D ra bas tɩ bũmb tiis-d rũndã sẽn yaa “koe-noog raarã” ye

WÃOOB a naasã ra tagsda bũmb nins b sẽn dat n maanã yelle. B ra yasa tẽngã noor n bõosdẽ tɩ ned baa a ye pa kõt-b bũmb ye. Siiri sodaasã ra gɩdgame tɩ b ra kẽes rɩɩb Samari pʋgẽ, sẽn na yɩl tɩ kom kʋ nebã wall b sak tɩ b soog-ba. Wãoobã ra tagsdame tɩ pa tar yõod tɩ b kẽng tẽngã pʋgẽ ye. Rɩɩbã ligd ra lebga toog wʋsgo. B ra wʋmame me tɩ biig la b wãb-yã.—2 Rĩm 6:24-29.

Wãoobã yeela woto: “Wa-y tɩ d yik n kẽng Siiri nebã sʋka. B sã n na n kʋ-d bɩ b kʋ-do, la b sã n na n bas-d bɩ b bas-do.” La zĩigã sẽn sobge, b yikame n kẽng Siiri nebã tãb-sikã zĩigẽ, n mik tɩ ned ka be be ye. Sodaag baa a ye ra ka be n gũud zĩigã ye. B ra loeya b wiidã la b bõensã la b zoe n looge. Wãoobã yãa fu-roog a ye sẽn yaa vɩʋʋgo, n kẽ n yã rɩɩb be n dɩ la b yũ. B le yãa sãnem, wanzuri, fut la teed a taaba. B wʋka b sẽn datã n tɩ solge, la b le wa n wʋk teed a taab n tɩ paase. Nebã ra zoeeme n bas tãb-sikã. A Zeova kɩtame tɩ Siiri nebã wʋm saar dãmb ne wiid rãamde, la zãma kãseng bʋrg n yik n zoe, b sẽn da tagsd tɩ neb n wat n na n zab ne-bã yĩngã. B teedã fãa paa be tɩ sẽn da rat-a fãa tõe n wa wʋke.

Wãoobã sẽn wa n wʋkd teedã n kẽnd n solgdẽ wã, b tagsa neb nins sẽn be Samari n kiid komã yelle, tɩ namsd-ba. B yeela taab woto: “Tõnd ka maan neer ye. Rũndã yaa koe-noog raare!” B lebg n kẽnga Samari n tɩ togs nebã koe-kãngã.—2 Rĩm 7:1-11.

D tõe n yeelame tɩ d sẽn vɩ sasa ningã yaa “koe-noog raare.” A Zezi goma bũmb a yembr yelle, sẽn na n wilg tɩ d vɩɩ “dũniyã sɛɛb wakate.” A yeela woto: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Mat. 24:3, 14) Rẽ segd n kɩtame tɩ d maan bõe?

Bũmb d sẽn dat tõe n tiis-d lame

Wãoob a naasã sũy yɩɩ noog ne bũmb nins b sẽn yã wã, hal n da yĩm Samari nebã yelle. Ra yaa teed nins b sẽn na n paamã yell bal n pak-ba. Tõnd me tõe n wa maana bũmb sẽn wõnd woto. Komã naaga yɛl nins sẽn wilgd tɩ d vɩɩ dũniyã sɛɛb wakatã. (Luk 21:7, 11) A Zezi sagla a karen-biisã woto: “Bɩ y gũus y mense n da sak tɩ yão-beed ne rã-yũuri la vɩɩm kãnga yɛla pak yãmb” ye. (Luk 21:34) Tõnd sẽn yaa kiris-nebã, d segd n gũusame tɩ bũmb nins d sẽn datã ra kɩt tɩ d yĩm tɩ d sẽn vɩ sasa ningã yaa “koe-noog raar” ye.

Kiris-ned a ye b sẽn boond t’a Blessing pa bas tɩ bũmb tiis-a t’a pa tʋma a Zeova tʋʋmdã ye. A ra karemdame la a yaa so-pakda. A wa n kẽe kãadem ne ned sẽn tʋm Benẽ Betɛllẽ wã, tɩ yẽ me wa tʋmd be. A yeela woto: “Mam tʋʋmd yaa rotã pɛgbo, la m nonga tʋʋm-kãngã wʋsgo.” Yʋʋm 12 la woto, a Blessing sẽn sɩng so-pakrã n wa lebg Betɛllẽ tʋm-tʋmda. A sũur yaa noog wʋsg a sẽn pa yĩm tɩ d sẽn vɩ sasa ningã yaa “koe-noog raarã.”

 D gũus ne bũmb nins sẽn dɩkd sẽk wʋsgã

A Zezi sẽn wa n tʋmd a karen-biis 70 wã, a yeela woto: “Tigisg yaa wʋsgo la tigisdbã yaa bilfu. Woto yĩnga, bɩ y kos tigisgã soab tɩ b tʋm tigisdb tɩ b kẽng b tigisgã.” (Luk 10:2) Kẽebg wakate, ka-koaad sã n deem ne a koodã kẽebgo, kẽer tõe n sãamame. Tõnd me sã n deem ne koɛɛgã moonego, tõe n kɩtame tɩ neb kẽer pa paam vɩɩm ye. Rẽ n so t’a Zezi paas woto: “Ra pʋʋs-y ned sora zug ye.” (Luk 10:4) Gɛrk gom-bil ning b sẽn lebg verse kãngã pʋgẽ tɩ ‘pʋʋsã’ võor pa “maana wãna” bɩ “ne y yibeoog” bal ye. Tõe n yɩɩ wa ned ne a zoa sẽn mi n seg taab n yals n pʋʋs taab la b sogsg taab kibay n kaoos to-to wã. A Zezi sẽn yeel woto wã, a rat n wilga a karen-biisã tɩ b tʋm ne b sẽkã sõma n da bas tɩ bũmb nins sẽn pa tɩlae wã tiis-b ye. Bala koɛɛgã b da segd n moonã yaa yõor yelle.

Rũndã-rũndã, bũmb kẽer tõe n sɩd rɩka d sẽkã wʋsgo. Sẽn na maan yʋʋm wʋsgo, yaa televiziõ wã n dɩkd nebã sẽk n yɩɩda. La selilɛɛrã ne ordinatɛɛrã yẽ? Gãrãnd Bertayn, b soka neb 1000 n mik tɩ daar fãa, ned fãa tõe n dɩka minit 88 n boond neb ne telefõnnã, n dɩk minit 53 n toond kibay ne ẽntɛrnetã, n dɩk minit 62 n boond neb ne selilɛɛrã la minit 22 n gʋlsd kibay n toondẽ. Wakat ning ned fãa sẽn dɩkd daar fãa wã yɩɩda wakat ning sõngr so-pakd sẽn tog n moon daar fãa wã naoor a yiibu. Yãmb yẽ rɩkda lɛɛr a wãn n boond neb a taabã ne telefõnnã, n toond neb kibay ne ẽntɛrnet bɩ ne selilɛɛrã?

A Ernst ne a Hildegard Seliger ra gũusda ne b sẽn maand bũmb nins ne b sẽkã. B yiibã fãa zĩnda nazi kã de kõnsãntrasiõ rãmb pʋsẽ, la kominist rãmb bãens rotẽ. La yʋʋm nins b yiibã fãa sẽn zĩnd be wã sã n naag taaba, yɩɩda yʋʋm 40. Nin-kãensã sẽn paam vʋʋsem sõng zaeebã sẽn wa n yi bãensã roogẽ wã, b yɩɩ so-pakdb n tãag b kũum.

Neb wʋsg da ratame n gʋlsd-b n paamd b kibay. Ra-kãngã ne a pagã ra tõe n dɩka b sẽkã wʋsg n karemd lɛta neb sẽn toond-ba, la bãmb me gʋlsd nin-kãensã. La yaa a Zeova tʋʋmdã yell n da pak-b n yɩɩda.

Yaa vẽeneg tɩ tõnd fãa ratame n boond d neb ne telefõn bɩ n gʋlsd-b lɛta n paamd b kibay. Woto pa wẽng ye. D sã n mi n yãk wakat bilf n maan bũmb a to, tõe n naf-d lame. La d segd n gũusame tɩ bũmb nins sẽn tõe n dɩk d sẽkã ra tiis-d rũndã sẽn yaa koe-noogã mooneg sasa wã ye.

D moon koe-noogã sõma

D sẽn paam n vɩ sasa sẽn yaa ‘koe-noog raarã’ yaa bark tɛkẽ. Bɩ d ra maan wa wãoob a naasã sẽn da maan tãb-sikã zĩigẽ wã ye. D ra yĩm tɩ b wa n baas n yeela woto: “Tõnd ka maan neer ye.” Tõnd me pa segd n bas tɩ d sẽn dat bũmb ninsã bɩ n bas tɩ bũmb nins sẽn tõe n dɩk d sẽkã wʋsgã kɩt tɩ d pa moon koɛɛgã wʋsg ye.

Rẽ wɛɛngẽ, d tara mak-sõng d sẽn segd n tũ. Tʋm-tʋmd a Poll sẽn moon koɛɛgã tɩ yʋʋm 20 poore, a yeela a koɛɛgã mooneg wɛɛngẽ woto: “Mam saagame n moon Kirist Koe-noog zĩiga fãa.” (Rom 15:19) A Poll pa bas tɩ bũmb boog a yẽesmã ye. Bɩ d fãa kell n tall yẽesem wa a Polle, n moon Rĩungã koɛɛgã sasa kãngã sẽn yaa “koe-noog raarã.”

[Foto, seb-neng 31]

A Blessing pa bas tɩ bũmb tiis-a t’a pa yɩ so-pakd la a tʋm Betɛllẽ wã ye

[Foto, seb-neng 32]

A Ernst ne a Hildegard Seliger ra gũusda ne b sẽn maand bũmb nins ne b sẽkã