SAWL kien mimli rabja għas-​segwaċi taʼ Ġesù. Billi ma kienx kuntent bil-​persekuzzjoni li diġà kien għamlilhom f’Ġerusalemm, inkluż it-​tħaġġir taʼ Stiefnu, issa kien qed ifittex biex juża miżuri iktar ħorox kontrihom. “Sawl, li kien għadu bil-​qawwa kollha jhedded bil-​mewt lid-​dixxipli tal-​Mulej, mar għand il-​qassis il-​kbir u talbu jagħtih ittri għas-​sinagogi taʼ Damasku, biex ikun jistaʼ jaqbad l-​irġiel u n-​nisa kollha li jsib miexja fit-​Triq tal-​Mulej u jeħodhom marbuta Ġerusalemm.”—Atti 9:​1, 2.

Hekk kif Sawl kien sejjer lejn Damasku, hu bilfors li kien qed jikkontempla kif se jwettaq l-​ordni li ngħatatlu bl-​iktar mod effettiv possibbli. L-​awtorità li ngħatatlu mill-​qassis il-​kbir kienet mingħajr ebda dubju tassigura l-​kooperazzjoni tal-​mexxejja tal-​komunità kbira Lhudija f’dik il-​belt. Sawl kien se jitlob l-​għajnuna tagħhom.

L-eċċitament taʼ Sawl żgur li beda jiżdied hekk kif beda joqrob lejn id-​destinazzjoni tiegħu. Il-​vjaġġ minn Ġerusalemm għal Damasku—mixja taʼ sebaʼ jew tmint ijiem taʼ madwar 220 kilometru—kien taʼ strapazz. F’daqqa waħda għal ħabta taʼ nofsinhar, dawl iktar qawwi minn dak tax-​xemx idda madwar Sawl, u hu waqaʼ fl-​art. Hu semaʼ leħen jgħidlu bil-​Lhudi: “Sawl, Sawl, għaliex qiegħed tippersegwitani? Iebsa għalik li teħodha kontra n-​niggieża!” “Min int, Mulej?” staqsa Sawl. “Jien Ġesù li int qiegħed tippersegwitah,” kienet it-​tweġiba. “Imma qum u ieqaf fuq riġlejk. Għax jien għalhekk dhertlek, biex nagħmlek ministru u xhud tad-​dehra li fiha rajtni u taʼ dawk li fihom għad nidhirlek. Neħilsek mill-​poplu u mill-​ġnus pagani li għandhom qiegħed nibagħtek.” “X’għandi nagħmel, Mulej?” staqsa Sawl. “Qum u mur Damasku. Hemm jgħidulek kull ma għandek tagħmel.”—Atti 9:​3-6; 22:​6-10; 26:​13-17.

 Dawk li kienu qed jivvjaġġaw maʼ Sawl semgħu leħen, imma la raw lill-​kelliemi u lanqas fehmu dak li qal. Minħabba d-​dija tad-​dawl, meta Sawl qam ma setax jara u kellhom imexxuh minn idejh. “Dam tlitt ijiem ma jarax, u la kiel u lanqas xorob.”—Atti 9:​7-9; 22:11.

Tlett Ijiem taʼ Meditazzjoni

Sawl aċċetta l-​ospitalità taʼ Ġuda, li kien jgħix fit-​triq li jgħidulha d-​Dritta. a (Atti 9:11) Din it-​triq—li bl-​Għarbi jgħidulha Darb al-Mustaqim—hija triq prinċipali u traffikuża f’Damasku. Immaġina x’għadda minn moħħ Sawl waqt li kien fid-​dar taʼ Ġuda. Din l-​esperjenza, lil Sawl kienet ħallietu agħma u xxokkjat. Issa kellu l-​ħin sabiex jimmedita fuq l-​implikazzjonijiet tagħha.

Il-​persekutur ġie wiċċ imbwiċċ maʼ dak kollu li hu kien jaħseb li kien assurd. Il-​Mulej Ġesù Kristu msammar maʼ zokk—ikkundannat mill-​ogħla awtorità Lhudija u “mżeblaħ u mwarrab mill-​bnedmin”—kien ħaj. Hekku, hu saħansitra kien wieqaf approvat fil-​lemin t’Alla “f’dawl li ħadd ma jistaʼ jersaq lejh”! Ġesù kien il-​Messija. Stiefnu u l-​oħrajn kellhom raġun. (Isaija 53:3; Atti 7:56; 1 Timotju 6:16) Sawl kien kompletament żbaljat, għax Ġesù identifika lilu nnifsu maʼ dawk l-​istess uħud li Sawl kien qed jippersegwita! Minkejja l-​evidenza, Sawl kif setaʼ jibqaʼ ‘jiħodha kontra n-​niggieża’? Saħansitra gendus stinat eventwalment jiġi mġiegħel imur fid-​direzzjoni li jridu sidu. Għalhekk, jekk jirrifjuta li jikkoopera mat-​tħeġġiġ taʼ Ġesù, Sawl kien se jweġġaʼ lilu nnifsu.

Bħala l-​Messija, Ġesù ma setax ikun kundannat minn Alla. Madankollu, Jehovah ħallieh isofri l-​iktar mewta infamja u jaqaʼ taħt is-​sentenza tal-​Liġi: “Wieħed imdendel hu s-​saħta taʼ Alla.” (Dewteronomju 21:23) Ġesù miet waqt li kien imdendel fuq iz-​zokk tat-​tortura. Hu ġie misħut, mhux għal dnubietu stess, ladarba ma kellu l-​ebda dnub, imma għall-​umanità midinba. Sawl iktar tard spjega: “Imma dawk kollha li jgħixu bl-​opri tal-​Liġi huma taħt is-​saħta. Għax hemm miktub: ‘Misħut kull min ma joqgħodx għall-​ħwejjeġ kollha li hemm imniżżla fil-​ktieb tal-​Liġi u ma jagħmilhomx’. U li ħadd permezz tal-​Liġi ma hu ġġustifikat quddiem Alla jidher ċar . . . Kristu fdiena mis-​saħta tal-​Liġi billi sar hu nnifsu saħta għalina, għax hemm miktub: ‘Misħut min ikun imdendel maʼ l-​għuda.’ ’’—Galatin 3:​10-13.

Is-sagrifiċċju taʼ Ġesù kellu valur taʼ redenzjoni. Billi aċċetta dan is-​sagrifiċċju, Jehovah b’mod figurattiv sammar il-​Liġi u s-​saħta tagħha maz-​zokk tat-​tortura. Malli fehem dan il-​fatt, Sawl setaʼ jqis iz-​zokk tat-​tortura bħala “għerf taʼ Alla” filwaqt li dan kien “skandlu għal-​Lhud.” (1 Korintin 1:​18-25; Kolossin 2:14) Mela, jekk is-​salvazzjoni ma kellhiex tkun permezz taʼ xogħlijiet tal-​liġi imma permezz tal-​fatt li Alla jeżerċita qalb tajba mhix mistħoqqa lejn midinbin bħal Sawl innifsu, potenzjalment din kienet miftuħa għal dawk li ma kinux taħt il-​Liġi. U għand il-​Ġentili li Ġesù kien se jibagħtu lil Sawl.—Efesin 3:​3-7.

Ma nafux kemm Sawl setaʼ jifhem dwar dan fiż-​żmien tal-​konverżjoni tiegħu. Ġesù kellu jerġaʼ jkellmu, forsi iktar minn darba, dwar il-​missjoni tiegħu għand il-​ġnus. Iktar minn hekk, għaddew diversi snin qabel ma Sawl poġġa dan kollu bil-​miktub taħt ispirazzjoni divina. (Atti 22:​17-21; Galatin 1:​15-18; 2:​1, 2) Madankollu, ftit li xejn kienu għaddew ġranet illi Sawl  ma rċiviex iktar direzzjonijiet mill-​Mulej ġdid tiegħu.

Żjara minn Ħananija

Wara li deher lil Sawl, Ġesù deher ukoll lil Ħananija, u qallu: “Mur fit-​triq li jgħidulha d-​Dritta, u hemm, fid-​dar taʼ Ġuda, staqsi għal wieħed minn Tarsu, jismu Sawl. Dan qiegħed jitlob, u ra f’dehra wieħed, jismu Ħananija, dieħel ħdejh u jqegħedlu jdejh fuqu biex jerġaʼ jieħu d-​dawl.”—Atti 9:​11, 12.

Ladarba Ħananija kien samaʼ b’Sawl, nistgħu nifhmu s-​sorpriża tiegħu għall-​kliem taʼ Ġesù. Hu qal: “Mulej, jien smajt mingħand ħafna fuq dan ir-​raġel, kemm għamel ħsara lill-​qaddisin tiegħek f’Ġerusalemm. U issa qiegħed hawn bis-​setgħa mingħand il-​qassisin il-​kbar biex jarresta lil dawk kollha li jsejjħu ismek.” Madankollu, Ġesù qal lil Ħananija: “Mur, għax dan ir-​raġel hu għodda magħżula minni biex iwassal ismi quddiem il-​ġnus u s-​slaten u quddiem ulied Iżrael.”—Atti 9:​13-15.

Rassigurat, Ħananija mar fl-​indirizz li kien tah Ġesù. Wara li sab lil Sawl u sellimlu, Ħananija poġġa idejh fuqu. “F’daqqa waħda,” jgħid ir-​rakkont, “waqaʼ bħal qxur minn għajnejh u raġaʼ beda jara.” Sawl issa kien lest biex jagħti widen. Il-​kliem taʼ Ħananija kkonferma dak li Sawl probabbilment kien fehem mill-​kliem taʼ Ġesù: “Alla taʼ missirijietna għażlek biex tagħraf ir-​rieda tiegħu, tara lil dak li hu l-​Ġust u tisimgħu jkellmek b’fommu stess. Għax int għad trid tixhed għalih quddiem il-​bnedmin kollha fuq dak li rajt u smajt. U issa x’int tistenna? Qum! Tgħammed u nħall minn dnubietek, int u ssejjaħ ismu.” X’kien ir-​riżultat? Sawl “qam u tgħammed, kiel xi ħaġa, u ħa r-​ruħ.”—Atti 9:​17-19; 22:​12-16.

Wara li wettaq l-​inkarigu tiegħu, il-​leali Ħananija malajr sparixxa mix-​xena, u ma nafu xejn iktar dwaru. Imma Sawl għaġġeb lil kulmin semgħu! Dak li qabel kien persekutur, li kien ġie Damasku biex jarresta lid-​dixxipli taʼ Ġesù, issa beda jippriedka fis-​sinagogi u jagħti prova li Ġesù kien il-​Kristu.—Atti 9:​20-22.

“Appostlu tal-​Ġnus”

Dak li ltaqaʼ miegħu Sawl fi triqtu lejn Damasku ġiegħel lil dan il-​persekutur biex ma jibqax fil-​korsa tiegħu. Billi rrealizza l-​identità tal-​Messija, Sawl setaʼ japplika ħafna konċetti u profeziji taʼ l-​Iskrittura Ebrajka għal Ġesù. Il-​fatt li kien sar konxju li Ġesù deherlu u kien ‘qabdu’ u inkarigah bħala “appostlu tal-​Ġnus” ittrasforma profondament il-​ħajja taʼ Sawl. (Filippin 3:​12, Saydon; Rumani 11:​13, Saydon) Issa bħala l-​appostlu Pawlu, hu kellu l-​privileġġ u l-​awtorità li kienu se jinfluwenzaw mhux biss il-​bqija taʼ ħajtu fuq l-​art imma wkoll il-​korsa taʼ l-​istorja tal-​Kristjanità.

Snin wara, meta bdew jiddibattu dwar l-​appostolat taʼ Pawlu, hu ddefenda l-​awtorità tiegħu billi rrefera għall-​esperjenza li għadda minnha fit-​triq lejn Damasku. “M’iniex appostlu? Ma rajtx lil Sidna Ġesù?” hu staqsa. U wara li semma d-​dehriet taʼ Ġesù rxoxtat lil oħrajn, Sawl (Pawlu) stqarr: “Fl-​aħħar deher lili wkoll wara kulħadd, qisni twelidt mormi qabel il-​waqt.” (1 Korintin 9:1; 15:8) Kien bħallikieku Sawl, permezz tal-​viżjoni li kellu tal-​glorja taʼ Ġesù fis-​sema, kien ngħata l-​unur li jitwieled, jew jiġi rxoxtat, għall-​ħajja bħala spirtu qabel iż-​żmien.

Sawl għaraf xi privileġġ kellu u għamel ħiltu kollha biex jibżaʼ għalih. “Jien l-​inqas wieħed fost l-​appostli, u ma jistħoqqlix nissejjaħ appostlu, għaliex kont naħqar il-​Knisja taʼ Alla,” hu kiteb. “Imma . . . l-​grazzja [t’Alla] fija ma sefgħetx fix-​xejn, għax tħabatt ħafna iktar [mill-appostli l-​oħrajn kollha].”—1 Korintin 15:​9, 10.

Forsi bħal Sawl int tiftakar iż-​żmien meta rrealizzajt li biex ikollok il-​favur t’Alla kellek bżonn tirranġa l-​ħarsiet reliġjużi li kont ilek tħaddan. Mingħajr ebda dubju, int kont ferm grat li Jehovah għenek biex tifhem il-​verità. Meta Sawl ra d-​dawl u rrealizza dak li kien meħtieġ minnu, hu ma żammx lura milli jagħmel dan. U baqaʼ jagħmlu b’żelu u b’determinazzjoni għall-​bqija taʼ ħajtu fuq l-​art. X’eżempju eċċellenti hu dan għal dawk kollha li llum jixtiequ l-​favur taʼ Jehovah!

[Nota taʼ taħt]

[Stampa f’paġna 27]

It-​triq li jgħidulha d-​Dritta f’Damasku fil-​ġurnata tal-​lum

[Sors taʼ l-​istampa]

Photo by ROLOC Color Slides