Kif Xi Wħud Ħadu t-​Tweġibiet

MILJUNI taʼ nies jitolbu. Xi wħud huma konvinti li t-​talb tagħhom jitwieġeb. Oħrajn jitħassbu dwar jekk it-​talb tagħhom qattx jiġi mismugħ. U hemm oħrajn li jfittxu t-​tweġibiet imma qatt ma jgħaddilhom minn rashom li jippreżentaw ix-​xewqat tagħhom lil Alla bit-​talb.

Il-Bibbja tidentifika lill-​Alla veru bħala Semmiegħ it-​talb. (Salm 65:3 [65:​2, NW]) Jekk titlob, int ċert li t-​talb tiegħek huwa indirizzat lill-​Alla veru? Huwa t-​talb tiegħek tat-​tip li hu se jwieġeb?

Ħafna nies madwar id-​dinja għandhom għalxiex iwieġbu iva! Kif ħadu t-​tweġibiet? X’tgħallmu?

Alla—Min Hu?

Fil-​Portugall, għalliema taʼ l-​iskola li ġiet mgħallma mis-​sorijiet u l-​qassisin ipprattikat ir-​reliġjon tagħha bis-​sinċerità. Din il-​mara tħawdet meta rat li l-​knisja nbidlet u ma baqgħetx tipprattika l-​affarijiet importanti li ġiet mgħallma. Meta vvjaġġat lejn pajjiżi oħra, saret taf b’modi taʼ qima mill-​Orjent, u bdiet titħasseb dwar jekk kienx hemm verament Alla wieħed li hu veru. Kif għandha tagħti qima? Meta staqsiet lill-​qassis tagħha dwar xi affarijiet li hemm fil-​Bibbja, hu injoraha u hi baqgħet diżappuntata.

Il-knisja Kattolika kienet qassmet fuljett fil-​belt taʼ din l-​għalliema li kien iwissi lill-​parruċċani biex ma jkellmux lix-​Xhieda taʼ Jehovah. Imma xorta kellha l-​mistoqsijiet. Darba waħda, meta x-​Xhieda ħabbtulha fuq il-​bieb, hi semgħethom u wriet interess f’dak li qalu. Kienet l-​ewwel darba li kellmithom.

Biex tikseb it-​tweġibiet għall-​ħafna mistoqsijiet li kellha, din il-​mara bdiet tistudja l-​Bibbja max-​Xhieda taʼ Jehovah. Kull ġimgħa kien ikollha lista twila taʼ mistoqsijiet lesta għalihom. Riedet tkun taf l-​isem t’Alla, jekk hemmx Alla wieħed biss li hu veru, jekk japprovax l-​użu tax-​xbihat fil-​qima, u ħafna iktar. Hi nnotat li t-​tweġibiet kollha li ħadet kienu mill-​Bibbja, mhux opinjonijiet persunali, allura baqgħet mistagħġba u ħassitha kuntenta ħafna b’dak li  kienet qed titgħallem. Ftit ftit, hi ħadet it-​tweġibiet għall-​ħafna mistoqsijiet li kellha. Illum, hi qed tqim lil Jehovah bl-​ispirtu u l-​verità, kif Ġesù Kristu qal li kellhom jagħmlu “dawk li jqimu fis-​sewwa.”—Ġwanni 4:​23, Saydon.

Il-​membri taʼ familja fi Sri Lanka kienu spiss jaqraw il-​Bibbja flimkien, imma ma kinux qed jieħdu t-​tweġibiet għall-​ħafna mistoqsijiet li kienu importanti għalihom. Għalkemm kellhom bżonn l-​għajnuna, il-​qassis tagħhom ma setax jagħtihielhom. Madankollu, ix-​Xhieda taʼ Jehovah żaru lil din il-​familja u ħallewlhom il-​letteratura mill-​Bibbja li kienet se tgħinhom. Iktar tard, meta x-​Xhieda taʼ Jehovah tawhom tweġibiet sodisfaċenti għall-​mistoqsijiet li kellhom mill-​Bibbja, huma aċċettaw li jkollhom studju tal-​Bibbja. Dak li tgħallmu fl-​istudji tagħhom interessahom ħafna.

Minkejja dan, minħabba dak li l-​mara tgħallmet fil-​knisja meta kienet għadha żgħira, hi ma setgħetx taċċetta l-​fatt li Missier Ġesù Kristu hu l-​uniku Alla veru, bħalma qal Ġesù stess. (Ġwann 17:​1, 3) Hi ġiet mgħallma li Ġesù hu daqs il-​Missier u li dan il-​“misteru” m’għandux jiġi dubitat. Bis-​sinċerità kollha u minħabba li ma felħitx iktar, hi talbet lil Jehovah, billi użat ismu, u staqsietu biex juriha min hu Ġesù. Imbagħad, reġgħet eżaminat bir-​reqqa l-​iskritturi li għandhom x’jaqsmu mas-​suġġett. (Ġwann 14:28; 17:21; 1 Korintin 8:​5, 6) Bħallikieku tneħħielha velu minn quddiem għajnejha, issa setgħet tara ċar u tond li Jehovah—il-​Ħallieq tas-​sema u l-​art u Missier Ġesù Kristu—hu l-​Alla veru.—Isaija 42:8; Ġeremija 10:​10-12.

Is-​Sofferenza—Għala?

Ir-​raġel Ġob għadda minn tbatija estrema. Uliedu kollha nqatlu f’maltempata, u hu tilef ġidu kollu biex spiċċa fil-​faqar. Kif ukoll, hu sofra minn marda taʼ wġigħ kbir u ssaporta l-​pressjoni li għamlulu xi ħbieb foloz. Meta kien għaddej minn dan kollu, Ġob qal xi kliem bl-​addoċċ. (Ġob 6:3) Imma Alla kkunsidra s-​sitwazzjoni li kien jinsab fiha. (Ġob 35:15) Hu kien jaf x’kien hemm f’qalb Ġob u għalhekk ipprovdielu l-​parir li kellu bżonn. Hu jagħmel l-​istess man-​nies taʼ llum ukoll.

Fil-​Możambik, Castro kellu biss għaxar snin meta mietet ommu. Din il-​ġrajja ħallietu mkisser. “Għala kellha tmut u tħallina?” hu staqsa. Għalkemm trabba minn ġenituri li jibżgħu minn Alla, issa beda jħossu mħawwad. X’setaʼ jserraħlu moħħu u jfarraġlu qalbu? Hu sab il-​faraġ meta qara Bibbja żgħira biċ-​Ċiċewan u ddiskutieha maʼ ħutu l-​kbar.

Maż-żmien, Castro beda jifhem għala ommu mietet, mhux minħabba xi inġustizzja minn Alla, imma minħabba l-​imperfezzjoni li nirtu. (Rumani 5:12; 6:23) Il-​wegħda taʼ l-​irxoxt li tinsab fil-​Bibbja tatu l-​akbar faraġ għaliex ipprovdietlu bażi biex ikollu fiduċja li kien se jerġaʼ jara lil ommu. (Ġwann 5:​28, 29; Atti 24:15) B’sogħba kbira, wara biss erbaʼ snin miet missieru. Imma din id-​darba Castro setaʼ jkampa aħjar maʼ din it-​telfa. Illum, hu jħobb lil Jehovah u qed juża ħajtu b’mod leali fis-​servizz t’Alla. Kulmin jafu jistaʼ jara biċ-​ċar il-​ferħ li sab.

Ħafna nies li tilfu lill-​maħbubin tagħhom fil-​mewt isibu l-​faraġ fl-​istess veritajiet Bibliċi li farrġu lil Castro. Xi wħud li għaddew minn tbatijiet kbar minħabba l-​azzjonijiet taʼ nies mill-​agħar jistaqsu l-​istess mistoqsija taʼ Ġob, li qal: “L-​għala l-​ħżiena ħajjithom twila?” (Ġob 21:7) Meta l-​bnedmin jisimgħu verament dak li Alla jgħid permezz tal-​Kelma tiegħu, huma jitgħallmu li l-​mod kif Alla jmexxi l-​affarijiet huwa taʼ benefiċċju għalihom.—2 Pietru 3:9.

Barbara, li trabbiet fl-​Istati Uniti, m’esperjenzatx personalment l-​orruri tal-​gwerra. Imma trabbiet f’dinja mimlija gwerer. Rapporti taʼ l-​atroċitajiet tal-​gwerra kienet tismagħhom fuq l-​aħbarijiet kuljum. Waqt li kienet qed tistudja l-​iskola, hi ħassitha mħawda minħabba l-​ġrajjiet fl-​istorja li żviluppaw b’mod li ma tistax tobsor. Għaliex seħħew dawn l-​affarijiet? Kien Alla jimpurtah minn dak li kien qed jiġri? Hi kienet temmen li Alla jeżisti, imma ma kinitx taf x’taqbad temmen dwaru.

 Madankollu, il-​ħarsa taʼ Barbara lejn il-​ħajja bdiet tinbidel meta bdiet tassoċja max-​Xhieda taʼ Jehovah. Qagħdet tismagħhom u studjat il-​Bibbja magħhom. Bdiet tattendi l-​laqgħat fis-​Sala tas-​Saltna. Attendiet ukoll għal waħda mill-​konvenzjonijiet kbar li jagħmlu. Iktar minn hekk, meta kienet tistaqsi xi mistoqsija, hi indunat li x-​Xhieda ma kinux qed jagħtu opinjonijiet differenti. Minflok, huma jaqblu f’dak li jgħidu għax il-​ħsieb tagħhom huwa bbażat fuq il-​Bibbja.

Ix-Xhieda wrewha l-​evidenza mill-​Bibbja li d-​dinja hi influwenzata minn Satana x-​Xitan, il-​ħakkiem tad-​dinja, u li din tirrifletti l-​ispirtu tiegħu. (Ġwann 14:30; 2 Korintin 4:4; Efesin 2:​1-3; 1 Ġwann 5:19) Huma spjegawlha li l-​ġrajjiet li kienu qed iħawduha kienu mbassrin fil-​Bibbja. (Danjel, kapitli 2, 7, u 8) Alla bassarhom minħabba li għandu l-​abbiltà li jara fil-​futur meta jkun irid. Hu kkaġuna li jseħħu ftit minn dawk il-​ġrajjiet. L-​oħrajn sempliċement ippermettiehom iseħħu. Ix-​Xhieda wrew lil Barbara li l-​Bibbja tbassar ukoll kemm il-​ġrajjiet tajbin taʼ żmienna kif ukoll il-​ħżiena u tispjega xi jfissru. (Mattew 24:​3-14) Urewha xi twiegħed il-​Bibbja dwar id-​dinja ġdida li se tkun mimlija bis-​sewwa u s-​sofferenza se tkun spiċċat.—2 Pietru 3:13; Apokalissi 21:​3, 4.

Maż-żmien, Barbara bdiet tifhem li Alla Jehovah m’huwiex responsabbli għas-​sofferenzi tal-​bnedmin. Biss, hu ma jipprovax jevitalhom it-​tbatija billi jġagħlhom jobdu l-​kmandamenti tiegħu meta huma jiddeċiedu li ma jobdux. (Dewteronomju 30:​19, 20) Alla pprovda mezz li bih nistgħu ngħixu ferħanin għal dejjem, imma hu qed jagħtina l-​opportunità issa biex nuru jekk hux se ngħixu fi qbil mat-​triqat sewwa tiegħu. (Apokalissi 14:​6, 7) Barbara ddeċidiet li titgħallem x’jirrikjedi Alla minnha u li tgħix fi qbil maʼ dan. Ukoll, fost ix-​Xhieda taʼ Jehovah hi sabet l-​imħabba li Ġesù qal li kienet se tidentifika lis-​segwaċi veri tiegħu.—Ġwann 13:​34, 35.

Inti wkoll tistaʼ tibbenefika mill-​provvedimenti li għenu lilha.

Ħajja Sinifikanti

Anki dawk li ħajjithom tidher li qed tirnexxi jistgħu jkunu qed ifittxu t-​tweġibiet għall-​mistoqsijiet li jħawduhom. Per eżempju, Matthew, raġel żagħżugħ mill-​Britannja, minn dejjem kellu xewqa kbira li jsib lill-​Alla veru u l-​iskop tal-​ħajja. Missieru miet meta Matthew kellu 17-il sena. Wara dan, Matthew ħa lawrja mill-​università fil-​mużika. Imbagħad, hu beda jirrealizza iktar minn qatt qabel kemm kienet bla skop il-​ħajja mimlija materjaliżmu li kien qed jgħix. Telaq mid-​dar biex imur jgħix Londra u hemm hu beda jiffrekwenta n-​nightclubs, involva ruħu fid-​drogi, fl-​astroloġija, fl-​ispiritiżmu, u fiż-​Zen Buddhism u filosofiji oħra—dan kollu biex jipprova jsib ħajja sodisfaċenti. B’niket kbir fuqu hu talab lil Alla biex jgħinu jsib il-​verità.

Jumejn wara Matthew iltaqaʼ maʼ ħabib li kien ilu ma jarah u qallu dwar is-​sitwazzjoni tal-​biki li kien jinsab fiha. Dan ir-​raġel kien studja max-​Xhieda taʼ Jehovah. Meta dan wera lil Matthew l-​iskrittura tat-​2 Timotju 3:​1-5, hu baqaʼ skantat meta ra kemm il-​Bibbja tiddeskrivi eżatt lid-​dinja taʼ madwarna. Meta qara l-​Priedka taʼ fuq il-​Muntanja, din messitlu qalbu. (Mattew, kapitli 5-7) Għall-​ewwel, żamm lura għax kien qara xi materjal li kkritika lix-​Xhieda taʼ Jehovah, imma fl-​aħħar hu ddeċieda li jattendi l-​laqgħat fis-​Sala tas-​Saltna fil-​qrib.

Matthew ħa pjaċir b’dak li semaʼ u beda jistudja l-​Bibbja maʼ wieħed mill-​anzjani tal-​kongregazzjoni. Malajr induna li dak li kien qed jitgħallem kien dak li kien qed ifittex, it-​tweġiba għat-​talba li għamel lil Alla. Hu beda jaħsad il-​benefiċċji hekk kif abbanduna xi prattiċi li ma jogħġbux lil Jehovah. Waqt li beda jikkultiva biżaʼ bnin minn Alla, hu tqanqal biex iġib ħajtu fi qbil mal-​kmandamenti tiegħu. Matthew tgħallem li ħajja bħal din hija waħda mimlija skop.—Koħèlet 12:13.

Ma kienx predestinat li Matthew jew loħrajn imsemmijin f’dan l-​artiklu kienu se jsibu mod taʼ ħajja sodisfaċenti. Minkejja dan, huma tgħallmu li Alla Jehovah għandu skop  kollu mħabba li jħaddan lil dawk kollha li jagħżlu li jobdu l-​kmandamenti tiegħu. (Atti 10:​34, 35) Dan l-​iskop jinkludi ħajja taʼ dejjem f’dinja ħielsa mill-​gwerer, mill-​mard u l-​ġuħ—saħansitra mill-​mewt. (Isaija 2:4; 25:​6-8; 33:24; Ġwann 3:16) Huwa dan dak li trid int? Jekk iva, tistaʼ titgħallem iktar dwar x’hemm bżonn biex tgħix ħajja sodisfaċenti billi tattendi l-​laqgħat ibbażati fuq il-​Bibbja fis-​Sala tas-​Saltna tax-​Xhieda taʼ Jehovah. Inti mistieden mill-​qalb biex tagħmel dan.

[Stampa f’paġna 7]

Itlob lil Alla bil-​ħrara billi tuża l-​isem persunali tiegħu

[Stampa f’paġna 7]

Studja l-​Bibbja maʼ dawk li jgħallmu verament x’hemm fiha

[Stampi f’paġna 7]

Attendi l-​laqgħat fis-​Sala tas-​Saltna

[Sors tal-​Istampa f’paġna 4]

Hiker: Chad Ehlers/Index Stock Photography