Yãmb zoe n soka y meng sogsg a woto buud bɩ? Sã n yaa rẽ bɩ y bãng tɩ y pa y yembr ye. Dũniyã gill zugu, neb wʋsg sokda b mens sogs-kãensã. Y tõe n paama b leoor bɩ?

Neb milyõ-rãmb na n yeelame tɩ n-ye. Bõe yĩnga? Bala, b paama b sogsgã leoor Biiblã pʋgẽ. Yãmb dat n bãnga Biiblã sẽn yetã bɩ? Y sã n date, y tõe n kosa a Zeova Kaset rãmbã tɩ b wa zãms-y Biiblã zaalem. *

Yaa sɩd tɩ d sã n kãab neb kẽer Biibl zãmsgo, b yetame tɩ b pa tar sẽk ye. Sãnda yetame tɩ Biiblã zãmsg yaa toogo. Kẽer me yetame tɩ b pa rat n pʋlem-d bũmb n wa pa tõog n pids ye. La sãnda yẽ pa woto ye. B sakd n zãmsa Biiblã ne yamleoogo. Ad makr a wãn sẽn wilgd rẽ:

• “Mam kẽnga katolik-rãmb la mɛrka-rãmb wẽnd-dotẽ, sik-rãmb la budis-rãmb pʋʋsg rotẽ, la m zãms tũudmã yɛl m sẽn wa n be inivɛrsite wã. La m pa paam sogsg nins m sẽn da sokd m meng Wẽnnaam zugã leoor ye. A Zeova Kaset soab n wa n wa mam zakẽ wã n sõs ne-ma. A sẽn tik Biiblã n leok m sogsgã yɩ-m-la noogo, tɩ m sak t’a na n zãms-m Biiblã.”—A Gill sẽn be Ãngeletɛɛrã.

• “Mam da sokda m meng sogsg wʋsgo, la tõnd pastɛɛrã sẽn leok maam to-to wã pa sõng-m ye. La a Zeova Kaset soab n tik Biiblã bal n leok m sogsgã. A sẽn yeel maam tɩ m sã n dat n bãng n paase a na n sõng-m lame wã, m saka zĩig pʋgẽ.”—A Koffi sẽn be Benẽ wã.

• “Mam da baood n bãnga bũmb ning sẽn maand ned a kũum poore. M da tagsdame tɩ sẽn ki-bã tõe n maana sẽn ket n vɩ-bã wẽnga, la m da baood n bãnga Biiblã sẽn yet bũmb ninga. Rẽ n so tɩ m sak n na n zãms Biiblã ne m zoa a ye sẽn yaa a Zeova Kaset soaba.”—A José sẽn be Berzɩllã.

• “Mam da mi n karemda Biiblã, la m pa wʋmd a goamã võor ye. La a Zeova Kaset rãmb n wa n wa tõnd zakẽ wã, n bilg Biiblã bãngr-goam kẽer võor tɩ m wʋm b võor nana-nana. M saka Biiblã zãmsgo, n da baood n bãng bõe me la m na n bãng n paase.”—A Dennize sẽn be Megsikã.

• “M da sokda m meng mam yell sã n sɩd paka Wẽnnaam. Rẽ n so tɩ m pʋʋs Wẽnnaam ning yell b sẽn gomd Biiblã pʋgẽ wã n kos sõngre. Vẽkembeoogã, a Zeova Kaset rãmb n wa tõnd zakẽ wã, tɩ mam sak n na n zãms Biiblã ne-ba.”—A Anju sẽn be Nepallã.

Kiba-kãensã tẽegda tõnd bũmb ning a Zezi sẽn yeelã. A yeela woto: “Sũ-noog rãmb la neb nins sẽn mi tɩ b segd n baoa Wẽnnaamã.” (Matɩe 5:3, MN) Sɩd me, ninsaal fãa tõe n tagsa Wẽnnaam yelle. La yaa Wẽnnaam bal n tõe n sõng tõnd tɩ d bãng-a. A tũnugda ne Biiblã sẽn yaa a Gomdã n sõng tõndo.

La Biiblã zãmsg maanda wãn-wãna? Wãn to la Biiblã zãmsg tõe n naf yãmba? Sõsg ning sẽn pʋgdã na n leoka sogs-kãensã.