YÃMB Biiblã pʋgẽ, wãn to la b lebg Yɩɩl Sõamyã 83:19 (Yɩɩl Sõamyã 83:18, NW)? Les Saintes Écritures — Traduction du monde nouveau wã lebgda verse kãngã woto: “Tɩ nebã bãng tɩ fo yʋʋr sẽn yaa a Zeova wã, foo f yembr bal n yaa Sẽn ka to Soab tẽngã fãa zugu.” Biibl dãmb kẽer me lebga verse kãngã woto. La Biibl dãmb wʋsg pa ningd yʋʋr sẽn yaa Zeova wã ye. B ledgd-a-la ne naam yʋy wala “Zusoaba,” bɩ “Soaala.” Yaa bʋg la b segd n ning verse kãngã pʋgẽ? Yaa naam yʋʋr bɩ, bɩ yʋʋr ning sẽn yaa Zeova wã?

Verse kãngã gomda yʋʋr yelle. Sã n yaa ne hebre goama b sẽn tũnug ne n gʋls Biiblã bab-kãsengã, yaa yʋ-peell sẽn pa tõe n pʋd ned a to n be beenẽ. Hebre gʋls-biisã pʋgẽ, b gʋlsd-a-la woto: יהוה (YHWH). Sã n yaa ne moorã goamã, b lebgd-a lame tɩ “Zeova.” Yʋ-kãngã bee Biiblã verse a yembr pʋgẽ bal bɩ? Ayo. Sɩngrẽ wã, Gʋlsg Sõamyã ra gʋlsa ne hebre goamã, tɩ Wẽnnaam yʋʋrã pukd be sẽn na ta naoor 7000.

Wẽnnaam yʋʋrã yõod taa zĩ-bʋgo? Ges-y pʋʋsg ning a Zezi Kirist sẽn zãms tõndã. A sɩngda woto: “Tõnd Ba sẽn be arzãna, tɩ yãmb yʋʋr yɩ ne waoogre.” (Matɩe 6:9) Kaoosg poore, a Zezi pʋʋsa Wẽnnaam woto: “M Ba, waoog-y y yʋʋrã.” La Wẽnnaam koɛɛg yii saasẽ n leoke: “Mam da waoog-a lame, la m na n le waoog-a lame.” (Zã 12:28) Vẽenega, Wẽnnaam yʋʋrã yõod ka to ye. La bõe yĩng masã tɩ Biiblã lɛbgdb kẽer yãk yʋ-kãngã n tek ne naam yʋy b lebgrã pʋgẽ?

Wõnda yaa bʋʋm a yiib yĩnga. Pipi, neb wʋsg yetame tɩ b pa segd n bool Wẽnnaam yʋʋrã ye, bala ned pa mi b sẽn da boond-a to-to sɩngrẽ wã ye. Pĩnd Hebre goamã ra pa gʋlsd ne wãgdse, sẽn dat n yeel tɩ gʋls-biis wala a, e, i, o, u ye. Woto yĩnga, rũndã-rũndã, ned ba a yembr pa tõe n sɩd wilg nebã sẽn da boond YHWH wã to-to Biiblã gʋlsg wakat ye. La rẽ segd n kɩtame tɩ d pa bool Wẽnnaam yʋʋrã bɩ? Biiblã gʋlsg wakate, tõe  tɩ b ra boonda a Zezi tɩ Yesuwa bɩ Yehosuwa. Ned ba a yembr pa tõe n sɩd bãng a yʋʋrã boolg takɩ ye. Ne rẽ fãa, dũniyã gill zugu, nebã gʋlsda a Zezi yʋʋrã ne gʋls-biis buud toor-toore, n boond-a tɩ zems ne nebã sẽn nong n boond-a to-to bãmb meng goamã pʋgẽ wã. B pa maand yam-yoog ne yʋ-kãnga boolgo, n yetẽ tɩ b pa mi b sẽn da boond-a to-to a Zezi wakatẽ wã ye. Woto me, y sã n tog sor n kẽng tẽn-zẽnga, y tõe n yãame tɩ b sẽn boond yãmb yʋʋrã to-to tẽn-kãnga buud gomd pʋgẽ wã pa yembr ne b sẽn boond yãmb to-to y meng buud-gomdã pʋgẽ wã ye. Woto yĩnga, tõnd sẽn pa mi tẽn-kʋdem wẽndẽ dãmbã sẽn da boond Wẽnnaam yʋʋrã to-to wã pa kõt tõnd bʋʋm tɩ d pa na n bool-a ye.

Bʋʋm a yiib-n-soab sẽn kɩt tɩ b yãk Wẽnnaam yʋʋrã Biiblã pʋgẽ wã yaa b sẽn tũ Zʋɩf rãmbã pĩnd rog-n-mikã. Bãmb wʋsg tẽedame tɩ ned pa segd n bool Wẽnnaam yʋʋrã abada. Vẽenega, b sẽn tẽed woto wã, yaa b sẽn golem Biiblã no-kãngã võorã yĩnga: “Ra pʋd [a Zeova] sẽn yaa fo Wẽnnaamã yʋʋr zaalem ye. Tɩ bõe, ned sã n pʋd [a Zeova] yʋʋr zaalem, [a] ka na n bas-a taal ye.”—Yikri 20:7.

No-kãngã yetame tɩ b ra pʋd Wẽnnaam yʋʋrã zaalem yĩng ye. La rẽ yĩnga a gɩdgame tɩ b ra pʋd yʋ-kãng ne waoogr bɩ? Ayo. Hebre Gʋlsg Sõamyã (“Kãab-kʋdgã”) gʋlsdb fãa ra yaa rap sẽn yaa wẽn-sakdb sẽn tũ Tõog ning Wẽnnaam sẽn kõ pĩnd wẽndẽ Israɛllã nebã. La b ra nong n pʋta Wẽnnaam yʋʋrã. Wala makre, b ninga Wẽnnaam yʋʋrã naoor wʋsg yɩɩl nins bãmb neb kʋʋng sẽn da yɩɩnd n pẽgd Wẽnnaamã pʋsẽ. Wẽnnaam a Zeova ra kõo a balemdbã noor meng tɩ b kos ne a yʋʋrã, la wẽn-sakdbã ra maanda woto. (Zoɛll 3:5; Tʋʋma 2:21) Woto yĩnga, rũndã-rũndã, kiris-nebã pa maand yam-yoog la b pʋd Wẽnnaam yʋʋrã ne waoogr ye. Sãmbg sẽn ka be, a Zezi me ra maanda woto.—Zã 17:26.

Biiblã lɛbgdb kẽer sẽn ledg Wẽnnaam yʋʋrã ne naam yʋyã, b konga wʋsgo. B maaname tɩ yaa wa Wẽnnaam zãra ne a balemdbã, la tɩ b pa tõe n tall zood ne-a ye. La Biiblã yaool n sagenda ninsaalbã tɩ b bao a Zeova zoodo. (Yɩɩl Sõamyã 25:14) Tags-y y zo-nongr yelle. D sã n da zɩ n bãng a yʋʋre, y zoodã ra na n taa zĩ-bʋgo? Woto me, nebã sã n pa mi Wẽnnaam yʋʋr sẽn yaa Zeova wã, wãn to la b tõe n tall zood ne Wẽnnaam? Sẽn  paase, nebã sã n pa boond Wẽnnaam yʋʋrã, b pa na n bãng a võorã sẽn tagma me ye. Wẽnnaam yʋʋrã võor yaa bõe?

Wẽnnaam mengã wilga a sõgen-sakd a Moiiz a yʋʋrã võore. A Moiiz sẽn wa n sok Wẽnnaam yʋʋrã sẽn yaa a soabã, a Zeova leok-a lame: “Mam na n yɩɩ a soab ning m sẽn na n yɩ wã.” (Yikri 3:14, NW) A Rotherham Biibl lebgrã yeta woto: “Mam na n lebga m sẽn dat n yɩ a soab fãa.” Woto, raab sã n beẽ, a Zeova tõe n lebga a sẽn dat n yɩ a soab fãa sẽn na yɩl n pids a raabã.

Mams-y n ges-y yãmb sẽn da na n tõe n lebg yãmb sẽn dat n yɩ a soab fãa. Bõe la y ra na n maan n kõ y zo-rãmbã? Bãmb ned a yembr sã n lʋɩ bã-kɛgenga, y tõe n lebga logtor n tɩp-a t’a sãooge. A to sã n be ligd zu-loees pʋgẽ, y tõe n lebga arzɛk soab sẽn yaa neer maand n sõng-a. La sɩd-sɩda, yãmb pa tõe n lebg wã fãa ye. Yaa woto ne tõnd fãa. La y sã n ket n zãmsd Biiblã, y na n yãa vẽeneg tɩ raab sã n beẽ, a Zeova lebgda a sẽn dat fãa, sẽn na yɩl n pids a kãabsã. La noom-a lame t’a rɩk a pãngã n sõng neb nins sẽn nong-a wã. (2 Kibaya 16:9) Neb nins sẽn pa mi a Zeova yʋʋrã pa ne a zʋg-sõma wã fãa sẽn be yamleoogã ye.

Vẽenega, Wẽnnaam yʋʋrã segd n zĩnda Biiblã pʋgẽ. D sã n mi yʋ-kãngã võor la d boond-a d balengã pʋgẽ, na n sõnga tõnd wʋsg tɩ d pẽneg d saasẽ Ba a Zeova n paase. *