D vɩɩ tood wakate

BIIBLÃ ra reng n wilgame tɩ “tood na n zĩndame.” A boonda tood wakat kãensã tɩ “yaoolem wakate.” (2 Tɩmote 3:1-5; 2 Pɩɛɛr 3:3-7) A Zezi Kirist karen-biisã sẽn wa n sok-a n dat n bãng “dũniyã sɛɛb wakatã,” a goma tood wakat kãngã yell a leoorã pʋgẽ. (Matɩe 24:3) Rẽ yĩnga tõnd sɩd vɩɩ yaoolem wakatã bɩ? Mak-y Biiblã sẽn deng n togs bũmb ningã ne kibayã sẽn wilgd bũmb ningã n gese, tɩ y na bãng y toore.

Biiblã reng n togsame tɩ: zab na n zĩnda dũniyã gill zugu—Luk 21:10; Wilgri 6:4.

Kibayã sẽn wilgdi: “D sã n na n geel a Zezi rogmã tɛk n tar n watẽ, zabã sẽn kʋ neb nins yʋʋmd 1900 wã tɛkã sõor yɩɩda sẽn deng rẽ wã naoor a tãabo.”—Worldwatch Institute.

Biiblã reng n togsame tɩ: kom la bãas na n zĩndame—Luk 21:11; Wilgri 6:5-8.

Kibayã sẽn wilgdi: Yʋʋmd 2003 wã pʋgẽ, b wilgame tɩ dũniyã gill zugu, neb sõor sẽn kolg milyõ 856 n da pa paamd n dɩtẽ tɩ sekdẽ.  La yʋʋmd 2004 pʋgẽ, b sõorã paasa milyõ a yopoe.—L’Organisation des Nations unies pour l’alimentation et l’agriculture.

Neb sẽn na ta milyaar a yembr n vɩ zĩis sẽn yaa rẽgd pʋgẽ, tɩ ro-sõma sẽn na n gãand kae ye. Neb sẽn yɩɩd milyaar a yiib la pʋɩ-sʋk n pa tar zĩig takɩ sẽn na n lobd b sagdo. Neb milyaar a yembr la tus-koabg n pa tar ko-yɩlemd n yũuda.—Worldwatch Institute.

Neb milyõ kobs-nu la pali wã bɩ weoogã tara, tɩ neb milyõ pis-naas kẽnd ne SƖDA wã. Yʋʋmd 2005 wã pʋgẽ, kõs-kʋdgã kʋʋ neb milyõ a yembr la tus kobs-yoobe.—L’Organisation mondiale de la santé.

Biiblã reng n togsame tɩ: nebã na n sãama tẽngã—Wilgri 11:18.

Kibayã sẽn wilgdi: “Bũmb nins ninsaalbã sẽn maandã tõe n wa kɩtame tɩ rũms la tɩɩs buud toor-toor wʋsg meneme.” “B sã n pʋɩ bũmb nins tẽn-gãongã, tɩɩsã la rũmsã sẽn kõt ãdem-biisã zĩis a tãabo, zĩis a yiibã fãa sãamame la bala.”—Évaluation des écosystèmes pour le millénaire.

“Teed buud toor-toor nebã sẽn maand tɩ yiisd bug-zõosã wɩngda zĩigã, la rẽ tõe n wa kɩtame tɩ saagã pa le niid ye. La woto tõe n waa ne yel-beed n kõ tẽngã la bũmb nins sẽn be a zugã.”—NASA, l’Institut Goddard pour les études spatiales.

Biiblã reng n togsame tɩ: b na n moona Wẽnnaam Rĩungã koe-noog dũniyã gill zugu—Matɩe 24:14; Wilgri 14:6, 7.

Kibayã sẽn wilgdi: Yʋʋmd 2007 wã pʋgẽ, a Zeova Kaset rãmbã sẽn kolg milyõ a yopoe wã rɩka lɛɛr dãmb sõor sẽn kolg milyaar a ye la pʋɩ-sʋk n moon Wẽnnaam Rĩungã koe-noog tẽns 236 pʋsẽ.—Annuaire des Témoins de Jéhovah 2008.

Wala d sẽn yã wã, Biiblã reng n wilgame tɩ baa ne kiba-wẽnsã, d tara bʋʋm n na n tẽ tɩ beoog daarã na n yɩɩ sõma. A Zezi goma Wẽnnaam Rĩungã koe-noog yelle. Wẽnnaam Rĩungã yaa bõe? Bõe yĩng tɩ yaa Wẽnnaam Rĩungã n tõe n kɩt tɩ beoog daarã yɩ sõma? La wãn to la Wẽnnaam Rĩungã waoong tõe n naf yãmba?

[Goam sẽn tar pãngã, seb-neng a 5]

Biiblã da reng n goma yɛl nins sẽn maand rũndã-rũndã wã yelle