Yãmb ra miime bɩ?

Bõe yĩng tɩ ligd-tekdb ra be Zerizalɛm wẽnd-doogẽ wã?

▪ A Zezi kũumã daar sẽn wa n kolgã, a kẽnga wẽnd-doogẽ wã n tɩ mik tɩ neb n da maand bũmb sẽn yaa kɛgre, t’a sũur pa yɩ noog ye. Biiblã yeta woto: “A Zezi . . . diga neb nins sẽn koosd la b raad Wẽnnaam doogẽ wã. La b luba ligd-tekdbã taabl dãmba, la b luba neb nins sẽn koosd walã goeels me. La bãmb yeela bãmb yaa: ‘A gʋlsame tɩ b na n boola mam doogã tɩ pʋʋsg roogo. La yãmb maand-a lame t’a yɩ fãadb zĩiga.’”—Matɩe 21:12, 13.

Pipi kiris-nebã wakatẽ, zʋɩf rãmbã la neb nins sẽn da tuub n sak zʋɩf rãmbã tũudmã ra yita tẽns toor-toor n wat Zerizalɛm wẽnd-doogẽ wã. Ned fãa ra wata ne ligd ning b sẽn dɩt a tẽngẽ wã. La sẽn na yɩl n paam n yao wẽnd-doogã lampo wã, bɩ n da rũms wall bũmb a taab n maan maando, ra yaa tɩlae tɩ b tek b ligdã n deeg beenẽ ligdã. Ligd-tekdbã sã n na n tek ligdã n kõ-ba, b rokda yõodo. Rẽ kɩtame tɩ zʋɩf rãmbã kibs sã n kolge, ligd-tekdbã ra rɩgenda b taabl dãmbã wẽnd-doogã zĩig ning b sẽn boond tɩ bu-zẽmsã zakã pʋgẽ.

A Zezi sẽn yeel tɩ ligd-tekdbã kɩtame tɩ wẽnd-doogã lebg “fãadb zĩigã,” wilgdame tɩ tõe tɩ yõod ning b sẽn da rokdã looga noore.