Tẽng a ye n da be Asiiri, tɩ b boond tɩ Niniiv. Tẽngã nebã ra yaa nin-wẽnse. A Zeova tʋma a no-rɛɛs a Zonaas t’a kẽng Niniiv n tɩ yeel nebã tɩ b bas b tʋʋm-wẽnsã. La a Zonaas rɩka sor a to n zoe. A tɩ kẽe batayo sẽn debd Tarsɩɩs.

Batayo wã sẽn wa n be koomã sʋka, sob-kẽeng n yiki, hal tɩ sẽn be-b batayo wã pʋgẽ wã yɛɛse. B pʋʋsa b wẽnnaam-dãmbã n yeel yaa: ‘Bõe yĩng tɩ yel-kãngã paamd tõndo?’ La a Zonaas yeel-b lame yaa: ‘Yaa mam yelle. A Zeova yeela maam tɩ m maan bũmbu, tɩ mam zãgs n zoetẽ. Rɩk-y maam n lob koomẽ wã tɩ sebgã na n yalsame.’ B ra pa rat n lob a Zonaas koomẽ wã ye. La a pẽdg-b lame. B sɩd lob-a lame, tɩ sebgã yalse.

A Zonaas tagsame t’a na n kiime. A ra tara bõrb n sigd koomã tẽngre. La a pʋʋsa a Zeova. A Zeova kɩtame tɩ zĩm-bed-kẽeng wa vel-a, n pa wãb-a ye. A Zonaas zĩnda zĩifã pʋgẽ n pʋʋs a Zeova n yeele: ‘Mam pa na n tol n le kɩɩs foo ye.’ A Zeova kogla a Zonaas t’a zĩnd zĩifã pʋgẽ rasem a tãabo. Rẽ poore, a kɩtame tɩ zĩifã tɩ wʋk-a koomã noore.

A Zeova sẽn fãag a Zonaasã, rẽ yĩnga rat n yeelame t’a pa na n le tʋm-a Niniiv bɩ? Ayo. A le tʋm-a lame. La so-kãngã wã  a Zonaas sakame. A tɩ moona Niniiv nebã yaa: ‘Ka ne rasem 40, a Zeova na n sãama tẽngã.’ Bũmb n maan tɩ ling-a. Niniiv nebã kelg-a lame n bas b tʋʋm-wẽnsã. Niniiv rĩmã yeela a nebã yaa: ‘Pʋʋs-y Wẽnnaam, la y bas y tʋʋm-wẽnsã, tɩ tõe t’a pa na n sãam-d ye.’ A Zeova sẽn yã tɩ b basa b tʋʋm-wẽnsã, a pa sãam-b ye.

A Zeova sẽn pa sãam tẽngã, a Zonaas sũurã yikame. Tags n gese. A Zeova zoee a Zonaas nimbãaneg n sõng-a. La a Zonaas pa zoe Niniiv nebã nimbãaneg ye. A sũurã pʋd n sãamame, t’a yi tẽngã n tɩ zĩnd tɩɩg maasmẽ. La tɩɩgã kiime, t’a Zonaas sũurã yiki. A Zeova yeel-a lame yaa: ‘Tɩɩgã yell paka foo n yɩɩd Niniiv nebã. Mam zoee bãmb nimbãanega, n pa sãam-b ye.’ Bõe la a Zeova ra rat t’a Zonaas bãnge? A ra ratame t’a bãng tɩ Niniiv nebã vɩɩm tara yõod n yɩɩd tɩɩg buud fãa.