Ra n bas-y tɩ baa fʋɩ zãag-y ne a Zeova ye
“Bɩ y [yãk, MN] y sẽn na n tũ a soab rũndã.”—ZOZ. 24:15.
1-3. a) Bõe yĩng tɩ d tõe n yeel t’a Zozue basa mak-sõngo? b) D sã n wa segd n yãk yam n maan bũmbu, bõe la d pa tog n yĩmi?
TÕND yam-yãkr fãa tara yõodo. Yaa d sẽn tõe n yãk yam d toorã n kɩt tɩ d tõe tɩ d vɩɩmã tees d sẽn datẽ wã. Yaa wa ned sẽn na n togd sore, n wa ta so-wɛlga. A segd n yãka sor ning a sẽn na n dɩke. Vẽenega, a na n basa sor ning sẽn na n zãag-a ne a sẽn dat zĩig ningã, la a rɩk sor ning sẽn teesd a sẽn datẽ wã.
2 Biiblã gomda neb sẽn da segd n yãk yam n maan bũmb sẽn tar yõod wʋsg yelle. Wala makre, a Kayẽ ra segd n yãka a sã n na n basame t’a sũ-yikrã kɩt t’a maan wẽnga, bɩ a na n yõka a menga. (Sɩng. 4:6, 7) A Zozue ra segd n yãka a sã n na n tũu Wẽnnaam sɩd-sɩdã bɩ a na n tũu ziri wẽnnaam-dãmba. (Zoz. 24:15) A sẽn da rat n kell n yɩ a Zeova zoa wã yĩnga, a yãka yam n na n tũ a sor-wilgrã. La a Kayẽ pa maan wa a Zozue ye. A maana bũmb sẽn zãag-a ne a Zeova.
3 Tõnd me tõe n wa segd n yãka yam n maan bũmb sẽn tar yõod wʋsgo. Sã n wa yaa woto, yɩta sõma tɩ d tẽeg tɩ d yam-yãkrã tõe n waooga a Zeova la paas zood ning d sẽn tar ne-a wã pãnga, wall kɩt tɩ d zãag ne-a. (Karm-y Hebre dãmb 3:12.) Sõs-kãngã la sẽn pʋgd-a wã pʋgẽ, d na n goma vɩɩmã nens a yopoe yelle. Rẽ na n sõng-d lame tɩ d bãng d sẽn na n maan to-to tɩ baa fʋɩ ra zãag-d ne a Zeova ye.
TƲƲMÃ WƐƐNGẼ
4. Bõe yĩng tɩ tʋʋm tar yõodo?
4 Kiris-nebã segd n tʋmame n ges b mens la b zagsã rãmb yelle. Biiblã wilgame tɩ sẽn pa rat n ges-a a zak rãmb yell yaa wẽng n yɩɩd ned sẽn ka be tẽeb pʋgẽ. (2 Tes. 3:10; 1 Tɩm. 5:8) Rẽnd tʋʋm tara yõod wʋsgo. La y sã n pa gũusi, yam-yãkr nins y sẽn maand tʋʋmã wɛɛngẽ wã tõe n zãag-y-la ne a Zeova. Wãn to?
5. Nand tɩ d sak tʋʋmde, bõe yell la d segd n tagse?
5 Mams-y n ges-y yãmb sẽn na n baood tʋʋmde. Yãmb babgẽ wã, tʋʋm paoong sã n yaa toogo, y tõe n wa rat n saka tʋʋmd ning fãa b sẽn kãab-y-yã. La b sã n kãab-y tʋʋmd sẽn na n kɩt tɩ y maan bũmb sẽn kɩɩsd Biiblã noyã, y maanda wãna? Tõe me tɩ yaa tʋʋmd sẽn na n dɩk sẽk wʋsgo, pa rẽ bɩ na n kɩtame tɩ y togd soaya, n pa paamd sẽk n tʋmd tigingã tʋʋm la y be ne y zakã rãmb ye. Y na n baas n saka tʋʋmdã, n tagsdẽ tɩ y sẽn na n tar tʋʋmd a woto n são y sẽn na n pa tʋmdẽ bɩ? Tẽeg-y tɩ y yam-yãkrã tõe n sõng-y lame tɩ kell n tall a Zeova zoodo, wall a kɩt tɩ y zãag ne-a. (Heb. 2:1) Y sã n baooda tʋʋmd wall y rat n toeema tʋʋmde, wãn to la y na n bãng n yãk yam tɩ zemse?
6, 7. a) Bʋʋm a yiib n tõe n kɩt tɩ ned baood tʋʋmde. Yaa bʋse? b) Bõe n na n sõng-y tɩ y kell n tall a Zeova zoodo, la bõe yĩnga?
6 Wa d sẽn zoe n yã wã, y segd n tagsa yãmb ne a Zeova zoodã yelle. Reng-y n sok-y y meng woto: ‘Bõe yĩng tɩ mam baood tʋʋmde?’ Sã n yaa sẽn na yɩl n ges y meng la zakã rãmb yell n tõog n ket n tʋmd a Zeova tʋʋmdã, a Zeova na n sõng-y lame. (Mat. 6:33) Y tʋʋmd sã n sãam wall y sã n tar ligd zu-loeese, a Zeova mi a sẽn na n sõng-y to-to. (Ezai 59:1) A ‘mi a sẽn na n maan to-to n fãag neb nins sẽn sakd yẽ wã makr wakate.’—2 Pɩɛ. 2:9, Kãab-paalgã Koe-noogo.
7 La sẽn pak yãmbã sã n yaa y we n lebg arzɛk soab yẽ? Tõe tɩ y sɩd paam arzɛka. La y sã n tʋmda ligdã raab yĩng bala, y tõe n paama zu-loeese. (Karm-y 1 Tɩmote 6:9, 10.) Sã n yaa ligdã la y tʋʋmdã yell bal n pak-yã, y na n zãaga ne a Zeova.
8, 9. Tʋʋmã wɛɛngẽ, bõe yell la roagdbã segd n tagse, la bõe yĩnga?
8 Y sã n tara kamba, yɩta sõma tɩ y tẽeg tɩ y yam-yãkr fãa tara pãng y kambã zugu. B neeme tɩ yaa y tʋʋmdã n pak yãmb n yɩɩd bɩ, bɩ yaa yãmb ne a Zeova zoodã? B sã n neẽ tɩ yaa paam n lebg nin-kãseng la arzɛk soab n pak-yã, y pa tagsd tɩ b sã n wa bɩ, bãmb me na n dɩka y togs-n-taar sɩda? Tõe tɩ b wa pa le nand-y sõma meng ye. D saam-bi-poak sẽn yaa pʋg-sad yeela woto: “Mam ba wã tʋʋmd ra sɩng n pak-a-la wʋsgo. Ra wõnda sẽn pak-a yaa tõog tɩ tõnd zakã rãmb paam bõn-sõma. A ra pa rat tɩ bũmb paoog tõnd ye. La yʋʋmã noorã, yɛlã toeemame. A tʋmda wakat fãa, n daad teed ligd sẽn toe tɩ yaool n pa tɩlae ne tõnd ye. Woto kɩtame tɩ nebã fãa get tõnd zakã neb wa nin-bɛda, la pa wa neb sẽn kengd b taab raood Wẽnnaam tũudmã pʋgẽ ye. Mam sã n da paam tɩ m ba wã boog ligdã baoob la a mao t’a zakã rãmb paam zood sõma ne a Zeova, yɩt-m-la noog wʋsgo.”
9 Roagdba, ra n lʋɩɩs-y y tʋʋmã taoor tɩ wa kɩt tɩ y zãag ne a Zeova ye. Kõ-y y kambã mak-sõngo. Wilg-y-b tɩ y kɩsa sɩd tɩ zood ne a Zeova yõod yɩɩda arzɛgse.—Mat. 5:3, MN.
10. Nand tɩ bi-bɩɩg yãk tʋʋmd a sẽn na n zãmse, bõe yell la a segd n tagse?
10 La wãn to la bi-bɩɩg tõe n bãng n yãk tʋʋmd a sẽn na n zãms tɩ zemse? Wa d sẽn zoe n yã wã, y sẽn na n yãk tʋʋmd ningã bee ne y sẽn dat tɩ y vɩɩmã teesẽ wã. Rẽ yĩnga, y sẽn yãk yam n na n zãms tʋʋmd ningã na n wa sõng-y lame tɩ y tõog n lʋɩɩs a Zeova raabã taoor bɩ, bɩ a na n zãag-y-la ne a Zeova? (2 Tɩm. 4:10) Y rat n yɩɩ wa dũni-kãngã nebã, tɩ yaa y sẽn wat n tar ligd wʋsg bal la y tar sũ-noog bɩ, bɩ y rat n teega a Zeova wa a Davɩɩde? A ra yeela woto: “Mam dag n yaa bi-bɩɩga, la masã mam kʋʋlame, la mam nan ka yã tɩ b bas nin-tɩrg ye, la mam nan ka yã t’a yagens bõosd rɩɩb me ye.” (Yɩɩl 37:25) Tẽeg-y tɩ y sã n pa yãk so-sõngo, na n zãag-y-la ne a Zeova, la y sã n bãng yãkre, y vɩɩmã na n talla barka. (Karm-y Yelbũn 10:22; Malaki 3:10.) So-bʋg la y na n dɩke? *
REEMÃ LA PEMSMÃ KOKR WƐƐNGẼ
11. Bõe la Biiblã yeel reemã la pemsmã kokr wɛɛngẽ, la d segd n gũusa ne bõe?
11 Biiblã pa wilg tɩ sũ-noog kɩdeng yaa wẽnga, wall tɩ reem bɩ pemsem kokr yaa sẽk sãoong ye. Tʋm-tʋmd a Poll yeela a Tɩmote tɩ “yĩngã modgr bee yõod bilfu.” (1 Tɩm. 4:8) Biiblã yeelame meng tɩ ‘laad wakat beeme,’ tɩ ‘warb wakat beẽ,’ la a paas tɩ vʋʋsg yaa sõma. (Koɛ. 3:4; 4:6) La y sã n pa gũusi, reemã la pemsmã kokr tõe n zãag-y-la ne a Zeova. Wãn to? Tõe n yɩɩ reemã mengã, wall a sẽn dɩkd sẽk ningã.
Y sã n yãk reem sẽn yaa sõma n deem tɩ wakatã me pa looge, nafd-y lame
12. Nand tɩ y yãk reem, bõe yell la y segd n tagse?
12 Bɩ d reng n gom reemã yelle. Pipi, yaa y bãng tɩ reem sẽn yaa sõma beeme, la reem wʋsg naaga ne yɛl Wẽnnaam sẽn kisi. Wala makre, nen-kɛglem, zĩn-dãmb yɛl la yoob yɛla. Rẽ n so tɩ y segd n deng n tagsg sõma n yaool n yãk reem. Sok-y y meng woto: Bõe la reemã maand maam? A kɩtdame tɩ m nong nen-kɛglem wall wags-taaba, pa rẽ bɩ m nong m tẽngã tɩ loog bɩ? (Yel. 3:31) Reemã sãamda m ligd bɩ? Neb a taab sã n bãng tɩ mam deemda reem kãnga, na n komsa b tẽebã bɩ? (Rom 14:21) Nin-bʋs buud la m na n naag n deeme? (Yel. 13:20) Reemã kɩtdame tɩ m yam be wẽng maaneg bɩ?—Zak 1:14, 15.
13, 14. Bõe yĩng tɩ y segd n tags y reemã sẽn dɩkd sẽk ningã yell neere?
13 D gom deemã la pemsmã kokr sẽn dɩkd sẽk ningã yell me. Sok-y y meng woto: ‘Mam deemã rɩkda sẽk wʋsgo, tɩ m pa moond koɛɛgã la m kẽnd tigissã sõma bɩ?’ Y reemã sã n dɩkd sẽk tɩ looge, a pa na n kõ-y sũ-noog ye. Sɩd me, neb nins reem sẽn pa rɩkd sẽk wʋsgã mikdame tɩ nafd-b-la sõma. Bõe yĩng tɩ yaa woto? B miime tɩ b reng n maana bũmb nins sẽn tar yõodã. Rẽ n so tɩ b sã n wa reem n sa, b pa ningd b mens taal ye.—Karm-y Efɛɛz rãmb 5:10.
14 Baa reem sẽn noomã, y sã n deemd wʋsgo, tõe n zãag-y-la ne a Zeova. Saam-bi-poak sẽn tar yʋʋm 20 t’a yʋʋr boondẽ t’a Kim bãnga rẽ. A yeelame tɩ arzũma, sibr la hat daar fãa, yẽ ra minim n naagda a zo-rãmb n deemdẽ. La masã, a bãngame tɩ bũmb n be t’a yõod yɩɩd reemã. Ad a sẽn yeele: “Mam sẽn yaa so-pakdã, m nekda yibeoog wakat a yoob sẽn na yɩl n sɩng koe-moonegã. Woto kɩtame tɩ m pa le tõe n naag m zo-rãmb n deem n tãag yʋng wakat a ye bɩ wakat a yiib ye. M miime tɩ naag f zo-rãmb n deem pa wẽng ye. La d sã n maand rẽ wʋsgo, sãamda sẽka.”
15. Wãn to la roagdbã tõe n sõng b kambã tɩ pemsmã kokr naf-ba?
15 Roagdbã segd n gesame tɩ b kambã paam bũmb nins sẽn yaa tɩlae ne-bã. B segdame me n sõng-b tɩ b paam zood sõma ne a Zeova, la b kɩt tɩ b kambã ne vẽeneg tɩ b nong-b lame. Rẽ baoodame tɩ b mi n naag taab n deeme. Yaa sɩd tɩ reem kẽer n pa sõma, la rẽ pa segd n kɩt tɩ y tags tɩ reem buudã fãa yaa wẽng ye. (1 Kor. 5:6) Y sã n tags neere, y tõe n bãng n yãka reem wall pemsem kokr sẽn na n naf yãmb ne y zakã rãmba. * Y sã n maan woto, reemã pa na n kɩt tɩ yãmb ne y zakã rãmb zãag ne a Zeova ye.
B SÃ N WA YIIS D ZAKÃ NED TIGINGÃ PƲGẼ
16, 17. Zu-loe-bʋg n namsd roagdb wʋsgo, la bõe yĩng tɩ d tõe n yeel t’a Zeova mii rẽ sẽn namsd-b to-to wã?
16 Nonglem ning sẽn be roagdbã ne b kambã sʋkã tara pãng wʋsgo, t’a Zeova mak rẽ ne yẽ mengã sẽn nong a nin-buiidã to-to wã. (Ezai 49:15) Rẽnd d zakã ned sã n bas a Zeova tɩ d sũurã sãam wʋsgo, pa lingr ye. Saam-bi-poak bi-pugl la b yiis tigingã pʋgẽ, t’a yeel woto: “Rẽ sãama m sũurã wʋsgo. M da pa wʋmd a sẽn bas a Zeova wã võor ye. Sẽn paase, m da ningda m meng taale.”
17 Zu-loɛɛg a woto sã n paam-y bɩ y bãng t’a Zeova mii rẽ sẽn namsd-y to-to wã. A Ãdem ne a Hawa sẽn kɩɩs-a wã, n paas neb wʋsg sẽn kɩɩs-a nand t’a Nowe wakatẽ sa-kãsengã ni wã, a “sũur sãama” wʋsgo. (Sɩng. 6:5, 6) Tõe n yɩɩ toog ne neb nins sẽn nan zɩ n paam zu-loe-kãngã wã tɩ b bãng a sẽn namsd ned to-to. Baasgo, y pa segd n bas tɩ y ned ning b sẽn yiisã manesem zãag-y ne a Zeova ye. La b sã n yiis y zakã ned tigingã pʋgẽ, wãn to la y tõe n mao ne y sũ-sãangã?
18. Biig sã n bas a Zeova, bõe yĩng t’a roagdbã pa segd n ning b mens taale?
18 Ra n ning-y y meng taal ye. A Zeova basame tɩ yaa ned kam fãa n yãkd a sã n na n tũ-a lame, tɩ y zakã ned ning fãa sẽn deeg lisg segd n “tʋk a meng zɩɩbo.” (Gal. 6:5) A Zeova pa ningd yãmb taal y ned yel-wẽnd yĩng ye. Yaa sẽn maan-a yel-wẽndã la a ningd taale. (Eze. 18:20) Ra n ning-y neb a taab taal me ye. Wilg-y tɩ y sakda a Zeova sẽn kibind a nin-buiidã to-to wã. Y sẽn segd n zab ne a soab yaa a Sʋɩtãana, pa kãsem-dãmbã sẽn dat n kogl tigingã ye.—1 Pɩɛ. 5:8, 9.
Y sã n saagdẽ tɩ y ned b sẽn yiis tigingã pʋgẽ tõe n lebg n waame, pa wẽng ye
19, 20. a) B sã n yiis biig tigingã pʋgẽ, wãn to la a roagdbã tõe n mao ne b sũ-sãangã? b) B tõe n saagame tɩ bõe n na n maane?
19 La y sã n sãam y sũur ne a Zeova b sẽn yiis y biigã yĩnga, y na n zãaga ne a Zeova. Y sẽn tõe n maan tɩ sõng y nedã yaa y sẽn na n kɩt t’a yã tɩ y nonga a Zeova n yɩɩd bũmba fãa, baa y zakã neb menga. Sẽn na yɩl tɩ y sũ-sãamsã ra tõog-yã, y segd n maoome tɩ zood ning y sẽn tar ne a Zeova wã pãng ra boog ye. Ra n zãag-y y meng ne y tẽed-n-taasã ye. (Yel. 18:1) Pʋʋsd-y-yã a Zeova, n pelgd y pʋg n wilgd-a yellã sẽn namsd-y to-to wã. (Yɩɩl 62:8, 9) Ra n bao-y padems n kɩɩs noor ning sẽn yeel tɩ d ra maan tũud-n-taar ne ned b sẽn yiisã ye. Wala makre, ra n toond-y-yã-a mesaaz-rãmb ne telefõn wall ne ẽntɛrnetã ye. (1 Kor. 5:11) Kell-y n tʋm-y-yã a Zeova tʋʋmdã wʋsgo. (1 Kor. 15:58) Saam-bi-poak ning yell d sẽn zoe n gomã yeela woto: “Mam miime tɩ m segd n kell n tʋma a Zeova tʋʋmdã wʋsgo, la m kell n tall zood sõma ne-a. Woto, m bi-puglã sã n lebg n wa sɩdã pʋgẽ, m na n tõog n sõng-a lame.”
20 Biiblã yeelame tɩ nonglem “gũuda a tẽeb pidsg ne bũmb fãa.” (1 Kor. 13:4, 7) Rẽnd y sã n saagdẽ tɩ y nedã na n lebg n wa sɩdã pʋgẽ, pa wẽng ye. Yʋʋmd fãa, neb wʋsg b sẽn yiis a Zeova siglgã pʋgẽ n lebgd n watẽ. Ned b sẽn yiis sã n tek yam n kos sugri, a Zeova sũur sigdame. A sakd n kõ a soabã sugri.—Yɩɩl 86:5.
YÃK-Y YAM N MAAN SẼN SEGDE
21, 22. Bõe la y yãk yam na n maane?
21 A Zeova kõo ninsaalbã lohorem tɩ b tõe n yãk yam b toore. (Karm-y Tõod 30:19, 20.) La lohorem kãng wata ne zɩɩbo. Rẽ n so tɩ kiris-ned fãa segd n sok a meng woto: ‘Mam sẽn yãkd yam n maand bũmb ninsã zãagd-m-la ne a Zeova bɩ? M pa bas tɩ tʋʋmã, reemã la pemsmã kokr wall m zakã ned b sẽn yiis tigingã pʋgẽ zãag-m ne a Zeova sɩda?’
22 A Zeova sẽn nong a nin-buiidã to-to wã zɩ n boog ye. Rẽnd yaa tõnd sẽn na n dɩk so-wẽng bal la d na n zãag ne a Zeova. (Rom 8:38, 39) La d tõeeme n da rɩk so-wẽng ye. Bɩ y mao y pãng tɛka, tɩ baa fʋɩ ra zãag-y ne a Zeova ye. Sõsg ning sẽn pʋgdã na n wilga vɩɩmã nens a naas pʋsẽ me d sẽn segd n gũusi.
