D saam-biisi,

Yʋʋmd 2008 wã yʋʋm-vẽkr kiuugã tɛka, sõss sẽn tar yamleoog n da yit fãrendã Gũusg Gasg ning d sẽn yiisd nebã fãa yĩngã pʋgẽ, t’a gom-zugã yetẽ tɩ “ Imitez leur foi. ” Yaa kiis a tãab-tãab la d ra yiisd sõs-kãense, hal tɩ b kareng ra noom neb wʋsgo!

Bõe la neb kẽer yeel sõs-kãensã wɛɛngẽ? Pag a ye sẽn karem a Mart kibarã n sa, a yeela woto: “M sẽn wa n karemdẽ wã, m laame. Bala mam kell n yaa wa a Marte. Wakat fãa m datame tɩ m sã n na n deeg neb sãand bɩ yɩ sõma, hal tɩ sasa ning bɩ m mi n yĩm tɩ m tog n vʋʋsame la m paam n sõs ne m sãambã.” Bi-pugl a ye me sẽn karem a Ɛstɛɛr kibarã yeelame: “Mam bãngame tɩ futã la mengã manegrã tõe n wa paka tõnd hal tɩ loog nugu. D segd n manegda d mens sõma yaa sɩda, la d pa rat tɩ lebg hobragi ye. A Zeova sẽn get n yɩɩd yaa tõnd sẽn yaa a soab d sũurã pʋgẽ wã.” Pag a ye me karma sõsg ning sẽn gomd a Pɩɛɛr yellã, n yeel woto: “Kibarã kẽe maam hal sõma, tɩ yaa wa m zĩnda be. M tõog n mamsa baa yel-bõonesã fãa, tɩ lebg vẽeneg m yamẽ!”

Nin-kãensã la neb ka tɛk gʋlsa Siglgã taoor lʋɩtb Sullã n na n wilg b mi-beoog sõs-kãensã yĩnga. B goamã wilgdame tɩ tʋm-tʋmd a Poll sẽn da yeel tɩ “bũmb fãa sẽn gʋls pĩndã gʋlsa tõnd zãmsg yĩngã” yaa sɩda. (Rom 15:4) Hakɩka, a Zeova kɩtame tɩ b gʋls kiba-kãensã Biiblã pʋgẽ tõnd saglg yĩnga. Tõnd fãa tõe n dɩka yam kiba-kãensã pʋsẽ, baa d sẽn be tũudum hakɩkã pʋgẽ sẽn kaoos to-to.

D sagend-y lame tɩ y sẽn paam sebrã, bɩ y modg n karm-a n da gũ ye. Sõsd-y sebrã zug y zak pʋgẽ Biibl zãmsgã sasa, tɩ na n yɩɩ y kambã noogo. D sã n wa zãmsd seb-kãngã tigingã Biibl zãmsgã sasa, bɩ y ra vaal baa yaa vugr ye. Maag-y y yĩng n karm-a neere, la y ra maan var-var ye. Y sã n wa karemd ned kibar bɩ y mams bũmb fãa y yamẽ, n ning y meng a soab zĩigẽ. Modg-y tɩ yɩ wa y zĩnda be, tɩ bũmb fãa yaa vẽeneg y yamẽ. Bʋgs-y n ges-y sẽn be-b kibarã pʋgẽ wã sẽn tall manesem ningã, la y tags n ges yãmb sẽn da na n maanega, sã n da yaa yãmba.

D sẽn yiis seb-kãngã tɩ yãmb me na n paam n karmã nooma tõnd wʋsgo. Wẽnd na kɩt t’a sõng yãmb ne y zakã rãmba! D nong-y-la wʋsgo. Wẽnd na ning-y barka!

A Zeova Kaset rãmbã Siglgã taoor lʋɩtb Sulli