A Zeezi maana rasem a yiib Samaari. Rẽ poore a kula a ba-yirã Galɩle soolmẽ wã. Yaa sɩd t’a moona koɛɛgã wʋsg Zʋʋde, la a sẽn kẽng Galɩle wã pa sẽn na n tɩ vʋʋs ye. A maneg n wɩnga ne koɛɛgã moonego. La a ra miime tɩ nebã pa na n deeg-a sõma ye. Bala wa yẽ mengã sẽn yeelã, “Wẽnnaam no-rɛɛs ka paamd waoogr a meng ba-yirẽ ye.” (Zã 4:44) A karen-biisã ka pa ne-a ye. Ned fãa leba a yiri, n tɩ tʋmd a tʋʋma.

Koe-bʋg la a Zeezi ra taasd nebã? A ra yeta nebã yaa: “Wẽnnaam soolem kolgame. Tek-y yam n bas y yel-wẽnã la y tẽ koe-noogã.” (Mark 1:15) Nebã manesem yɩɩ wãna? Galɩle neb wʋsg reega a Zeezi sõma, ne waoogre. La pa a koɛɛgã yĩng bal ye. Kiis a wãn sẽn looge, Galɩle neb kẽer sẽn kẽng Zeruzalɛm n na n tɩ maan Pakã yãa yel-soalmã a Zeezi sẽn maanã.—Zã 2:23.

Yɛ la a Zeezi sɩng a koe-moonegã Galɩle tẽngã? Wõnda yaa Kana, zĩig ning a sẽn da kẽng yi-kãadem kibsã, n maan yel-solemd tɩ koom lebg rãamã. So-kãngã wã, a wʋmame tɩ biig n ka laafɩ n dat n ki. Yaa naab a Erood Ãntipaas tʋm-tʋmd-kãseng a ye biiga. A Ãntipaas la sẽn kɩt tɩ b fiuug a Zãmbatiis zugã. A tʋm-tʋmdã wʋmame t’a Zeezi yii Zʋʋde n wa Kana. Raoã yii a yirã Kapɛrnawom ne sũ-sãang n wa Kana n na n gẽes a Zeezi. A sẽn yã-a wã, a yeel-a-la woto: “Zu-soaba, wa-y tao-tao tɩ m biigã ra wa ki ye.”—Zã 4:49.

A Zeezi sẽn leok raoã to-to wã tog n ling-a-la wʋsgo. A yeel-a lame yaa: “Kẽng tɩ f biigã vɩɩme.” (Zã 4:50) A Erood tʋm-tʋmdã tẽe a Zeezi goamã, n sɩd rɩk yir sore. A tek n sega yẽ mengã tʋm-tʋmdb sẽn da wat n na n togs-a kiba-noogo. B yeel-a lame t’a biigã bãag sãoogame. A sok-b lame n na n bãng sẽn yɩ wakat ning la bãagã sãoog-yã.

B leokame tɩ yɩɩ “zaamẽ wĩnto-sʋk sẽn loog lɛɛr a yembr la a yĩn-wɩngrã sig-yã.”—Zã 4:52.

Raoã bãngame tɩ kell n yaa wakat ning a Zeezi sẽn yeel-a t’a biigã vɩɩmẽ wã bal kɛpɩ. Yẽ ne a yirã rãmb fãa lebga a Zeezi karen-biisi. Yaool n yaa rakãagre, n tar tʋm-tʋmdba.

Naoor a yiib la a Zeezi maan yel-solemd Kana. Pipi wã, a kɩtame tɩ koom lebg rãam. Yiib-n-soabã a paa sẽn ta kilo 26 zĩigẽ, n sãoog biig sẽn da bẽede. A ra maana yel-soalem a taaba, la biigã sãoogrã yɩɩ yel-solemd sẽn kell n kõ kaset t’a lebg n waa Galɩle. Wilga vẽeneg t’a yaa no-rɛɛs Wẽnnaam sẽn yãke. La rẽ yĩnga, nebã na n waoog-a-la wa sẽn segdã bɩ?

A sã n wa ta a ba-yirã Nazarɛte, bũmb ning sẽn na n maan be wã n na n kɩt tɩ d bãnge.