L-Ewwel Ktieb taʼ Samwel 1:1-28
1 Issa kien hemm raġel Efrajmi li kien jgħix Ramatajm-sofim* fir-reġjun muntanjuż t’Efrajm. Dan kien Elkana bin Ġeroħam, bin Eliħu, bin Toħu, bin Suf.
2 Hu kellu żewġ nisa. Waħda kien jisimha Ħanna u l-oħra Peninna. Peninna kellha t-tfal, imma Ħanna ma kellhiex.
3 Kull sena, dan ir-raġel kien jitlaq minn beltu u jmur Silo biex iqim* u joffri sagrifiċċju lil Ġeħova tal-armati. Hemmhekk kien hemm iż-żewġt itfal t’Għeli, Ħofni u Fineħas, jaqdu bħala qassisin taʼ Ġeħova.
4 Darba minnhom meta Elkana offra s-sagrifiċċju, hu ta porzjonijiet lil martu Peninna kif ukoll lit-tfal tagħha subien u bniet kollha,
5 imma lil Ħanna taha porzjon speċjali għax lilha kien iħobb. Imma Ġeħova ma kienx taha tfal.*
6 Iktar minn hekk, il-mara l-oħra kienet il-ħin kollu taqbad magħha biex tweġġagħha għax Ġeħova ma kienx taha tfal.
7 Hekk kienet tagħmlilha sena wara l-oħra. Kull darba li Ħanna kienet titlaʼ fid-dar taʼ Ġeħova, il-mara l-oħra tant kienet taqbad magħha li kienet tibki u ma tikolx.
8 Imma żewġha Elkana qalilha: “Ħanna, għala qed tibki u m’intix tiekol, u għala int daqshekk imdejqa? M’iniex jien aħjar minn għaxart itfal għalik?”
9 Imbagħad wara li kienu kielu u xorbu f’Silo, Ħanna telqet minn fejn kienet. F’dak iż-żmien, Għeli l-qassis kien joqgħod fuq is-siġġu ħdejn il-koxxa tal-bieb tat-tempju* taʼ Ġeħova.
10 Ħanna kienet iddisprata ħafna,* u bdiet titlob lil Ġeħova u tibki kemm tiflaħ.
11 U għamlet din il-wegħda: “Jekk jogħġbok Ġeħova tal-armati, ara d-dwejjaq kbar tiegħi u ftakar fija. Jekk ma tinsinix u tagħtini tifel, jien nagħtih lilek Ġeħova l-jiem kollha taʼ ħajtu, u xagħru ma jinqatax.”
12 Waqt li hi talbet fit-tul quddiem Ġeħova, Għeli qagħad iħares lejha.
13 Ħanna kienet qed titkellem f’qalbha, xofftejha biss kienu qed jiċċaqalqu u leħinha ma kienx jinstemaʼ. Allura Għeli ħaseb li kienet fis-sakra.
14 Għeli qalilha: “Kemm se ddum fis-sakra? Tibqax tixrob inbid.”
15 Ħanna wieġbet: “Le, sidi! Jien għandi stress kbir.* Ma xrobtx inbid jew xorb alkoħoliku ieħor, imma qed niftaħ qalbi maʼ Ġeħova.
16 Tqisx lill-qaddejja tiegħek bħala mara li mhi tajba għal xejn, għax jien s’issa tkellimt minħabba t-tbatija u d-dwejjaq kbar tiegħi.”
17 Imbagħad Għeli wieġeb: “Mur fil-paċi, u jalla l-Alla t’Iżrael jagħtik dak li tlabtu.”
18 Hi wieġbet: “Jalla l-qaddejja tiegħek issib il-ħniena f’għajnejk.” U hi marret għal triqitha, kielet, u ma baqgħetx imdejqa.
19 Imbagħad il-familja qamu kmieni filgħodu u mielu quddiem Ġeħova, u wara dan marru lura lejn darhom f’Rama. Elkana kellu relazzjonijiet sesswali maʼ martu Ħanna, u Ġeħova ftakar fiha.
20 Fi żmien sena,* Ħanna ħarġet tqila u welldet iben u semmietu Samwel,* għax qalet, “mingħand Ġeħova tlabtu.”
21 Maż-żmien, Elkana telaʼ man-nies kollha taʼ daru biex joffri lil Ġeħova s-sagrifiċċju taʼ kull sena u biex jippreżenta l-offerta tal-wegħda li għamel.
22 Imma Ħanna ma telgħetx, għax qalet lil żewġha: “Le, mhux se nitlaʼ għalissa. Malli t-tifel jaqtaʼ l-ħalib, nieħdu quddiem Ġeħova u jibqaʼ hemmhekk.”
23 U żewġha Elkana qalilha: “Agħmel dak li taħseb li hu l-aħjar.* Oqgħod id-dar sakemm jaqtaʼ l-ħalib. Jalla Ġeħova jagħmel ċert li dak li għedt isir.” Għalhekk, il-mara qagħdet id-dar u baqgħet treddaʼ lil binha sakemm qataʼ l-ħalib.
24 Malli qataʼ l-ħalib, hi ħaditu fid-dar taʼ Ġeħova f’Silo, flimkien maʼ barri taʼ tliet snin, efa* dqiq, u ġarra kbira nbid.
25 Imbagħad inqatel il-barri, u t-tifel ittieħed għand Għeli.
26 U qaltlu: “Sidi, naħliflek li* jien dik li kont miegħek f’dan il-post biex nitlob lil Ġeħova.
27 Kien għal dan it-tifel li tlabt, u Ġeħova tani dak li tlabtu.
28 U jien issa se nagħtih* lil Ġeħova. Għax il-jiem kollha taʼ ħajtu, ikun taʼ Ġeħova.”
U hu* miel hemmhekk quddiem Ġeħova.
Noti taʼ taħt
^ Jew “Rama.”
^ Jew “imil quddiem.”
^ Letteralment “għalqilha ġufha.”
^ Jiġifieri t-tabernaklu.
^ Jew “ruħha kienet mimlija mrar.”
^ Jew “mara mnikkta fl-ispirtu.”
^ Jew forsi “Meta kien il-waqt.”
^ Ifisser “Isem Alla.”
^ Letteralment “dak li hu tajjeb f’għajnejk.”
^ Jew “daqskemm hi ħajja ruħek.”
^ Letteralment “nisilfu.”
^ Milli jidher Elkana.
