X’qanqal lil waħda mara li kienet tagħmel kuntrabandu bid-​djamanti u li kienet tisraq mingħand dak li jħaddimha biex issir ħaddiema onesta? X’għen lil waħda mara li pprovat tagħmel suwiċidju darbtejn biex issib skop f’ħajjitha? Kif setaʼ wieħed li jabbuża mill-​alkoħol u d-​drogi jikseb is-​saħħa biex jaqtaʼ l-​vizzji qerridin tiegħu? Ikkunsidra x’għandhom x’jgħidu huma.

DETTALJI

ISEM: MARGARET DEBRUYN

ETÀ: 45

PAJJIŻ: IL-​BOTSWANA

STORJA: KUNTRABANDU U SERQ

IL-​PASSAT TIEGĦI: Missieri oriġinalment kien mill-​Ġermanja imma sar ċittadin tal-​Lbiċ taʼ l-​Afrika (issa n-​Namibja). Ommi kienet mill-​Botswana, mit-​tribù tal-​Mangologa. Jien twilidt f’Gobabis, in-​Namibja.

Fis-​snin 70 tas-​seklu l-​ieħor, il-​Gvern taʼ l-​Afrika t’Isfel kellu ħafna kontroll fuq in-​Namibja u fl-​irħula u l-​villaġġi kien jinforza strettament il-​liġijiet taʼ l-​apartheid, jiġifieri, id-​diskriminazzjoni razzjali. Minħabba li l-​ġenituri tiegħi kellhom żwieġ taʼ żewġ razez differenti, huma ġew perswaduti biex jisseparaw. Allura, ommi rritornat lura miegħi u maʼ ħuti f’Ghansi, il-​Botswana, u bdejna ngħixu hemmhekk.

Fl-1979, jien mort noqgħod Lobatse, il-​Botswana, u bdejt ngħix maʼ ġenituri adottivi sakemm spiċċajt l-​istudji tiegħi. Iktar tard, sibt xogħol bħala skrivana f’post fejn isewwu l-​karozzi. Trabbejt bit-​twemmin li Alla ma jipprovdix għan-​nies, li trid tagħmel kulma hemm bżonn—tajjeb jew ħażin—biex tipprovdi għalik innifsek u għall-​familja tiegħek.

Ladarba kelli pożizzjoni taʼ responsabbiltà fuq ix-​xogħol, użajt l-​opportunità biex nisraq il-​partijiet tal-​karozzi mingħand l-​imgħallem tiegħi. Kulmeta kienet tgħaddi ferrovija mir-​raħal bil-​lejl, jien u sħabi konna nitilgħu fuqha u nisirqu kulma kien jiġi għal idejna. Ukoll, jien involvejt ruħi fil-​kuntrabandu tad-​djamanti, id-​deheb, u r-​ram. Bdejt nabbuża mid-​drogi, sirt vjolenti ħafna, u kelli ħafna rġiel.

Imbagħad, fl-​1993, finalment inqbadt nisraq u tlift ix-​xogħol. “Sħabi” abbandunawni, għaliex beżgħu li huma wkoll setgħu jinqabdu.  Ir-​reazzjoni tagħhom weġġgħetni, u ddeċidejt li ma nafda lil ħadd.

KIF IL-​BIBBJA BIDDLITLI ĦAJTI: Fl-​1994, iltqajt maʼ Tim u Virginia, tnejn mix-​Xhieda taʼ Ġeħova li kienu missjunarji. Huma kellmuni fil-​post taʼ l-​impjieg il-​ġdid tiegħi, u għenuni nitgħallem dwar il-​Bibbja fis-​siegħa tal-​brejk tiegħi. Iktar tard, meta ħassejt li stajt nafdahom, ħallejthom jiġu d-​dar tiegħi biex jistudjaw il-​Bibbja miegħi.

Malajr indunajt li biex nogħġob lil Alla kelli nagħmel xi bidliet fl-​istil taʼ ħajti. Per eżempju, tgħallimt mill-​1 Korintin 6:9, 10 li “la ż-​żienja, . . . la l-​ħallelin, la r-​rgħiba, la s-​sakranazzi, la ż-​żeblieħa, lanqas l-​imbroljuni ma jirtu s-​saltna t’Alla.” Ħaġa ħaġa, waqqaft il-​vizzji l-​ħżiena tiegħi. Ma bqajtx nisraq. Ma bqajtx nissieħeb mal-​membri tal-​gruppi kriminali li kont trabbejt magħhom. Imbagħad, b’saħħa mingħand Ġeħova, keċċejt l-​irġiel li kelli ’l barra minn ħajti.

KIF IBBENEFIKAJT: B’ħafna sforz, tgħallimt nikkontrolla t-​tempra tiegħi u ma ngħajjatx maʼ wliedi meta xi ħaġa tmur ħażin. (Efesin 4:31) Jien nipprova nsolvi l-​affarijiet b’mod paċifiku. Dan il-​metodu taʼ komunikazzjoni jġib ir-​riżultati mixtiqin u jressaqna eqreb lejn xulxin bħala familja.

Il-​ħbieb li kelli qabel, anki l-​ġirien stess, saru jafu li jistgħu jafdawni. Sirt impjegata onesta u fdata li nistaʼ nieħu ħsieb il-​provvisti u l-​flus bir-​reqqa. B’dan il-​mod, nistaʼ nappoġġa lili nnifsi waqt li nqattaʼ ħafna mill-​ħin tiegħi ngħin lin-​nies jitgħallmu dwar il-​Bibbja. B’qalbi kollha naqbel mal-​kliem taʼ Proverbji 10:22: “Il-​barka taʼ Ġeħova—hi li ġġib l-​għana, u hu ma jżid l-​ebda wġigħ magħha.”

DETTALJI

ISEM: GLORIA ELIZARRARÁS DE CHOPERENA

ETÀ: 37

PAJJIŻ: IL-​MESSIKU

STORJA: IPPROVAT TAGĦMEL SUWIĊIDJU

IL-​PASSAT TIEGĦI: Trabbejt fl-​inħawi sinjuri taʼ Naucalpan, fl-​Istat tal-​Messiku. Minn meta kont żgħira, kont ribelluża ħafna u kont inħobb immur il-​parties. Bdejt inpejjep meta kelli 12-il sena, nixrob l-​alkoħol t’14, u nieħu d-​drogi taʼ 16. Ftit snin wara, tlaqt mid-​dar. Ħafna minn sħabi kienu minn familji mħarbtin, u kienu jiġu abbużati fiżikament jew verbalment. Ħajti tant dehret bla tama li darbtejn ipprovajt nagħmel suwiċidju.

Meta kelli 19-il sena, bdejt naħdem bħala mudella. Għalhekk, kont nissieħeb maʼ nies involuti fil-​politika u fid-​dinja tad-​divertiment. Maż-​żmien iżżewwiġt u kelli t-​tfal, imma jien kont nieħu d-​deċiżjonijiet kollha tal-​familja tiegħi. Ukoll, komplejt inpejjep u nixrob, u bqajt ngħix ħajja soċjali mimlija daqs bajda. Fil-​konversazzjoni tiegħi kont nuża ħafna kliem baxx, u kont nieħu gost ngħid ċajt maħmuġ. Kienu jitilgħuli malajr ħafna.

Ħafna min-​nies li għażilt li nissieħeb magħhom kellhom l-​istess stil taʼ ħajja. Għalihom, jien kont nidher li kelli kollox. Imma jien komplejt inħoss li ħajti kienet vojta, mingħajr skop.

 KIF IL-​BIBBJA BIDDLITLI ĦAJTI: Bdejt nistudja l-​Bibbja max-​Xhieda taʼ Ġeħova fl-​1998. Il-​Bibbja għallmitni li l-​ħajja għandha skop. Tgħallimt li Alla Ġeħova jrid iġedded l-​art u jagħmilha Ġenna, li se jirxoxta l-​mejtin, u li jien stajt inkun parti minn dak il-​futur.

Tgħallimt ukoll li l-​mod kif stajt nesprimi l-​imħabba tiegħi għal Alla kien billi nobdih. (1 Ġwanni 5:3) Din kienet sfida għall-​ewwel għaliex jien qatt ma kont aċċettajt gwida mingħand ħadd. Madankollu, maż-​żmien irrikonoxxejt li ma stajtx inkompli nidderieġi l-​ħajja tiegħi waħdi. (Ġeremija 10:23) Tlabt lil Ġeħova biex jiggwidani. Tlabtu biex jgħinni nġib ħajti fi qbil mal-​livelli tiegħu u ngħallem lil uliedi jgħixu b’mod differenti minn kif kont għext jien.

Kien diffiċli ħafna għalija li nagħmel il-​bidliet neċessarji, imma bdejt napplika l-​parir misjub f’Efesin 4:22-24: “Għandkom tinżgħu l-​personalità l-​qadima li taqbel maʼ kif kontu ġġibu ruħkom qabel . . . u tilbsu l-​personalità l-​ġdida li nħolqot skond ir-​rieda t’Alla fil-​ġustizzja u l-​lealtà vera.” Għalija, li nilbes il-​personalità l-​ġdida kien ifisser li naqtaʼ vizzji maħmuġin bħat-​tipjip, u kelli nitgħallem vokabolarju ġdid, wieħed mingħajr kliem oxxen. Domt kważi tliet snin biex nagħmel il-​bidliet meħtiġin sabiex stajt nitgħammed bħala waħda mix-​Xhieda taʼ Ġeħova.

Ukoll, bdejt nieħu bis-​serjetà l-​irwol tiegħi bħala mara miżżewġa u omm. Bdejt napplika l-​parir fl-​1 Pietru 3:1, 2: “Intom in-​nisa, kunu sottomessi lejn żwieġkom, sabiex, jekk xi wħud ma jkunux ubbidjenti lejn il-​kelma, dawn jintrebħu mingħajr ebda kelma permezz tal-​kondotta tan-​nisa tagħhom, għax ikunu raw b’għajnejhom stess il-​kondotta safja tagħkom flimkien mar-​rispett profond.”

KIF IBBENEFIKAJT: Jien tassew grata lejn Ġeħova għax issa naf li l-​ħajja fil-​fatt għandha skop. Inħoss li jien persuna ħafna aħjar issa u lil uliedi nistaʼ nagħtihom trobbija tajba. Kultant qalbi tikkundannani għal dak li għamilt fil-​passat, imma Ġeħova jaf lil qalbi. (1 Ġwanni 3:19, 20) Mingħajr ebda dubju, jien ġejt protetta minn ħafna ħsara minħabba li qed ngħix skond il-​livelli tal-​Bibbja u dan il-​fatt ġabli paċi ġewwinija.

DETTALJI

ISEM: JAILSON CORREA DE OLIVEIRA

ETÀ: 33

PAJJIŻ: IL-​BRAŻIL

STORJA: ABBUŻA MILL-​ALKOĦOL U D-​DROGI

IL-​PASSAT TIEGĦI: Twilidt f’Bagé, belt Brażiljana taʼ xi 100,000 abitant ħdejn il-​fruntiera taʼ bejn il-​Brażil u l-​Urugwaj. L-​agrikultura u t-​trobbija taʼ l-​imrieħel kienu l-​industriji prinċipali. Trabbejt f’distrett fqir fejn il-​gruppi kriminali kienu jxerrdu l-​vjolenza, u l-​abbuż mill-​alkoħol u d-​droga kien komuni fost iż-​żgħażagħ.

Wara li tlaqt mill-​iskola, bdejt nixrob, inpejjep il-​marijuana, u nismaʼ mużika heavy metal. Ma kontx nemmen f’Alla. Ħassejt li t-​tbatija u t-​taħwid kollu fid-​dinja jagħtu prova li Alla ma jeżistix.

Kont indoqq il-​kitarra u nikteb il-​mużika u spiss kont nispira ruħi mill-​ktieb Bibliku tar-​Rivelazzjoni.  Il-​grupp tiegħi ma kellux suċċess daqskemm ħsibt li se jkollu, allura bdejt niddependi iktar u iktar mid-​drogi qawwijin. Ma kienx jimpurtani jekk xi darba mmut b’overdose. Ħafna mill-​kantanti li kont nadura spiċċaw ħajjithom b’dak il-​mod.

Kont inħallas il-​vizzju tiegħi tad-​drogi billi nissellef il-​flus mingħand nannti, li rabbietni. Kont nigdbilha jekk kienet tistaqsini għalxiex qed nissellef il-​flus. Biex tkompli tgħaxxaqha, jien kont ninvolvi ruħi fl-​ispiritiżmu. Il-​maġija konnessa m’affarijiet sopranaturali kienet taffaxxinani, u kont naħseb li din setgħet tgħinni nikteb mużika aħjar.

KIF IL-​BIBBJA BIDDLITLI ĦAJTI: Wara li bdejt nistudja l-​Bibbja u nattendi l-​laqgħat tax-​Xhieda taʼ Ġeħova, l-​attitudni tiegħi bdiet tinbidel. Bil-​mod il-​mod, żviluppajt ix-​xewqa li ngħix u nkun ferħan. Imqanqal minn din l-​attitudni l-​ġdida, iddeċidejt li naqtaʼ x-​xagħar twil tiegħi. Jien kont ħallejtu jitwal bħala sinjal tad-​dwejjaq u r-​ribelljoni tiegħi. Imbagħad irrealizzajt li jekk ridt inkun aċċettabbli għal Alla, kelli nieqaf nabbuża mill-​alkoħol, naqtaʼ d-​drogi, u nieqaf inpejjep. Rajt ukoll li kelli bżonn nibdel l-​għażla tal-​mużika tiegħi.

L-​ewwel darba li attendejt laqgħa tax-​Xhieda taʼ Ġeħova, innotajt vers Skritturali li kien jidher fuq wieħed mill-​ħitan. Kien meħud minn Proverbji 3:5, 6, u kien jgħid: “Afda f’Ġeħova b’qalbek kollha u tistrieħx fuq fehmtek stess. Agħti kasu fil-​mogħdijiet tiegħek kollha, u hu jiddrittalek triqatek.” Meta qgħadt naħseb dwar din l-​iskrittura ħassejtni rassigurat li Ġeħova kien se jgħinni nirranġa ħajti jekk inħallih.

Xorta waħda, li nibdel l-​istil taʼ ħajti li kellu għeruq fondi u li nwaqqaf il-​vizzji tiegħi li kienu jinvolvu l-​abbuż tad-​drogi u l-​alkoħol kien diffiċli daqslikieku kelli naqtaʼ idi barra. (Mattew 18:8, 9) Ma stajtx nagħmel dawn il-​bidliet bil-​mod il-​mod. Kont naf li dan ma kienx se jaħdem fil-​każ tiegħi. Allura qtajt il-​vizzji tiegħi ħabta u sabta. Bdejt nevita wkoll il-​postijiet u n-​nies kollha li setgħu jħajruni lura lejn l-​istil qadim u qerried tal-​ħajja li kelli.

Tgħallimt nifraħ b’dak li kont inwettaq kuljum u ma nikkonċentrax fuq il-​mumenti taʼ skuraġġiment. Ħassejt li kien ikun unur li nkun fiżikament, moralment, u spiritwalment nadif fil-​ħarsa taʼ Ġeħova. Tlabt u rċivejt l-​għajnuna taʼ Ġeħova biex ma noqgħodx naħseb dwar kif kont qabel imma biex inħares ’il quddiem. Kultant kont nerġaʼ naqaʼ. Imma xorta insistejt li jkolli l-​istudju persunali tal-​Bibbja maʼ l-​għalliem tiegħi, avolja kultant kont inkun bl-​effetti tas-​sakra.

Il-verità dwar Alla li tgħallimt mill-​Bibbja—li jimpurtah minna bħala individwi, li se jeqred ir-​reliġjon falza, u li issa qed jappoġġa x-​xogħol taʼ l-​ippridkar madwar id-​dinja—għamlet sens għalija. (Mattew 7:21-23; 24:14; 1 Pietru 5:6, 7) Kollox ġie f’postu b’dawn il-​fatti kollha. Fl-​aħħar, iddeċidejt li niddedika ħajti lil Alla. Ridt nuri l-​gratitudni tiegħi għal dak kollu li kien għamel miegħi.

KIF IBBENEFIKAJT: Issa nħoss li ħajti għandha skop u tifsir. (Ekkleżjasti 12:13) U minflok ma nieħu mingħand il-​familja tiegħi, issa qed inkun nistaʼ nagħti xi ħaġa lura. Qsamt l-​affarijiet tajbin mill-​Bibbja maʼ nannti, u issa hi ddedikat ħajjitha lil Ġeħova. Diversi membri oħrajn tal-​familja tiegħi u wieħed minn sħabi taʼ qabel li kien parti mill-​grupp għamlu l-​istess.

Issa jien miżżewweġ, u jien u marti nqattgħu l-​maġġuranza mill-​ħin tagħna ngħinu lil oħrajn jitgħallmu dwar il-​Bibbja. Inħossni premjat bil-​kbir għax tgħallimt ‘nafda f’Ġeħova b’qalbi kollha.’

[Kumment f’paġna 29]

“Bil-​mod il-​mod, żviluppajt ix-​xewqa li ngħix u nkun ferħan”