Tũudum hakɩkã neb nonga taaba

BIIBLÃ yeelame tɩ “ned ninga sẽn ka nong a taab ka bãng Wẽnnaam ye, bala Wẽnnaam yaa nonglem.” (1 Zã 4:8, Kãab-paalgã Koe-noogo) Dẽnd tũudum hakɩkã wilgda a nebã tɩ b segd n nong taaba.

Tũudum toɛy-toɛy wʋsg maanda nebã neer hal tɩ sek pẽgre. Wala makre, b geta bãad-rãmbã, sẽn kʋʋl-bã la naong rãmbã yelle. B yeta b nebã tɩ b tũ tʋm-tʋmd a Zã saglga. A Zã yeela woto: “Ned sã n tar tẽng zug arzɛka, n ne a saam-biig zu-loɛɛga, la a maand wa a ka ne, Wẽnd nonglmã yɩta a wãn n pa ne yẽ soaba? M kom-bõonego,  d nonglmã ra yɩ bʋʋre la gom nood ye, nonglmã yɩ sɩda, a tũ ne tʋʋmde.”—1 Zã 3:17, 18, Sebr Sõngo.

La tõnd sẽn vɩ tẽng ningã taoor dãmb sã n wa zabd ne tẽng a to, d segd n kell n tũu Wẽnnaam sẽn yeel tɩ f “nong f to wala f mengã” bɩ?—Matɩe 22:39, Sebr Sõngo.

A Zezi yeela woto: “Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:35) Bao-y n leok-y sogsg nins sẽn pʋgdã, la y sok y mens woto: “Rẽ yĩnga tũudum kãng nebã sɩd nonga taab wakat fãa ne tʋʋma, la pa ne b no-goam bal bɩ?”

MAKRE: Zabã wɛɛngẽ.

BIIBLÃ YETA WOTO: A Zezi yeela a karen-biisã woto: “Mam yeta yãmb tɩ nong y bɛɛba, . . . la y maan neb nins sẽn kis yãmbã neere”—Matɩe 5:44, Kãab-paalgã Koe-noogo.

Sodaasã sẽn wa n na n yõk a Zezi wã, a Pɩɛɛr yiisa a zab-teoog n na n zab n fãag-a. La a Zezi yeela a Pɩɛɛr woto: “Sui f sʋʋgã a wʋʋgẽ, tɩ bõe, neb nins fãa sẽn zãad sʋʋsã, yaa sʋʋg n na n kʋ-ba.”—Matɩe 26:52.

Tʋm-tʋmd a Zã yeela woto: “Ned ninga fãa sẽn ka maand tɩrga, la ned ninga sẽn ka nong a ba-biig me ka Wẽnnaam ned ye. Bõn-kãng wilgda sẽn yaa Wẽnnaam kamba la sẽn yaa Sʋɩtãana kamba. Tɩ bõe, koɛɛg ninga yãmb sẽn wʋm hal sɩngrẽ b sẽn togs yãmbã, a yaa tɩ tõnd nong taaba. La d ra yɩ wa a Kayẽ sẽn da yaa wẽng soabã rẽnd n kʋ a ba-biigã ye.”—1 Zã 3:10-12.

SOKRE: Rẽ yĩnga tũudum kãng wilgda a nebã tɩ zabr sasa, b pa segd n sõng n zab bɩ?

MAKRE: Politikã wɛɛngẽ.

BIIBLÃ YETA WOTO: Daar a yembre, zʋɩf rãmb kẽer sẽn da yã a Zezi sẽn maand bõn-bõnã, b tʋlgame t’a wa sõng-b b politikã wɛɛngẽ. La a maana wãna? ‘A Zezi sẽn mik tɩ nebã na n wa modg-a lame t’a yɩ b rĩmã, a leb n kẽnga tãng zug a yembr bala.’—Zã 6:15.

B sẽn wa n yõk a Zezi n dõd-a t’a sagenda nin-buiidã tɩ b kɩɩs tẽngã soaadbã, a leoka woto: “Mam naamã ka dũni kãnga rẽnd ye, m naama da yaẽ-la dũni kãnga rẽnna, m nebã na n yiisẽ-la tãpo, n sõng-ma, tɩ m da lʋɩ Zʋɩf rãmb nugẽ ye, la m naam ka dũni kãnga rẽnd ye.”—Zã 18:36, Sebr Sõngo.

Daar a yembr a Zezi sẽn da wa n pʋʋsd Wẽnnaam a karen-biisã yĩnga, a yeela woto: “Mam kõo bãmb yãmb goama, la dũniyã kisga bãmba bãmb sẽn ka dũniyã rẽnda, a wa mam sẽn ka dũniyã rẽndã yĩnga.”—Zã 17:14.

 SOKRE: Rẽ yĩnga tũudum kãng nebã tũuda a Zezi makrã, n pa kẽesd b toog politikã pʋgẽ, baa politikã neb kẽer sã n kis-b rẽ yĩng bɩ?

MAKRE: Bu-welsgã wɛɛngẽ.

BIIBLÃ YETA WOTO: A Pɩɛɛr sẽn wa yã bu-zẽmsã neb sẽn sakd n lebgd kiris-nebã, a yeela woto: “M neeme tɩ Wẽnd ka welg ninsaal ne a to ye. Fo buuda sẽn yaa a soaba, f sã n zoet Wẽnde la f maand sẽn zemse, b pʋgda f poore.”—Tʋʋma 10:34, 35, Sebr Sõngo.

A Zak me gʋlsa pipi kiris-nebã n yeel-b woto: “M ba-biisi yãmb sẽn tẽed tõnd Zũ-soab a Zezi Kiristã, sẽn so-a ziirã, bɩ y ra tũus neb ye. Ned sẽn pid sãnem nugbĩnga la a yer naam fut sã n kẽ yãmb kaorengo, tɩ naong soab me sẽn yer nimbãan-fut me kẽ, yãmb sã n waoog ned ning sẽn yer-a naam futã n yeel-a: Fo wa n zĩnd waoogr zĩ-kãnga wã, la y yeel naongã soaba: Fo yals yĩngr be, wall f yeel: Zĩnd tẽng mam naoẽ wã. Dẽ yĩnga, yãmb ka tũusd neba, la y ya bʋ-kaoodb sẽn tar tags-wẽnse?”—Zak 2:1-4, Kãab-paalgã Koe-noogo.

SOKRE: Rẽ yĩnga tũudum kãng wilgda a nebã tɩ ned pa yɩɩd a to Wẽnnaam nifẽ, la tɩ baa b sẽn yaa buud toor-toore, tɩ b tarmã me pa ye wã pa segd n kɩt tɩ welgr zĩnd b sʋk bɩ?

[Foto, seb-neng a 7]

Tũudum bʋg neb n pa maand politiki, tɩ baa b sẽn yaa buud toor-toor tɩ b tarmã pa ye wã pa welgd-ba?