Xi drabi, skoperta arkeoloġika direttament jew indirettament tikkonferma l-​eżistenza taʼ karattru Bibliku. Pereżempju, fl-​2011 xi studjużi Iżraelin ippubblikaw informazzjoni rigward sejba li tagħmel proprju dan. Instab ossarju għad-​dfin taʼ 2,000 sena ilu. Ossarju hu kaxxa maħduma mill-​blat b’xi skultura mnaqqxa li fih kien jitpoġġa l-​għadam taʼ individwu mejjet wara li jkun tmermer il-​ġisem.

Fuq dan l-​ossarju partikulari tidher l-​iskrizzjoni: “Mirjam bint Jesugħa, bin Kajfa, qassis taʼ Magħżija minn Beth ′Imri.” Il-​qassis il-​kbir Iżraeli li kien involut fil-​ġuri u l-​qtil taʼ Ġesù kien Kajfa. (Ġw. 11:48-​50) L-​istorjografu Ġużeppi Flavju jirreferi għalih bħala “Ġużeppi li kien imsejjaħ Kajfa.” Dan l-​ossarju milli jidher kien taʼ xi qarib tiegħu. Iktar kmieni nstab ossarju ieħor li huwa maħsub li kien tal-​qassis il-​kbir innifsu. L-​iskrizzjoni taʼ fuqu taqra Yehosef bar Caiapha, jew Ġużeppi, bin Kajfa, * u għalhekk b’xi mod Mirjam kienet tiġi minn Kajfa.

Skont l-​informazzjoni mill-​Israel Antiquities Authority (IAA), l-​ossarju taʼ Mirjam kien ittieħed mingħand il-​ħallelin li kienu serqu qabar tal-​qedem. L-​analisi tiegħu u tal-​iskrizzjoni taʼ fuqu jikkonfermaw li hu awtentiku.

L-​ossarju jgħidilna xi ħaġa ġdida wkoll. Jirreferi għal “Magħżija,” l-​aħħar mill-​24 taqsima taʼ qassisin li qdew wieħed wara l-​ieħor fit-​tempju taʼ Ġerusalemm. (1 Kron. 24:18) L-​IAA tgħid li l-​iskrizzjoni fuq dan l-​ossarju turi li “l-​familja taʼ Kajfa kienet parti mit-​taqsima taʼ Magħżija.”

L-​iskrizzjoni ssemmi wkoll lil Beth ′Imri. Hemm żewġ interpretazzjonijiet taʼ din il-​parti tal-​iskrizzjoni. L-​IAA tgħid li “l-​ewwel possibbiltà hi li Beth ′Imri hu isem taʼ familja taʼ qassisin—ulied ’Immer (Esdra 2:36, 37; Neħemija 7:39-​42) li d-​dixxendenti tagħhom jinkludu membri tat-​taqsima taʼ Magħżija.” “It-​tieni possibbiltà hi [li Beth ′Imri hu] l-​post fejn twieldet Mirjam jew il-​familja kollha tagħha.” Hu x’inhu l-​każ, l-​ossarju taʼ Mirjam jagħti prova li l-​Bibbja titkellem dwar nies u familji li vera eżistew.