Sogsg a naas b sẽn leok dũniyã saab wɛɛngẽ

A ZEZI KIRIST ra pĩnd n togsame tɩ ‘dũni kãngã na n saame.’ A goma rẽ yell n yeel woto: “Wakat kãnga, to-kãseng na n zĩndame, toog sẽn yaa woto nan ka zĩnd dũniyã zug ye, la a kõn leb n zĩnd yãoã zugẽ abada.”—Matɩe 24:14, 21.

A Zezi sẽn gom dũniyã saab yellã, n paas Biiblã goam a taab rẽ wɛɛngẽ wata ne sogsg kẽer sẽn tar yõodo. Yɩta sõma tɩ y rɩk y Biiblã n ges b sẽn leokd sogs-kãens to-to wã.

1 Bõe la b sẽn na n menesã?

Biiblã pa yet tɩ yaa tẽn-gãongã la b sẽn na n menesã ye. Yɩɩl-gʋlsdã ra yeela woto: “[Wẽnnaam] yẽbga dũniyã a yẽgr zugu; a kõn tol n dĩms abada ye.” (Yɩɩl Sõamyã 104:5) Biiblã pa yet me tɩ wakat n wat tɩ b na n menes yõor buud fãa tẽngã zug ye. (Ezai 45:18) A Zezi meng yeelame tɩ neb n na n põs dũniyã sãoong sasa. (Matɩe 24:21, 22) Sã n yaa woto, yaa bõe la Biiblã sẽn yeel tɩ b na n menesa dũniyã sãoong sasa wã?

B na n menesa ninsaalbã goosneema rãmbã fãa sẽn pa tõog n welg dũniyã yɛlã. Wẽnnaam da kɩtame tɩ no-rɛɛs a Daniɛll yeel woto: “Wẽnnaam sẽn be yĩngrã na n kɩtame tɩ soolem sẽn ka tõe n sãame, la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.”—Daniɛll 2:44.

Pemsmã la tẽn-gãongã rẽgengã, n paas zabã na n saame. Yɩɩl Sõamyã 46:10 goma Wẽnnaam sẽn na n maan bũmb ningã yelle, n yeel woto: “Bãmb kɩtdame tɩ zabr sɛ hal dũniyã tɛk fãa. Bãmb kaooda tãbdo, la b kʋʋsda kãna, la b yõogda saar dãmb bugum.” Biiblã yetame me tɩ Wẽnnaam “na n sãama neb nins sẽn sãamd dũniyã.”—Wilgri 11:18.

Nin-kʋʋrã, wẽgbã la tʋʋm-kɛgã fãa na n saame. Wẽnnaam Gomdã yeela woto: ‘Nin-tɩrsã na n zĩnda tẽngã pʋgẽ, pʋ-peelem dãmbã na n zĩnda a pʋgẽ. La b na n yiisa nin-wẽnsã tẽngã pʋgẽ. B na n yiisa neb nins sẽn ka baood sɩdã.’—Yelbũna 2:21, 22.

 2 Wakat bʋg la dũniyã na n sa?

Wẽnnaam a Zeova yãka “wakat” takɩ n na n wa sãam nin-wẽnsã la a menes wẽnem buud fãa, tɩ rẽ poor bɩ a kɩt t’a Rĩungã sẽn yaa goosneema wã soog dũniyã fãa. (Mark 13:33) La Biiblã wilgda vẽeneg tɩ d pa tõe n mag n bãng sẽn na n yɩ wakat ningã ye. A Zezi yeela woto: ‘Ned baa a yembr ka mi ra-kãnga, la wakat kãng ye. Baa malɛk rãmbã sẽn be saasẽ wã, baa Wẽnnaam Biigã meng ka mi ye, yaa Ba wã bala.’ (Matɩe 24:36) La a Zezi ne a karen-biisã pĩnd n wilga yɛl kẽer sẽn na n zĩnd tɩ Wẽnnaam yaool n sãam dũniyã. B wilgame tɩ d sã n wa yã yɛl nins sẽn pʋgdã fãa sẽn naag taab n pidsd dũniyã gill zugu, bɩ d bãng tɩ saabã ta n saame.

Politikã zu-loeesã, tẽngã rẽgengã, la nin-buiidã zʋg-wẽnsã tara paasg n yɩɩd pĩndã. Daar a ye, a Zezi karen-biisã sẽn sok-a n na n bãng dũniyã saab sẽn na n yɩ wakat ninga, a leok-b-la woto: “Buud a yembr na n yika zabr ne buud a to, la soolem a yembr ne soolem a to. La tẽn-digimdug na n zĩnda zĩig-zĩiga. La kom na n zĩndame. La bõn-kãens fãa yaa tood sɩngr bala.” (Mark 13:8) Tʋm-tʋmd a Poll me ra yeela woto: “Yaoolem wakate, tood na n zĩndame. Tɩ bõe, nebã na n yɩɩ beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba rãmba, la ma rãmb kɩɩsdba, zɩ-beoog rãmba, nin-zaalse, neb sẽn ka tar nimbãan-zoeere, la sũ-to-neba, tẽn-kãn-neba, neb sẽn ka tar yõk-m-menga, pʋto-rãmba, nin-sõamyã kisgdba, zãmb dãmba, neb sẽn ka gũusda, la wuk-m-mens rãmb sẽn nong dũniyã sũ-noog n yɩɩd [b sẽn nong] Wẽnnaam.”—2 Tɩmote 3:1-5.

B moonda Wẽnnaam Rĩungã koɛɛg dũniyã gill zugu, buud-goam toɛy-toɛy pʋgẽ. A Zezi ra yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:14.

3 Dũniyã saab poore, bõe n na n maane?

Biiblã pa yet tɩ b na n kɩtame tɩ nin-tɩrsã fãa kẽng saasẽ n tɩ vɩɩmd wakat sẽn kõn sa ye. A Zezi pʋd n yeelame tɩ Wẽnnaam sẽn da rat tɩ ãdem-biisã vɩɩm yɩ to-to hal sɩngrẽ wã na n pidsame. A yeela woto: “Bark bee sũ-maasem dãmbã zutu, tɩ bõe, bãmb na soog dũniyã.” (Matɩe 5:5; 6:9, 10) La b kẽer sã n maan kaalem tɩ saabã nan pa ta, Biiblã wilgame tɩ b na n wa vʋʋg-b lame. (Zoob 14:14, 15; Zã 5:28, 29) Rẽ poore, bõe n na n maane?

A Zezi sẽn yaa Wẽnnaam Rĩungã rĩmã na n zĩnda saasẽ n dɩ naam dũniyã gill zugu. No-rɛɛs a Daniɛll da yeela woto: ‘M yʋng bõn-makrã pʋgẽ, mam yãa bũmb sẽn wẽnd ninsaala, [yaa a Zezi sẽn vʋʋgã,] t’a zao sawat n watẽ. Yẽ kolga wakat fãa naabã, [Wẽnnaam a Zeova,] tɩ b bool-a t’a kẽng b nengẽ. La b kõo yẽ [a Zezi] soolem ne waoogre la naam, tɩ tẽnsã fãa neb sẽn yaa soolem toɛy-toɛyã n gomd goam toor-toorã sak-a. A na n dɩɩ naam wakat fãa n ka bas ye, la a soolmã ka na n tol n sɛ ye.’—Daniɛll 7:13, 14; Luk 1:31, 32; Zã 3:13-16.

Neb nins Wẽnnaam Rĩungã sẽn na n soogã na n talla laafɩ la bãane, wakat sẽn kõn sa. No-rɛɛs a Ezai ra yeela woto: “B na n mee zags n zĩnd b pʋsẽ. Bãmb na n sela tɩɩs n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye.” (Ezai 65:21-23) Tʋm-tʋmd a Zã ra goma wakat kãng yell n yeel woto: ‘Gese, Wẽnnaam yir bee nebã sʋka. La a na n zĩnda ne bãmba, la bãmb na n yɩɩ a  neba, la a menga na n paa ne bãmba. A na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.’—Wilgri 21:3, 4.

4 Bõe la y segd n maan n põs saabã wakate?

Tʋm-tʋmd a Pɩɛɛr yeelame tɩ saabã wakate, b sã n yeel neb kẽer tɩ Wẽnnaam na n kẽesa a toog n menes wẽnemã la nin-wẽnsã tẽngã zugu, b na n laadame n tẽed tɩ yaa ziri. (2 Pɩɛɛr 3:3, 4) La a Pɩɛɛr keooga nebã tɩ baa kẽer sã n laadẽ, b segd n modg n tũu sagl-kãensã.

Rɩk-y yam sãoong nins sẽn loogã pʋgẽ. A Pɩɛɛr yeela woto: “Bãmb, [dat n yeel tɩ Wẽnnaam,] ka bas pĩnd dũniyã tɩ põs ye, la bãmb sẽn tʋm sãoong sa-kãseng wẽn-kɩɩsdbã sẽn be dũniyã zugã yĩnga, bãmb fãaga a Nowe sẽn yaa tɩrlem koe-moondã ne neb a yopoe.” (2 Pɩɛɛr 2:5) A Pɩɛɛr goma laadbã yell n yeel woto: “Bãmb ka rat n deeg tɩ yaa ne Wẽnnaam goamã la yĩngr be hal pĩnda, la koom kɩtame tɩ tẽng puk yẽ pʋgẽ, la ne ko-kãnga, dũniyã sẽn da be pĩndã sãama koom sẽn lim-a wã yĩng ye. La yaa ne gom-kãng  bala, yĩngr la dũniyã * sẽn be masã wã bĩnga bugum yĩnga, bʋʋd kaoobo, la wẽn-kɩɩsdbã sãoong daar sẽn na n ta wã.”—2 Pɩɛɛr 3:5-7.

Tũud-y Wẽnnaam noyã la a saglsã. A Pɩɛɛr yeelame tɩ neb nins fãa sẽn dat n wa paam n põs dũniyã saab wakatã segd n mao n yɩɩ neb “yel-manesem sẽn yaa sõma la sẽn sakd Wẽnnaam.” (2 Pɩɛɛr 3:11) Tẽeg-y t’a Pɩɛɛr goma “yel-manesem sẽn yaa sõma” la Wẽnnaam sakr yelle. Woto wilgdame tɩ pa d sẽn na n yet ne noor bal tɩ d tara tẽebo, wall d sẽn na n gũ tɩ saabã kolg tɩ d yaool n bao Wẽnnaam la d na n põs ye.

La woto wã, yaa yel-manesem la wẽn-sakr tʋʋm-bʋs takɩ la Wẽnnaam nonga? Yɩta sõma tɩ y mak yãmb sẽn mi wã ne Biiblã sẽn yet rẽ wɛɛngẽ wã n gese. Y sã n kos a Zeova Kaset rãmbã tɩ b sõng-yã, b na n sõng-y lame. Kos-y-b tɩ b wilg-y sogs-kãensã leoorã y meng Biiblã pʋgẽ. Y sã n maan dẽ, na n sõng-y lame tɩ baa rũndã-rũndã yɛlã sẽn sek rabeemã, bɩ y ra le zoe beoog daarã rabeem.

[Tẽngr note]

[Foto, seb-neng a 7]

Tẽngã pa na n tol n menem abada. Yaa sẽn sãamd-b tẽngã n na n meneme