Wẽnnaam Gomdã sẽn yete

Bõe yĩng tɩ y segd n zãms Biiblã?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Bõe yĩng tɩ y segd n zãms Biiblã?

Wẽnnaam tara koe-noog n taasd ãdem-biisã. Yaa ne Biiblã maasem la a taasd tõnd koe-no-kãngã. Biiblã yaa wa lɛtre, d saasẽ Ba wã sẽn nong-dã sẽn gʋls n tool-do.—Karm-y Zeremi 29:11.

2. Koe-noogã yaa bʋgo?

Ãdem-biisã rata goosneem-sõngo. Ninsaalbã naamã toor-toorã baa a ye pa tõog n kɩt tɩ ãdem-biisã paam b mens ne wẽgbã, nin-kʋʋrã, bãasã la kũumã ye. La koe-noog n yaool n beẽ. Wẽnnaam na n waa ne goosneem-sõngo, sẽn na n fãag tõnd ne bũmb nins fãa sẽn wat ne namsgã.—Karm-y Daniɛll 2:44.

3. Bõe yĩng tɩ tar yõod tɩ y zãms Biiblã?

Ka la bilfu, Wẽnnaam na n sãama neb nins sẽn wat ne namsgã. La nananda, a zãmsda neb milyõ rãmb sẽn yaa sik-m-mens rãmba, tɩ b vɩɩmã yaa sõma. Wẽnnaam Gomdã zãmsg sõngda nebã tɩ b bãngd b sẽn tõe n mao ne zu-loeesã to-to, b sẽn tõe n paam sũ-noog hakɩk to-to, la b sẽn tõe n ta Wẽnnaam yam to-to.—Karm-y Sofoni 2:3.

4. Ãnd n so Biiblã?

Sɛb 66 n be Biiblã pʋgẽ. Yaa rap 40 n gʋls seb-kãensã. A Moiiz n gʋls pipi sɛb a nu wã sẽn na maan yʋʋm 3 500 masã. Yaoolem sebrã yaa tʋm-tʋmd a Zã n gʋls sẽn yɩɩd yʋʋm 1 900 masã. Sẽn gʋls-b Biiblã gʋlsa Wẽnnaam goama, pa b mens tagsg ye. Dẽnd Biiblã yaa Wẽnnaam n so.—Karm-y 2 Tɩmote 3:16; 2 Pɩɛɛr 1:21.

Biiblã sẽn togs beoog yɛl tɩ sɩd pidsd kɛpɩ wã me yaa kaset sẽn wilgd t’a yita Wẽnnaam nengẽ. Ninsaal pa tõe n togs beoog yɛl kɛpɩ woto ye. (Ezai 46:9, 10) Sẽn paase, Biiblã wilgda tõnd Wẽnnaam sẽn yaa a soabã. Biiblã goamã tara pãng n tõe n kɩt tɩ ned toeem zʋgo, n lebg nin-sõngo. Woto fãa kɩtame tɩ neb milyõ rãmb kɩs sɩd tɩ Biiblã yita Wẽnnaam nengẽ.—Karm-y Zozue 23:14; 1 Tesalonik rãmb 2:13.

5. Wãn to la y tõe n wʋm Biiblã goam võore?

B ra boonda a Zezi tɩ Wẽnnaam Gomdã karen-saamba. Neb nins a sẽn da sõsd ne wã wʋsg ra mii Gʋlsg Sõamyã, la baasgo, yɩɩ tɩlae t’a sõng-b tɩ b wʋm goam kẽer võore. Sẽn na yɩl n sõng-b tɩ b “bãng Gʋlsg Sõamyã” võore, a ra tẽegd-b-la vɛrse rãmba, la a wilgd-b a võorã. Sõs-kãngã pʋgẽ me, yaa woto la b maan sẽn na yɩl n sõng-yã.—Karm-y Luk 24:27, 45.

Y sã n zãms Biiblã n bãng Wẽnnaam daabã ne ninsaalbã, na n kõ-y-la sũ-noog wʋsgo. La neb kẽer sã n bãng tɩ yãmb karemda Biiblã, b sũy pa na n yɩ noog ye. Ra bas-y tɩ rẽ koms y raood ye. Y sã n dat n wa paam vɩɩm sẽn kõn sa wã, yaa tɩlae tɩ y zãms Biiblã n bãng Wẽnnaam.—Karm-y Matɩe 5:10-12; Zã 17:3.

Y sã n dat vẽnegr n paase, bɩ y karem seb-kãngã: Biiblã sɩd yetame tɩ bõe? a sak a 2 wã. A Zeova Kaset rãmbã n yiis-a.