1, 2. A Soll ra kẽnda Damaas n na n tɩ maan bõe?

 RAP sull n dɩk Damaas sore, n da rat ne b sũur fãa n tɩ tʋm tɩ nare. B ra rabd n na n tɩ yiisa a Zeezi karen-biisã nebã sẽn kisã b zagsã pʋsẽ ne pãnga, n sẽb-ba, n yaal-ba, la b tall-b n kẽng Zerizalɛm tɩ Sãnedrẽ wã neb sɩbg-ba.

² B taoor soab a Soll ra zoe n tara taale, ned kʋʋb yĩnga. a Sẽn nan pa kaoose, nebã sẽn wa n lobd a Etɩɛn sẽn yaa a Zeezi karen-biig sẽn maan sɩd ne-a wã kugã, a Soll ra getame t’a sũur noom ne rẽ. (Tʋʋ. 7:57–8:1) Rẽ poore, a Soll sɩnga a Zeezi karen-biis nins sẽn da be Zerizalɛmmã namsgo. Leb n yaa yẽ n lʋɩ neb sull taoore, tɩ b kẽng tẽns a taab pʋsẽ n tɩ nams a Zeezi karen-biisã. A Soll da ratame tɩ neb nins fãa sẽn tũud “sorã” menem zãnga.—Tʋʋ. 9:1, 2; ges-y zĩ-gũbrã: “ A Soll paama sor n na n tɩ yõg neb Damaase.”

3, 4. a) Bõe n paam a Solle? b) Sogs-bʋs la d na n leoke?

³ Zĩig pʋgẽ, vẽenem n yi saasẽ n yãg n bui-a. Neb nins sẽn da togd sor ne-a wã yãa vẽenemã, la b ra yasame n pa tõe n gom ye. Vẽenemã buii a Soll t’a lʋɩ tẽnga. A sẽn da pa le ne wã, a wʋma koɛɛg sẽn yit saasẽ sẽn yeel-a yaa: “Solle, Solle, bõe yĩng tɩ fo namsd maam?” Rẽ linga a Soll t’a leok yaa: “Zu-soaba, yãmb yaa ãnda?” Leoor ning a sẽn paamã sɩd ling-a-la wʋsgo. Zu-soabã leok-a lame yaa: “Mam yaa a Zeezi, fo sẽn namsd a soabã.”—Tʋʋ. 9:3-5; 22:9.

⁴ A Zeezi pipi goam nins a sẽn togs a Sollã tõe n sõnga tõnd tɩ d bãng bõe? D sã n lebg n tẽeg yɛlã sẽn yɩ to-to a Soll sẽn wa n lebg a Zeezi karen-biigã, wãn to la rẽ tõe n naf tõndo? A Soll sẽn lebg a Zeezi karen-biigã poore, tigimsã fãa neb ra zĩi bãane. Bũmb nins sẽn maan sasa kãnga sõngda tõnd tɩ d bãng bõe?

5, 6. A Zeezi sẽn togs a Soll goam ninsã sõngda tõnd tɩ d bãng bõe?

⁵ A Zeezi sẽn yals a Soll Damaas sorã zugã, a pa sok-a yaa: “Bõe yĩng tɩ fo namsd mam karen-biisã?” Wa d sẽn yã yĩngrã, a sok-a lame yaa: “Bõe yĩng tɩ fo namsd maam?” (Tʋʋ. 9:4) Hakɩɩka, a Zeezi karen-biisã sã n namsdẽ, yẽ me namsdame.—Mat. 25:34-40, 45.

⁶ B sã n namsda yãmb y sẽn tẽed Kiristã yĩnga, y tõe n basa y yam t’a Zeova ne a Zeezi miime tɩ yɛlã pa nana ne-y ye. (Mat. 10:22, 28-31) A Zeova tõeeme n pa kɩt tɩ y zu-loeesã sa zĩig pʋgẽ ye. Tẽeg-y t’a Soll sẽn wa n teend neb nins sẽn kʋ a Etɩɛnnã, la a sẽn wa n kẽng Zerizalɛm n tɩ yiis a Zeezi karen-biisã b zagsã pʋsẽ ne pãngã, a Zeezi ra neeme. (Tʋʋ. 8:3) La a Zeezi pa kɩt tɩ b bas a karen-biisã wakat kãng ye. Baasg zãnga, a Zeova tũnuga ne a Zeezi n kõ a Etɩɛn la a karen-biis a taabã pãnga, tɩ b kell n maan sɩd ne-a.

7. B sã n wa namsd yãmba, bõe la y segd n maan n tõog toogo?

⁷ Ad bũmb a wãn y sẽn tõe n maane, sẽn na yɩl n tõog toog b sã n wa namsd yãmba: 1) Yãk-y yam n kell n maan sɩd ne a Zeova baa sẽn wa n yaa a soaba, 2) kos-y-yã a Zeova sõngre, (Fili. 4:6, 7) 3) bas-y sũ-dokrã ne a Zeova, (Rom. 12:17-21) 4) kɩs-y sɩd t’a Zeova na n kõ-y-la pãng tɩ y tõog toogo, hal n tãag wakat ning a sẽn na n kɩt tɩ y zu-loɛɛgã sa wã.—Fili. 4:12, 13.

8, 9. A Ananiyaas manesem yɩɩ wãna, tʋʋmd ning a Zeezi sẽn bobl-a wã wɛɛngẽ?

⁸ A Soll sẽn sok a Zeezi tɩ “Zu-soabã yãmb yaa ãnda?” t’a Zeezi leok-a wã poore, a Zeezi yeelame yaa: “Yik n kẽ tẽngã pʋgẽ, tɩ b na n togsa foo bũmb ning f sẽn segd n maane.” (Tʋʋ. 9:6) A Soll sẽn da pa le ne baa fʋɩ wã yĩnga, rap nins sẽn da be ne-a wã tɛɛ-a lame n kẽng Damaase. Beenẽ, a loee noore, la a  pʋʋs rasem a tãabo. Sasa kãnga, a Zeezi goma a Soll yell ne a karen-biig a ye sẽn da be Damaase. A yʋʋr ra yaa a Ananiyaase. A ra tara ‘yʋ-noog Zʋɩf-rãmb nins sẽn be be wã sʋka.’—Tʋʋ. 22:12.

⁹ A Zeezi sẽn da vʋʋgã, n leb n yaa tigingã zu-soabã ra gomda ne a Ananiyaas mengã, n na n bobl-a tʋʋmd sẽn tar yõod wʋsgo. Ra yaa zu-zẽkr tʋʋmde, leb n yaa tʋʋmd sẽn da pa nana. A Zeezi sẽn yeel a Ananiyaas t’a tɩ gom ne a Sollã, a leokame yaa: “Zu-soaba, mam wʋma neb wʋsg sẽn gomd ra-kãngã yelle, la wẽng ning fãa a sẽn maan yãmb nin-sõamyã nins sẽn be Zerizalɛmmã yelle. A waa ka ne tõog a sẽn deeg maan-kʋʋdbã taoor dãmb nengẽ n na n yõg neb nins fãa sẽn pʋʋsd ne yãmb yʋʋrã.”—Tʋʋ. 9:13, 14.

10. A Zeezi sẽn gom ne a Ananiyaas to-to wã wilgda tõnd bõe?

 ¹⁰ A Zeezi pa zab a Ananiyaas a sẽn togs sẽn da be a sũurẽ wã yĩng ye. La a wilg-a-la a sẽn segd n maanã vẽenega. Sẽn paase, a Zeezi wilgame t’a nong-a lame, n togs-a bũmb ning sẽn kɩt t’a rat t’a tʋm tʋʋm-kãngã sẽn pa nana wã. A Zeezi yeela a Soll wɛɛngẽ yaa: “Ra-kãngã yaa tʋʋm-teoog mam sẽn yãk t’a na n wilg bu-zẽmsã ne rĩm-dãmbã la Israyɛll nebã mam yʋʋrã. Bala mam na n wilg-a-la namsg nins fãa a sẽn segd n paam mam yʋʋrã yĩngã vẽenega.” (Tʋʋ. 9:15, 16) A Ananiyaas tũu a Zeezi sẽn yeelã tao-tao. A kẽnga a Soll sẽn da namsd kiris-nebã nengẽ n yeel-a yaa: “M saam-biig a Solle, Zu-soab a Zeezi sẽn vẽneg a meng ne foo, f sẽn wa n be sorã zug n watẽ wã n tʋm maam sẽn na yɩl tɩ f ninã le puki, la f pid ne vʋʋsem sõngo.”—Tʋʋ. 9:17.

11, 12. Bõe la d tõe n bãng a Zeezi ne a Ananiyaas la a Soll kibarã pʋgẽ?

¹¹ D bãngda bũmb wʋsg a Zeezi ne a Ananiyaas la a Soll kibarã pʋgẽ. Wala makre, a Zeezi n lʋɩt taoor koɛɛgã mooneg pʋgẽ, wa a sẽn da pʋlmã. (Mat. 28:20) Baa ne a Zeezi sẽn pa gomd ne nebã vẽeneg-vẽeneg rũndã-rũndã wã, ne tʋm-tʋmd sẽn tũud sɩdã maasem, a geta koɛɛgã mooneg yelle. Yaa tʋm-tʋmd kãng la a yãk t’a ges a zakã rãmb yelle. (Mat. 24:45-47) Koe-moondbã la so-pakdbã paamdame tɩ Siglgã taoor lʋɩtb sull wilgd-b sore, tɩ b tõe n tɩ paam b rãmb nins sẽn dat n bãng n paas Kiristã zugã. Wa d sẽn yã sak ning sẽn loogã pʋgẽ wã, nin-kãensã sʋka, bãmb wʋsg pʋʋsa Wẽnnaam n kos-a t’a wilg-b sore, la rẽ poore, a Zeova Kaset soab n wa n kaag-ba.—Tʋʋ. 9:11.

¹² A Ananiyaas sẽn sak tʋʋmd ning a Zeezi sẽn kõ-a wã, a paama bark me. Rẽ yĩnga, yãmb tũuda a Zeezi noorã n kõt kaset sõma baa tʋʋm-kãngã sã n mi n kɩtame tɩ y maan yɩɩr bɩ? Ne neb kẽere, kẽng zak-zak n seg neb b sẽn pa mi tõe n kɩtame tɩ b maand yɩɩre. Ne neb a taabã, yɩl n moon neb sẽn be b tʋʋm zĩisẽ koɛɛgã, soayã noy pa rẽ bɩ ne telefõnnã la lɛtã maasmã yaa toogo. A Ananiyaas tõoga a rabeemã, n sõng a Soll t’a paam vʋʋsem sõngã. b A Ananiyaas tõog n maana rẽ, bala a ra teega a Zeezi zãng-zãnga. Sẽn paase, a ra geta a Soll wa a saam-biiga. Wa a Ananiyaase, tõnd me na n tõoga d rabeemã, d sã n kɩs sɩd zãng-zãng t’a Zeezi n lʋɩt taoor koɛɛgã moonegã pʋgẽ, d sã n kʋmd d taabã nimbãanega, la d get baa neb nins sẽn namsd tõndã wa neb sẽn tõe n wa yɩ d saam-biisi.—Mat. 9:36.

13, 14. Yãmb sã n zãmsda Biiblã ne a Zeova kaset soab n yaool n nan pa reeg lisgu, wãn to la a Soll kibarã tõe n sõng yãmba?

¹³ A Soll toeema bũmb kẽer tao-tao sẽn zems ne bũmb ning a sẽn bãngã.  A sẽn paam sãoogrã poore, a reega lisgu, la a sɩng n tigimd ne karen-biisã sẽn da be Damaasã. A pa tek rẽ bal ye. Biiblã yetame yaa: “Tao-tao bala, a sɩnga tigsg rotẽ wã moonego, n gomd a Zeezi yell n yetẽ tɩ yẽ la Wẽnnaam Biigã.”—Tʋʋ. 9:20.

¹⁴ Yãmb sã n zãmsda Biiblã ne a Zeova Kaset soab n yaool n nan pa reeg lisgu, rẽ yĩnga, y na n maana wa a Solle, n tũ bũmb nins y sẽn bãngdã bɩ? Yaa sɩd t’a Soll maana kaset ne yel-solemd Kiristã sẽn maane. La sãmbg kae tɩ rẽ sõng-a lame t’a wa sak n deeg lisg ye. Neb a taab me n maan kaset ne yel-soalem a Zeezi sẽn maane. Wala makre, a Zeezi sẽn wa n sãoogd rao nug sẽn kʋɩ wã, Fariziyẽ-rãmb sull n da get-a. Zʋɩf-rãmbã fãa la bal ra miime t’a Zeezi vʋʋga a Lazaare. La bãmb wʋsg pa sak n tũ a Zeezi ye. Kẽer meng nams-a lame. (Mark 3:1-6; Zã 12:9, 10) La a Soll yẽ ra toeemame. Bõe yĩng t’a Soll sak n lebg kiris-neda, tɩ neb a taabã yaool n pa sake? Bala a ra zoeta Wẽnnaam n yɩɩd ninsaalbã. Sẽn paase, a sũur da nooma wʋsg ne Kiristã sẽn zoe a nimbãanegã. (Fili. 3:8) Yãmb me sã n maan woto, baa fʋɩ pa na n tõog n gɩdg yãmb tɩ y pa moon koe-noogã, la y wa segl y meng n sa n deeg lisg ye.

15, 16. Bõe la a Soll maan tigsg rotã pʋsẽ, la Zʋɩf-rãmbã sẽn da be Damaasã manesem yɩɩ wãna?

¹⁵ Mams-y y yamẽ neb kʋʋngã manesem sẽn yɩ to-to, a Soll sẽn wa n sɩng a Zeezi yell goam tigsg rotã pʋsẽ wã! Rẽ linga neb kẽere, la sãnda sokame yaa: “Pa rao ning sẽn nams neb nins sẽn be Zerizalɛm n pʋʋsd ne yʋ-kãngã la woto la?” (Tʋʋ. 9:21) A Soll sẽn wa n bilgd bũmb ning sẽn kɩt t’a toeem a manesmã ne a Zeezi karen-biisã, a wilga “vẽeneg t’a Zeezi n yaa Kiristã.” (Tʋʋ. 9:22) Ned sã n bilg yɛlã tɩ yaa vẽeneg-vẽenega, pa nebã fãa n na n sak n deeg ye. Rẽ pa tõe n kɩt tɩ wuk-m-mens rãmbã la neb nins sẽn gãd rog-n-migsã yɛlã dem-demã toeem b tagsa wã ye. La a Soll pa koms raood n bas ye.

¹⁶ Yʋʋm a tãab poore, Zʋɩf-rãmb nins sẽn da be Damaasã ra ket n namsda a Solle. B wa n baas n seda taab n na n kʋ-a. La a Soll sẽn wa n bãng rẽ wã, a soosame n yi tẽngã. (Tʋʋ. 9:23; 2 Kor. 11:32, 33; Gal. 1:13-18) A sakame tɩ b rɩk-a n ning peoogẽ, n tũnug lalg võorẽ n sik-a yɩnga. A Luk goma neb nins sẽn sõng a Soll t’a tõog n põs yʋn-kãngã yelle, n bool-b t’a ‘Soll karen-biisi.’ (Tʋʋ. 9:25) Gom-kãngã wilgdame tɩ neb kẽer sẽn wʋm a Soll koe-noogã Damaasã, b sak n toeemame n lebg Kirist karen-biisi.

17. a) Nebã manesem yaa wãna, bũmb nins Biiblã sẽn yet tɩ yaa sɩdã wɛɛngẽ? b) Bõe la y segd n ket n maandẽ, la bõe yĩnga?

¹⁷ Y sẽn wa n sɩng n gomd bõn-sõma nins y sẽn bãngdã yell ne y zo-rãmbã, y zakã rãmb la neb a taabã, tõe tɩ y ra tagsdame tɩ b na n sak n deega bũmb nins Biiblã sẽn yet tɩ yaa vẽenega. Tõe tɩ neb kẽer sakame, tɩ neb wʋsg pa sak ye. Tõeeme me tɩ y zakã rãmb gesa yãmb wa b bɛya. (Mat. 10:32-38) La y sã n ket n paasd y minimã Gʋls-sõamyã bilgrã wɛɛngẽ, la y  kell n tall manesem sẽn yaa sõma, baa b rãmb nins sẽn namsd yãmbã tõe n wa toeema b manesmã.—Tʋʋ. 17:2; 1 Pɩy. 2:12; 3:1, 2, 7.

18, 19. a) A Barnabaas sẽn sõng a Soll t’a lebg a Zeezi karen-biigã, bõe n maane? b) Wãn to la d tõe n dɩk a Barnabaas ne a Soll togs-n-taare?

¹⁸ A Soll sẽn ta Zerizalɛmmã, a Zeezi karen-biisã pa sak n tẽ t’a ra lebga a Zeezi karen-biig masã ye. La a Barnabaas sẽn kõ kaset t’a Soll lebga a Zeezi karen-biigã, tẽn-tʋmdbã sak-a lame, la a paa ne bãmb wakat a wãna. (Tʋʋ. 9:26-28) A Soll ra maanda gũusgu, la a ra pa zoet yãnd koe-noogã yĩng ye. (Rom. 1:16) A moona koɛɛgã ne raood Zerizalɛm, zĩig ning a sẽn sɩng a Zeezi karen-biisã namsgã. Zʋɩf-rãmb nins sẽn da be Zerizalɛmmã sũy yika wʋsgo, b sẽn bãng tɩ rao ning b sẽn da tagsd t’a na n lʋɩɩ taoor n menes kiris-nebã lebga kiris-nedã yĩnga. B seda taab n na n kʋ-a. Kibarã pʋgẽ, b yeelame yaa: “Saam-biisã sẽn bãng rẽ wã, b tall-a lame [a Soll] n kẽng Sezaare n kɩt t’a loog Tarse.” (Tʋʋ. 9:30) A Soll saka a Zeezi sẽn wilg-a sorã. A Zeezi ra tũnuga ne tigingã neb n sõng-a. Rẽ nafa a Soll ne tigingã nebã fãa.

¹⁹ Tẽeg-y tɩ yaa a Barnabaas n yãk yam n na n sõng a Solle. Sãmbg kae t’a Barnabaas sẽn maan bũmb ningã sõnga nin-kãensã a yiibã sẽn da tũud a Zeova ne yẽesmã, tɩ b wa lebg zo-rãmb hakɩɩka. Rẽ yĩnga, yãmb maanda wa a Barnabaase, n sõngd neb nins sẽn lebgd koe-moondb paalmã, n naagd-b n moond koɛɛgã la y sõngd-b tɩ b tẽebã pãng paasdẽ bɩ? Yãmb sã n maan woto, a Zeova na n keoo yãmb zembala. Yãmb sã n lebga koe-moond paalem, wa a Solle, yãmb me sakdame tɩ neb a taabã sõngd-y bɩ? Yãmb sã n naag koe-moondb nins sẽn tar minimã n moond koɛɛgã, y na n paama minim n paas koɛɛgã mooneg wɛɛngẽ, y sũ-noogã na n paasame, y na n lebga zo-rãmb hakɩɩka, tɩ y zoodã kaoos y yõor tɛka.

20, 21. Bõe la Wẽnnaam nin-buiidã maan pĩndã la bõe la b maand masã, b sã n wa zĩ bãane?

²⁰ A Soll sẽn lebg kiris-ned n tõog n põs Zerizalɛmmã poore, “Zide ne Galile la Samari tigimsã fãa neb ra zĩi bãane.” (Tʋʋ. 9:31) Bõe la a Zeezi karen-biisã maan wakat kãng sẽn da yaa bãan sasa wã? (2 Tɩm. 4:2) Kibarã pʋgẽ, b yeelame tɩ b ‘tẽebã pãng ra paasdame.’ Tẽn-tʋmdbã la neb a taab sẽn da tar zu-sobend tʋʋmd tigingã pʋgẽ wã kenga karen-biisã tẽebo, la b sõng-b tɩ b ra ‘zoet a Zeova la b paamd vʋʋsem sõngã belsgo.’ Wala makre, a Pɩyɛɛr tũnuga ne rẽ n keng karen-biis nins sẽn da be Lida, Saarõ longã pʋgẽ wã tẽebo. A modgrã sõngame tɩ neb wʋsg sẽn da be tẽn-kãng pʋgẽ ‘tẽ Zu-soabã.’ (Tʋʋ. 9:32-35) Karen-biisã pa bas tɩ b daar fãa tʋʋmã tiis-b ye. B ra modgdame n get taab yelle, la b moond koe-noogã. Rẽ sõngame tɩ tigingã nebã “sõorã ra tar paasgo.”

²¹ Yʋʋmd 1990 sẽnese, tẽns wʋsg pʋsẽ, a Zeova Kaset rãmbã me ra zĩi bãane. Goosneema-rãmb wʋsg sẽn nams Wẽnnaam nin-buiidã wa n tiig n  lʋɩɩme. Rẽ kɩtame tɩ ra lebg nana tɩ d moon koɛɛgã tẽns nins pʋsẽ b sẽn da gɩdg koe-noogã moonegã. Tẽns kẽer pʋsẽ menga, gɩdgr ra pa le beẽ ye. A Zeova Kaset rãmb bãmb tusa tũnuga ne segb kãnga n moon koɛɛgã zãma zĩisẽ, hal tɩ neb wʋsg sak n kelg koe-noogã.

22. Wãn to la y tõe n tʋm sõma ne lohorem ning y sẽn tarã?

²² Yãmb tʋmda sõma ne lohorem ning y sẽn tarã bɩ? Yãmb sã n vɩɩ tẽng b sẽn pa gɩdg tõnd koe-moonegã tʋʋmdã, a Sʋɩtãan na n dat n maka yãmb tɩ y bas Rĩungã tʋʋmdã, la y bao arzɛgse. (Mat. 13:22) Ra bas-y tɩ bũmb tiis-y ye. Yãmb sã n zĩi bãane, tʋm-y ne yam sasa kãnga. Tũnug-y ne rẽ n kõt kaset sõma, la y kengd tigingã neb raoodo. Tẽeg-y tɩ yãmb yɛlã tõe n tiig n toeemame.

23, 24. a) A Tabita kibarã sõngda tõnd tɩ d bãng bõe? b) Bõe la d segd n ket n maand ne d sũur fãa?

²³ D gom bũmb ning sẽn paam a Tabita, bɩ a Dorkasã yelle. A ra vɩɩ Zope, tẽng sẽn pa zãr wʋsg ne Lida ye. Pʋg-kãngã sẽn da maand sɩd ne Wẽnnaamã ra tũnugda ne a sẽkã la bũmb nins a sẽn tarã n tʋmd “tʋʋm-sõma wʋsgo, la a sõngd naong rãmbã me.” La a wa n tiig n lʋɩɩ bãaga, n maan kaalem. c A kũumã sãama karen-biis nins sẽn da be Zope wã sũy wʋsgo. Sẽn yɩɩd fãa, pʋg-kõap nins a sẽn da maan neerã. A Pɩyɛɛr sẽn ta roog ning pʋgẽ b sẽn da segend a kũumã a mumbã yĩngã, a maana yel-solemd a Zeezi Kirist tẽn-tʋmdbã baa a ye sẽn da zɩ n tõog n maane. A pʋʋsame, rẽ poore, a vʋʋga a Tabita! Mams-y n ges-y pʋg-kõapã la karen-biis a taabã sũy sẽn yɩ noog to-to, a Pɩyɛɛr sẽn bool-b tɩ b lebg n wa roog ning pʋgẽ b sẽn da be wã, n wilg-b a Tabita sẽn vʋʋgã! Sãmbg kae tɩ bũmb nins fãa sẽn maanã kenga karen-biisã raoodo, zu-loees nins sẽn da ket taoorã yĩng ye! Kibarã “saaga Zope soolmã fãa, tɩ neb wʋsg lebg Zu-soabã tẽedba.”—Tʋʋ. 9:36-42.

²⁴ A Tabita kibarã sõngda tõnd tɩ d bãng bũmb a yiib sẽn tar yõod wʋsgo. 1) Tõnd vɩɩmã tõe n tiig n toeemame. Rẽ n so tɩ tar yõod wʋsg tɩ d bao yʋ-noog Wẽnnaam taoore, tɩ nan ket n tõe! (Koɛ. 7:1) 2) Kũum vʋʋgrã yaa waaziba. A Zeova gũus n gesa tʋʋm-sõma nins fãa a Tabita sẽn tʋmã n keo-a rẽ yĩnga. A pa na n yĩm tʋʋmd ning fãa d sẽn tʋmd ne d  sũy fãa wã ye. D sã n maan kaalem tɩ Armagedõ nan pa wa me, a na n vʋʋg-d lame. (Ebre. 6:10) Rẽ wã, d bee “toog wakate,” pa rẽ bɩ “d zĩi bãane,” bɩ d ket n kõt kaset sõma Kiristã wɛɛngẽ.—2 Tɩm. 4:2.