स्तोत्रं १३९:१-२४
दावीदचं गीत. स्तुतिगीत. संचालकासाठी.
१३९ हे यहोवा, तू मला तपासून पाहिलं आहेस आणि तू मला ओळखतोस.+
२ माझं बसणं आणि माझं उठणं तुला माहीत आहे.+
माझे विचार तू दुरूनच ओळखतोस.+
३ मी प्रवास करतो आणि विश्रांती घेतो, तेव्हा तू मला पाहतोस;*माझे सर्व मार्ग तू जाणतोस.+
४ हे यहोवा, माझ्या तोंडातून शब्द फुटण्याआधीचतुला तो माहीत असतो.+
५ माझ्या मागे आणि पुढे, सर्व बाजूंनी तू माझं रक्षण करतोस,तू आपला हात माझ्यावर ठेवतोस.
६ हे ज्ञान माझ्या समजण्यापलीकडे;*माझ्या आवाक्याबाहेरचं आहे.*+
७ मी तुझ्या पवित्र शक्‍तीपासून* निसटून कुठे जाऊ शकतो?
तुझ्यासमोरून मी कुठे पळून जाऊ शकतो?+
८ जर मी आकाशात चढून गेलो, तर तू तिथे असशील,आणि जर मी कबरेत* अंथरूण घातलं, तर पाहा! तिथेही तू असशील.+
९ जर मी पहाटेच्या पंखांवर स्वार होऊन,सर्वात दूरच्या समुद्राजवळ राहायला गेलो,
१० तर, तिथेही तुझा हात मला मार्ग दाखवेलआणि तुझा उजवा हात मला सांभाळेल.+
११ “अंधार मला नक्कीच लपवू शकेल,” असं जर मी म्हणालो,तर माझ्याभोवती रात्रीचा अंधार, प्रकाशात बदलेल.
१२ काळोखही तुझ्यासाठी पुरेसा दाट नसेल;उलट, रात्रसुद्धा दिवसाइतकीच लख्ख असेल.+
तुझ्यासाठी काळोख आणि प्रकाश सारखाच!+
१३ कारण तूच माझे अवयव* निर्माण केलेस;माझ्या आईच्या पोटात,* तू मला पडद्याआड ठेवलंस.+
१४ तू मला किती अद्‌भुत रितीने बनवलंस,+ हे पाहून मी विस्मित होतोआणि म्हणून मी तुझी स्तुती करतो!
तुझी कार्यं अद्‌भुत आहेत,+याची मला जाणीव आहे.
१५ जेव्हा मला गुप्त ठिकाणी बनवण्यात आलं
आणि पृथ्वीच्या सगळ्यात खोल भागांत मी आकार घेत होतो,*तेव्हा माझी हाडं तुझ्यापासून लपलेली नव्हती.+
१६ मी गर्भात होतो, तेव्हा तुझ्या डोळ्यांनी मला पाहिलं;माझ्या शरीराच्या भागांपैकी एकही अस्तित्वात येण्याआधी,त्या सर्वांबद्दल आणि त्यांची रचना झाली त्या दिवसांबद्दल,तुझ्या पुस्तकात लिहिलेलं होतं.
१७ म्हणूनच, हे देवा, तुझे विचार मला फार मौल्यवान वाटतात!+
त्यांची बेरीज करता येणार नाही!+
१८ मी ते मोजू लागलो, तर त्यांची संख्या वाळूच्या कणांपेक्षाही जास्त असेल.+
सकाळी जाग आल्यावरही, मी ते मोजतच असेन.*+
१९ हे देवा, कृपा करून दुष्टांचा नाश कर!+
म्हणजे हिंसाचार करणारे* माझ्यापासून दूर होतील.
२० जे दुष्ट हेतूने* तुझ्याविरुद्ध बोलतात,ते तुझे शत्रू आहेत; ते तुझ्या नावाचा गैरवापर करतात.+
२१ हे यहोवा, जे तुझा द्वेष करतात, त्यांचा मी द्वेष करत नाही का?+
जे तुझ्याविरुद्ध बंड करतात, त्यांची मला घृणा वाटत नाही का?+
२२ हो, अगदी मनापासून मी त्यांचा द्वेष करतो.+
ते खरोखर माझे शत्रू आहेत.
२३ हे देवा, मला तपासून पाहा आणि माझं मन ओळख.+
माझी पारख कर आणि माझ्या चिंता* जाणून घे.+
२४ चुकीच्या मार्गावर नेणारी एखादी गोष्ट तर माझ्यात नाही ना, हे पाहा+आणि मला सर्वकाळाच्या मार्गावर चालव.+
तळटीपा
^ शब्दशः “मापतोस.”
^ किंवा “माझ्यासाठी खूपच अद्‌भुत.”
^ किंवा “माझ्या मोजण्यापलीकडे आहे.”
^ शब्दार्थसूची पाहा.
^ हिब्रू भाषेत “शिओल.” शब्दार्थसूची पाहा.
^ शब्दशः “गुरदे.”
^ किंवा “उदरात.”
^ शब्दशः “विणला जात होतो.”
^ शब्दशः “मी अजूनही तुझ्यासोबत आहे.”
^ किंवा “रक्‍तपाताचे दोषी.”
^ किंवा “स्वतःच्या कल्पनेप्रमाणे.”
^ किंवा “मला अस्वस्थ करणारे विचार.”
