Sagl-sõma wã baoobo

Y SÃ N baood sagls rũndã-rũndã, y na gale, bala sagendbã waoogame. Dũniyã gill zugu, sɛb nins b sẽn yiisd nebã saglg yĩngã sõor tara paasgo. Zĩis toɛy-toɛy wala Gãrãndbertayn, Amerik Latin soolmã, Zapõ la Etazĩni, nebã raada seb-kãens sõma n yɩɩd sɛb a taabã. B yiisda video filim dãmb sẽn sagend nebã. Televiziõ wã pʋgẽ me b maanda sõss a woto buudu. Sagendb kẽer me tigimda nebã n sõsda. La woto fãa nooma neb wʋsgo. Bũmb ning sẽn kɩt tɩ nebã nong rẽ wã yaa tɩ b wilgd-b lame tɩ b tõe n welga b zu-loeesã b toor tɩ pa tũ ne kẽng n tɩ yã neb sẽn tar minim vɩɩmã yɛl kẽer pʋgẽ, pa rẽ bɩ tũudum taoor-soab ye. Bõe yell la sagendbã nong n gomda?

B wae n wilgda nebã b sẽn tõe n maan to-to n yidg vɩɩmã pʋgẽ, b sẽn tõe n paam ned n kẽ kãadem tɩ zems to-to, la b sẽn tõe n wub b kambã to-to. Sẽn paase, b nong n kõta sagls sẽn na sõng nebã tɩ b mao ne sũ-sãamsã, n welg b mo-yõsã, la b bãng b sẽn tõe n maan to-to tɩ b vɩɩmã kell n yɩ noog baa kãadem kaoob poore. Neb wʋsg me rata sagls sẽn na sõng-b tɩ b tõogd n dɩt n zemsdẽ, pa rẽ bɩ n tõog n bas sɩgaar wall rãam yũubu. Rẽ yĩnga, sagl-kãens nafda nebã bɩ? Pa wakat fãa la b yaa sõma ye. Rẽ n so tɩ d segd n tũ Biiblã sagl-kãngã: “Zɩt deegda a sẽn wʋmd bũmb ninga fãa. La nin-yẽeseng gũusda ne a sẽn maand bũmb ningã.”—Yelbũna 14:15.

Sɛb nins b sẽn yiisd nebã saglg yĩngã yaa toor fasɩ ne b rãmb nins b sẽn yiisd  sẽn na yɩl n sõng nebã tɩ b zãms yɛl kẽer wala ordinatɛɛrã tall n tʋme, gɛɛl bɩ buud-goamã. Bala ned sɩd tõe n talla seb-kãensã n zãms bũmb n bãng tɩ pa tũ ne ligd wʋsg yiisg ye. La sɛb nins b sẽn yiisd n sagend nebã ligdã baoobo, kãadmã wɛɛngẽ, kambã wubr la laafɩ wã zu-loeesã wɛɛngẽ wã yaa toore. Bala, naoor wʋsgo, sagendb kãens ratame tɩ nebã vɩɩmd wa bãmb sẽn yetã, wall b rat tɩ nebã tall yam-tagsg bãmb sẽn nande. Rẽ n so tɩ d segd n sok d mens woto: “Sagendã yaa nin-bʋg buudu, la bõe la a tik n kõt a saglsã?”

Pa wakat fãa la sagendbã sagls tik sɩd zug ye. B sẽn yaa ligd-baoodbã yĩnga, kẽer mi n kõta sagls sẽn noom nebã, bala b miime tɩ rẽ la b na n da b sɛbã. Wala makre, tẽng a ye pʋgẽ, yaa hal sẽn yɩɩd dolaarã ligd milyaar a nii la nebã yiisd yʋʋmd fãa n daad seb-kãense!

Seb-kãensã sɩd tõe n sõnga ned bɩ?

Y sã n wa tɩ raad-ba, yaa sagls sẽn tõe n sõng-y la y baooda. La wakat ninga, sagls nins y sẽn yãt b pʋsẽ wã pa tõe n welg y yellã, wall y pʋd n pa tõe n tũ-b meng ye. Wala makre, zu-loeesã welgr wɛɛngẽ, sagendb kẽer mi n yeta nebã woto: ‘Y sã n dat n tõog n welg y yelle, y segd n ninga y yamẽ bal tɩ na n zemsame. Sẽn yaa bũmb ning fãa la y baooda, y rata ligdi, laafɩ wall zood sẽn tar barka, yãmb we n ning y yamẽ tɩ y na n paama y sẽn datã.’ Rẽ yĩnga sagl-kãensã buud tõe n sõnga ned sɩda? B sɩd tõe n sõng-y lame tɩ y mao ne y zu-loeesã bɩ?

D rɩk makre. Sɛb nins nebã sẽn nong n yɩɩd yaa b rãmb nins sẽn kõt sagls zoodã la kãadmã wɛɛngẽ wã. Rẽ yĩnga, b sõngda nebã tɩ b tõogd n paamd sũ-noog b zagsã pʋsẽ bɩ? Pa woto wakat fãa ye. Ad pag a ye sẽn yaa seb-gʋnd sẽn yeele: “Sebr a ye n kõt sagls nonglmã wɛɛngẽ, hal tɩ nebã ra nong-a Amerik Latin soolmẽ wã wʋsgo. A wilgda a karemdbã b sẽn na n maan to-to n paam tɩ zems-n-taar sẽn yaa sõma la waoogr zĩnd b sʋka. Sebrã pʋgẽ, a gʋlsdã yeelame me tɩ ned zĩid-n-taar ne a to sã n pa noome t’a baas n ket n be ne-a, a maanda a menga.” Sagl-kãngã rat n yeelame tɩ yell a woto pʋgẽ, f segd n maana sẽn noom-fo, la f ra bao n bãng yɛlã sẽn yitẽ n gẽes b tɩɩm ye.

Yaa sɩd tɩ sagendbã sɛb mi n tara sagl-sõma. La wakat ning me, b saglsã yaa wẽnse. Naoor wʋsgo, nina mi n sagla nebã yell ning zug tɩ zemse, n yaool n wa tɩ sagl-b yell a to zug t’a saglgã tũub tõe n wa ne yɛla. Pʋd n yaa toog tɩ d teeg nin-kãensã saglsã sẽn waoog la b wae n kɩɩsd taabã. Woto yĩnga, ãnda sagls la y tõe n teege? Sok-y y mens woto: ‘Rẽ yĩnga sagendã maaga a yĩng n sɩd fees yɛlã sõma n wʋm b võor n yaool n kõt a saglsã bɩ, bɩ yaa a mengã tagsg bal la a sɩlemd n dat tɩ nebã tũ? Rẽ yĩnga a sagenda nebã woto a sẽn dat n paam ligd wall a sẽn dat yʋʋr yĩng bɩ?’

Sebr sẽn kõt sagls t’a saglsã yaa sõma wakat fãa yaa Biiblã. A kõta sagls yɛl nins yell sagendbã sẽn wae n gomd b sɛbã pʋsẽ wã zutu, la a sagend nebã yɛl a taab zut menga. A sõnga neb milyõ rãmb tɩ b tõog n tũ sagl-kãngã: “[Bɩ y maneg y tagsgã] n yeelg nin-paalgã.” (Efɛɛz rãmba 4:23, 24) Biiblã kɩtdame tɩ d tõe n bãng d zu-loeesã sẽn yitẽ, la a wilgd tõnd d sẽn tõe n mao ne-b to-to me. Sẽn yɩɩd fãa, a pʋd n wilgda bʋʋm nins sẽn kɩt tɩ d segd n maan sẽn yaa tɩrgã. Sõsg ning sẽn pʋgdã na n wilga a sẽn sõngd-d to-to wã.