Ne y waoong vɩɩm sẽn tar barkã sor zugu!

“Tõnd sã n vɩ walla tõnd sã n ki, tõnd yaa [a Zeova] rẽnda.”—ROM. 14:8.

1. A Zezi yeelame tɩ d sã n dat vɩɩm sẽn tar barkã, bõe la d segd n maane?

A ZEOVA ratame tɩ tõnd vɩɩmã tall barka. Ned fãa tõe n yãka yam n vɩɩmd wa a sẽn date, la vɩɩm sẽn tar barkã sor yaa a ye bala. D sã n dat tɩ d vɩɩmã tall barka, yaa tɩlae tɩ d vɩɩmd tɩ zems ne Wẽnnaam Gomdã noyã, la d rɩk a biig a Zezi Kirist togs-n-taare. A Zezi wilga a karen-biisã tɩ b segd n tũu Wẽnnaam ne b sɩɩs la ne sɩda, la a tʋm-b tɩ b tɩ sõng neb a taab me tɩ b lebg yẽ karen-biisi. (Mat. 28:19, 20; Zã 4:24) D sã n tũud bũmb nins a Zezi sẽn wilgã, d noogda a Zeova sũuri, la d paamd a barka.

2. Pipi kiris-nebã wakatẽ, wʋsg manesem yɩɩ wãn b sẽn wʋm koɛɛgã, la b sẽn da boond-b tɩ “sorã” nebã rat n yeelame tɩ bõe?

² Tõnd sã n wa yã ‘neb nins sẽn dat vɩɩm sẽn-kõn-sa wã’ sẽn lebg tẽedb n deeg lisgu, zemsame tɩ d bɛɛl-b ne b waoog vɩɩm sẽn tar barkã sor zugu. (Tʋʋ. 13:48) Pipi kiris-nebã wakate, neb tusa sẽn yit buud toor-toor n sak n deeg tɩ kiris-nebã sorã yaa sɩda, n deeg lisgu, tɩ wilg nebã fãa nifẽ tɩ b rɩka b mens n kõ Wẽnnaam. (Tʋʋ. 2:41) B ra boonda pipi kiris-nebã tɩ “sorã” neba. (Tʋʋ. 19:23) B sẽn bool Kirist tũudmã tɩ “sorã” sɩd zemsame. Bala sẽn da lebgd-b kiris-nebã sẽn da tũud bũmb nins b vɩɩmã pʋgẽ wã ra wilgdame tɩ b tẽeda a Zezi Kirist la b tũud a mak-sõngã.—1 Pɩɛ. 2:21.

3. Bõe yĩng tɩ sẽn dat-a n lebg a Zeova ned fãa segd n deeg lisgu, la yʋʋm piig sẽn loogã pʋgẽ, neb a wãn n deeg lisgu?

³ Yaoolem dayã pʋgẽ, karen-biisã maaneg tʋʋmd paama pãng hal tɩ b tʋmd-a sẽn yɩɩd tẽns 230 pʋgẽ. Yʋʋm piigã sẽn loogã pʋgẽ, sẽn yɩɩd neb 2 700 000 n yãk yam n na n tũ a Zeova, n deeg lisg n wilg tɩ b rɩka b mens n kõ-a. Dẽnd yaa wa semen fãa, sẽn yɩɩd neb 5 000 n deegd lisgu! Yaa ned sẽn na n nong Wẽnnaam, n mi Biiblã sẽn yet bũmb ningã la a tẽed rẽ, la a yaoond n dɩk a meng n kõ Wẽnnaam n deeg lisgu. Lisgã reegr yaa tõnd vɩɩmã pʋgẽ yel-kãseng a ye, bala yaa tõnd ne a Zeova zoodã sɩngre. A wilgdame me tɩ d basa yard t’a Zeova  na n sõng-d lame tɩ d tõog n maan a raabã wakat fãa, wa a sẽn da sõng a pĩnd wẽndẽ nin-buiidã tɩ b tũ a sorã.—Ezai 30:21.

Bõe yĩng tɩ y segd n deeg lisgu?

4, 5. Sõdg-y lisgã reegr sẽn wat ne bark la nafa ninsi?

⁴ Tõe tɩ y zãmsa Biiblã n mi Wẽnnaam, n toeem y vɩɩmã, n lebg koe-moond sẽn nan pa reeg lisgu. Yaa sɩd tɩ woto seka pẽgre. La rẽ yĩnga y zoe n pʋʋsa Wẽnnaam n dɩk y meng n kõ-a, la y tʋll n deeg lisg bɩ? Sãmbg kae tɩ y sẽn zãms Biiblã, y bãngame tɩ yaa a Zeova raabã maaneg la y segd n lʋɩɩs taoor y vɩɩmã pʋgẽ, lakae pa y mengã raab maanego, wall arzɛk baoob ye. (Karm-y Yɩɩl Sõamyã 148:11-13; Luk 12:15) La y sã n deeg lisgu, bark la nafa nins y sẽn na n paamã kẽer la bʋse?

⁵ Y sã n dɩk y meng n kõ Wẽnnaam n lebg kiris-neda, y vɩɩmã na n talla võore. Y sũur na n yɩɩ noogo, y sẽn sakd n maand Wẽnnaam daabã yĩnga. (Rom 12:1, 2) A Zeova vʋʋsem sõngã na n kɩtame tɩ y paam zʋg-sõma toor-toore. Wala makre, y na n paama tẽebo, la y yɩ ned sẽn nong laafɩ. (Gal. 5:22, 23) Wẽnnaam na n leokda y pʋʋsgã, la a ningd modgr nins y sẽn maand n tũud a noyã barka. Koɛɛgã mooneg na n kõ-y-la sũ-noogo, tɩ y sẽn vɩ tɩ zemsd ne Wẽnnaam noyã kɩtdẽ tɩ vɩɩm sẽn kõn sa wã lebgd vẽeneg ne-y n paasdẽ. Rẽ toor sẽn ka be, y sã n deeg lisgu, wilgdame tɩ y sɩd rat n yɩɩ a Zeova Kaset soaba.—Ezai 43:10-12.

6. Bõe la lisgã reegr wilgda?

⁶ D sã n dɩk d meng n kõ a Zeova la d reeg lisgu, d wilga nebã fãa sʋk tɩ lebga a Zeova n so tõndo. Tʋm-tʋmd a Poll yeela woto: “Tõnd ned baa a yembr ka tõe n vɩ a meng yĩng bal ye, la ned baa a ye ka tõe n ki a meng yĩng me bal ye. Tɩ bõe, tõnd sã n vɩ, tõnd vɩɩ Zusoabã yĩnga; la tõnd sã n ki, tõnd kiida Zusoabã yĩnga. Woto yĩnga, tõnd sã n vɩ walla tõnd sã n ki, tõnd yaa Zusoabã rẽnda.” (Rom 14:7, 8) Wẽnnaam waooga tõndo, a sẽn naan tõnd tɩ d tõe n yãk yam n maan d sẽn datã. D sã n yãk yam n na n maan a raabã d sẽn nong-a yĩnga, noom-a-la hal wʋsgo. (Yel. 27:11) D sã n deeg lisgu, wilgdame tɩ d rɩka d meng n kõ a Zeova, la wilgd zãma wã me tɩ d sakame tɩ yẽ la d Naaba. Woto wilgdame tɩ no-koeemd ning sẽn wẽed ãndũni wã fãa naamã wɛɛngẽ wã pʋgẽ, d bee a Zeova poore. (Tʋʋ. 5:29, 32) D sã n maan woto, a Zeova me na n zĩnda d poorẽ. (Karm-y Yɩɩl Sõamyã 118:6.) Sẽn paase, lisgã na n kɩtame tɩ d paam bark a taab Wẽnnaam nugẽ rũndã-rũndã, la beoog daar me.

B paamda saam-biis sẽn nong-ba

7-9. a) A Zezi yeelame tɩ sẽn bas-b bũmb fãa n tũ yẽ wã na n paama bõe? b) Wãn to la a Zezi goam nins sẽn be Mark 10:29, 30 wã pidsd rũndã-rũndã?

⁷ Daar a ye, tʋm-tʋmd a Pɩɛɛr soka a Zezi woto: “Tõnd basa bũmb fãa n tũ yãmba. Woto, yaa bõe la tõnd na n deege?” (Mat. 19:27) A Pɩɛɛr da rat n bãnga bũmb ning yẽ ne  karen-biis a taabã sẽn na n paam beoog daare. Bala, sẽn na yɩl n tõog n kẽes b mens zãng-zãng Rĩungã koɛɛgã mooneg pʋgẽ, b sak n monga b mens bũmb wʋsgo. (Mat. 4:18-22) La a Zezi yeel-b lame tɩ b na n paama bõe?

⁸ A Mark goma rẽ yelle, n yeel t’a Zezi wilgame t’a karen-biisã na n paama saam-biis la saam-bi-pogs Wẽnnaam tũudmã pʋgẽ. A Zezi yeela woto: “Mam yeta yãmb sɩda tɩ ned ka be sẽn na n bas a yir walla a ba-bi-rap walla a ba-bi-pogs walla a ma walla a ba walla a kamb walla a pʋt mam yĩng ne koe-noogã yĩnga, sẽn kõn paam yiri la ba-bi-rapa la ba-bi-pogse, la ma rãmba la kamba la pʋt naoor koabg ye. La baoosgo, a na paam namsg masã zãmaan kãngã pʋgẽ. La dũniyã sẽn watã, a na paam vɩɩm sẽn ka sɛta.” (Mark 10:29, 30) Wala a Zezi sẽn yeelã, pipi kiris-nebã sɩd yɩɩ “ba-bi-rap la ba-bi-pogs la ma rãmb” taab yĩnga. Kẽer sɩd deega b tẽed-n-taas b zagsẽ. Sẽn maan-b woto wã sʋka, d tõe n sõdga a Lidi, a Akila, a Pirsill la a Gayus.—Tʋʋ. 16:14, 15; 18:2-4; 3 Zã 1, 5-8.

⁹ A Zezi gomdã pidsda dũniyã gill zug rũndã-rũndã. D tõe n yeelame tɩ “pʋt” nins a karen-biisã sẽn basd rũndã-rũndã wã yaa tʋʋm buud toor-toor wʋsg sẽn basd sẽn na yɩl n tʋm Wẽnnaam tʋʋmdã. Wala makre, misioneer dãmbã, Betɛllẽ tʋm-tʋmdbã, so-pakdbã, sẽn gilgd-b n sõngd n met siglgã rotã, la neb a taab sakame n bas nafa toor-toor n tʋmd Rĩungã tʋʋm tẽns wʋsg pʋsẽ. D tẽed-n-taas wʋsg sak n toeema zags sẽn na yɩl n da gĩd b vɩɩmã ne yɛl wʋsg ye. A Zeova sẽn get nin-kãensã yell to-to wã, n paas b tʋʋmdã sẽn kõt-b sũ-noog ningã kõta tõnd me sũ-noogo. (Tʋʋ. 20:35) Sẽn paase, neb nins fãa sẽn deeg lisg n yaa a Zeova Kaset rãmbã tõe n naaga b tẽed-n-taasã sẽn be dũniyã gill zugã tɩ b rengd n baood ‘Wẽnnaam soolmã ne a tɩrlmã,’ n paamd bark nins rẽ sẽn wat ne wã.—Mat. 6:33.

B paamda koglg “zĩ-soalgdgã pʋgẽ”

10, 11. “Sẽn-ka-to zĩ-soalgdgã” yaa bõe, la wãn to la d tõe n paam n kẽ be?

¹⁰ Rɩk-m-meng-n-kõ wã la lisgã wata ne bark a to me. Kɩtdame tɩ d paam n zĩnd “Sẽn-ka-to zĩ-soalgdgã pʋgẽ.” (Karm-y Yɩɩl Sõamyã 91:1.) Zĩ-kãngã pa zĩig sɩd-sɩd ye. A makda koglg la bãan ning d sẽn paamde, a Zeova sẽn kogend tõnd tɩ baa fʋɩ pa tõe n sãam zood ning d sẽn tar ne-a wã. A yaa “zĩ-soalgdga,” bala neb nins sẽn pa mi Wẽnnaam la b pa tẽed-a wã pa mi zĩ-kãng ye. D sã n vɩ tɩ zemsd ne d sẽn dɩk d meng n kõ wã, la d wilgdẽ tɩ d kɩsa sɩd zãng ne a Zeova, yaa wa d sẽn yet-a woto: “Yãmb yaa mam zĩ-lilldga la mam pãng zĩiga la mam Wẽnnaam mam sẽn dellda.” (Yɩɩl 91:2) Wẽnnaam a Zeova lebgda tõnd zĩ-lilldga. (Yɩɩl 91:9) Zĩ-lilldg sẽn yaa sõma n yɩɩd woto kae ye.

¹¹ D sã n paam n be a Zeova “zĩ-soalgdgã” pʋgẽ, rat n yeelame me tɩ d lebga a zoa. La yɩl n paam a Zeova zoodo, rẽnda d reng n dɩk d meng n kõ-a la d reeg lisgu. Rẽ tɛka, d wɩngda ne Biiblã zãmsgo, n pelgd d pʋs n pʋʋsd a Zeova, la d sakd a noyã ne d sũur fãa, tɩ paasd zood ning d sẽn tar ne-a wã pãnga. (Zak 4:8) A Zezi sẽn tar bas-yard ning ne a Naandã zɩ n keoos ye. Rẽ kɩtame tɩ zood ning a sẽn tar ne-a wã sõmblem ka to ye. (Zã 8:29) Woto yĩnga, bɩ d tall bas-yard zãng-zãng ne a Zeova, n kɩs sɩd t’a ratame la a tõe n sõng-d lame tɩ d pids pʋleng ning d sẽn maane, d sẽn wa n na n dɩk d meng n kõ-a wã. (Koɛ. 5:3) Wẽnnaam sẽn maand bũmb nins a nin-buiidã sõngr yĩngã wilgda vẽeneg t’a sɩd nong-d lame, la t’a ratame tɩ d tõog n tũ-a sõma.

D nan bark nins d sẽn zoe n tarẽ wã

12, 13. a) Bark bʋs la Wẽnnaam nin-buiidã zoe n tarẽ? b) Wãn to la d tõe n sõng nin-paalsã?

¹² Rɩk-m-meng-n-kõ wã la lisgã kɩtdame me tɩ d paam n naag nin-buiid Wẽnnaam sẽn ningd bark toor-toore. Nin-buiid kae n tar b barkã buud ye. Bala b tara zood ne Wẽnnaam a Zeova, tɩ bãan la zems-n-taar be b sʋk me. (Yɩɩl 29:11; Ezai 54:13) Bũmb kae dũni kãngã pʋgẽ d sẽn tõe n dɩk n mak ne bark nins Wẽnnaam nin-buiidã sẽn paamdã ye. Woto yaa vẽeneg tõnd tigis-kãsems nins sẽn tigimd tẽns wʋsg nebã sasa. Tigis-kãens sasa, d tẽed-n-taas sẽn yit  tẽns toɛy-toɛya, n gomd buud-goam toor-toor naagda taaba, tɩ laafɩ, zems-n-taar la nonglem be b sʋka.

¹³ Bark nins tõnd sẽn tarã kɩtame tɩ d yaa toor fasɩ ne dũni kãngã nebã yɛl sẽn tar sãoong n debda. (Karm-y Ezai 65:13, 14.) D sẽn moond koe-noogã kɩtame tɩ d tõe n paam n bool neb a taab tɩ b wa naag tõnd n paam bark nins d sẽn tarã. D sẽn paam n tõe n sõng neb nins sẽn nan lebg tigingã nebã tɩ b bãng koɛɛgã mooneg n paasã me yaa bark n kõ-do. Kãsem dãmbã sã n wa yãk-d tɩ d sõng nin-paalse, d tõe n paam n yɩɩ wa a Akila ne a Pirsill sẽn paam n zãms a Apolos ‘Wẽnnaam sorã tɩrg n paasã.’—Tʋʋ. 18:24-26.

Rɩkd-y-yã a Zezi mak-sõngã

14, 15. Bʋʋm-bʋs yĩng la d sẽn segd n ket n dɩkd a Zezi mak-sõngã?

¹⁴ Sɩd zemsame tɩ d rɩkd a Zezi mak-sõngã. Nand t’a wa tẽng zug ka, a zĩnda ne a Ba wã, n tʋm ne-a yʋʋm tus ka tɛka. (Yel. 8:22, 30) A ra miime tɩ yaa ned sẽn na n maand Wẽnnaam daabã, n paas a sẽn na n kɩt sɩdã kaseto, la a soab vɩɩmã talld barka. (Zã 18:37) A ra mii vẽeneg tɩ ned ning sẽn pa maand woto, a na n maanda sẽn noom a mengã bala, la rẽ wilgdame t’a yaa yam-koɛɛg soaba. A Zezi leb n da miime tɩ b na n nams-a-la wʋsgo, la b kʋ-a menga. (Mat. 20:18, 19; Heb. 4:15) La a sɩd kõo tõnd mak-sõngo, n wilg d sẽn tõe n kell n sak Wẽnnaam wakat fãa to-to.

¹⁵ A Zezi lisgã poor bilf bala, a Sʋɩtãan mak-a lame n tʋlg t’a bas vɩɩm sẽn tar barkã sor tũubu, la a pa tõog ye. (Mat. 4:1-11) Woto wilgdame tɩ baa a Sʋɩtãan sẽn maanega, d tõe n kell n saka Wẽnnaam wakat fãa. La wilgdame me tɩ wõnda wa a Sʋɩtãan sẽn baood neb nins n yɩɩd yaa sẽn segend-b n na n deeg lisgã, la sẽn deeg-b lisg paalmã. (1 Pɩɛ. 5:8) Wakat ning me, d roagdb sẽn dat d neer tõe n nams-d-la zɩɩlem yĩnga. La yel-kãngã buud kõta tõnd sor tɩ d tõe n wilg tɩ d tara zʋg-sõma nins kiris-ned sẽn segd n tallã. Wala makre, b sã n wa sok-d bũmbu, d leokda ne waoogr la gũusgu. (1 Pɩɛ.  3:15) Woto tõe n kɩtame tɩ neb nins sẽn kelgd tõndã toeem yam.—1 Tɩm. 4:16.

Kell-y n tũ-y vɩɩm sẽn tar barkã sore!

16, 17. a) Sã n yaa ne Tõod 30:19, 20 goamã, yɛl a tãab bʋs la ned ning fãa sẽn dat vɩɩmã segd n maane? b) Bõe la a Zezi, a Zã la a Poll yeel tɩ wilgdẽ t’a Moiiz gomdã yaa sɩda?

¹⁶ Na maan yʋʋm 1 500 nand t’a Zezi wa tẽngã zugu, a Moiiz ra sagla Israɛll nebã tɩ b yãk vɩɩm sẽn tar barkã sore. A yeel-b la woto: “Rũndã, mam boonda yĩngr ne tẽngã tɩ b wa yɩ kaset dãmb tõnd sʋka, tɩ mam wilga yãmb vɩɩm ne kũum la bark ne kãab wẽnse. Bɩ y yãk vɩɩm tɩ yãmb ne y yagensã tõe n vɩɩmde. La y nong Zusoab a Wẽnnaam la y sak bãmb koɛɛgã n gãd bãmba.” (Tõo. 30:19, 20) Yaa sɩd tɩ Israɛll nebã pa kell n sak Wẽnnaam ye. La a Moiiz gomdã pʋgẽ, a sõdga yɛl a tãab ned ning fãa sẽn dat vɩɩmã sẽn segd n maane. Yel-kãens pa toeem ye. A Zezi la kiris-neb a taab me goma rẽ yelle.

¹⁷ Pipi, ‘d segd n nonga tõnd Wẽnnaam a Zeova.’ Yaa d sẽn na n tũud Wẽnnaam noyã sẽn yaa tɩrsã la d wilgd tɩ d nong-a lame. (Mat. 22:37) Yiib-n-soaba, ‘d segd n kelga a Zeova koɛɛgã,’ rat n yeel tɩ d zãmsd Biiblã la d sakd Wẽnnaam noyã. (1 Zã 5:3) Woto baoodame tɩ d kẽnd tigissã me n pa vaandẽ, bala yaa tigissẽ wã la b wilgd Biiblã goamã võore. (Heb. 10:23-25) Tãab-n-soaba, ‘d segd n gãda a Zeova.’ Woto rat n yeelame tɩ baa sẽn wa n yaa zu-loees nins pʋsẽ la d be, d segd n kell n talla tẽeb ne Wẽnnaam la d tũ a Biigã.—2 Kor. 4:16-18.

18. a) Hal yʋʋmd 1914 soabã pʋgẽ, bõe la Gũusg Gasgã yeel bãngr ning d sẽn paamdã zugu? b) Wẽnnaam sẽn vẽneg tõnd a Gomdã rũndã-rũndã wã, d manesem segd n yɩɩ wãn ne rẽ?

¹⁸ D sã n tũud Biiblã noyã, d sɩd paamda bark wʋsgo! Yʋʋmd 1914 yʋʋm-sar kiuug rasem 15 Gũusg Gasgã neng 377-378 wã pʋgẽ, b sɩd yeela gomd sẽn wilgd rẽ. B yeela woto: “Rẽ yĩnga tõnd pa nin-buiid sẽn tar bark la sũ-noog sɩda? D Wẽnnaamã pa sõngd-d wakat fãa sɩda? Sẽn tẽed-a t’a tõe n paama bark sẽn yɩɩd woto zĩig a to bɩ a soab kẽnge. La d tẽedame tɩ sẽn wa n yã-a zĩig sẽn são, a na wilg d fãa. Vẽenega, d pa mi bũmb yõod sẽn kolg bũmb nins d sẽn yã Wẽnnaam Gomdã pʋgẽ wã yõodã ye. . . . D sẽn paam n wʋmd Wẽnnaam Gomdã võor sõma wã kõt-d-la bãane, sũ-noog la bark wʋsgo, hal tɩ d pa tõe n bãng n bilg ye. Biiblã sẽn bilgd Wẽnnaam yamã, a tɩrlmã, a pãngã la a nonglmã to-to wã taa d yam la noom-d wʋsgo. Tõnd sẽn da baoodã pa yɩɩd woto ye. D sẽn dat bal yaa d ket n bãngd d Wẽnnaamã n paasdẽ.” Rũndã-rũndã me, d ket n nanda vẽenem ning Wẽnnaam sẽn kõt tõnd a Gomdã zugã wʋsgo. Sɩd me, yaa masã la d tar bʋʋm n yɩɩda, n na n maan sũ-noog d sẽn ‘kẽnd a Zeova vẽenemã pʋgẽ’ wã yĩnga.—Ezai 2:5; Yɩɩl 43:3; Yel. 4:18.

19. Bõe yĩng tɩ sẽn tõe n deeg-b lisgã pa segd n bas tɩ kaoose?

¹⁹ Yãmb sã n dat n ‘kẽn a Zeova vẽenemã pʋgẽ’ la y yaool n nan pa rɩk y meng n kõ-a la y reeg lisgu, bɩ y ra bas tɩ kaoos ye. Maan-y y sẽn tõe fãa n pids bũmb nins Biiblã sẽn wilg tɩ ned segd n maaname n yaool n tõog n deeg lisgã. Woto la y wilgd Wẽnnaam ne Kiristã y mi-beoogo, bũmb nins fãa b sẽn maan tõnd yĩngã. Bũmb kae y sẽn tare, t’a yõodã yɩɩd y vɩɩmã ye. Rɩk-y y vɩɩmã n kõ Wẽnnaam. Tũ-y Wẽnnaam Biigã, n wilg tɩ y rat n maana Wẽnnaam daabã. (2 Kor. 5:14, 15) Woto la y tũud vɩɩm sẽn tar barkã sore!

Wãn to la y na n leoke?

• D sã n deeg lisgu, bõe la rẽ wilgda?

• Ned sã n dɩk a meng n kõ Wẽnnaam n deeg lisgu, a paamda nafa bʋse?

• Bõe yĩng tɩ tar yõod tɩ d rɩk a Zezi mak-sõngã?

• Bõe n na n sõng tõnd tɩ d kell n pa vɩɩm sẽn tar barkã sor zugu?

[Zãmsgã sogsgã]

[Foto, seb-neng 29]

Lisgã wilgdame tɩ yãmb yãka yam n dɩk vɩɩm sẽn tar barkã sore

[Foto, seb-neng 31]

Yãmb bee “zĩ-soalgdgã pʋgẽ” bɩ?