Il-​Bibbja ma tgħallimx li kull individwu għandu anġlu kustodju. Hu minnu li Ġesù darba qal: “Araw li ma tistmerrux lil xi wieħed minn dawn iċ-​ċkejknin [id-​dixxipli taʼ Kristu]; għax ngħidilkom li l-​anġli tagħhom fis-​sema dejjem jaraw wiċċ Missieri li hu fis-​sema.” (Mattew 18:10) Però, minflok ma kien qed jgħid li kull persuna għandha anġlu kustodju, Ġesù sempliċement kien qed jgħid li l-​anġli jieħdu interess persunali f’kull dixxiplu tiegħu. Għalhekk, l-​aduraturi veri ma jiħdux riskji għalxejn b’xejn jew bi traskuraġni għax jassumu li l-​anġli t’Alla se jipproteġuhom.

Ifisser dan li l-​anġli ma jgħinux lill-​bnedmin? Le. (Salm 91:11) Xi wħud iħossuhom ċerti li Alla kien tahom protezzjoni u gwida permezz tal-​anġli. Kenneth, li ssemma fl-​ewwel artiklu, hekk iħossu. Għalkemm ma nistgħux inkunu ċerti, jistaʼ jkun li għandu raġun. Ix-​Xhieda taʼ Ġeħova spiss jaraw evidenza tal-​intervent tal-​anġli hekk kif jieħdu sehem fix-​xogħol tal-​ippritkar li jagħmlu. Madankollu, peress li l-​anġli huma inviżibbli, ma nistgħux ngħidu sa liema punt Alla jużahom biex jgħinu individwi f’diversi ċirkustanzi. Minkejja dan, żgur li ma nagħmlux ħażin jekk nirringrazzjaw lil Dak li Jistaʼ Kollox għal kwalunkwe appoġġ li għandu mnejn ikun tana.—Kolossin 3:15; Ġakbu 1:17, 18.