A Moyiiz lʋɩɩ Israyɛll nebã taoor yʋʋm wʋsgo, la masã, a kolga kũum. A Zeova yeel-a lame yaa: ‘Pa foo n na n tall Israyɛll nebã n kẽ Kana tẽngã ye. La m na n basame tɩ f ges tẽngã yɩɩga.’ Dẽ, a Moyiiz kosa a Zeova t’a yãk ned sẽn na n lʋɩ Israyɛll nebã taoore. A Zeova yeel-a lame yaa: ‘Kẽng n tɩ yeel a Zozuwe tɩ yaa yẽ la m yãk-yã.’

A Moyiiz yeela Israyɛll nebã tɩ yẽ kũumã kolgame, la t’a Zeova yãka a Zozuwe t’a na n tall-b n kẽ Kana tẽngã. A Moyiiz yeela a Zozuwe yaa: ‘Ra zoe rabeem ye. A Zeova na n sõnga foo.’ Rẽ poor bilfu, a Moyiiz rʋʋ Nebo tãngã zugu. Be, a Zeova wilg-a-la tẽng ning a sẽn yeel t’a na n kõo a Abrahaam ne a Izaak la a Zakoob kambã. A Moyiiz kiime, rẽ t’a tara yʋʋm 120.

A Zeova yeela a Zozuwe yaa: ‘Pasg-y Zʋrdẽ kʋɩlgã n kẽ Kana. M na n sõnga foo wa m sẽn sõng a Moyiizã. Karem noy nins mam sẽn kõ yãmbã daar fãa. Ra yɛɛs ye. Tall raoodo. Maan bũmb nins fãa mam sẽn yeel foo wã.’

 A Zozuwe tʋma rap a yiib tɩ b kẽng n tɩ ges Zeriko tẽngã. Sak ning sẽn pʋgdã pʋgẽ, d na n goma rẽ yell sõma. Rap a yiibã sẽn lebg n wa wã, b yeelame tɩ b sã n kẽ Kana masã, yaa sõma. Vẽkembeoogã, a Zozuwe yeela nebã tɩ b sag b teedã. Rẽ poore, a kɩtame tɩ maan-kʋʋdbã rɩk kãabg-koglgã n lʋɩ taoor tɩ b na n tɩ pasg Zʋrdẽ kʋɩlgã. Kʋɩlgã ra pidame n puugi. La maan-kʋʋdbã karsã sẽn sɩɩs koomã bala, koomã sẽn da zoetã yalsame, n welg zĩis a yiibu, n bas so-koɛɛnga. B yalsa kʋɩlgã tẽn-sʋka, hal tɩ Israyɛll nebã fãa pasge. Fo pa tagsd tɩ yel-solemd kãngã kɩtame tɩ b tẽeg bũmb ning sẽn maan mog-miuugẽ wã sɩda?

Masã, Israyɛll nebã taa tẽng ning a Zeova sẽn da yeel t’a na n kõ-b lame wã. B tõe n mee zagse, n tuk pʋto, la b sel tɩɩs sẽn womd biisi. Ra yaa tẽng sẽn pid ne rɩ-nood buud toor-toore, hal tɩ b boond-a tɩ bĩisim la sɩɩd tẽnga.