A Salomo sẽn lebg Israyɛll rĩmã poore, a Zeova sok-a lame yaa: ‘Bõe la fo rat tɩ m kõ-fo?’ A Salomo leokame: ‘Mam yaa biiga, m yamã pa waoog ye. Kõ maam yam, tɩ m tõog n ges fo nebã yelle.’ T’a Zeova yeel-a yaa: ‘Fo sẽn kos maam yamã yĩnga, m na n kɩtame tɩ f yamã yɩɩg ned buud fãa dũniyã zugu. Mam na n kɩtame me tɩ f lebg rakãagre. Fo sã n sak maam, m na n kɩtame tɩ f vɩɩmd n kaoose.’

A Salomo sɩnga wẽnd-doogã meebo. A kɩtame tɩ b naag sãnem, wanzuri, raad la kug n tall n me roogã. Rap la pagb wʋsg sẽn mi tʋʋmd sõma n naag n tʋme. Yʋʋm a yopoe poore, b mee wẽnd-doogã n sɛ. B rɩka roogã n kõ a Zeova. B maana maand tẽn-kugrã sẽn da be wẽnd-doogã pʋgẽ wã zugu. A Salomo yĩgimda tẽn-kugrã taoor n pʋʋs a Zeova n yeel yaa: ‘Zeova, ro-kãngã bedrmã ne a neermã ka sek a na tõog n deeg foo ye. D kotame tɩ f sak tõnd sẽn maand bũmb ning n kõt foomã, la f kelg d pʋʋsgã.’ A Salomo sẽn pʋʋs n sa wã bala, a Zeova kɩtame tɩ bugum yi yĩngr n dɩ maandã sẽn da be tẽn-kugrã zugã, sẽn na yɩl n wilg t’a sũur nooma ne roogã. Israyɛll nebã sẽn yã rẽ wã, b kɩdma sũ-noogo.

Israyɛll tẽngã pʋgẽ, la baa tẽn-zãrsẽ, nebã ra miime tɩ rĩm a Salomo tara yam wʋsgo. B ra wata a nengẽ, t’a sõngd-b n welgd b zu-loeesã. Baa Seba rĩm-poakã waa a nengẽ, n sok-a sogsg sẽn yaa toogo, n na n ges a yamã sã n sɩd yaa wʋsgo. A Salomo sẽn leok to-to wã kɩtame t’a yeele: ‘Mam da pa tẽed tɩ nebã sẽn yeelã yaa sɩd ye. La masã mam bãngame tɩ fo sɩd tara yam wʋsgo, n yɩɩd mam sẽn da wʋmã menga. Fo Wẽnnaam a Zeova ninga foo barka.’ Israyɛll nebã vɩɩm ra noomame, tɩ yaa sũ-noogo. La yɛlã ra na n toeemame.