Wẽnnaam kelgda buud fãa neb pʋʋsgo. (Yɩɩl Sõamyã 145:18, 19) Biiblã sẽn yaa Wẽnnaam Gomdã sagend-d lame tɩ d pʋʋs Wẽnnaam d yell buud fãa poorẽ. (Filip rãmba 4:6, 7) La pa pʋʋsg fãa n noom Wẽnnaam ye. Makre, pʋʋsg ned sẽn zãms ne zugu, wall a sẽn karemd sebr pʋgẽ pa noom Wẽnnaam ye.—Karm-y Matɩe 6:7.

Sẽn paase, ned sã n yãk yam n pa tũud a Zeova noyã, a soab pʋʋsg pa noom-a ye. (Yelbũna 28:9) Pĩnd wẽndẽ, Israyɛll nebã sẽn wa n lebg nin-kʋʋdbã, Wẽnnaam tõdgame t’a kõn deeg b pʋʋsg ye. Dẽnd, ned sã n dat tɩ Wẽnnaam deeg a pʋʋsgo, a tara a sẽn segd n maane.—Karm-y Ezai 1:15.

D sã n dat tɩ Wẽnnaam deeg d pʋʋsgo, d segd n pʋʋs-a-la ne tẽebo. (Zak 1:5, 6) D tog n tẽeme t’a beeme, la tɩ tõnd yell pak-a lame. D sã n zãmsd Biiblã, d tõe n paasa d tẽebã pãnga, bala, tẽeb hakɩkã tika bũmb sẽn yaa vẽenega, la bas-m-yam ning Wẽnnaam Gomdã sẽn kõt tõndã zugu.—Karm-y Hebre dãmb 11:1, 6.

D tog n pʋʋsa ne pʋ-peelem la ne sik-m-menga. Baa Wẽnnaam Bi-ribl a Zezi sã n da na n pʋʋse, a sikda a menga. (Luk 22:41, 42) Rẽnd wall tɩ d togs Wẽnnaam a sẽn segd n maanegã, segdame tɩ tõnd karemd Biiblã n bãngd a sẽn dat tɩ d maane. Rẽ la d na n tõogd n pʋʋsdẽ tɩ zemsd ne a raabã.—Karm-y 1 Zã 5:14.