażin ukoll. Hu ħadha kontra l-​Alla l-​veru Ġeħova u qal lin-​nies biex jibnu  torri għoli bl-​isem taʼ Babel, biex b’hekk isiru famużi. Kif taħseb li ħassewhom Sem u missieru dwar dan?—Ġenesi 9:25; 10:6-​10; 11:4, 5.

Huma ddispjaċiehom u Ġeħova wkoll. Taf x’għamel Ġeħova?— Hu ħawwad il-​lingwa tan-​nies biex ma jifhmux lil xulxin. Imbagħad in-​nies kellhom jieqfu jibnu u jmorru f’postijiet differenti maʼ dawk li kienu jitkellmu bl-​istess lingwa. (Ġenesi 11:6-​9) Iżda Alla ma biddilx il-​lingwa taʼ Sem u l-​familja tiegħu. Għalhekk, huma setgħu jibqgħu qrib xulxin u jgħinu lil xulxin biex jaqdu lil Alla. Qatt ħsibt dwar kemm Sem dam jaqdi lil Ġeħova?—

Sem għex 600 sena, 98 sena qabel id-​Dilluvju u 500 u sentejn wara. Nistgħu nkunu ċertu li hu għen lil Noè jibni l-​arka u jwissi lin-​nies dwar id-​Dilluvju li kien ġej. Imma x’taħseb li għamel Sem matul l-​iktar minn 500 sena li għex wara d-​Dilluvju?— Noè sejjaħ lil Ġeħova l-​“Alla taʼ Sem.” Sem żgur li kompla jaqdi lil Ġeħova u jgħin lill-​membri tal-​familja tiegħu biex jagħmlu l-​istess. Iktar tard, il-​familja taʼ Sem saret tinkludi lil Abraham, Sara, u Iżakk.—Ġenesi 9:26; 11:10-​31; 21:1-​3.

Issa aħseb dwar id-​dinja tal-​lum li dejjem qed issir iktar mill-​agħar minn żmien Sem ’l hawn. X’se jsir minnha?— Il-​Bibbja tgħid li se “tgħaddi.” Imma wkoll twiegħed: “Min jagħmel ir-​rieda t’Alla jibqaʼ għal dejjem.” Allura jekk nagħmlu r-​rieda t’Alla nistgħu nkunu fost dawk li jsalvaw għal ġod-​dinja l-​ġdida t’Alla. Imbagħad, bl-​għajnuna t’Alla nistgħu nibqgħu ngħixu għal dejjem ferħanin fuq l-​art!—1 Ġwanni 2:17; Salm 37:29; Isaija 65:17.

[Nota taʼ taħt]

Mistoqsijiet:

○ F’liema tip taʼ dinja għex Sem għall-​ewwel, u għal liema żewġ raġunijiet qeridha Alla?

○ Kemm għex Sem u x’tip taʼ raġel kien?

○ X’se jiġri dalwaqt minn din id-​dinja?

○ X’għandna nagħmlu biex nibqgħu ħajjin wara t-​tmiem taʼ din id-​dinja?