Iż-​Żgħażagħ Jistaqsu . . .

X’Għandha Tkun il-​Ħarsa Tiegħi Lejn id-​Diskoteki?

“Kelli għalxiex immur​—biex nieħu verament gost.”​—Shawn.

“Ngħid il-​verità, kont nieħu gost​—taʼ l-​għaġeb il-​pjaċir li kont nieħu! Ħafna żfin, żfin il-​lejl kollu.”​—Ernest.

ID-​DISKOTEKI saru popolari ħafna f’dawn l-​aħħar snin. Ħafna żgħażagħ li jixtiequ jiddevertu jmorru spiss f’dawn id-​diskoteki u n-​nightclubs.

M’għandniex xi ngħidu, aħna lkoll nieħdu gost niddevertu. U l-​Bibbja tgħid li hemm “żmien li tidħak” u anki “żmien li tiżfen.” (Koħèlet 3:4) Madankollu, hija diskoteka post ideali għal divertiment bnin? Jew għandek għalfejn taħsibha darbtejn qabel ma tmur f’post bħal dan?

“Tbahrid”

Għalkemm il-​Bibbja ma tikkundannax laqgħat soċjali moderati, però din twissi kontra t-​“tbahrid.” (Galatin 5:​19-21) Fiż-​żminijiet tal-​Bibbja, it-​tbahrid spiss kien iwassal għal imġiba mhix kontrollata. Il-​profeta Isaija kiteb: “Gwaj għal dawk li jbakkru fil-​għodu, u jiġru għal wara s-​sokor; jiddawwru billejl sa ma jisħnu bl-​inbid. Kitarra u arpa, tanbur u flawt, u nbid x’jixorbu fl-​ikliet tagħhom, u xejn ma jaħsbu f’għemil il-​Mulej.”—Isaija 5:​11, 12.

F’dawn il-​laqgħat kien ikun hemm is-​“sokor” u l-​mużika mhix kontrollata. Dawn kienu jibdew minn kmieni u jibqgħu sejrin sa tard bil-​lejl. Innota wkoll l-​attitudni taʼ min jieħu sehem fit-​tbahrid​—dawn l-​uħud aġixxew qisu Alla ma jeżistix! Mela, mhux taʼ b’xejn li Alla kkundanna dawn il-​laqgħat. Imma Alla kif iħossu dwar dak li jseħħ f’ħafna mid-​diskoteki taʼ llum?

Ikkunsidra l-​fatti. Fattur wieħed hu li xi diskoteki għadhom jippermettu li jkun hemm żfin vjolenti. Sors wieħed jgħid li dan it-​tip taʼ żfin żviluppa f’nofs is-​snin tmenin f’diskoteki fl-​Istati Uniti wara żmien il-​pank. Beda minn tip taʼ żfin li fih min jieħu sehem joqgħod jaħbat  maʼ taʼ madwaru. Ġeneralment dan jinvolvi li min jieħu sehem jaqbeż ’il fuq u ’l isfel, jheżżeż rasu b’mod vjolenti, jimita l-​mod kif l-​annimali jagħtu bir-​ras, kif ukoll jaħbat maż-​żeffiena l-​oħra. Spiss, iż-​żeffiena wara jbatu minn ksur f’saqajhom u idejhom u minn feriti u ġieli kien hemm min weġġaʼ x-​xewka taʼ dahru jew rasu. Saħansitra kien hemm min miet. Barra minn hekk, f’xi diskoteki n-​nies jintrefgħu fuq l-​idejn minn folla u jinġarru fuq l-​idejn mgħollija. Mhux l-​ewwel darba jiġri li min ikun merfugħ jaqaʼ, u jispiċċa biex iweġġaʼ. U spiss jiġri li t-​tfajliet jintmessu b’modi li m’humiex xierqa.

Żgur li Alla ma jiħux pjaċir bi mġiba bħal din. Wara kollox, il-​Kelma tiegħu tordna lill-​Kristjani biex ‘iwarrbu l-​ħażen u l-​ġibdiet tad-​dinja, biex jgħixu bir-​rażna.’—Titu 2:12.

Il-​Mużika u d-​Droga

Ikkunsidra wkoll it-​tip taʼ mużika li tindaqq f’ħafna diskoteki. Xi wħud jispeċjalizzaw f’tipi taʼ hard rock jew heavy metal, mużika li fiha ħafna ritmu qawwi u kliem ħamallu. Imma f’ħafna diskoteki r-​rap, jew il-​hip-hop, huwa l-​iktar tip taʼ mużika li jindaqq. Din il-​mużika hija bl-​istess mod karatterizzata mis-​sess, il-​vjolenza, u r-​ribelljoni. Jistaʼ jkun li jekk tismaʼ mużika bħal din f’ambjent taʼ ħsara morali se tiġi effettwat? David Hollingworth, li jagħti l-​pariri professjonali dwar id-​diskoteki, qal: “Il-​mużika għandha effett psikoloġiku qawwi fuq in-​nies. Meta tiġborhom f’folol kbar tistaʼ titqanqal attitudni taʼ natura aggressiva.” Mhux taʼ b’xejn li f’għadd taʼ diskoteki fil-​bliet Amerikani kien hemm ħafna każi taʼ vjolenza. Ħafna nies iħossu li dan hu effett dirett tax-​xena mużikali li tippromwovi attività vulgari u kondotta feroċi. *

F’dawn l-​aħħar snin sar komuni wkoll l-​użu tad-​droga fid-​diskoteki. Waħda riċerkatriċi qalet li ‘kemm id-​diskoteki jsiru popolari hu konness direttament mal-​fatt taʼ kemm l-​użu illegali tad-​droga jkun disponibbli, varjat, u kemm din tittieħed.’ Fil-​fatt, hemm tip taʼ droga li s-​soltu jissejjaħ droga taż-​żfin. Xi wħud li jmorru d-​diskoteki saħansitra jużaw taħlita taʼ drogi. Fost l-​iktar droga li titħallat hemm il-​ketamine (loppju totali li jissejjaħ ukoll special K), li tistaʼ tissepara grupp taʼ proċessi mentali li s-​soltu jkunu konnessi flimkien, tikkaġuna dillirju, problemi fin-​nifs, u ħsara fis-​sistema tan-​nervituri. Il-​metamfetamina tistaʼ ttellef il-​memorja, tagħmel lill-​individwu aggressiv, vjolenti, u tistaʼ tagħmillu ħsara fil-​qalb jew fis-​sistema tan-​nervituri. Waħda mill-​iktar drogi popolari hija l-​ecstasy meħuda mill-​amfetamina. Din tistaʼ tħawwad lil dak li jkun, tagħmlu ansjuż, iġġiegħel il-​qalb tibda tħabbat b’iktar qawwa, tgħollilu l-​pressjoni, u tqabbdu deni qawwi. Kien hemm min miet minħabba li ħa l-​ecstasy.

Min juża d-​droga illegali jkun qed jikser il-​kmand tal-​Bibbja li jgħid li għandna “nitnaddfu minn kull tidnis tal-​ġisem u tar-​ruħ.” (2 Korintin 7:1) Huwa għaqli li tmur f’ambjent fejn hi xi ħaġa komuni li tintuża d-​droga?

Sħubija Ħażina

Ftakar fit-​twissija li spiss tiġi kwotata: “Ilħbiberija ħażina tħassar id-​drawwiet tajba.”  (1 Korintin 15:33) Bħal dawk li kienu moħħhom fit-​tbahrid fiż-​żminijiet Bibliċi, ħafna miż-​żgħażagħ li jmorru d-​diskoteki ma tantx jidhru interessati f’li jogħġbu ’l Alla. Fil-​fatt, ħafna minnhom jistgħu jiġu deskritti bħala wħud li “jħobbu aktar il-​pjaċir milli ’l Alla.” (2 Timotju 3:4) Tixtieq int verament tissieħeb maʼ nies bħal dawn?

Xi wħud għandhom mnejn jirraġunaw li jekk imorru f’diskoteka maʼ żgħażagħ Kristjani oħra se jkun hemm inqas periklu. Madankollu, iż-​żgħażagħ Kristjani li huma tabilħaqq “taʼ eżempju għal dawk li jemmnu . . . fl-​imġiba” wisq probabbli mhux se jkunu jridu jmorru. (1 Timotju 4:12) Anki jekk grupp taʼ żgħażagħ Kristjani jmorru f’diskoteka u jirnexxilhom jibqgħu flimkien bħala grupp, il-​mużika u l-​atmosfera ħażina moralment mhux se jinbidlu. Huma jistgħu jsibu ruħhom f’sitwazzjoni diffiċli jew imbarazzanti jekk l-​oħrajn jistidnuhom biex jiżfnu magħhom. Xi żgħażagħ saħansitra sabu ruħhom f’nofs taʼ ġlieda! Għalhekk, il-​kliem tal-​Bibbja juri kemm hu minnu: “Min jagħmilha maʼ l-​għaref, isir għaref, min imur mal-​boloh, jaqaʼ fl-​hemm.”—Proverbji 13:20.

Żfin Provokanti

Imbagħad trid tikkunsidra ż-​żfin fih innifsu. Hemm tip taʼ żfin verament stramb li sar popolari, l-​iktar fost l-​adolexxenti fl-​Istati Uniti. Ġeneralment dan jinżifen mal-​mużika rap bil-​kliem li jiddeskrivi l-​attività sesswali fid-​dettall. Iktar minn hekk, iż-​żifna nfisha timita r-​relazzjoni sesswali. Għalhekk, iċ-​ċaqliq taʼ dan it-​tip taʼ żfin ġie deskritt bħala ‘sess bil-​ħwejjeġ fuqek.’

Se jkunu jridu ż-​żgħażagħ Kristjani jinvolvu ruħhom f’dan it-​tip taʼ żfin? Mhux jekk iridu jogħġbu ’l Alla, li jordnalna ‘naħarbu ż-​żína.’ (1 Korintin 6:18) Xi wħud għandhom mnejn jirraġunaw, ‘Jekk kulħadd qed jagħmel hekk, żgur li m’huwiex daqshekk ħażin.’ Madankollu, jistaʼ jkun li l-​folla tkun qed tiżbalja. (Eżodu 23:2) Agħmel il-​qalb u żommilhom sod lil sħabek. Żomm kuxjenza tajba quddiem Alla!​—1 Pietru 4:​3, 4.

Kif Tiddeċiedi

Dan ma jfissirx li ż-​żfin kollu hu ħażin. Il-​Bibbja tgħidilna li s-​Sultan David tant feraħ wara li mar lura bl-​arka qaddisa tal-​patt lejn Ġerusalemm, li “beda jiżfen b’ħiltu kollha.” (2 Samwel 6:14) Fil-​parabbola taʼ Ġesù dwar l-​iben il-​ħali, il-​ferħ li kien hemm minħabba li l-​iben ġie lura inkluda “daqq u żfin.”—Luqa 15:25.

Xi forom taʼ żfin jistgħu bl-​istess mod ikunu aċċettati fost il-​Kristjani fil-​lokalità tiegħek. Xorta waħda, il-​bilanċ u l-​għaqal huma importanti. Hemm ħafna inqas periklu meta lmużika u ż-​żfin jitgawdew f’laqgħat Kristjani, fejn hemm kontroll u superviżjoni addattati, milli fid-​diskoteki. Fil-​laqgħat tal-​Kristjani li jkollhom superviżjoni tajba, iż-​żgħażagħ ma jinqatgħux għalihom imma jgawdu sħubija bnina maʼ Kristjani taʼ kull età.

Veru, jistaʼ jkun hemm xi restoranti filkomunità tiegħek fejn ikun hemm mużika u żfin aċċettabbli. Imma qabel ma taċċetta stedina biex tmur f’postijiet bħal dawn, tajjeb li tistaqsi mistoqsijiet bħal dawn: Liema tip taʼ reputazzjoni għandu dan il-​post? Huwa post għaż-​żgħażagħ biss? Jekk iva, x’ċans hemm li l-​atmosfera se tkun waħda bnina? Liema mużika se tindaqq? X’tip taʼ żfin ikun hemm? Il-​ġenituri tiegħi kif iħossuhom dwar li jien immur hemmhekk? Jekk tistaqsi mistoqsijiet bħal dawn se tkun tistaʼ tipproteġi lilek innifsek mill-​ħsara.

Shawn, li semmejna fil-​bidu, jiġbor kollox fi ftit kliem. Qabel ma sar Kristjan, hu kien imur id-​diskoteka. Hu jiftakar: “Ikun hemm ħafna mġiba ħażina fid-​diskoteki. Ġeneralment il-​mużika tkun maħmuġa, iż-​żfin huwa verament immorali, u l-​maġġuranza kbira minn dawk li jmorru f’dawn il-​postijiet għandhom motiv wieħed​—iridu jitilqu minn hemm maʼ xi ħadd li jistgħu jkollhom x’jaqsmu miegħu sesswalment.” Shawn ma baqax imur id-​diskoteka wara li studja l-​Bibbja max-​Xhieda taʼ Jehovah. Hu jagħti l-​opinjoni tiegħu wara l-​esperjenza qarsa tiegħu: “Dawn id-​diskoteki m’humiex post addattat għall-​Kristjani.”

[Nota taʼ taħt]

[Stampa f’paġna 24]

Xi żgħażagħ sabu ruħhom f’sitwazzjonijiet imbarazzanti fid-​diskoteki