Hemm xi tama taʼ rxoxt għal tarbija li tmut f’ġuf ommha?

Għal dawk li qatt ma sofrew l-​uġigħ minħabba t-​telfa taʼ tarbija b’dan il-​mod, jistaʼ jkun diffiċli biex jifhmu s-​sentimenti taʼ dawk li ġralhom hekk. Ċerti ġenituri jitnikktu b’mod profond minħabba li jġarrbu telfa bħal din. Waħda omm tilfet ħamest itfal qabel ma twieldu. Maż-​żmien, hi ħassitha mbierka li rabbiet żewġ subien b’saħħithom. Madankollu, hi baqgħet tiftakar l-​esperjenza taʼ kull tarbija li tilfet. Sa ma mietet, hi kienet taf eżatt kemm kieku kellha żmien kull waħda mit-​trabi tagħha li twieldu mejtin jew li korriethom kieku baqgħu ħajjin. Hemm xi bażi biex dawn il-​Kristjani jittamaw li l-​irxoxt se jġib lura lit-​trabi li tilfu?

It-tweġiba sempliċi għal din il-​mistoqsija hi li ma nafux. Il-​Bibbja qatt ma titkellem b’mod dirett fuq il-​kwistjoni taʼ l-​irxoxt tat-​trabi li jitwieldu mejtin jew li jintilfu minħabba korriment. Minkejja dan, il-​Kelma t’Alla fiha prinċipji li huma rilevanti għal din il-​mistoqsija u li għandhom mnejn joffru xi ftit tal-​faraġ.

Ejja nikkunsidraw żewġ mistoqsijiet relatati mas-​suġġett. L-​ewwel, mill-​ħarsa taʼ Ġeħova, il-​ħajja umana meta tibda—fil-​konċepiment jew fit-​twelid? It-​tieni, Ġeħova kif iqis lil dawk li għadhom ma twildux—bħala individwi uniċi jew bħala sempliċement gruppi taʼ ċelluli u tessut fil-​ġuf taʼ mara? Il-​prinċipji Bibliċi jagħtu tweġibiet ċari għal dawn iż-​żewġ mistoqsijiet.

Il-Liġi Mosajka rrivelat b’mod ċar li l-​ħajja ma tibdiex fit-​twelid, imma ħafna iktar qabel. Kif? Uriet li jekk xi ħadd joqtol fetus setaʼ jingħata l-​mewt. Innota x’tgħid din il-​liġi: “Trid tagħti ruħ b’ruħ.” a (Eżo. 21:22, 23) B’hekk, it-​tarbija fil-​ġuf li tkun għadha ma twilditx hija ħajja u hi ruħ ħajja. Minħabba li fehmu dan il-​fatt, miljuni taʼ Kristjani ġew megħjunin biex assolutament jirrifjutaw l-​abort, billi jarawh bħala dnub serju kontra Alla.

M’għandniex xi ngħidu, it-​tarbija li għadha ma twilditx hija ħajja, imma Ġeħova kemm iqisha taʼ valur dik il-​ħajja? Il-​liġi kwotata hawn fuq kienet tesiġi li adult jingħata l-​mewt talli jkun ikkaġuna l-​mewt taʼ tarbija li tkun għadha ma twilditx. Mela jidher ċar li l-​ħajja taʼ tarbija li tkun għadha ma twilditx għandha valur kbir f’għajnejn Alla. Iżjed minn hekk, ħafna skritturi oħrajn fil-​Bibbja juru li Ġeħova jara lit-​trabi li jkunu għadhom ma twildux bħala individwi distinti. Per eżempju, is-​Sultan David kien ispirat biex jgħid dwar Ġeħova: “Żammejtni mistur f’żaqq ommi. . . . Għajnejk rawni meta kont għadni biss embriju, u fil-​ktieb tiegħek inkitbu l-​partijiet kollha tiegħi, dwar iż-​żmien meta ġew ifformati.”—Salm 139:13-16; Ġob 31:14, 15.

Ġeħova jara wkoll li t-​tarbija li tkun għadha ma twilditx għandha karatteristiki distinti u li jistaʼ jkollha potenzjal kbir fil-​futur. Waqt li Rebekka, mart Iżakk, kienet tqila bit-​tewmin, Ġeħova lissen profezija dwar iż-​żewġ subien li kienu qed jissieltu f’ġufha, u wera li kien diġà ra karatteristiki fihom li fil-​futur kien se jkollhom effett kbir fuq ħafna nies.—Ġen. 25:22, 23; Rum. 9:10-13.

Il-każ taʼ Ġwanni l-​Għammied huwa interessanti wkoll. Ir-​rakkont taʼ l-​Evanġelju jgħid: “Malli Eliżabetta semgħet it-​tislima taʼ Marija, it-​tarbija f’ġufha qabżet; u Eliżabetta mtliet bl-​ispirtu qaddis.” (Lq. 1:41) Meta ddeskriva dan ir-​rakkont, it-​tabib Luqa uża kelma Griega li setgħet tirreferi kemm għal fetus u kemm għal tarbija li tkun twieldet. Hu uża l-​istess kelma meta rrefera għat-​tarbija Ġesù mimdud fil-​maxtura.—Lq. 2:12, 16; 18:15.

Meta nikkunsidraw dawn il-​fatturi u l-​iskritturi kollha, tagħmel il-​Bibbja distinzjoni bejn tarbija  fil-​ġuf u waħda li tkun ħadet l-​ewwel nifs tagħha? Ma jidhirx li hu l-​każ. U dan jaqbel maʼ l-​iskoperti tax-​xjenza moderna. Per eżempju, ir-​riċerkaturi skoprew li tarbija fil-​ġuf kapaċi tħoss u tirreaġixxi għal dak li jiġri barra l-​ġuf. B’hekk, m’huwiex sorprendenti li omm li tkun tqila tiżviluppa rabta mill-​qrib mat-​tarbija li tkun qed tikber ġo fiha.

Mhux kull tarbija tieħu l-​istess tul taʼ żmien biex tikber fil-​ġuf. Ikkunsidra dan l-​eżempju: Waħda omm tiled tarbija ħajja qabel iż-​żmien, li tmut ftit jiem wara. Omm oħra ġġorr it-​tarbija tagħha sa l-​aħħar, imma t-​tarbija tmut eżatt qabel titwieled. Hija l-​ewwel omm imbierka bit-​tama li t-​tarbija tagħha se tiġi rxoxtata sempliċement minħabba li t-​tarbija inzertat twieldet qabel iż-​żmien, fil-​waqt li t-​tieni omm m’għandhiex din it-​tama?

Mela, bħala sommarju, il-​Bibbja tgħallem b’mod ċar li l-​ħajja tibda fil-​konċepiment u li Ġeħova jara lit-​tarbija li tkun għadha ma twilditx bħala individwa unika li għandha valur. Minħabba dawn il-​veritajiet Skritturali, xi wħud għandhom mnejn jirraġunaw li ma jkunx jaqbel mal-​veritajiet li tgħallem il-​Bibbja jekk wieħed jirraġuna li m’hemm ebda tama taʼ rxoxt għal tarbija li tkun għadha ma twilditx u li tkun mietet. Tabilħaqq, huma għandhom mnejn iħossu li rraġunar bħal dan iqajjem dubju dwar il-​waqfa Skritturali tagħna kontra l-​abort, li hija bbażata prinċipalment fuq dawn l-​istess veritajiet.

Fil-passat, din ir-​rivista qajmet mistoqsijiet prattiċi li jidhru li jqajmu dubju dwar il-​possibbiltà taʼ rxoxt għal tfal li mietu qabel it-​twelid. Per eżempju, se jpoġġi Alla embriju li jkun għadu ma żviluppax għalkollox f’ġuf mara fil-​Ġenna taʼ l-​art? Madankollu, iktar studju u meditazzjoni bit-​talb wasslu lill-​Ġemgħa li Tiggverna biex tikkonkludi li fatturi bħal dawn m’humiex se jeffettwaw it-​tama taʼ l-​irxoxt. Ġesù qal: “Kollox hu possibbli għal Alla.” (Mk. 10:27) L-​esperjenza taʼ Ġesù wriet il-​verità taʼ din l-​istqarrija; ħajtu ġiet trasferita mis-​sema għal ġo ġuf taʼ tfajla verġni—żgur li din hija xi ħaġa impossibbli għall-​aħħar min-​naħa tal-​bniedem.

Mela jfisser dan kollu li l-​Bibbja tgħallem li t-​tfal li jmutu qabel ma jitwieldu se jiġu rxoxtati? Irridu nenfasizzaw li l-​Bibbja ma tagħtix tweġiba diretta għal din il-​mistoqsija, u għalhekk m’hemm ebda bażi biex il-​bnedmin ikunu dommatiċi dwar din il-​kwistjoni. Dan is-​suġġett jistaʼ jqajjem mistoqsijiet bla għadd. Biss, l-​aħjar ħaġa hi li nevitaw li nispekulaw. Dak li nafu hu dan: Il-​kwistjoni qiegħda f’idejn Alla Ġeħova, li hu għani fil-​qalb tajba bl-​imħabba u l-​ħniena. (Salm 86:15) Mingħajr dubju taʼ xejn, hija x-​xewqa mill-​qalb tiegħu li jneħħi l-​effetti tal-​mewt permezz taʼ l-​irxoxt. (Ġob 14:14, 15) Nistgħu nkunu fiduċjużi li hu dejjem jagħmel dak li hu sewwa. Hu se jipprovdi fejqan għall-​ħafna weġgħat li jiġu fuqna mill-​ħajja f’din is-​sistema mill-​agħar hekk kif bi mħabba jidderieġi lil Ibnu biex “ikisser l-​għemejjel tax-​Xitan.”—1 Ġw. 3:8.

[Nota taʼ taħt]

[Stampa f’paġna 13]

Ġeħova se jipprovdi fejqan għall-​esperjenzi kollha taʼ wġigħ