A Abrahaam yɩɩ sik-m-meng soaba

Daar a yembre, a Abrahaam da zĩi a fu-roog noorẽ ne wĩndg n kokd pemsem. A sẽn zẽk a nenga, a yãa rap a tãab sẽn be yɩɩg n watẽ. * Zĩig pʋgẽ, a yik n wudgame n seg sãambã n bõos-b tɩ b wa sig yẽ yirã n vʋʋs bilfu. A yeel-b lame tɩ b zĩnd t’a tall dɩɩb bilf n wa kõ-ba. La a yaool n kɩt tɩ b maan maasa, la b kʋ nag-bil n segle, la b wa ne bĩis-gõeem ne bĩis-naar n kõ-ba. A Abrahaam sẽn maan woto fãa wã pa wilgd bal t’a mii sãamb reegr ye. Wilgdame me t’a yaa sik-m-meng soaba. D na n yãa rẽ taoore.—Sɩngre 18:1-8.

SIK-M-MENG SOAB YAA WÃN-WÃNÃ? Sik-m-meng soab pa wukd a menga, a pa tɩtaam soab me. Yaa ned sẽn sak n deeg tɩ neb a taabã tara b sẽn maand tɩ yaa sõma n yɩɩd yẽ. (Filip rãmba 2:3) A sakd n kelgda neb a taabã, n dɩkd yam, la a sakd n tʋmd tʋʋm sẽn wõnd paoogda neda.

WÃN-TO LA A ABRAHAAM WILG T’A YAA SIK-M-MENG SOABA? A tʋma neb a taabã neer yĩnga. Wa d sẽn togs tɩ loogã, a Abrahaam sẽn wa n yã sãambã, a yɩɩ tao-tao n na n ges b yelle. A pag a Saara me segla rɩɩb tao-tao. La yaa a Abrahaam n da be tʋʋma taoore. Yẽ n wudg n seg sãambã, yẽ n yeel tɩ b wa t’a kõ-b rɩɩbã, yẽ n wudg n ta rũmsã sʋk n yãk nag-bil n kɩt tɩ b kʋ, yẽ n leb n tall rɩɩbã n tɩ kõ-ba. A Abrahaam da tõe n kɩtame t’a tʋm-tʋmdbã maan fãa, la yẽ mengã naag n tʋmame. A pa ges tɩ rẽ paoogd-a lame ye. Sik-m-meng tek woto!

A Abrahaam sak n kelga a zakã neba, n dɩk yam. Biiblã pʋgẽ, b sẽn gomd yẽ ne a Saara sẽn sõsd ne taab pa waoog ye. La naoor a yiib fãa, b wilgame t’a Abrahaam sak n kelga a Saara koɛɛga. (Sɩngre 16:2; 21:8-14) A Saara ra yeela a  Abrahaam bũmb meng tɩ pa yɩ-a noog baa bilf ye. La a Zeova sẽn yeel-a t’a Saara gomdã yaa sɩdã, a sika a meng n tũ.

A ABRAHAAM KIBARÃ WILGDA TÕND BÕE? D sã n sɩd yaa sik-m-mens rãmba, d na n data ne d sũur fãa n tʋm n sõng neb a taabã. D na n maanda d sẽn tõe fãa n sõngd-ba, tɩ rẽ kõt-d sũ-noogo.

Bũmb a to me n tõe n wilg tɩ d yaa sik-m-mens rãmba. Ned sã n togs tõnd bũmb yell welgr wɛɛngẽ, bɩ d ra yɩ tao-tao n zãgse, d sẽn pa tags wa yẽ wã yĩng bal ye. Yɩta sõma tɩ d kelg-a la d rɩk yam. (Yelbũna 15:22) Sẽn yɩɩd fãa, ned sã n yaa taoor soab n tar yam-kãngã, na n sõng-a-la wʋsgo. Tʋʋmd taoor soab a ye yʋʋr sẽn yaa a John yeela woto: “M gũus n gesame tɩ taoor soab sẽn yaa sõma kɩtdame t’a tʋʋmã zĩigẽ bɩ ned fãa tõe n togs a sẽn tagsde, n pa yɛɛsdẽ ye.” A paasa woto: “Tʋʋmd taoor soab sã n pa sik-m-meng soaba, yaa toog t’a sak n deeg tɩ tʋʋmã zĩigẽ, nina miime n yɩɩd yẽ, baa ne a sẽn yaa taoor soabã. Dẽnd ned kae n mi fãa, baa a yaa taoor soaba.”

D sã n dɩk a Abrahaam togs-n-taare, n sakd n kelgd neb a taabã n dɩkd yam, la d sakd n tʋmd tʋʋm nins sẽn wõnd paoogda nedã, d na n paama a Zeova barka. Bala, Wẽnnaam pa nong tɩtaam dãmbã ye. La a “ningda sik-m-mens rãmbã zut barka.”—1 Pɩɛɛr 5:5.

[Tẽngr note]