A Zezi ra na n leoka sok-kãngã tɩ bõe?

Wẽn-tũudb wʋsg tagsdame tɩ tũudmã segd n kẽesa a toog politikã yɛl pʋgẽ. B tẽedame tɩ woto la b na n tõog n sõng n welg ãdem-biisã zu-loeesã. La wẽn-tũudb kẽer getame tɩ pa zems tɩ tũudmã kẽes a toog politikã pʋgẽ ye. Bõe la yãmb mengã tagsd yel-kãngã wɛɛngẽ? Rẽ yĩnga, tũudmã ne politikã segd n naaga taab n tʋm bɩ?

NEBÃ geta a Zezi Kirist wa a soab ning sẽn “tall pãng wʋsg ãdem-biisã zug tũudmã wɛɛngẽ wã.” Tags-y n ges-y d sã n da tõe n sok a Zezi tũudmã sã n tog n kẽesa a toog politikã pʋgẽ, a na n leokame tɩ bõe? A sẽn wa n be tẽngã zugã, a goamã la a tʋʋmã sõngd-d lame tɩ d bãng sok-kãngã leoore. Wala makre, a sẽn wa n sõsd ne nebã tãngã zugã, a kõ a karen-biisã saglse, sẽn na yɩl tɩ b bãng b manesem sẽn segd n yɩ to-to zĩig ning b sẽn vɩ wã. Bɩ d gom sagl-kãens kẽer yelle.

B tog n vɩɩ neb a taabã sʋka

A Zezi rɩka makre, n bilg manesem ning a karen-biisã sẽn segd n tall dũniyã pʋgẽ wã, n yeel-b woto: ‘Yãmb yaa dũniyã yamsem. La yamsem noom sã n yi, a na n le yãa noom yɛ? A lebga zaalem, la a zemsame tɩ b lob-a tɩ neb tab ne nao. Yãmb yaa dũniyã vẽenem. . . . Bɩ yãmb vẽenem yãg woto nebã sʋka, tɩ bãmb tõe n yã yãmb tʋʋm-sõmã la b waoog yãmb Ba sẽn be arzãnã.’ (Matɩe 5:13-16) Bõe yĩng t’a yeel t’a karen-biisã yaa dũniyã yamsem la a vẽenem?

A Zezi gomdã wilgdame t’a karen-biisã yaa wa yamsem ãdem-biisã fãa yĩnga, la pa neb sul-bil yĩng bal ye. B leb n yaa wa vẽenem nebã fãa yĩnga. A Zezi sẽn yeel woto wã, wilgda vẽeneg t’a pa rat t’a karen-biisã welg n tɩ vɩ kɛɛng ye. Bõe yĩnga?

Pĩnd wẽndẽ, la baa rũndã-rũndã, tẽns wʋsg pʋsẽ, b wae n ningda yamsem rɩbd sãnda pʋgẽ sẽn na yɩl tɩ ra põog ye. La yamsem pa tõe tɩ rɩɩb ra põog tɩ b pa ning-a rɩɩbã pʋgẽ ye. Fɩtl me pa tõe n vẽneg roogo, sã n mik tɩ b yõgen-a lame n tɩ rɩgl zĩig a to ye. Dẽnd a Zezi sẽn pa kõ a karen-biisã noor tɩ b welg ne nebã n tɩ bao zĩig n vɩ wã pa lingr ye. A leb n pa yeel-b tɩ b vɩ ne taab bala, n pa baood neb nins sẽn pa b tẽed-n-taasã zĩig baa bilf ye. Wa sẽn yaa tɩlae tɩ yamsem kẽ rɩɩb pʋgẽ n tõog t’a pa põogã, tɩ fɩtl me segd n be roog pʋgẽ sẽn na yɩl tɩ lik ra zĩnd roogã pʋgẽ wã, kiris-nebã me segd n vɩɩmda neb a taabã sʋka, n tõog n sõng-ba.

“Bãmb ka dũniyã rẽnd” ye

La sagls nins a Zezi sẽn kõ a karen-biisã n wilg manesem ning b sẽn segd n tall ne neb a taabã wata ne sokr sẽn tar yõodo: Manesem bʋg la kiris-nebã segd n tall ne politikã? Bõe yĩnga? Bala, a Zezi kũumã sẽn wa n kolgã, a pʋʋsa Wẽnnaam a karen-biisã yĩnga, n yeel woto: ‘Mam ka kot yãmb tɩ y yiis bãmb dũniyã pʋgẽ ye, m kotame tɩ y gũ-b tɩ wẽng soabã ra tõog-b ye. Bãmb ka dũniyã rẽnd wa mam sẽn ka dũniyã rẽndã.’ (Zã 17:15, 16) Woto wã, wãn to la kiris-nebã sẽn pa dũniyã rẽndã tõe n tʋmd zĩig ning b sẽn vɩ wã n sõng nebã? Sẽn na yɩl n bãng rẽ, bɩ d bao sogsg nins sẽn pʋgdã leoore:

[Seb-neng 3]

• Manesem bʋg la a Zezi tall ne politikã?

• Manesem bʋg la kiris-nebã segd n tall ne politikã?