Babilond paama rĩm a to tɩ b boond-a t’a Darius. Yaa Meed neda. A yãame t’a Dãniyɛll yaa ned sẽn yaa toore. A kõo a Dãniyɛll naam n yɩɩd ned buud fãa tẽngã pʋgẽ. La rap n maan sũ-kiir ne a Dãniyɛlle, n da rat tɩ b kʋ-a. B ra miime t’a pʋʋsda a Zeova naoor a tãab daar fãa. Rẽ n so tɩ b tɩ yeel rĩm a Darius yaa: ‘B tog n yiisa noore, tɩ ned ra le pʋʋs wẽnnaam a to tɩ ka foo ye. Ned ning sẽn na n kɩɩse, b na n lob-a-la bõnyẽesã bokẽ.’ Rẽ yɩɩ a Darius noogo, t’a sak n yiis noorã.

A Dãniyɛll sẽn wʋm bal tɩ b yiisa noorã, a kẽnga a roogẽ wã. A roogã fenetr ra pakame, t’a tɩ yĩgimd be n pʋʋs a Zeova. Rap nins sẽn da maand sũ-kiirã ling-a lame t’a be a roogẽ wã n pʋʋsdẽ, tɩ b zoe n tɩ yeel a Darius yaa: ‘A Dãniyɛll kɩɩsa foo. A pʋʋsda a Wẽnnaamã naoor a tãab daar fãa.’ A Darius ra nonga a Dãniyɛlle, n pa rat tɩ b kʋ-a ye. Daarã tõre, a tagsa a sẽn na n maan to-to n fãag-a. La bãmb tẽngẽ wã, baa rĩmã meng pa tõe n kɩt tɩ b toeem noor b sẽn yiis ye. A kong n yeela a tʋm-tʋmdbã tɩ b yõk a Dãniyɛll n tɩ lob bõnyẽesã bokẽ.

 Yʋn-kãngã, a Darius tagsa a Dãniyɛll yelle, hal n pa tõog n gũs ye. Beoogã sẽn vẽege, a wudgame n ta bokã noore, n bool a Dãniyɛll n sok yaa: ‘Fo Wẽnnaamã fãaga foo bɩ?’

A Darius wʋma ned koɛɛga. Ra yaa a Dãniyɛlle. A yeela a Darius yaa: ‘A Zeova malɛkã wa n muma bõnyẽesã noyã. B pa maan maam bũmb ye.’ A Darius sũurã yɩɩ noog wʋsgo. A kɩtame tɩ b yiis a Dãniyɛll bokẽ wã, la a pa pogl baa bilf ye. Dẽ, rĩmã yeelame yaa: ‘Yõk-y rap nins sẽn dõd a Dãniyɛllã n lob bokã pʋgẽ.’ B sẽn lob-bã, bõnyẽesã wãb-b lame.

A Darius kɩtame tɩ b yeel tẽngã nebã yaa: ‘Nebã fãa tog n zoee a Dãniyɛll Wẽnnaamã. A fãag-a lame tɩ bõnyẽesã pa kʋ-a ye.’

Fo pʋʋsda a Zeova daar fãa wa a Dãniyɛll bɩ?