A Zeova ra kɩtame tɩ bʋ-kaoodb ra sõngd Israyɛll nebã, la b wa n yeelame tɩ b rata rĩma. B yeela a Sãmwɛll yaa: ‘Tẽns nins fãa sẽn pẽ tõndã tara rĩm-dãmba. Tõnd me rata rĩma.’ A Sãmwɛll ra miime tɩ rẽ pa sõma ye. A pʋʋsa a Zeova n gom rẽ yelle. A Zeova yeel-a lame yaa: ‘Pa foo la nebã pa rat ye. Yaa maam. Yeel-b tɩ b na n paama rĩma, la tɩ rĩmã na n kɩtame tɩ b maan bũmb wʋsg n kõ yẽ.’ Baa ne rẽ, nebã yeelame yaa: ‘Tõnd toog kae ye. Tõnd wee n paam rĩma.’

A Zeova yeela a Sãmwɛll tɩ rao yʋʋr sẽn boond t’a Sayull n na n lebg Israyɛll pipi rĩma. A Sayull wa n kẽnga Rama, n na n tɩ ges a Sãmwɛlle. La a Sãmwɛll ninga a Sayull zugã kaam t’a na n lebg rĩma.

A Sãmwɛll wa n boola Israyɛll nebã fãa tɩ b tigim taaba, t’a na n wilg-b b rĩmã. La b gẽesa a Sayull n pa yã ye. Fo mii a sẽn da be zĩig ning bɩ? A ra solga teedã poore. B wa n yã-a lame, n tall-a n wa nebã sʋka. A Sayull woglmã ra yɩɩda nebã fãa. A ra yaa rasãng me. A Sãmwɛll yeelame: ‘Ad ned ning a Zeova sẽn yãkã.’ Nebã kelmame n yeele: ‘Wẽnd na kaoos rĩmã.’

Sɩngrẽ wã, rĩm a Sayull ra kelgda a Sãmwɛlle, la a sakd a Zeova. La a wa n toeemame. Wala makre, a Sayull ra pa tar sor n na n maan maand ye. A Sãmwɛll sẽn yaa a Zeova no-rɛɛsã ra yeel-a lame t’a yals n gũ yẽ t’a wa. La a Sãmwɛll sẽn da kaoosdã, a Sayull maana maandã a toore. A Sãmwɛll manesem yɩɩ wãna? A yeel-a lame yaa: ‘Fo ra pa segd n kɩɩs a Zeova ye.’ A Sayull rɩka yam bɩ?

A Sayull wa n kẽng n tɩ zaba ne Amalɛk rãmbã. A Sãmwɛll yeel-a lame t’a kʋ nebã fãa. La a Sayull pa kʋ rĩm a Agaag ye. A Zeova yeela a Sãmwɛll yaa: ‘A Sayull pa le kelgd mam goamã ye.’ A Sãmwɛll sũurã sãama wʋsg t’a yeel a Sayull yaa: ‘Fo sẽn  pa le kelgd a Zeova wã, a na n yãka ned a to t’a yɩ rĩma.’ La a Sãmwɛll sẽn wẽnemd t’a na n looge, a Sayull gãda a fuugã tɩ tõsge. Dẽ, a Sãmwɛll yeel-a lame yaa: ‘A Zeova na n tõsga fo naamã.’ Woto rat n yeelame t’a Zeova ra na n deega naamã n kõ ned sẽn nong yẽ la a sakd a goamã.