Israyɛll nebã yii Sinayi tãngẽ wã n pasg Paarã weoogã n ta tẽng b sẽn boond tɩ Kadɛɛs. Beenẽ, a Zeova yeela a Moyiiz yaa: ‘Yãk rap 12 n tʋm tɩ b tɩ ges Kana tẽngã mam sẽn na n kõ Israyɛll nebã. Yãk rao a ye Israyɛll buud fãa pʋgẽ.’ A Moyiiz sɩd yãka rap 12 n yeel-b yaa: ‘Kẽng-y Kana n tɩ ges tẽngã sã n yaa sõma n sakd koobo, tẽngã neb sã n tara pãng bɩ b pa tar pãnga, la b sã n tara tẽns sẽn tar lalse, bɩ b sã n bee fu-rot pʋsẽ.’ A Zozuwe ne a Kalɛɛb ra bee rap 12 sʋka.

Rasem 40 poore, rap 12 lebg n waame. B zãa kankama, grenaad biisi, ne reezẽ biisi. B sẽn wa wã, b yeelame: ‘Tẽngã yaa sõma, la nebã tara pãng wʋsgo, tɩ b tẽnsã lals me yaa bɛda.’ La a Kalɛɛb yeelame yaa: ‘Tõnd tõe n tõog-b lame. Yik-y tɩ d kẽnge.’ Fo mii bũmb ning sẽn kɩt t’a yeel woto wã bɩ? Bala yẽ ne a Zozuwe ra miime t’a Zeova na n sõng-b lame. La rap 10 sẽn kellã yeelame: ‘Kana nebã yaa bɛda la wogdo. Tõnd sã n yas b taoore, d yaa wa sʋya.’

Israyɛll nebã sũurã sãamame, tɩ b yeel yaa: ‘Wa-y tɩ d yãk ned a to t’a lʋɩ d taoore, tɩ d leb Ezɩpti. Bala tõnd sã n kẽng Kana, b na n kʋʋ tõndo.’ A Zozuwe ne a Kalɛɛb yeelame yaa: ‘Da kɩɩs-y-yã a Zeova ye. Ra zoe-y rabeem ye. A Zeova na n  sõnga tõndo.’ La Israyɛll nebã pa kelg-b ye. B baoome meng n na n kʋ-ba.

Bõe la a Zeova maan-yã? A yeela a Moyiiz yaa: ‘Baa bũmb nins fãa mam sẽn maan n kõ Israyɛll nebã, b ket n kɩɩsda mam goamã. M na n kɩtame tɩ b pa weoogã pʋgẽ yʋʋm 40, n ki be. Yaa b kambã, n paas a Zozuwe ne a Kalɛɛb bal n na n paam n kẽ tẽng ning mam sẽn yeel tɩ m na n kõ-b lame wã.’