Nebã wa n lebga wʋsg tẽngã zugu. Neb ka tɛk ra maanda sẽn yaa wẽnga. Baa malɛgs kẽer sẽn da be saasẽ wã lebga malɛg-wẽnse. B waa tẽngã zugu. Fo mii b sẽn maan bɩ? B sẽn wa wã, b lebga wa ninsaalba, n bao kom-pugli tɩ b lebg b pagba.

Malɛgsã ne b pagbã roga kom-dibli. Kom-kãens lebga bɛda, n tar pãng wʋsgo, n namsd nebã, la b maand-b wẽnga. A Zeova ra pa na n bas tɩ nebã ket n maand sẽn yaa wẽng ye. A yãka yam n na n kɩt tɩ sa-kãseng ni n sãam nin-wẽnsã.

La rao a ye n da pa maand wa neb a taabã. A ra nonga a Zeova. A yʋʋr la a Nowe. A ra tara pag ne kom-dibli a tãabo, a Sɛm, a Kam ne a Zafɛte. Bãmb me ra tara pagba. A Zeova yeela a Nowe t’a ka koom-koglg sẽn yaa bedre, tɩ yẽ ne a zakã rãmb kẽ, tɩ saagã ra kʋ-b ye. Koom-koglg yaa wa kees sẽn yaa bed-kẽenga, b sẽn maan ne raado, n tõe n dug koom zugu. A Zeova yeela a Nowe t’a kẽes rũms wʋsg koglgã pʋgẽ, tɩ bãmb me ra ki ye.

Zĩig pʋgẽ, a Nowe sɩnga koglgã kaabo. Yẽ ne a zakã rãmb rɩka sẽn ta yʋʋm 50 n ka koglgã. B kaa koglgã wa a Zeova sẽn yeelã kɛpɩ. Koglgã kaab sasa, a Nowe ra yeta nebã tɩ sa-kãseng n wate. La b pa kelg ye.

B wa n saame n na n kẽ koglgã pʋgẽ masã. Sak ning sẽn pʋgdã pʋgẽ, d na n yãa bũmb ning sẽn maane.