Sabab-wẽnsã wilgdame tɩ Wẽnnaam pa zoet nebã nimbãaneg bɩ?
Sabab-wẽnsã wilgdame tɩ Wẽnnaam pa zoet nebã nimbãaneg bɩ?
NEB KẼER SẼN YETE: “Sẽn yaa Wẽnnaam n so dũniyã yĩnga, yaa yẽ n wat ne sabab-wẽnsã. A pa zoet d nimbãaneg ye.”
BIIBLÃ SẼN YETE: “Dũniyã fãa bee wẽng soabã nugẽ.” (1 Zã 5:19) “Wẽng soabã” yaa ãnda? Biiblã wilgame tɩ yaa a Sʋɩtãana. (Matɩe 13:19; Mark 4:15) Woto yaa sɩda. Bala, yaa a Sʋɩtãan sẽn yaa dũniyã naabã yĩng la a sẽn tõog tɩ neb wʋsg yaa beed rãmb la rat-tɩ-loog rãmbã. B pa tagsd b tʋʋmã sẽn tõe n wa ne zu-loees ninsã yell ye. Rẽnd d mii bũmb ning sẽn kɩt tɩ ninsaalbã sãamd tẽn-gãongã, weoogã la pemsmã. Bãngdb wʋsg yetame tɩ ninsaalbã sẽn sãamd tẽn-gãongã tõe n waa ne sabab-wẽnse, wall kɩt tɩ b wẽnemã paase. B yetame tɩ rẽ kɩtdame tɩ sabab-wẽnsã namsd neb wʋsg n yɩɩd pĩndã.
La bõe yĩng tɩ Wẽnnaam bas t’a Sʋɩtãan paam pãng woto n so dũniyã? Yellã sɩnga wakat ning tõnd yaab a Ãdem ne a Hawa sẽn kɩɩs Wẽnnaam naamã. Rẽ tɛka, ãdem-biisã wʋsg rɩka b naoore. Ninsaalbã sẽn zãgs tɩ Wẽnnaam kõn yɩ b naabã, b lʋɩɩ a Sʋɩtãan sẽn yaa Wẽnnaam bɛyã nugẽ. Rẽ n so t’a Zezi bool-a tɩ “dũniyã naaba.” (Zã 14:30) La a Sʋɩtãan pa na n soog dũniyã wakat fãa yĩng ye.
A Zeova * pa mum a nin n pa ne namsg ning a Sʋɩtãan sẽn wat ne wã ye. Ninsaalbã sẽn namsdã reeg n namsd-a lame. Wala makre, b sẽn wa n namsd Israyɛll nebã, ra sãamda Wẽnnaam sũuri. Biiblã goma rẽ yell n yeel woto: “Israyɛll namsgã sãama Zu-soabã sũuri.” (Bʋkaoodba 10:16) Wẽnnaam sẽn zoet tõnd nimbãanegã yĩnga, ka la bilfu, a na n kɩtame t’a Sʋɩtãan naamã sẽn wat ne namsgã sa. A yãka a Biig a Zezi Kirist sẽn nong tɩrlmã t’a na n dɩ naam wakat sẽn kõn sa yĩnga.
RẼ SẼN NA N NAF YÃMB TO-TO: A Sʋɩtãan pa tõe n kogl ninsaalbã tɩ sabab-wẽnsã ra nams-b ye. La a Zezi na n maana rẽ a naamã sasa. Daar a yembre, a kogla a karen-biisã seb-kãseng sasa. Biiblã goma rẽ yelle, n yeel woto: “[A Zezi] lenga sobgã n yeel mogrã: ‘Sĩndi! Bas bʋʋre!’ La sobgã yõkame, la zĩigã lebga sɩddd.” A karen-biisã soka taab yaa: “Nin-kãngã yaa bõe ned tɩ sobgã ne mogrã sakd bãmba?” (Mark 4:37-41) Kiba-kãngã kɩtame tɩ d kɩs sɩd t’a Zezi naamã sasa, a na n kogla ninsaalbã tɩ sabab-wẽnsã ra nams-b ye.—Daniɛll 7:13, 14.
^ sull 5 Biiblã wilgdame tɩ Wẽnnaam tara yʋʋre. A yʋʋrã la a Zeova.
