A Zeezi ra tara zo-rãmb a tãab Betani. Yaa a Lazaar ne a yao a Maari la a kẽem a Mart. Daar a ye, a Zeezi ra bee Peere soolmẽ wã, t’a Maari ne a Mart tʋm tɩ b wa yeel-a yaa: ‘A Lazaar yĩnsã zabda wʋsgo. D kotame tɩ f wa tao-tao.’ La a Zeezi pa loog zĩig pʋgẽ ye. Rasem a yiib poore, a yeela a karen-biisã yaa: ‘Yik-y tɩ d kẽng Betani. A Lazaar gõeeme, la mam na n tɩ nek-a lame.’ La tʋm-tʋmdbã yeelame: ‘A Lazaar sã n gõeeme, a yĩnsã na n sigame.’ La a Zeezi yeel-b-la vẽeneg t’a Lazaar kiime.

A Zeezi sẽn ta Betani wã t’a Lazaar sẽn ki wã yaa rasem a naase. Neb wʋsg n da wa n na n bels a Mart ne a Maari. A Mart sẽn wʋm t’a Zeezi watame wã, a zoeeme n tɩ seg-a, n yeel-a yaa: ‘Zu-soaba, fo sã n da be ka, mam yao wã ra ka na n ki ye.’ La a Zeezi yeel-a lame yaa: ‘Mart, fo yao wã na n vʋʋgame. Fo tẽeda rẽ bɩ?’ A Mart leokame: ‘Mam miime tɩ kũum vʋʋgrã sasa, a na n vʋʋgame.’ La a Zeezi yeel-a lame: ‘Mam yaa vʋʋgre, la vɩɩm.’

Rẽ poore, a Mart tɩ yeela a Maari t’a Zeezi waame. A Maari zoeeme n sɛg a Zeezi. La nebã pʋg-a lame. A taame n yĩgimd a Zeezi taoor la a tar yãbre. A yeelame: ‘Zu-soaba, fo sã n da be ka, mam kẽemã ra ka na n ki ye.’ A Zeezi sẽn yã t’a Maari sũurã sãama wʋsgã, yẽ me sɩnga yãbre. La nebã yeelame: ‘A sɩd ra nonga a Lazaar wʋsgo.’ La neb kẽer sokame yaa: ‘Bõe yĩng t’a pa wa sãoog a zoa wã?’ Rẽ wã, bõe la a Zeezi na n maane?

A Zeezi kẽnga yaoogẽ wã. B ra paga yaoogã noor ne kug-bedre. A yeelame: ‘Tus-y kugrã n lake.’ T’a Mart yeel yaa: ‘Taa rasem a naase. Woto t’a põogame.’ Baa ne rẽ, b laka kugrã. Dẽ, a Zeezi pʋʋsame n yeel yaa: ‘M Ba, mam pʋʋsda foo barka, fo sẽn kelg maamã. Mam miime tɩ fo kelgda maam wakat fãa. La mam sẽn zẽk m koɛɛg n gomdã yaa sẽn na yɩl tɩ nebã bãng tɩ foo n tʋm maam.’ Rẽ poore, a zẽka a koɛɛg n yeel yaa:  ‘Lazaare, wa yi.’ A Lazaar sɩd yiime, la nebã yɛɛsa wʋsgo. B ra vil-a-la ne pɛɛla, t’a Zeezi yeel tɩ b lok pɛɛlã n bas-a t’a looge.

Neb wʋsg sẽn yã rẽ, b tẽe a Zeezi. La kẽer tɩ togsa Fariziẽ-rãmbã. Rẽ tɛka, Fariziẽ-rãmbã baoome n na n kʋ a Lazaar ne a Zeezi. A Zida Iskariot sẽn da naag tʋm-tʋmdb 12 soosame n kẽng Fariziẽ-rãmbã nengẽ, n tɩ yeel-b yaa: ‘Mam sã n sõng yãmb tɩ y yõk a Zeezi, yãmb na n kõo maam wãna?’ Tɩ b yeel-a tɩ b na n kõ-a-la wanzuri ligd bãmb 30. Rẽ tɛka, a Zida sɩngame n baood a sẽn na n maan tɩ Fariziẽ-rãmbã paam a Zeezi n yõke.