HUWA diffiċli li tiddeskrivi eżatt x’inhu s-​seħer fi żmienna. Ir-​raġuni hi li dawk li jipprattikawh ivarjaw ħafna. Dawn ma jirrikonoxxu ebda awtorità jew duttrina ċentrali, jew xi ktieb imqaddes li jgħaqqad it-​twemmin tagħhom. Hemm differenzi wkoll fit-​tradizzjoni, fl-​organizzazzjoni, fir-​ritwali, u fl-​opinjoni rigward liema allat għandhom jonoraw. Kittieb wieħed josserva: “Id-​dinja taʼ l-​okkult toffri lil dak li jkun ‘suq ħieles’ taʼ ideat.” Awtriċi oħra tgħid: “Il-​biċċa l-​kbira tan-​Neo-Pagani ma jaqblu kważi fuq xejn.”

Ħafna nies ma jsibu ebda oġġezzjoni għal dawn il-​kontradizzjonijiet. Ktieb li jipprovdi gwida għal dawk li jixtiequ jsiru sħaħar jistqarr: “Meta tkun f’diffikultà għax issib informazzjoni kontradittorja, eżamina din l-​informazzjoni u agħmel deċiżjoni dwar liema waħda se temmen. Agħmel dak li tħoss dak il-​ħin. Fi kliem ieħor, int liberu li tagħżel x’jogħġbok fost ir-​ritwali pubblikati u l-​kotba taʼ gwida dwar ir-​ritwali biex tiddeċiedi dak li tħoss li hu tajjeb.”

Iżda, dawk li jafu minn xiex tistaʼ tingħaraf il-​verità joġġezzjonaw għal dawn il-​kontradizzjonijiet. Il-​verità hi magħmula mill-​fatti, minn dak li hu veru. Xi ħaġa tkun vera mhux sempliċement għax persuna tħoss jew tittama jew temmen li hi vera. Per eżempju, kien hemm żmien meta t-​tobba kienu jemmnu li setgħu jfejqu l-​pulmonite billi jaqsmu tiġieġa ħajja fi tnejn u jpoġġu ż-​żewġ nofsijiet fuq sider il-​pazjent. Bla dubju, ħafna pazjenti sinċerament kienu jemmnu li din il-​kura kienet se tfejjaqhom. Madankollu, it-​twemmin u t-​tamiet tagħhom ma kinux jaqblu mal-​fatti—din il-​proċedura ma tfejjaqx il-​pulmonite. In-​nies ma joħolquhiex huma l-​verità, imma jagħmlu ħilithom biex jifhmuha.

Il-Bibbja tgħid li ġo fiha hemm il-​verità dwar kwistjonijiet spiritwali. Ġesù Kristu, meta kien fuq l-​art, qal f’talba lil Missieru: “Il-​kelma tiegħek hi l-​verità.” (Ġwann 17:17) L-​appostlu Pawlu kiteb: “L-​Iskrittura kollha hija mnebbħa minn Alla.” (2 Timotju 3:16) Ħafna li jipprattikaw is-​seħer ma jaqblux maʼ dan. Minflok, huma jipprovaw isibu dik ix-​xi ħaġa li timmotivahom u tiggwidahom fil-​ħrejjef, fir-​reliġjonijiet tal-​qedem, u saħansitra fil-​fantaxjenza. Iżda, ma jkunx raġunevoli li għall-​inqas nikkunsidraw dak li tgħid il-​Bibbja? Wara kollox, din hi rikonoxxuta tistaʼ tgħid maʼ kullimkien bħala ktieb imqaddes. Hija wkoll waħda mill-​iktar kitbiet reliġjużi antiki li  baqgħu jeżistu. Il-​Bibbja nkitbet matul perijodu taʼ 1,600 sena, u madankollu hija konsistenti fit-​tagħlim kollu tagħha. Ejja nqabblu t-​tagħlim tal-​Bibbja maʼ xi twemmin li jħaddnu dawk li jinkuraġġixxu l-​prattika tas-​seħer.

Min Hemm fil-​Qasam taʼ l-​Ispirti?

Mistoqsija fundamentali li għandu jistaqsi min ifittex li jkollu fehma spiritwali hija din, Min hemm fil-​qasam taʼ l-​ispirti? Filwaqt li l-​biċċa l-​kbira tas-​sħaħar fi żmienna jħaddnu fidi f’iktar minn alla wieħed, li hi relatata man-​natura, xi wħud iqimu alla-omm kbira, meqjusa bħala li għandha rwol triplu taʼ xebba, omm, u mara xiħa għakka, li jirrappreżentaw l-​istadji bażiċi tal-​ħajja. Il-​maħbub tagħha huwa alla bil-​qrun. Sħaħar oħrajn iqimu alla raġel u alla mara flimkien. Wieħed kittieb jgħid: “L-​Alla mara u l-​Alla raġel huma meqjusin bħala manifestazzjoni tal-​forzi tan-​natura femminili u maskili. It-​tnejn li huma [għandhom] il-​karatteristiċi uniċi tagħhom li meta jingħaqdu flimkien jirriżultaw fil-​ħolqien armonjuż tal-​ħajja.” Awtorità oħra tikteb: “Waħda mill-​iktar għażliet importanti fil-​prattika tas-​Seħer hija li int tagħżel l-​allat (Allat Maskili u Femminili) li se taħdem id f’id magħhom. . . . Il-​prattika tas-​Seħer tagħtik il-​libertà li tagħżel u mbagħad tonora lill-​allat li tkun għażilt int stess bħala Divinitajiet.”

Il-Bibbja ma tappoġġa ebda waħda minn dawn l-​ideat. Ġesù Kristu ddedika l-​ministeru kollu tiegħu biex jgħallem lil oħrajn dwar Jehovah, “l-​uniku Alla veru.” (Ġwann 17:​3, NW) Il-​Bibbja tistqarr: “Kbir il-​Mulej, taʼ min ifaħħru ħafna, tal-​biżaʼ aktar mill-​allat kollha. Għax kollha frugħa l-​allat tal-​popli.”—1 Kronaki 16:​25, 26.

Xi ngħidu għax-​Xitan? Il-​Webster’s Ninth New Collegiate Dictionary jiddefinixxi s-​seħer bħala “komunikazzjoni max-​xitan.” Ikun diffiċli llum li nsibu xi saħħara li taqbel maʼ din id-​definizzjoni, għaliex ħafna lanqas biss jaċċettaw saħansitra li Satana x-​Xitan tassew jeżisti. Waħda mara żagħżugħa, li ġiet deskritta minn The Irish Times bħala “saħħara li għandha kariga importanti u li tmexxi wieħed mill-​iktar gruppi influwenti taʼ sħaħar fl-​Irlanda,” tirraġuna hekk: “It-​twemmin fix-​Xitan jimplika li wieħed jaċċetta l-​Kristjanità . . . [Ix-Xitan] ma jistax jeżisti f’univers fejn m’hemmx Alla.”

Il-Bibbja tikkonferma l-​eżistenza tax-​Xitan u takkużah b’ħafna mis-​sofferenza u t-​taqlib li hawn fid-​dinja. (Apokalissi 12:12) Ġesù mhux biss għallem li x-​Xitan jeżisti, imma wkoll wera li huwa possibbli li wieħed jistaʼ jkun qed jagħmel ir-​rieda tax-​Xitan mingħajr ma jkun konxju taʼ dan. Per eżempju, fl-​ewwel seklu, xi mexxejja reliġjużi li kienu jriduha taʼ tajbin sostnew li, f’ċertu sens, huma kienu wlied Alla u kienu jemmnu li qed jagħmlu r-​rieda t’Alla. Ġesù, li setaʼ jagħraf x’kien hemm f’qalbhom, kien jaf li dan ma kienx veru. Hu qalilhom f’wiċċhom: “Intom ġejjin minn missierkom, li hu x-​Xitan, u x-​xewqat taʼ missierkom tridu tagħmlu.” (Ġwann 8:44) Iżjed minn hekk, il-​ktieb Bibliku t’Apokalissi jgħid li x-​Xitan huwa l-​“qarrieq tad-​dinja kollha.”—Apokalissi 12:9.

Teżisti xi Maġija Tajba?

M’għandniex xi ngħidu, il-​maġija minn dejjem kienet assoċjata maʼ l-​okkult. a Ħafna nies, kemm fl-​antik u kemm fi żmienna, jemmnu li l-​maġija li jipprattikaw is-​sħaħar issir biex tagħmel il-​ħsara  lil oħrajn. Jingħad li s-​sħaħar għandhom is-​setgħa li jikkaġunaw uġigħ tremend u saħansitra l-​mewt permezz tal-​maġija. Matul iż-​żminijiet, is-​sħaħar baqgħu jingħataw il-​ħtija għal kull tip taʼ sfortuni, inkluż mard, mewt, u ħsara lill-​uċuħ tar-​rabaʼ.

Is-sħaħar illum jiċħduhom bil-​qawwi akkużi bħal dawn. Waqt li jammettu li xi kultant jistaʼ jkun hemm xi saħħara ħażina li tagħmel id-​deni, il-​biċċa l-​kbira minnhom isostnu li l-​maġija li jagħmlu ssir għall-​ġid, mhux biex tagħmel il-​ħsara. Il-​membri tal-​Wicca jgħallmu li l-​effetti tal-​maġija se jkunu t-​triplu għal min jipprattikaha, u jgħidu li dan hu wieħed mill-​akbar fatturi li minħabba fihom is-​sħaħar iżommu lura milli jlissnu xi saħta. Eżempji taʼ din l-​hekk imsejħa maġija tajba jinkludu sħarijiet biex tipproteġi lilek innifsek, biex tnaddaf lil darek minn forzi negattivi li jkun ħalla warajh min kien joqgħod fid-​dar qablek, biex iġġiegħel lil xi ħadd jieħu grazzja miegħek, biex tfiq iktar malajr u tkun b’saħħtek, biex tevita li titlef l-​impjieg tiegħek, u biex takkwista l-​flus. Meta tqis li l-​maġija jingħad li għandha poteri kbar bħal dawn, m’huwiex sorprendenti li din saret daqshekk popolari.

Madankollu, il-​Bibbja ma tagħmel ebda distinzjoni bejn maġija tajba u maġija ħażina. Alla wera biċ-​ċar kif jaħsibha dwar dan fil-​Liġi li ta lil Mosè. Hu qal: “La tagħmlux . . . sħarijiet.” (Levitiku 19:26) Naqraw ukoll: “Ma għandu jkun hemm ħadd f’nofsok . . . [“li jipprattika l-​maġija,” NW], min jitkixxef il-​ġejjieni, min jagħmel il-​magħmul u s-​sħarijiet, min isejjaħ l-​erwieħ.”—Dewteronomju 18:​10, 11.

Alla għala qal hekk? Dan m’huwiex għaliex irid iċaħħadna minn xi ħaġa li hi taʼ benefiċċju għalina. Jehovah ta dawn il-​liġijiet lin-​nies tiegħu għaliex kien iħobbhom u ma ridhomx jinħakmu mill-​biżaʼ u s-​superstizzjoni. Minflok, hu jistieden lill-​qaddejja tiegħu biex jitolbuh l-​affarijiet li jkollhom bżonn. Hu d-​Donatur taʼ “kull ħaġa tajba li tingħata u kull don perfett.” (Ġakbu 1:17) L-​appostlu Ġwanni aċċerta lil sħabu fit-​twemmin: “Kull ma nitolbu naqilgħuh mingħandu [mingħand Alla], għax qegħdin inżommu l-​kmandamenti tiegħu u nagħmlu dak li jogħġob lilu.”—1 Ġwann 3:22.

Xi Ngħidu għall-​Ispirti mill-​Agħar?

Ħafna sħaħar jaqblu mal-​Bibbja fuq dan il-​punt: L-​ispirti mill-​agħar tassew jeżistu. F’artiklu li kiteb, wieħed li jinkuraġġixxi l-​prattika tas-​seħer iwissi: “Il-​fantażmi qegħdin hemm barra: Dawn jeżistu, fid-​dinja inviżibbli simili għal dik li ngħixu fiha aħna, kreaturi ħajjin. . . . It-​termini ‘Għafrid’, ‘Spirtu Ħażin’ u ‘Demonju’ huma pjuttost eżatti. Huma għandhom qawwa tremenda. . . . L-​iktar intelliġenti fosthom . . . huma kapaċi (jekk xi ħadd jogħġbu jagħtihom l-​għajnuna tiegħu u  jiftħilhom bieb) jidħlu fid-​dinja tagħna.  . . . Jistgħu jidħlu ġo fik . . . , u saħansitra jkollhom ċertu kontroll fuqek. Iva, dan hu eżatt bħall-​istejjer antiki taʼ kif uħud ġew maħkumin mid-​Demonji.”

Fi żminijiet Bibliċi, nies maħkumin mid-​demonji kienu jsofru b’diversi modi. Xi wħud minn dawk effettwati ma kinux jistgħu jitkellmu, xi wħud kienu għomja, xi wħud kienu jġibu ruħhom taʼ mġienen, u xi wħud kellhom saħħa barranija. (Mattew 9:​32; 12:22; 17:​15, 18; Mark 5:​2-5; Luqa 8:​29; 9:​42; 11:14; Atti 19:16) Xi drabi l-​agunija kienet tiżdied meta ħafna demonji kienu jaħkmu lil persuna waħda lkoll f’daqqa. (Luqa 8:​2, 30) Mela, żgur li hemm raġunijiet tajbin għala Jehovah jwissi lin-​nies biex jitbegħdu mis-​seħer u prattiċi oħrajn relatati maʼ l-​okkult.

Reliġjon Ibbażata fuq il-​Verità

Illum, ħafna jitħajru jipprattikaw is-​seħer minħabba li din ir-​reliġjon ibbażata fuq riverenza għan-​natura tidher li ma tagħmel ebda ħsara u m’hi taʼ ebda theddida. F’xi komunitajiet, din ġiet aċċettata. In-​nies ma jibżgħux minnha. Minflok, f’ħafna postijiet din saret komuni. F’ambjent fejn it-​tolleranza reliġjuża twassal lil ħafna biex jaċċettaw saħansitra dak li m’huwiex normali, is-​seħer kiseb l-​approvazzjoni taʼ ħafna.

Tabilħaqq, id-​dinja taʼ reliġjonijiet saret suq minfejn in-​nies huma liberi li jagħżlu waħda li tissodisfa l-​bżonnijiet tagħhom, qisu xi ħadd qed jixtri xi par żarbun. B’kuntrast, Ġesù tkellem biss dwar żewġ għażliet. Hu qal: “Għaddu mill-​bieb id-​dejjaq. Għax wiesaʼ l-​bieb u spazjuża t-​triq li tieħu għat-​telfien, u ħafna huma li jgħaddu minnha. Imma kemm huwa dejjaq il-​bieb u dejqa t-​triq li tieħu għall-​ħajja, u ftit huma li jsibuha!” (Mattew 7:​13, 14) Naturalment, aħna liberi li nagħżlu liema mogħdija se ngħaddu minnha. Imma ladarba hemm involut il-​benesseri etern tagħna, din l-​għażla għandha importanza vitali. Biex niksbu fehma spiritwali, irridu nibqgħu mexjin fil-​mogħdija tal-​verità—il-​mogħdija li tinsab biss fil-​Kelma t’Alla, il-​Bibbja.

[Nota taʼ taħt]

[Stampa f’paġna 5]

Ħafna llum iqisu s-​seħer bħala reliġjon ibbażata fuq riverenza għan-​natura li ma tagħmel ebda ħsara

[Stampa f’paġna 6]

Il-​maġija minn dejjem kienet assoċjata maʼ l-​okkult

[Stampa f’paġna 6]

Qegħdin dawk li jipprattikaw is-​seħer jagħmlu r-​rieda tax-​Xitan mingħajr ma huma konxji taʼ dan?

[Stampi f’paġna 7]

Il-​Bibbja tirrivela l-​mogħdija tal-​verità