Huma Jaqdu lill-Fratellanza Kristjana f’Pajjiżi Barranin
Huma Jaqdu lill-Fratellanza Kristjana f’Pajjiżi Barranin
QATT smajt l-espressjonijiet “qaddejja internazzjonali” u “volontieri internazzjonali”? Ix-Xhieda taʼ Jehovah li jagħmlu parti minn dawn il-gruppi joffru l-ħin u l-kapaċitajiet tagħhom biex jgħinu fil-bini taʼ faċilitajiet li jintużaw għall-istampar u t-tqassim tal-messaġġ tas-Saltna li jinsab fil-Bibbja. Dawn il-volontieri jgħinu wkoll fil-bini taʼ Swali taʼ l-Assembleat u Swali tas-Saltna, li jservu bħala ċentri għat-tagħlim tal-Bibbja. Fil-preżent, dawn il-volontieri qed jgħinu fil-proġetti taʼ kostruzzjoni f’34 pajjiż differenti l-iktar f’dawk il-pajjiżi fejn għandhom ftit riżorsi. Xi sfidi speċjali u ferħ jiksbu dawn il-ministri hekk kif jaqdu lill-fratellanza Kristjana f’pajjiżi barranin? Kif iħossuhom dwar is-“servizz sagru” li jwettqu? (Rivelazzjoni 7: 9, 15, NW) Biex insiru nafu dan ejja niltaqgħu maʼ xi volontieri li qdew fil-Messiku.
L-ewwel darba li waslu xi volontieri barranin fil-Messiku kien f’Mejju taʼ l-1992. Ftit wara, huma kienu minn taʼ quddiem fix-xogħol tat-tkabbir tal-bini taʼ l-uffiċċju tal-fergħa li jieħu ħsieb l-attivitajiet tax-Xhieda taʼ Jehovah fil-Messiku. Il-proġett tat-tkabbir jikkonsisti f’14-il blokka bini ġdid, inkluż ir-residenzi għall-volontieri li jaqdu fl-uffiċċju tal-fergħa, l-istamperija, u l-uffiċini.
Biex jgħinu f’dan il-proġett taʼ kostruzzjoni, iktar minn 730 volontier mill-Ingilterra, l-Istati Uniti, il-Kanada, u pajjiżi oħrajn qdew spalla maʼ spalla maʼ mijiet taʼ volontieri minn kull parti tal-Messiku. Barra minn hekk, iktar minn 28,000 Xhud, li jagħmlu parti minn madwar 1,600 kongregazzjoni li jinsabu fl-inħawi qrib l-uffiċċju tal-fergħa, għenu fl-attivitajiet taʼ kostruzzjoni fis-Sibtijiet u l-Ħdud. Ilkoll qdew minn jeddhom u kienu ferħanin li joffru xogħolhom bla ħlas. Huma ħassewhom privileġġati li jaqdu lil Jehovah b’dan il-mod. Kemm dam sejjer il-proġett taʼ kostruzzjoni huma żammew f’moħħhom il-kliem imnebbaħ taʼ Salm 127:1: “Jekk il-Mulej ma jibnix id-dar, għalxejn jitħabtu l-bennejja.”
L-Isfidi li Jiffaċċjaw
X’inhuma l-isfidi li jiffaċċjaw dawn il-volontieri internazzjonali meta jkunu qed jaqdu f’inkarigu f’pajjiż barrani? Dawn huma ftit mill-kummenti tagħhom. Curtis u Sally,
koppja mill-Istati Uniti, għenu fi proġetti taʼ kostruzzjoni fil-Ġermanja, l-Indja, il-Messiku, il-Paragwaj, ir-Rumanija, ir-Russja, is-Senegal, u z-Zambja. Curtis jirrakkonta: “L-ewwel sfida kienet li kellna nħallu lit-tifla tagħna, li taqdi bħala pijuniera [ministru full-time], u l-kongregazzjoni tagħna fil-Minnesota. Jien u marti konna ilna nassoċjaw maʼ dik il-kongregazzjoni għal 24 sena, u konna għal qalbna ħafna fiha.”Sally tinnota: “Forsi huwa iktar taʼ sfida għal mara milli għal raġel li tgħix f’kundizzjonijiet mhux familjari, imma tgħallimt li huwa possibbli li taddatta ruħek. Saħansitra tgħallimt nissaporti l-ħafna insetti li kien hemm!” Hi tkompli: “F’pajjiż minnhom, konna għaxar volontieri f’appartament wieħed li lanqas kċina ma kien fih u kellu biss żewġ kmamar tal-banju. Dan għenni nuri iktar paċenzja.”
Il-fatt li trid titgħallem lingwa ġdida huwa sfida li teħtieġ sforz u umiltà. Sharon, li qdiet maʼ żewġha fi proġetti taʼ kostruzzjoni f’pajjiżi differenti, tgħid: “Hija sfida meta ma tkunx taf bil-lingwa tal-pajjiż fejn tkun qed taqdi. Għall-bidu, ikun veru diffiċli biex issir taf sew lil ħutek spiritwali għax ma tkunx tistaʼ tesprimi s-sentimenti tiegħek kif tixtieq. Tant tħossok skuraġġita. Imma l-aħwa li niltaqgħu magħhom f’dawn l-inkarigi barranin jieħdu ħafna paċenzja bina u tgħidx kemm jieħdu ħsiebna. B’xi mod jew ieħor, fl-aħħar jirnexxilna nikkomunikaw.”
Kuraġġ Meħtieġ fil-Ministeru
Dawn il-volontieri li jissagrifikaw lilhom infushom jikkontribwixxu ħafna għall-progress tax-xogħol tal-kostruzzjoni, imma huma jirrealizzaw li, l-ewwel u qabel kollox, ix-xogħol prinċipali tagħhom hu li jxandru l-aħbar tajba tas-Saltna t’Alla. Għalhekk, huma jappoġġaw bis-sħiħ ix-xogħol taʼ l-ippridkar fil-kongregazzjonijiet li jkunu qed jattendu. Åke u Ing-Mari, koppja li għenu fil-proġetti tal-kostruzzjoni
fil-Gwadalupe, il-Malawi, il-Messiku, u n-Niġerja, jammettu li trid tkun kuraġġuż biex titkellem b’lingwa oħra meta tkun qed tieħu sehem fil-ministeru f’pajjiż barrani.Ing-Mari tirrakkonta: “Għall-ewwel, ftit tkellimna, għax dejjem konna noħorġu m’aħwa tal-post, u minħabba l-mistħija konna nħalluhom jitkellmu huma. Imma, għodwa waħda ddeċidejna li noħorġu fis-servizz taʼ l-għalqa waħedna. Tlaqna mid-dar b’rogħda kbira fuqna u b’qalbna tħabbat sitta sitta. Iltqajna maʼ mara żagħżugħa li qagħdet tismaʼ l-preżentazzjoni li kont ippreparajt. Qrajtilha skrittura u ħallejtilha xi letteratura. Imbagħad din il-mara qaltli: ‘Ħa ngħidlek. Jien għandi xi ħadd jiġi minni li jistudja l-Bibbja max-Xhieda taʼ Jehovah. Kif nistaʼ nibda nistudja jien ukoll?’ Jien bqajt b’ħalqi miftuħ. Imbagħad ġejt f’tiegħi u offrejtilha studju tal-Bibbja.”
Ing-Mari tkompli: “Immaġina kemm fraħt u kemm kont grata lejn Jehovah li bierek l-inizjattiva tagħna u x-xewqa tagħna li naqsmu l-verità maʼ ħaddieħor.” Din il-mara għamlet ħafna progress u tgħammdet bħala Xhud f’konvenzjoni distrettwali fil-belt tal-Messiku. Åke u Ing-Mari fil-qosor jgħidu dan dwar il-ministeru tagħhom: “Aħna napprezzawhom ħafna l-inkarigi tal-proġetti tal-kostruzzjoni differenti li jkollna, imma m’hemm xejn li jġiblek iktar ferħ u sodisfazzjon milli tgħin lil xi ħadd iħaddan il-verità.”
L-Ispirtu taʼ Ssagrifikar Tagħhom Infushom
Veru li l-volontieri li jħallu warajhom lill-familji u l-ħbieb jagħmlu ħafna sagrifiċċji biex jaqdu lil ħuthom f’pajjiżi barranin, imma huma jesperjenzaw ukoll ħafna ferħ. Għala?
Howard, li qeda maʼ martu, Pamela, fl-Angola, l-Ekwador, El Salvador, il-Gujana, il-Kolumbja, il-Messiku, u Puerto Rico jispjega: “Huwa privileġġ li tiltaqaʼ maʼ l-aħwa f’pajjiżi differenti u tara b’għajnejk stess l-imħabba kbira li tgħaqqad il-fratellanza internazzjonali tagħna. Din spiss naqraw dwarha, imma meta tkun tgħix u taqdi m’oħrajn taʼ kulturi u trobbija differenti, tkun tistaʼ tapprezza ferm iktar il-fratellanza prezzjuża li għandna.”
Anki Gary, li għen fil-proġetti taʼ kostruzzjoni fl-Ekwador, il-Kolumbja, il-Kosta Rika, il-Messiku, u z-Zambja, iħoss li bbenefika ħafna minn dan il-programm. Hu jirrakkonta: “It-taħriġ li ħadt tul is-snin li ili nagħmilha m’aħwa maturi li jaqdu fil-fergħat tal-pajjiżi li nkun ġejt assenjat fihom għenni biex inkun imħejji aħjar għall-isfidi fl-inkarigi tiegħi. Dan saħħaħli l-fidi għaliex pprovdieli opportunità biex nesperjenza l-unità li tant tispikka fl-organizzazzjoni taʼ Jehovah madwar id-dinja—unità li ma tiġix effettwata mid-differenzi fil-lingwa, ir-razza, jew il-kultura.”
Sadanittant, l-attività taʼ kostruzzjoni fil-Messiku tlestiet, u l-faċilitajiet ġodda tal-fergħa ġew dedikati din is-sena. Immotivati mill-imħabba tagħhom għal Alla, qaddejja u volontieri internazzjonali kkontribwew ħafna għat-tkabbir tal-qima vera fil-Messiku u f’pajjiżi oħra. Il-fatt li huma qdew minn jeddhom u ssagrifikaw lilhom infushom biex jaqdu lil ħuthom Kristjani fuq skala internazzjonali huwa apprezzat ferm mix-Xhieda taʼ Jehovah madwar id-dinja.
[Stampa f’paġna 25]
L-Ekwador
[Stampa f’paġna 25]
Il-Kolumbja
[Stampa f’paġna 25]
L-Angola
[Stampa f’paġna 26]
Jibda x-xogħol fuq il-faċilitajiet il-ġodda fil-fergħa tal-Messiku
[Stampa f’paġna 26]
Il-ġnien fil-fergħa
[Stampa f’paġna 26]
Taħt: Xi membri tad-Dipartiment tal-Kostruzzjoni quddiem parti mill-faċilitajiet il-ġodda
[Stampa f’paġna 27]
Volontieri tal-kostruzzjoni jieħdu gost jappoġġaw ix-xogħol taʼ l-ippridkar mal-kongregazzjoni lokali