“Ħallejtilkom mudell sabiex, bħalma għamiltilkom jien, tagħmlu intom ukoll.”—ĠW. 13:15.

INT KIF TWIEĠEB?

L-​Iben t’Alla kif wera umiltà qabel ma ġie fuq l-​art?

Ġesù kif wera umiltà bħala bniedem?

L-​umiltà taʼ Ġesù liema barkiet ġabet?

1, 2. Matul l-​aħħar lejla tiegħu fuq l-​art, Ġesù liema lezzjoni għallem lill-​appostli tiegħu?

 HIJA l-​aħħar lejla taʼ Ġesù fuq l-​art, u hu jqattagħha mal-​appostli tiegħu fil-​kamra taʼ fuq f’dar f’Ġerusalemm. Matul l-​ikla taʼ filgħaxija, Ġesù jqum u jpoġġi l-​mantar tiegħu fil-​ġenb. Hu jitħażżem b’xugaman, iferraʼ l-​ilma ġo friskatur, u jibda jaħsel saqajn id-​dixxipli u jixxottahomlhom bix-​xugaman. Imbagħad jilbes il-​mantar tiegħu. Ġesù għala għamel dan l-​att umli?—Ġw. 13:3-​5.

² Ġesù nnifsu spjega: “Tafu x’għamiltilkom? . . . Jekk jien, għalkemm Mulej u Għalliem, ħsiltilkom saqajkom, intom ukoll għandkom taħslu saqajn xulxin. Għax ħallejtilkom mudell sabiex, bħalma għamiltilkom jien, tagħmlu intom ukoll.” (Ġw. 13:12-​15) B’dan l-​att umli, Ġesù għallem lill-​appostli tiegħu lezzjoni li kienet se tibqaʼ mnaqqxa f’moħħhom u li iktar tard kienet se tinkuraġġihom biex ikunu umli.

3. (a) F’żewġ okkażjonijiet, Ġesù kif enfasizza l-​importanza tal-​umiltà? (b) X’se niddiskutu f’dan l-​artiklu?

³ Meta Ġesù ħasel saqajn l-​appostli, din ma kinitx l-​ewwel darba li enfasizza l-​valur tal-​umiltà. F’okkażjoni qabel, meta xi appostli wrew spirtu kompetittiv, Ġesù ħa tifel żgħir u qiegħdu maġenbu, u qalilhom: “Kulmin jilqaʼ lil dan it-​tifel f’ismi, jilqaʼ lili wkoll, u kulmin jilqaʼ lili, jilqaʼ wkoll lil dak li bagħatni. Għax min iġib ruħu bħal wieħed mill-​iżgħar fostkom ilkoll, dan ikun il-​kbir.” (Lq. 9:46-​48) Peress li kien jaf li l-​Fariżej kienu jfittxu l-​prominenza, Ġesù iktar tard fil-​ministeru tiegħu qal: “Kulmin jitgħolla jiġi umiljat u min jumilja ruħu jitgħolla.” (Lq. 14:11) Jidher ċar li Ġesù jrid  lis-​segwaċi tiegħu jkunu umli. Ma jridhomx ikunu kburin, jaħsbu li huma iktar importanti minn oħrajn, jew jaġixxu bħallikieku huma aħjar minn oħrajn. Bil-​ħsieb li nimitawh, ejja neżaminaw bir-​reqqa l-​eżempju tiegħu tal-​umiltà. Se naraw ukoll kif ma jibbenefikax biss min juri din il-​kwalità, imma oħrajn ukoll.

“MA DORTX FID-​DIREZZJONI OPPOSTA”

4. Ġesù kif wera umiltà qabel ma ġie fuq l-​art?

⁴ L-​Iben uniġenitu t’Alla wera umiltà anki qabel ma ġie fuq l-​art. Fis-​sema, Ġesù qattaʼ snin bla għadd maʼ Missieru. Il-​ktieb Bibliku taʼ Isaija jikkummenta fuq ir-​relazzjoni mill-​qrib li l-​Iben kellu maʼ Missieru billi jgħid: “Il-​Mulej Sovran Ġeħova tani l-​ilsien taʼ wieħed li ġie mgħallem, sabiex inkun naf kif inwieġeb lill-​għajjien b’kelma. Hu jqajjimni kull fil-​għodu; hu jqajjimli widinti biex nismaʼ bħal wieħed li ġie mgħallem. Il-​Mulej Sovran Ġeħova nnifsu fetaħli widinti, u jien, min-​naħa tiegħi, ma kontx ribelluż. Ma dortx fid-​direzzjoni opposta.” (Is. 50:4, 5) L-​Iben t’Alla wera attitudni umli u qagħad attent ferm għal dak li Ġeħova għallmu. Hu kien ħerqan u lest li jitgħallem mill-​Alla l-​veru. Ġesù żgur li osserva wkoll kif Ġeħova b’umiltà wera ħniena lejn l-​umanità midinba.

5. Fl-​irwol taʼ Mikiel l-​arkanġlu, Ġesù kif ħalla eżempju taʼ umiltà u modestja meta argumenta max-​Xitan?

⁵ Mhux kull ħliqa fis-​sema kellha l-​istess attitudni tal-​Iben uniġenitu t’Alla. Minflok ma xtaq jitgħallem minn Ġeħova, l-​anġlu li sar Satana x-​Xitan tkabbar u beda jħoss li hu iktar importanti minn oħrajn. Dan l-​aġir kien l-​oppost tal-​umiltà u wasslu biex irribella kontra Ġeħova. Min-​naħa l-​oħra, Ġesù la ried iktar awtorità fis-​sema milli tah Alla u lanqas qatt ma ried jużaha ħażin l-​awtorità li kellu. Bħala Mikiel l-​arkanġlu, Ġesù m’abbużax mill-​awtorità tiegħu meta kellu ‘tilwima max-​Xitan dwar il-​ġisem taʼ Mosè.’ Minflok, l-​Iben t’Alla wera umiltà u modestja. Hu kien kuntent li jistenna lil Ġeħova, l-​Imħallef Suprem tal-​univers, biex jieħu ħsieb l-​affarijiet bl-​aħjar mod u fl-​aħjar ħin.—Aqra Ġuda 9.

6. Ġesù kif wera l-​umiltà meta aċċetta l-​inkarigu biex jaqdi bħala l-​Messija?

⁶ L-​affarijiet li Ġesù tgħallem meta kien għadu fis-​sema bla dubju inkludew il-​profeziji li bassru dettalji dwar ħajtu fuq l-​art bħala l-​Messija. B’hekk, hu x’aktarx kien jaf minn qabel li kien hemm jistennewh esperjenzi xejn pjaċevoli. Madankollu, Ġesù aċċetta l-​inkarigu biex jgħix fuq l-​art u jmut bħala l-​Messija mwiegħed. Għala? L-​appostlu Pawlu enfasizza l-​umiltà tal-​Iben uniġenitu t’Alla meta kiteb: “Għalkemm kien jeżisti fis-​sura t’Alla, ma qagħadx jaħseb li għandu jaħtaf, jiġifieri, li għandu jkun ugwali m’Alla. Le, iżda xejjen lilu nnifsu u ħa s-​sura taʼ lsir u sar jixbah lill-​bnedmin.”—Flp. 2:6, 7.

BĦALA BNIEDEM “UMILJA RUĦU”

7, 8. Ġesù b’liema modi wera umiltà fi tfulitu u matul il-​ministeru tiegħu fuq l-​art?

⁷ Pawlu kiteb: “Meta [Ġesù] sab ruħu f’għamla taʼ bniedem, umilja ruħu u sar ubbidjenti sal-​mewt, iva, sal-​mewt fuq zokk tat-​tortura.” (Flp. 2:8) Sa minn tfulitu, Ġesù ħallielna mudell tal-​umiltà. Għalkemm trabba minn ġenituri imperfetti—Ġużeppi u Marija—Ġesù b’umiltà “baqaʼ sottomess lejhom.” (Lq. 2:51) X’eżempju mill-​aħjar hu dan għaċ-​ċkejknin u għaż-​żgħażagħ li se  jiġu mberkin minn Alla talli jkunu lesti jissottomettu ruħhom lejn il-​ġenituri tagħhom!

⁸ Bħala adult, Ġesù wera umiltà billi għamel ir-​rieda t’Alla l-​iktar ħaġa importanti f’ħajtu. (Ġw. 4:34) Matul il-​ministeru tiegħu, Ġesù Kristu uża l-​isem persunali t’Alla u għen lil nies sinċieri jiksbu għarfien eżatt dwar l-​attributi taʼ Ġeħova u l-​iskop Tiegħu għall-​umanità. Ġesù wkoll għex fi qbil maʼ dak li għallem dwar Ġeħova. Pereżempju, fit-​talba mudell, l-​ewwel punt li Ġesù semma kien: “Missierna fis-​smewwiet, ħa jitqaddes ismek.” (Mt. 6:9) Hawnhekk Ġesù wera lid-​dixxipli tiegħu li l-​prijorità tagħhom kellha tkun li jigglorifikaw isem Ġeħova. Hu nnifsu għamel hekk. Lejn tmiem il-​ministeru tiegħu fuq l-​art, Ġesù setaʼ jgħid fit-​talb lil Ġeħova: “Għarrafthom ismek [lill-​appostli] u nibqaʼ ngħarrfu.” (Ġw. 17:26) Iktar minn hekk, matul il-​ministeru tiegħu, Ġesù ta l-​krettu lil Ġeħova għal dak li kien wettaq fuq l-​art.—Ġw. 5:19.

9. Żakkarija xi pprofetizza rigward il-​Messija, u Ġesù kif wettaq dan?

⁹ Rigward il-​Messija, Żakkarija pprofetizza: “Kun ferħana ferm, O bint Sijon. Għajjat bil-​ferħ taʼ rebħa, O bint Ġerusalemm. Ara! Is-​sultan tiegħek jiġi għandek. Hu ġust, iva, salvat; umli, u riekeb fuq ħmar, saħansitra fuq wild taʼ ħmara.” (Żak. 9:9) Dan twettaq meta Ġesù daħal Ġerusalemm qabel il-​Qbiż tas-​sena 33 E.K. In-​nies firxu l-​imnatar tagħhom kif ukoll friegħi tas-​siġar fit-​triq. Tabilħaqq, kien hemm għagħa kbira mad-​dħul tiegħu fil-​belt. Anki meta n-​nies faħħruh bħala s-​Sultan tagħhom, Ġesù kien umli.—Mt. 21:4-​11.

10. Ġesù x’wera billi baqaʼ ubbidjenti sal-​mewt?

¹⁰ Waqt li kien fuq l-​art, Ġesù Kristu wera li kien umli u ubbidjenti sal-​mewt fuq zokk tat-​tortura.  B’hekk, hu wera mingħajr ebda dubju li l-​bnedmin jistgħu jibqgħu leali lejn Ġeħova saħansitra meta jiffaċċjaw sitwazzjonijiet estremament diffiċli. Ġesù wera wkoll li Satana kien żbaljat meta sostna li l-​bnedmin jaqdu lil Ġeħova għal raġunijiet egoistiċi. (Ġob 1:9-​11; 2:4) Minħabba li obda lil Missieru b’mod perfett, Kristu ddefenda d-​dritt taʼ Ġeħova li jaħkem u wera li kellu fiduċja li l-​mod li bih jaħkem Ġeħova hu l-​aħjar. Ċertament li Ġeħova feraħ meta osserva l-​lealtà perfetta tal-​Iben umli tiegħu.—Aqra Proverbji 27:11.

11. Is-​sagrifiċċju taʼ Ġesù x’għamel possibbli għal dawk li għandhom fidi fih?

¹¹ Permezz tal-​mewt taʼ Ġesù fuq zokk tat-​tortura hu possibbli li n-​nies isalvaw mid-​dnub u l-​mewt. (Mt. 20:28) Bis-​sagrifiċċju taʼ Ġesù, Ġeħova jistaʼ jaħfer id-​dnubiet tagħna skont il-​ħtiġijiet ġusti tiegħu u jagħti opportunità lill-​bnedmin biex jgħixu għal dejjem. Pawlu kiteb: “B’att wieħed taʼ ġustifikazzjoni r-​riżultat għall-​bnedmin taʼ kull xorta hu li jiġu dikjarati ġusti għall-​ħajja.” (Rum. 5:18) Il-​mewt taʼ Ġesù għamlitha possibbli biex dawk midlukin bl-​ispirtu qaddis jgħixu għal dejjem fis-​sema u n-​“nagħaġ oħrajn” jgħixu għal dejjem fuq l-​art.—Ġw. 10:16; Rum. 8:16, 17.

JIEN “UMLI F’QALBI”

12. Meta ttratta maʼ bnedmin imperfetti, Ġesù kif wera ħlewwa u umiltà?

¹² Ġesù stieden lil dawk kollha li huma “mħabbtin u mgħobbijin” biex imorru għandu. Hu qal: “Ħudu l-​madmad tiegħi fuqkom u tgħallmu minni, għax jien ġwejjed u umli f’qalbi, u intom issibu serħan għal ruħkom.” (Mt. 11:28, 29) L-​umiltà u l-​ħlewwa taʼ Ġesù qanqluh jittratta mal-​bnedmin imperfetti b’qalb tajba u b’mod imparzjali. Hu kien raġunevoli f’dak li kien jistenna mid-​dixxipli tiegħu. Ġesù faħħarhom u inkuraġġiehom. Ma ġegħelhomx iħossuhom li mhumiex kapaċi jew mhumiex tajbin biżżejjed. Żgur li Ġesù ma kienx aħrax jew oppressiv. Għall-​kuntrarju, hu żgura lis-​segwaċi tiegħu li jekk jitgħallmu minnu u japplikaw it-​tagħlim tiegħu kienu se jsibu serħan, għax il-​madmad tiegħu kien ħelu u t-​tagħbija tiegħu kienet ħafifa. Nisa u rġiel taʼ kull età kienu jħossuhom komdi fil-​preżenza tiegħu.—Mt. 11:30.

13. Ġesù kif wera ħniena maʼ dawk li kellhom ħajja diffiċli?

¹³ Ġesù ddispjaċieh għal dawk f’Iżrael li kellhom ħajja diffiċli u għamel kulma setaʼ biex jgħinhom. Qrib Ġeriko, hu ltaqaʼ maʼ żewġt irġiel għomja, Bartimew u sieħbu. It-​tnejn li huma baqgħu jitolbu lil Ġesù għall-​għajnuna, imma  n-​nies madwarhom bdew isikktuhom. Ġesù setaʼ faċilment jinjorahom lil dawn l-​irġiel għomja, imma m’għamilx hekk. Minflok, Ġesù talab li jġibuhomlu, u mqanqal mill-​ħniena, tahom lura d-​dawl. Iva, Ġesù imita lil Missieru, Ġeħova, billi wera umiltà u ħniena lejn bnedmin midinbin.—Mt. 20:29-​34; Mk. 10:46-​52.

“KULMIN JUMILJA RUĦU JITGĦOLLA”

14. L-​umiltà taʼ Ġesù liema barkiet ġabet?

¹⁴ L-​attitudni umli taʼ Ġesù Kristu ġabet ferħ u barkiet lil ħafna. Ġeħova feraħ meta ra lil Ibnu l-​maħbub jissottometti ruħu b’umiltà għar-​rieda divina. L-​appostli u d-​dixxipli ġew imfarrġin u inkuraġġiti bil-​mod ġwejjed u umli li bih Ġesù ttrattahom. Billi għallimhom, faħħarhom, u kien taʼ eżempju tajjeb għalihom, hu għenhom isiru qaddejja aħjar t’Alla. Ġesù għen lil nies oħrajn billi għallimhom, inkuraġġiehom, u tahom dak li kellhom bżonn. Infatti, permezz tas-​sagrifiċċju taʼ Ġesù, il-​bnedmin kollha li jeżerċitaw fidi fih se jkollhom barkiet għall-​eternità kollha.

15. Ġesù kif ibbenefika billi kien umli?

¹⁵ Xi ngħidu għal Ġesù? Ibbenefika hu talli kien umli? Iva, għax Ġesù qal lid-​dixxipli tiegħu: “Kulmin jumilja ruħu jitgħolla.” (Mt. 23:12) Pawlu spjega li dan hu eżattament dak li ġara fil-​każ taʼ Ġesù. Pawlu qal: “Alla eżaltah [lil Ġesù] għal pożizzjoni superjuri u b’qalb tajba tah l-​isem li hu fuq kull isem ieħor, sabiex f’isem Ġesù tintlewa kull irkoppa fis-​sema, fuq l-​art, u taħt l-​art, u kull ilsien jistqarr quddiem kulħadd li Ġesù Kristu hu Mulej għall-​glorja t’Alla l-​Missier.” Minħabba li Ġesù wera umiltà u fedeltà waqt li kien fuq l-​art, Alla Ġeħova eżalta lil Ibnu billi tah awtorità fuq il-​ħlejjaq fis-​sema u fuq l-​art.—Flp. 2:9-​11.

ĠESÙ SE ‘JIRKEB GĦALL-​KAWŻA TAL-​VERITÀ U L-​UMILTÀ’

16. L-​Iben t’Alla kif se jkompli juri umiltà fil-​futur?

¹⁶ L-​Iben t’Alla se jkompli juri umiltà fil-​futur. Meta bassar dwar kif Ġesù, bħala Sultan fis-​sema, se jaġixxi kontra l-​għedewwa Tiegħu, is-​salmista kanta: “Fil-​glorja tiegħek mur u rnexxi; irkeb għall-​kawża tal-​verità, l-​umiltà, u s-​sewwa.” (Salm 45:4) F’Armageddon, Ġesù Kristu se jiġġieled biex jiddefendi lil dawk li huma umli u sewwa u li jħobbu l-​verità. U x’se jiġri fi tmiem ir-​Renju tiegħu taʼ Elf Sena meta s-​Sultan Messjaniku ‘jġib fix-​xejn kull gvern u kull awtorità u qawwa’? Se juri umiltà? Iva, għax hu se “jgħaddi s-​saltna lil Alla tiegħu u Missieru.”—Aqra l-​1 Korintin 15:24-​28.

17, 18. (a) Għala hu importanti li l-​qaddejja taʼ Ġeħova jsegwu l-​eżempju tal-​umiltà taʼ Ġesù? (b) X’se niddiskutu fl-​artiklu li jmiss?

¹⁷ Xi ngħidu għalina? Se nimitaw l-​eżempju taʼ Ġesù u nuru umiltà? F’Armageddon, is-​Sultan Ġesù Kristu se jsalva biss lil dawk li huma umli u sewwa. Għalhekk jeħtieġ li nkunu umli jekk irridu nibqgħu ħajjin. Ukoll, jekk nuru umiltà se jkun hemm ħafna benefiċċji għalina u għal ħaddieħor, sewwasew bħalma kien hemm għal Ġesù.

¹⁸ X’jistaʼ jgħinna nsegwu l-​eżempju tal-​umiltà taʼ Ġesù? Kif nistgħu nistinkaw biex inkunu umli minkejja l-​isfidi li għandna mnejn inħabbtu wiċċna magħhom? Se nikkunsidraw dawn il-​mistoqsijiet fl-​artiklu li jmiss.

[Mistoqsijiet ta’ Studju]

[Stampi f’paġna 12]

Kif nistgħu nibbenefikaw mill-​eżempju tal-​umiltà taʼ Ġesù?

[Stampa f’paġna 13]

Għandna nimitaw il-​mod kif Ġesù wera ħniena