L-Aħbar Tajba Skont Marku 8:1-38
8 F’dawk il-ġranet inġabret folla kbira u ma kellhom xejn x’jieklu. Allura għajjat lid-dixxipli u qalilhom:
2 “Qed nitħassarhom lil dawn in-nies, għax diġà ilhom miegħi tlett ijiem u m’għandhom xejn x’jieklu.
3 Li kelli nibgħathom lejn id-dar bil-ġuħ,* jagħtihom xi ħass ħażin fit-triq, u xi wħud minnhom ġew mill-bogħod.”
4 Imma d-dixxipli tiegħu wiġbuh: “F’dan il-post imwarrab, kif nistgħu nsibu biżżejjed ħobż biex inxebbgħu lil dawn in-nies?”
5 Ġesù staqsiehom: “Kemm-il ħobża għandkom?” Qalulu: “Sebgħa.”
6 Imbagħad hu qal lin-nies biex ipoġġu fl-art. Wara, ħa s-sebaʼ ħobżiet, qal talba, qasamhom, u tahom lid-dixxipli biex jagħtuhom lill-folla, u hekk għamlu.
7 Kellhom ukoll ftit ħut żgħir, u wara li rringrazzja lil Alla, qalilhom biex iqassmuhom ukoll.
8 Wara li kielu u xebgħu, ġabru sebat iqfief kbar b’dak li kien għad fadal.
9 Kien hemm madwar 4,000 raġel li kielu. Imbagħad bagħathom lura.
10 Hu telaʼ mill-ewwel fid-dgħajsa mad-dixxipli tiegħu u marru lejn ir-reġjun taʼ Dalmanuta.
11 Hemmhekk marru għandu l-Fariżej u bdew jargumentaw miegħu, u biex jittestjawh talbuh jagħmel miraklu f’isem Alla.
12 Għalhekk, iddispjaċieh ħafna u qal: “Din il-ġenerazzjoni għala trid tara miraklu? Naċċertakom li din il-ġenerazzjoni mhu se tara l-ebda miraklu.”
13 Wara li qal dan, telaq, reġaʼ telaʼ fuq id-dgħajsa, u mar ix-xatt l-ieħor.
14 Madankollu, id-dixxipli nsew jieħdu l-ħobż magħhom. Kellhom biss ħobża waħda fid-dgħajsa.
15 U Ġesù wissiehom b’mod ċar: “Oqogħdu attenti mill-ħmira tal-Fariżej u mill-ħmira t’Erodi.”
16 Għalhekk, bdew jargumentaw bejniethom minħabba li ma ħadux ħobż magħhom.
17 Meta ra dan, hu qalilhom: “Għala qed targumentaw għax m’għandkomx ħobż? Għadkom ma ndunajtux u ma fhimtux? Għadkom qed issibuha diffiċli biex tifhmu kollox?
18 ‘Għandkom għajnejn u ma tarawx; għandkom widnejn u ma tisimgħux.’ Ma tiftakrux
19 meta qsamt il-ħames ħobżiet għall-5,000 raġel? Kemm-il qoffa mlejtu b’dak li kien għad fadal?” Wiġbuh: “Tnax.”
20 “Meta qsamt is-sebaʼ ħobżiet għall-4,000 raġel, tiftakru kemm-il qoffa kbira mlejtu b’dak li kien fadal?” Wiġbuh: “Sebgħa.”
21 Għal dan qalilhom: “Għadkom ma tistgħux tifhmu?”
22 Issa waslu Betsajda. Hawnhekk xi nies ġabulu raġel li ma jarax u talbuh bil-ħniena biex ifejqu.
23 Ġesù qabad lir-raġel minn idu u ħarġu ’l barra mir-raħal. Wara li beżaq fuq għajnejh, qiegħed idejh fuqu u staqsieh: “Qed tara xi ħaġa?”
24 Ir-raġel ħares ’il fuq u qal: “Qed nara xi nies jimxu, imma qed narahom qishom siġar.”
25 Imbagħad reġaʼ messlu għajnejh, u r-raġel fieq u beda jara kollox ċar.
26 Għalhekk, bagħtu lejn id-dar u qallu biex ma jgħaddix mir-raħal.
27 Ġesù u d-dixxipli tiegħu telqu lejn l-irħula taʼ Ċesarija Filippi, u mat-triq beda jistaqsi lid-dixxipli: “In-nies min qed jgħidu li jien?”
28 Huma wiġbuh: “Hemm min qed jgħid Ġwanni l-Battista u min qed jgħid Elija. U oħrajn qed jgħidu li int wieħed mill-profeti.”
29 Imbagħad staqsiehom: “Iżda intom min tgħidu li jien?” Pietru wieġbu: “Int il-Kristu.”
30 Għal dan hu kkmandahom b’mod sod biex ma jgħidu lil ħadd min kien.
31 Ukoll, beda jgħallimhom li hu, Bin il-bniedem, kien se jkollu jgħaddi minn ħafna tbatija u ma kienx se jiġi aċċettat mill-anzjani,* mill-qassisin importanti, u mill-iskribi. Qalilhom ukoll li kellu jinqatel u jiġi rxoxtat wara tlett ijiem.
32 Fil-fatt, hu kien qed jgħidilhom dan ċar u tond. Imma Pietru ħadu fil-ġenb u beda joġġezzjona.*
33 Għal dan, Ġesù dar, ħares lejn id-dixxipli tiegħu, u kkoreġa* lil Pietru billi qallu: “Itlaq minn quddiemi, Satana, għax m’intix taħseb bħalma jaħseb Alla, imma bħalma jaħsbu n-nies.”
34 Issa hu għajjat lill-folla u lid-dixxipli tiegħu u qalilhom: “Jekk xi ħadd irid jiġi warajja, ma jridx jgħix iktar għalih innifsu, imma jrid jissaporti l-persekuzzjoni* u jibqaʼ miexi warajja.
35 Għax min jipprova jsalva ħajtu,* imut, imma min imut minħabba li jkun dixxiplu tiegħi u minħabba l-aħbar tajba, se jgħix.
36 Għax x’jiswa li bniedem ikollu l-affarijiet kollha tad-dinja imma jitlef ħajtu?*
37 Jew x’se jagħti bniedem biex jixtri ħajtu?*
38 Din il-ġenerazzjoni hi midinba* u mhux leali* lejn Alla. Jekk xi ħadd minnha jistħi għax hu dixxiplu tiegħi u għax jemmen f’dak li ngħid jien, meta jien, Bin il-bniedem, niġi bl-awtorità kbira taʼ Missieri mal-anġli qaddisa, jien ukoll se nistħi ngħid li hu dixxiplu tiegħi.”
Noti taʼ taħt
^ Jew “sajmin.”
^ Letteralment “iċanfru.”
^ Letteralment “ċanfar.”
^ Jew “imma jrid jaċċetta z-zokk tat-tortura tiegħu.” Ara Termini tal-Bibbja Spjegati.
^ Jew “ruħu.”
^ Jew “ruħu.”
^ Jew “ruħu.”
^ Jew “tagħmel id-dnub.”
^ Letteralment “adultera.”
