Qrajt bir-​reqqa l-​ħarġiet reċenti taʼ It-​Torri tal-​Għassa? Ara jekk tistax twieġeb il-​mistoqsijiet li ġejjin:

• X’ried ifisser Alla meta qal lit-​tribù taʼ Levi: “Jien is-​sehem tiegħek”?

Kull wieħed mit-​tribujiet l-​oħra taʼ Iżrael irċieva art bħala wirt imma l-​Leviti kellhom lil Ġeħova bħala “s-​sehem” tagħhom. (Num. 18:20) Ma kinux se jirċievu art bħala wirt, imma ngħataw privileġġ speċjali taʼ servizz. Xorta waħda, Ġeħova kien se jieħu ħsieb il-​bżonnijiet bażiċi tagħhom. Illum dawk li għandhom il-​privileġġ li jkabbru l-​interessi tas-​Saltna jistgħu jkunu fiduċjużi li l-​bżonnijiet tal-​ħajja tagħhom se jkunu provduti.—9/15, paġni 7-​8, 13.

• X’jistaʼ jgħin lil Kristjan jiddeċiedi jekk xi tip taʼ rikreazzjoni hix taʼ benefiċċju jew le?

Biex jiddetermina jekk xi tip taʼ rikreazzjoni tkunx taʼ benefiċċju u togħġobx lil Alla, ikun tajjeb li jistaqsi: X’inhu dak li tinkludi? Meta se nfittixha? Min se jkunu l-​ħbieb tiegħi f’din ir-​rikreazzjoni?—10/15, paġni 9-​12.

• X’jistaʼ jgħin lil koppja jiddiskutu kwistjonijiet li jistgħu jġibu l-​firda?

Tkellmu dwarhom meta t-​tnejn li intom tkunu kalmi u rilassati. Xi ngħidu jekk żewġek jew martek iżżomm lura biex titkellem? Kun af li “l-​ħsieb f’qalb il-​bniedem hu bħal ilmijiet fondi, imma min għandu d-​dixxerniment se jtellgħu.” (Prov. 20:5) Jekk ittellaʼ barmil ilma minn bir b’għaġla żejda titlef ħafna ilma. Bl-​istess mod, jekk int tkellem lil żewġek b’saħħa żejda, hu għandu mnejn ikun irid jiddefendi ruħu u l-​opportunità biex tgħinu jiftaħ qalbu tistaʼ tintilef. Minflok, staqsi b’ġentilezza u b’rispett, u kun paċenzjuża jekk żewġek ma jesprimix ruħu malajr daqs kemm tixtiequ int.—10/1, paġni 10-​12.

• X’nistgħu nitgħallmu minn Salm 78?

Dan is-​Salm jaċċertana li Ġeħova għandu rabta soda mal-​aduraturi tiegħu u ma jaqtax qalbu minnhom malajr. Fl-​istess ħin, meta nikkunsidraw li Ġeħova għandu sentimenti u li l-​kondotta tagħna tistaʼ teffettwa s-​sentimenti tiegħu, iġegħelna naħsbu.—10/1, paġna 13.

• X’nistgħu nitgħallmu minn Elija meta kien qalbu maqtugħa?

F’ħin minnhom Elija ħassu mhu tajjeb għal xejn u għajjat: “Biżżejjed!” X’jiswa li jibqaʼ jgħix? B’mod simili, għadd taʼ rġiel u nisa leali msemmijin f’rakkonti Bibliċi huma deskritti bħala li tant ħassewhom imdejqin li xtaqu jmutu—fosthom Rebekka, Ġakobb, Mosè, u Ġob. Illum ngħixu fi “żminijiet kritiċi li diffiċli biex issib tarfhom,” għalhekk ma nissorprendux ruħna li ħafna nies, saħansitra qaddejja leali t’Alla, ikunu qalbhom sewda xi kultant. (2 Tim. 3:1) Jekk qatt issib lilek innifsek f’sitwazzjoni kerha bħal din, segwi l-​eżempju t’Elija f’dan ir-​rigward: Iftaħ qalbek m’Alla. Wara kollox, Ġeħova huwa “l-​Alla taʼ kull faraġ.” (2 Kor. 1:3)—10/1, paġni 18-​21.

• Ir-​rakkont fi Proverbji 7:6-​23 kif jgħinna nevitaw li naraw il-​pornografija?

Din is-​silta tirrakkonta dwar żagħżugħ li mexa fi triq fejn kien jaf li kienet tgħix mara immorali. Hi stiednet liż-​żagħżugħ f’darha. Hu ma setax jirreżisti t-​tentazzjoni, u mar warajha. Illum nagħmlu tajjeb li nevitaw siti tal-​Internet fejn nafu li hemm vidjos jew stampi sesswali, u għandna bżonn nitolbu għall-​għajnuna t’Alla saħansitra qabel ma niltaqgħu maʼ stampi bħal dawn fuq l-​Internet.—11/15, paġni 9-​10.