BIIBLÃ pa togsd tõnd a Zezi sẽn dog wakat ningã ye. La a sɩd wilgda tõnd bũmb ning sẽn kɩt tɩ d tõe n yeel t’a pa rog yʋʋm-sar kiuugã pʋgẽ wã.

D ges yʋʋm-sar kiuugã sasa, waoodã sẽn yaa to-to Betlehɛm a Zezi sẽn dogẽ wã. Zʋɩf rãmbã kiuug ning b sẽn boond tɩ Kislɛɛvã (a bee sɩpaolg ne yʋʋm-sar kiuugã sʋka) ra yaa waood la saas wakate. Kiuug ning sẽn pʋgd rẽ wã ra yaa Tebɛt (yʋʋm-sar ne yʋʋm-vẽkr sʋka). Sasa kãng tɩ waoodã zabd n yɩɩda yʋʋmdã sasa a taabã, tɩ wakat ninga, neez bɩ sa-lamd da be tãensã zutu. D ges Biiblã sẽn yet tõnd bũmb ning bab-kãngã waood la a tʋʋlg sẽn da yaa to-to wã zugu.

 Biibl gʋlsd a Ɛsdras wilgame tɩ Kislɛɛv sɩd ra yaa kiuug sẽn yaa waood la sa-niir wakate. A Ɛsdras sẽn wilg tɩ neb kʋʋng n da tigim Zerizalɛm ‘kiuug a wɛ soaba [Kislɛɛv kiuug] rasem pisi raarã’ poore, a wilgame tɩ nebã ra ‘rigda . . . saaga sẽn niida yĩnga.’ Kʋʋngã sẽn da tigmã yeelame tɩ yʋʋmdã sasa kãnga wã da “yaa sẽoogo,” la tɩ bãmb “ka tõe n yaas yɩng ye.” (Ɛsdras 10:9, 13; Zeremi 36:22) Rẽnd pa lingr la babgẽ be rũm-kɩɩmbã sẽn maand b sẽn tõe tɛk n kẽesd b rũmsã tɩ yʋng ra wa mik-b yɩng yʋʋm-sar kiuugã sasa wã ye.

La Biiblã wilgdame tɩ rũm-kɩɩmb n da be weoogẽ wã n gũud rũms yʋng ning a Zezi sẽn dogã sasa. Sɩda, Biibl gʋlsd a Luk wilgame tɩ sasa kãnga, pe-kɩɩmbã ra bee wetẽ wã “n gũud b piis ne yʋngo,” Betlehɛm noore. (Luk 2:8-12) Ges-y tɩ pe-kɩɩmbã sɩd ra bee yɩnga, b ra pa saagd wĩntoog bal ye. B ra bee weoogẽ ne b rũmsã yʋngo. Rẽ yĩnga neba ra tõe n maana woto Betlehɛm yʋʋm-sar kiuugã sẽn yaa waood la saag niib wakatã sɩda? Ayo, pa saagd ye. Woto, bũmb nins sẽn maan a Zezi rogmã sasa wã wilgdame t’a pa rog yʋʋm-sar kiuug ye. *

Wẽnnaam Gomdã wilgda tõnd a Zezi kũumã wakat tɩ yaa vẽenega, la a pa wilgd a rogmã wakat vẽeneg ye. Rẽ tẽeg-d-la rĩm a Salomo gom-kãensã: “Yʋ-sõng n são tɩdar kaam sẽn yaa sõama. La ned kũum daar n são a rogem daare.” (Koɛɛg Soaba 7:1) Rẽnd pa lingri, Biiblã sẽn kõt vẽnegr a Zezi tʋʋmdã la a kũumã zugu, la a pa togsd yɛl wʋsg a rogmã wakat zugã ye.