1. X’inhi l-indiema?

 META nagħmlu xi ħaġa ħażina hu importanti li nindmu. Il-Bibbja tgħid li xi ħadd jindem billi jiddispjaċih taʼ dak li jkun għamel u jagħmel kulma jistaʼ biex ma jerġax jagħmel dak l-iżball.—Ara Termini tal-Bibbja Spjegati, “Indiema.”

2. Għala għandna bżonn nitgħallmu dwar l-indiema? (Neħemija 8:​9-11)

² Peress li kuljum nidinbu, kollha kemm aħna għandna bżonn nitgħallmu dwar l-indiema. Bħala t-tfal taʼ Adam u Eva, aħna writna d-dnub u l-mewt, u ħadd minna ma jistaʼ jeħles minn dawn l-affarijiet. (Rum. 3:23; 5:12) Anke nies li huma msemmijin fil-Bibbja għall-fidi b’saħħitha li kellhom, bħall-appostlu Pawlu, kellhom jiġġieldu kontra x-xewqat ħżiena. (Rum. 7:​21-24) Imma dan ifisser li l-ħin kollu għandna nkunu mdejqin u skuraġġiti minħabba d-dnubiet li nagħmlu? Le, għax Ġeħova hu ħanin u jrid li nkunu ferħanin. Aħseb dwar il-Lhud fi żmien Neħemija. (Aqra Neħemija 8:​9-11.) Ġeħova ma ridhomx ikunu mdejqin iżżejjed dwar id-dnubiet li għamlu fil-passat. Hu xtaq li jaqduh bil-ferħ. Ġeħova jaf li meta nindmu se nkunu ferħanin u għalhekk jgħallimna dwar l-indiema. Jekk nindmu, nistgħu nkunu ċerti li Missierna, peress li hu mimli ħniena, se jaħfrilna.

3. X’se nitgħallmu f’dan l-artiklu?

³ F’dan l-artiklu se naraw tliet punti dwar l-indiema. L-ewwel, se nitgħallmu Ġeħova x’għallem lill-Iżraelin fuq l-indiema. Imbagħad, se naraw kif Ġeħova jgħin lin-nies jindmu. U fl-aħħar, se naraw Ġesù x’għallem lid-dixxipli tiegħu dwar l-indiema.

 ĠEĦOVA X’GĦALLEM LILL-IŻRAELIN FUQ L-INDIEMA?

4. Ġeħova x’għallem lill-Iżraelin dwar l-indiema?

⁴ Meta Ġeħova ta l-liġijiet lill-Iżraelin huma wiegħdu li se jobduhom, u Ġeħova wegħedhom li jekk jobdu dawk il-liġijiet kien se jipproteġihom u jberikhom. Dwar dawk il-liġijiet, hu qal: “Issa dan il-kmandament li qed nikkmandak illum la hu diffiċli wisq għalik, u lanqas mhu ’l bogħod minnek.” (Dewt. 30:​11, 16) Imma jekk ma kinux se jibqgħu leali lejh, pereżempju billi jaqdu allat foloz, ma kienx se jibqaʼ jipproteġihom u kienu se jbatu. Però, anke kieku kellu jiġri dan, xorta setgħu jerġgħu jsiru ħbieb tiegħu. Huma setgħu ‘jerġgħu lura lejn Ġeħova l-Alla tagħhom u jisimgħu minnu.’ (Dewt. 30:​1-3, 17-20) Dan ifisser li setgħu jindmu. B’hekk, Ġeħova kien jerġaʼ jersaq qrib tagħhom u jberikhom.

5. Ġeħova kif wera li ma qatax qalbu meta n-nies tiegħu m’obdewhx? (2 Slaten 17:​13, 14)

⁵ L-Iżraelin, għal darba wara l-oħra, m’obdewx lil Ġeħova apposta. Huma kienu jaqdu lill-allat foloz u għamlu ħafna affarijiet ħżiena oħra. Minħabba f’hekk, batew. Imma Ġeħova ma qatax qalbu minnhom u baqaʼ jipprova jgħinhom. Hu kemm-il darba bagħtilhom profeti biex jgħinhom jindmu u jerġgħu jibdew jaqduh b’qalbhom kollha.—Aqra t-​2 Slaten 17:​13, 14.

6. Ġeħova kif uża l-profeti biex juri lill-Iżraelin kemm hu importanti li jindmu? (Ara l-istampa.)

⁶ Ħafna drabi, meta l-Iżraelin ma kinux jobdu lil Ġeħova hu kien jibagħtilhom lill-profeti biex jgħidilhom x’kien se jiġri jekk ma jinbidlux, u biex jgħinhom. Pereżempju, Alla qal lil Ġeremija biex lill-Iżraelin jgħidilhom: “Erġaʼ lura, O Israel ir-ribelluża . . . Ma nħarisx iktar b’wiċċ irrabjat lejkom, għax jien leali . . . M’iniex se nibqaʼ nżomm f’qalbi għal dejjem. Biss agħraf l-iżball tiegħek, għax int kontra Ġeħova Alla tiegħek dnibt.” (Ġer. 3:​12, 13) Ġeħova qal lil Ġoel biex jgħidilhom: “Ejjew  lura għandi b’qalbkom kollha.” (Ġoel 2:​12, 13) Permezz taʼ Isaija qalilhom: “Tnaddfu; neħħu l-ħażen t’għemilkom minn quddiem għajnejja; tibqgħux tagħmlu l-ħażen.” (Isa. 1:​16-19) U permezz taʼ Eżekjel, Ġeħova staqsa: “Jaqaw jien nitgħaxxaq b’xi mod bil-mewt taʼ xi ħadd ħażin, . . . u mhux li dan idur lura minn triqatu u jibqaʼ jgħix? Għax jien ma niħux pjaċir meta xi ħadd imut, . . . mela, duru lura u ibqgħu għixu.” (Eżek. 18:​23, 32) Ġeħova jkun vera ferħan meta n-nies jindmu għax hu jixtieqhom jgħixu għal dejjem! Mela Ġeħova ma jistenniex lin-nies jindmu u mbagħad jibda jgħinhom. Ejja naraw xi eżempji oħra taʼ dan.

7. Ġeħova kif uża lil Ħosea u l-mara tiegħu biex jgħallem lill-Iżraelin?

⁷ Innota Ġeħova x’għallem lill-Iżraelin permezz tal-profeta Ħosea u l-mara tiegħu Gomer. Hi ma baqgħetx leali lejh, u telqitu biex tmur maʼ raġel ieħor. Ġeħova x’għamel? Peress li hu jaf kollox dwar kulħadd, qal lil Ħosea: “Erġaʼ ħobb il-mara li jħobbha raġel ieħor u li qed tagħmel adulterju, bħalma jien, Ġeħova, inħobb lill-poplu t’Iżrael waqt li huma jqimu allat oħrajn.” (Ħos. 3:1; Prov. 16:2) Innota li l-mara taʼ Ħosea kienet għadha qed tagħmel dnub serju, imma Ġeħova xorta qal lil Ħosea biex jaħfrilha u jerġaʼ jaċċettaha bħala l-mara tiegħu. a Bl-istess mod, Ġeħova ma kienx qataʼ qalbu mill-poplu tiegħu. Avolja kienu għadhom qed jagħmlu dnubiet serji, hu kien għadu jħobbhom, u allura baqaʼ jibagħtilhom il-profeti biex jgħinhom jinbidlu. Dan l-eżempju jurina li Ġeħova jaf kollox dwar kull persuna, u hu se jibqaʼ jipprova jgħin lil xi ħadd li qed jagħmel dnub serju biex jindem u jirranġa. (Prov. 17:3) Ejja naraw kif jagħmel dan.

KIF ĠEĦOVA JGĦIN LIN-NIES JINDMU

8. Ġeħova x’għamel biex jgħin lil Kajjin jindem? (Ġenesi 4:​3-7) (Ara l-istampa.)

⁸ Kajjin kien l-ewwel tifel taʼ Adam u Eva. Bħat-tfal kollha taʼ Adam u Eva, hu wiret ix-xewqa biex jagħmel dak li hu ħażin. Imma Kajjin ma provax jikkontrolla dawk ix-xewqat. Fil-fatt, il-Bibbja tgħid: “Dak li għamel kien ħażin.” (1 Ġw. 3:12) Jistaʼ jkun li Ġeħova għalhekk “ma ħarisx b’approvazzjoni lejn Kajjin u l-offerta tiegħu” meta kien qed joffri sagrifiċċju. Minflok ma pprova jinbidel għall-aħjar, “Kajjin imtela b’rabja kbira u dwejjaq.” Ġeħova x’għamel? Hu tkellem maʼ Kajjin. (Aqra Ġenesi 4:​3-7.) Innota li Ġeħova rraġuna b’qalb tajba maʼ Kajjin u qallu li jekk jagħmel dak li hu tajjeb kien se jbierku. Ġeħova qallu wkoll li r-rabja li kellu setgħet twasslu biex jagħmel xi ħaġa ħażina. B’dispjaċir, Kajjin ma semax minn Ġeħova u m’aċċettax l-għajnuna tiegħu. Imma avolja Kajjin ma semax minn Ġeħova, Alla ma ddeċidiex li mhu se jgħin lil ħadd iktar biex jindem!

9. Ġeħova kif għen lil David jindem?

⁹ Ġeħova kien iħobbu ħafna lir-Re David. Hu saħansitra qal li kien ‘raġel għal qalbu.’ (Atti 13:22) Imma David għamel  xi dnubiet serji ħafna bħal adulterju u qatel. Skont il-Liġi taʼ Mosè, David kellu jmut. (Lev. 20:10; Num. 35:31) Imma, Ġeħova xtaq jgħin lil David jindem. b Allura, bagħat lill-profeta Natan biex jitkellem miegħu, avolja David kien għadu ma nidimx. Natan uża eżempju biex jgħin lil David jifhem kemm kienu gravi d-dnubiet li għamel. (2 Sam. 12:​1-14) David fehem kemm kien weġġaʼ lil Ġeħova u nidem. Wara hu kiteb salm li juri kemm kien iddispjaċieh. (Slm. 51, sopraskrizzjoni) Dan is-salm illum jgħin lil ħafna nies li dinbu biex iħossuhom aħjar wara li jindmu. Kemm għandna napprezzaw li Ġeħova kien iħobb lil David u għenu jindem.

10. Kif tħossok dwar il-maħfra u l-paċenzja taʼ Ġeħova?

¹⁰ Ġeħova jobgħod kull tip taʼ dnub. (Slm. 5:​4, 5) Imma hu jaf li aħna kollha nidinbu, u peress li jħobbna jixtieq jgħinna. Hu dejjem jipprova jgħin lin-nies jersqu qrib lejh, anke dawk li għamlu dnubiet serji ħafna. Kemm għandna napprezzaw li nafu li Ġeħova jixtieq jaħfrilna! Iżjed ma naħsbu dwar il-paċenzja u l-maħfra taʼ Ġeħova, iżjed inkunu mmotivati biex nibqgħu leali u meta nidinbu nindmu mill-ewwel. Issa se naraw Ġesù x’għallem lid-dixxipli tiegħu dwar l-indiema.

DAK LI ĠESÙ GĦALLEM LID-DIXXIPLI TIEGĦU DWAR L-INDIEMA

11-12. Ġesù x’eżempju ġab biex juri li Ġeħova hu lest li jaħfer? (Ara l-istampa.)

¹¹ Meta kien wasal iż-żmien biex jidher il-Messija, Ġeħova uża lil Ġwanni l-Għammied biex jipprietka lin-nies u jgħidilhom jindmu. Meta Ġesù Kristu beda jipprietka, hu wkoll għallem lin-nies kemm kien importanti li jindmu.—Mat. 3:​1, 2; 4:17.

¹² Meta Ġesù kien fid-dinja, għallem  lin-nies li Missieru jixtieq ħafna jaħfer lil dawk li jidinbu. Mod kif għamel dan hu billi qal storja dwar missier u t-tifel tiegħu. It-tifel kien iddeċieda li jitlaq mid-dar u jagħmel xi affarijiet ħżiena ħafna. Imma wara xi żmien hu “ġie f’sensih” u reġaʼ mar id-dar għand missieru. Il-missier kif ħassu dwar it-tifel? Ġesù qal li “waqt li kien għadu ’l bogħod, missieru rah u tħassru. Imbagħad ġera lejh, għannqu, u biesu b’tenerezza.” It-tifel staqsa lil missieru biex jaħdem bħala qaddej tiegħu. Imma missieru ried jaħfirlu u qallu “ibni” u riedu jerġaʼ jkun parti mill-familja tiegħu. Il-missier qal: “Hu kien intilef u nstab.” (Luqa 15:​11-32) Meta Ġesù kien fis-sema żgur li kemm-il darba ra lil Missieru juri maħfra u qalb tajba maʼ dawk li nidmu. X’eżempju sabiħ qal Ġesù li juri kemm Ġeħova jaħfer!

13-14. L-appostlu Pietru x’tgħallem dwar l-indiema, u hu x’għallem lil oħrajn dwarha? (Ara l-istampa.)

¹³ L-appostlu Pietru tgħallem ħafna minn Ġesù dwar kif Ġeħova jaħfer lil dawk li jindmu. Pietru għamel ħafna żbalji u Ġesù kien lest li jaħfirlu. Pereżempju, meta Pietru qal li ma kienx jaf lil Ġesù tliet darbiet, ħassu ħażin ħafna. (Mat. 26:​34, 35, 69-75) Imma wara li Ġesù ġie rxoxtat, deher lil Pietru waħdu biex ikellmu. (Luqa 24:​33, 34; 1 Kor. 15:​3-5) Ġesù żgur li kien jaf li Pietru kien nidem u riedu jkun ċert li kien ħafirlu.

¹⁴ Pietru kien jaf x’jiġifieri li tindem u kif tħossok meta Ġeħova jaħfirlek. Allura, setaʼ jgħallem lil oħrajn dwar dan. Xi żmien wara l-festa taʼ Pentekoste, Pietru spjega lil grupp taʼ Lhud li huma kienu qatlu lill-Messija. Imma hu qalilhom: “Indmu u duru lura lejn Alla  biex hu jħassar id-dnubiet tagħkom, u b’hekk Ġeħova jagħtikom żmien taʼ serħan il-moħħ.” (Atti 3:​14, 15, 17, 19) Pietru wriehom li xi ħadd jindem billi jdur lura. Dan ifisser li jibda jaħseb bħalma jridu Ġeħova, jieqaf jagħmel id-dnub, u jibda jagħmel dak li jogħġob lil Ġeħova. Pietru qal ukoll li Ġeħova kien se jaħfer għalkollox, bħallikieku jħassar id-dnubiet u jisparixxu kompletament. U ħafna snin wara, Pietru żgura lill-Kristjani: “Ġeħova . . . qed juri paċenzja magħkom, għax ma jixtieqx li jkun hemm min jinqered imma jixtieq li kulħadd jindem.” (2 Pt. 3:9) Kemm għandna tama sabiħa li meta nagħmlu d-dnubiet, anke serji ħafna, jekk nindmu Ġeħova se jaħfrilna għalkollox!

15-16. (a) L-appostlu Pawlu kif tgħallem x’inhi l-maħfra? (1 Timotju 1:​12-15) (b) X’se naraw fl-artiklu li jmiss?

¹⁵ Sawl taʼ Tarsu għamel ħafna affarijiet ħżiena. Hu kien jippersegwita lill-Kristjani tal-bidu. Wisq probabbli, il-Kristjani kienu jaħsbu li hu qatt ma kien se jinbidel. Imma Ġesù kien jaf li Sawl setaʼ jinbidel u jindem. Ġesù u Ġeħova raw kwalitajiet sbieħ f’Sawl. Ġesù qal: “Jien għażilt lil dan ir-raġel.” (Atti 9:15) Biex jgħin lil Sawl jindem, Ġesù uża miraklu. (Atti 7:​58-60; 8:​1-3; 9:​1-9, 17-20) Wara li sar Kristjan, Sawl beda jissejjaħ bl-isem Pawlu. Ġesù tah xogħol x’jagħmel bħala appostlu. (Aqra l-​1 Timotju 1:​12-15.) Pawlu taʼ spiss kien jgħid kemm japprezza l-qalb tajba taʼ Ġeħova u Ġesù. Pawlu qal: “Alla b’qalb tajba qed jipprova jgħinek tindem.”—Rum. 2:4.

¹⁶ Darba, Pawlu semaʼ li l-kongregazzjoni f’Korintu kienet qed tħalli ħu jgħix ħajja immorali. L-appostlu Pawlu x’għamel? Minn dak li qal nistgħu nitgħallmu kif Ġeħova juri mħabba meta jiddixxiplina u kif juri ħniena meta xi ħadd jindem. Fl-artiklu li jmiss, se nitgħallmu kif nistgħu nuru ħniena bħalu billi niddiskutu x’ġara fil-kongregazzjoni taʼ Korintu.