Yaa ‘Wẽnnaam n kɩtd tɩ bɩ’
Yaa ‘Wẽnnaam n kɩtd tɩ bɩ’
“Ka ned ninga sẽn sendã wala ned ning sẽn zãgsd koomã n yaa bũmb ye, yaa Wẽnnaam n kɩt tɩ bɩ.”—1 KOR. 3:7.
1. Bõe yĩng tɩ d tõe n yeel tɩ d yaa ‘Wẽnnaam tʋmd-n-taase’?
TƲM-TƲMD a Poll goma zu-noog tʋʋmd ning d fãa sẽn tõe n paam n tʋmã yelle, n yeel tɩ rẽ kɩtame tɩ d yaa Wẽnnaam tʋmd-n-taase. (Karm-y 1 Korẽnt dãmb 3:5-9.) Yaa karen-biisã maaneg yell la a sẽn da gomdã. A wilgame tɩ tʋʋm-kãng wõnda ka-koaad tʋʋmde. Sẽn na yɩl n tõog n tʋm tʋʋmdã sõma, rẽnda d paam a Zeova sõngre. A Poll yeelame tɩ d tẽeg tɩ yaa ‘Wẽnnaam n kɩtd tɩ bɩtẽ.’
2. Bõe yĩng tɩ sẽn yaa Wẽnnaam n kɩtd tɩ bɩtẽ wã sõngd tõnd tɩ d pa wukd d mense?
2 D sã n sak n deeg tɩ yaa Wẽnnaam n kɩtd tɩ bɩtẽ, na n sõng-d lame tɩ d ra wuk d mens ye. Tõnd tõe n modgda wʋsg koɛɛgã mooneg la karen-biisã maaneg pʋgẽ, la ned sã n sak n lebg a Zezi karen-biiga, yaa a Zeova n segd ne pẽgrã. Bõe yĩnga? Bala baa d sã n modga wʋsgo, d pa mi, la d pʋd n pa tõe n bãng sẽn sɩngd to-to tɩ ned wa sak n toeem n lebg a Zezi karen-biigã ye. La pa be ne tõnd meng ye. Rĩm a Salomo wilga rẽ vẽeneg n yeel woto: “Fo ka tõe n bãng tʋʋmd ninga Wẽnnaam sẽn maanda fãa ye.”—Koɛ. 11:5.
3. Wãn to la bõn-buud fẽrgr ne karen-biisã maaneg wõnd taaba?
3 Rẽ yĩnga tõnd sẽn pa tõe n bãng bũmb nins fãa sẽn kɩtd tɩ ned wa sak n toeem n lebg a Zezi karen-biigã sãamda d sũur bɩ? Ayo. Rẽ pʋd n kɩtame tɩ tʋʋmdã tar yamleoogo, tɩ noom-do. Rĩm a Salomo ra yeela woto: “Bʋd f bõn-buud yibeoogo, la ra bas f nus tɩ yɩ zaalem zaabr ye. Tɩ bõe, fo ka mi a yembr walla a to sã n na n tõogame, walla a yiibã fãa sã n na n yɩɩ sõma ye.” (Koɛ. 11:6) Sɩd me, baa yaa bõn-buud la d fẽrg-yã, d pa tõe n bãng sẽn na n yi-bã, la b sã n na n yiime meng ye. Yɛl wʋsg d sẽn pa tõe n bãng n kẽed sʋka. Yaa woto me ne karen-biisã maanego. A Zezi wẽe yel-bũn a yiib sẽn be Mark evãnzillã sak a 4 pʋgẽ n wilg rẽ. Bɩ d ges rẽ sẽn zãmsd tõnd bũmb ninga.
Bee ne bõn-buudã sẽn lʋɩẽ wã
4, 5. Kʋms-y a Zezi yel-bũnd ning sẽn be Mark 4:1-9 pʋgẽ wã.
4 Mark 4:1-9 wã pʋgẽ, a Zezi goma ka-koaad sẽn fẽrg bõn-buud tɩ lʋɩ zĩis toor-toor yelle. A yeela woto: “Kelg-y-yã. Ned a ye n da kẽng n na n tɩ fẽrg ki. Yẽ sẽn fẽrgda, bõn-biis kẽer lʋɩɩ sor kɩrenga. La liuuli wa n dɩɩ bãmba. La kẽer lʋɩɩ kug zĩigẽ tom sẽn ka waooga, la tao-tao bala, bãmb yiime tom sẽn ka waoogã yĩnga. La sõor sẽn zẽke, bãmb zelgame n ki b sẽn ka paam yẽgã yĩnga. La kẽer lʋɩɩ gõos sʋka, la gõos yik n dɩɩ bãmba tɩ b ka wom biis ye. La kẽer lʋɩɩ zĩ-sõngẽ n yik n wom biis wʋsgo, kẽer womame tɩ ta pis-tã, la kẽer tɩ ta pis-yoobe, la kẽer tɩ ta koabga.”
5 Tẽns wʋsg pʋsẽ, bõn-buud kẽer n be tɩ b sɩd fẽrgdẽ n ka bʋtẽ ye. Ka-koaadbã mi n nong n koonda b fuugã n ning bõn-buudã, wall b ning-a wamd pʋgẽ n yãkd n fẽrgdẽ. Yel-bũn-kãnga pʋgẽ, ka-koaadã pa kẽng zĩis buud toor-toor n tɩ fẽrg bõn-buudã ye. Yaa bõn-buudã a sẽn fẽrgã n tɩ lʋɩ zĩis toor-toore.
6. A Zezi wilgame tɩ ka-koaadã yel-bũnd võor yaa bõe?
6 A Zezi wilga a yel-bũndã võor Mark 4:14-20 pʋgẽ woto: “Ka-fẽrgdã fẽrga Wẽnnaam koɛɛga. Neb kẽer bee sor kɩrenga Wẽnnaam koɛɛgã sẽn fẽrg zĩig ningã. La b sẽn wʋm n sɛ, tao-tao bala, Sʋɩtãanã watame n yiisd goam nins sẽn dag n fẽrg b sũyã pʋsẽ. Woto me, neb a taab reegda bõn-biisi, la nin-kãens wẽnda kug zĩisi. Bãmb sẽn wʋm Wẽnnaam koɛɛgã, tao-tao bala bãmb deegda ne sũ-noogo, la bãmb ka tar b mens yẽg ye. Bãmb kaoosda bilf bala, la toogo bɩ namsg sã n yaool n paam bãmb Wẽnnaam koɛɛgã yĩnga, bãmb lʋɩtame. Neb a taab wẽnda gõos zĩiga bõn-biis sẽn lʋɩ a pʋga. Bãmb yaa neb nins sẽn wʋmd Wẽnnaam koɛɛgã, la yɩɩr ne dũniyã yɛla, la arzɛgs belgre, la bũmb a taab ratem kẽedame n dɩt Wẽnnaam koɛɛgã t’a ka womd biis ye. La neb a taab sẽn wʋmd Wẽnnaam koɛɛgã n deegdẽ n womd biisi, bãmb wẽnda zĩ-sõngo bõn-biis sẽn lʋɩ a pʋgẽ. Bãmb womda biisi, kẽer tata pis-tã, la kẽer tata pis-yoobe, la kẽer tata koabga.”
7. Bõn-buudã makda bõe, la zĩisã sẽn yaa toor-toorã me wilgda bõe?
7 A Zezi pa yeel tɩ ka-koaadã fẽrga bõn-buud buud toor-toor ye. Bõn-buudã yaa a ye, la yaa ka-fẽrgdã sẽn fẽrgã la tɩ lʋɩ zĩis toor-toore, tɩ zĩigã kɩt tɩ kẽer pa wom ye. Pipi wã yaa zĩ-koɛɛnga, yiib-n-soabã yaa zĩig tom sẽn ka waooge, tãab-n-soabã yaa gõos zĩigẽ tɩ naas-n-soabã yaa zĩ-sõng sẽn sakd kood sõma. (Luk 8:8) Bõn-buudã makda bõe? Makda Rĩungã koɛɛg sẽn be Wẽnnaam Gomdã pʋgẽ wã. (Mat. 13:19) Zĩisã sẽn yaa toor-toorã wilgda bõe? Wilgdame tɩ neb nins sẽn kelgd koɛɛgã sũyã ka wõnd taab ye.—Karm-y Luk 8:12, 15.
8. a) Ka-koaadã makda ãnd rãmba? b) Bõe yĩng tɩ nebã sẽn reegd Rĩungã koe-noogã to-to wã pa yembre?
8 Ka-koaadã makda ãnd rãmba? A makda Wẽnnaam tʋmd-n-taasã, sẽn dat n yeel tɩ neb nins sẽn moond Rĩungã koe-noogã. Wala a Poll ne a Apolosse, koe-moondbã bʋtame la b zãgsd koom. La baa b fãa tʋm wʋsgo, b tʋʋmã biis pa na n yɩ yembr ye. Bõe yĩnga? Bala neb nins sẽn sakd koɛɛgã sũy pa yembr ye. La rẽ pa be ne ka-koaadã ye. D sẽn mi woto wã sɩd sõngda d fãa wʋsgo. La sẽn yɩɩd fãa, sõngda saam-biis nins sẽn moon yʋʋm wʋsg tɩ wõnd b tʋʋmdã pa womd biis sõma wã. * Bõe yĩng tɩ d yet tɩ sõngdame?
9. Bõe la tʋm-tʋmd a Poll la a Zezi wilg vẽeneg tɩ kengd raoodo?
9 Pa ka-koaad tʋʋm sẽn wom biis ninsã n wilgd t’a tʋma sõma ye. A Poll goma rẽ yell n yeel tɩ ‘ned kam fãa na n deega a meng keoore, tɩ zems a meng tʋʋmde.’ (1 Kor. 3:8) Yaa tʋʋmdã la b get n keo, la pa tʋʋmdã sẽn wom biis ninsã ye. A Zezi pʋd n wilga rẽ vẽenega. A karen-biisã sẽn da wa n tɩ moon n lebg n wa, b sũy ra yaa noog wʋsgo, bala zĩn-dãmbã ra sakd-b-la a Zezi yʋʋrã yĩnga. Baa ne rẽ sẽn yaa bʋʋm sẽn sek b na kɩdem sũ-noogã, a Zezi yeel-b-la woto: “Bɩ y ra paam sũ-noog zĩn-dãmbã sẽn sakd yãmbã yĩng ye. Bɩ y paam sũ-noog yãmb yʋyã sẽn gʋls [saasẽ wã] yĩnga.” (Luk 10:17-20) Baa d sã n pa tõog n sõng neb wʋsg tɩ b lebg a Zezi karen-biisi, pa rat n yeel tɩ d pa tʋm sõma, bɩ d pa tʋm ne d sũur fãa wa neb a taabã ye. Naoor wʋsgo, bee ne sẽn kelgd-a wã sũuri. La sẽn yaa a soab fãa, yaa Wẽnnaam n kɩtd tɩ bɩ.
Sẽn kelgd-b koɛɛgã sẽn segd n maanega
10. Bõe n wilgd tɩ ned sẽn wʋm koɛɛgã yaa wa zĩ-sõngã bɩ pa wa zĩ-sõngã?
10 La bõe la sẽn wʋm-b koɛɛgã segd n maane? Rẽ yĩnga d tõe n deng n bãnga sẽn na n sak-bã bɩ? Ayo. Rẽ yaa bãmb meng n yãkde, tɩ d yaool n bãng kõɛɛgã sã n lʋɩɩ zĩ-sõngẽ bɩ pa zĩ-sõngẽ. Sɩd-sɩda, ned yam tõe n wa toeemame. (Rom 6:17) A Zezi yeela a yel-bũndã pʋgẽ tɩ neb kẽer ‘sẽn wʋm koɛɛgã n sɛ, tao-tao bala,’ Sʋɩtãanã watame n yiis gom-kãens b sũyã pʋsẽ. Ka tɩlae tɩ b bas tɩ yɩ woto ye. Zak 4:7 wã pʋgẽ, b sagenda kiris-nebã tɩ b “kɩɩs Sʋɩtãanã,” t’a na n zoe n bas-b lame. A Zezi yeelame me tɩ sãnda sakda koɛɛgã tao-tao ne sũ-noogo, la b wat n lʋɩɩme, b sẽn ‘ka tar yẽgã’ yĩnga. B sagenda a Zeova nin-buiidã tɩ b “kɩ yẽg” yẽbgrã zug sõmã, sẽn na yɩl n tõog n bãng ‘a yalem la a woglem la a zulum la a zãntlem sẽn yaa bũmb ninga, la tɩ b bãng Kirist nonglem sẽn yɩɩd neb sẽn tõe n bãnge.’—Ef. 3:17-19; Kol. 2:6, 7.
11. Bõe la d tõe n maan tɩ yɩɩr la arzɛk baoob ra kẽ d sũyã n kɩt tɩ koɛɛgã pa wom biisi?
11 A Zezi wilgame tɩ neb a taab sẽn wʋmd koɛɛgã basdame tɩ “yɩɩr ne dũniyã yɛla, la arzɛgs belgr” kẽed b sũyã n dɩt koɛɛgã. (1 Tɩm. 6:9, 10) Wãn to la b tõe n gil rẽnda? Tʋm-tʋmd a Poll leokame n yeel woto: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tarã sek yãmba. Tɩ bõe, Wẽnnaam menga yeelame yaa: ‘Mam kõn bas yãmb walla m mong yãmb abada.’ ”—Heb. 13:5.
12. Bõe yĩng tɩ neb nins b sẽn mak ne zĩ-sõngã biis sõor yaa toor-toore?
12 Sẽn na n baase, a Zezi yeelame tɩ bõn-buud nins sẽn lʋɩ zĩ-sõngẽ wã “womda biisi, kẽer tata pis-tã, la kẽer tata pis-yoobe, la kẽer tata koabga.” Baa ned sã n tar sũ-sõng n sak n kelg koɛɛgã n lebg a Zezi karen-biiga, a sẽn na n tõog n maan bũmb ning koɛɛgã mooneg pʋgẽ wã bee ne a yɛlã sẽn yaa to-to. Wala makre, kʋʋlmã la bãas tõe n kɩtame tɩ neb kẽer pa tõe n moon koɛɛgã wʋsg ye. (Ges-y Mark 12:43, 44.) Ka me, tõe tɩ ka-koaadã bɩ koe-moondã pa na n tõog n welg yellã zãnga, bɩ tõe t’a pʋd n pa tõog n welg-a meng ye. La a sã n ne t’a Zeova kɩtdame tɩ bɩtẽ, a sũur yaa noog wʋsgo.—Karm-y Yɩɩl Sõamyã 126:5, 6.
Yel-bũnd a to
13, 14. a) Kʋms-y-yã a Zezi yel-bũnd ning sẽn be Mark 4:26-29 pʋgẽ wã. b) Ka-koaadã la bõn-buudã makda bõe?
13 A Zezi wẽe ka-koaad yel-bũnd a to tɩ be Mark 4:26-29 pʋgẽ. A yeela woto: “Wẽnnaam soolem yaa wa rao sẽn bʋd a bõn-biis tẽng pʋgẽ. A sã n gũsi walla a sã n nee, wĩntoog ne yʋngo, bõn-biisã bundame n yikdẽ. La yẽ ka bãngd a sẽn yɩ wãn n yɩ woto ye. Bõn-biisã yita tẽngã pʋgẽ b toore, dẽenem yaa vãado, dẽ poore yaa pʋga, la sẽn pʋgdã yaa biis n bɩta. La biisã sã n bɩ zãnga b kɛɛdame; tɩ bõe, tigsg taame.”
14 Ka-koaadã makda ãnd rãmba? Kiris-neb ne yʋʋr tũudmã neb kẽer tẽedame tɩ makda a Zezi. D yaool n pa tõe n yeel t’a Zezi gõeeme n pa bãngd bõn-buudã sẽn maand to-to n womd biis la b bɩtẽ wã ye. Vẽenega, a Zezi mii sẽn sɩngd to-to tɩ bõn-buudã wa womd biis n bɩtẽ wã. Wala d sẽn togs tɩ loogã, ka-koaad kãngã me makda Rĩungã koe-moondb sẽn moond koɛɛgã ne yẽesmã. Bõn-buudã b sẽn bʋtã yaa koɛɛgã b sẽn moondã. *
15, 16. Bõn-buudã sẽn maand to-to n bɩtẽ wã, la nebã sẽn maand to-to n lebgd karen-biisã wɛɛngẽ, bõe la a Zezi wilg tɩ yaa vẽenega?
15 A Zezi goamã pʋgẽ, a wilgame tɩ ka-koaadã gõee yʋngo, tɩ beoogã sã n vẽeg bɩ a yiki. Woto pa rat n yeel t’a reemda ne a tʋʋmdã ye. Wilgdame bal tɩ yaa woto la neb wʋsg maand daar ne a to fãa. A Zezi sẽn yeel woto wã wilgdame tɩ pa daar a yembr tʋʋmd ye. Yɩɩ bũmb sẽn maan bilf-bilfu. A wilga bũmb ning sẽn maanã n yeel tɩ “bõn-biisã bundame n yikdẽ.” Rẽ poore a yeela woto: “La yẽ ka bãngd a sẽn yɩ wãn n yɩ woto ye.” Rat n wilg vẽeneg bal tɩ b yitame la b bɩt “b toore.”
16 Yaa bõe la a Zezi ra rat n wilgi? A ra gomda sẽn sɩngd to-to tɩ bõn-buudã wa yit la b bɩtẽ wã yelle, la rẽ fãa sẽn maand bilf-bilfã me yelle. Bõn-buudã ‘yita tẽngã pʋgẽ b toore, dẽenem yaa vãado, dẽ poore yaa pʋga, la sẽn pʋgda yaa biis n bɩta.’ (Mark 4:28) Dẽnd yaa bilf-bilf tɩ woto fãa wa tõog n yɩ. D pa tõe n modg bõn-buudã n dat tɩ b yi la b bɩ tao-tao ye. Yaa woto me ne neb nins sẽn lebgd a Zezi karen-biisã. Yaa bilf-bilf la a Zeova kɩtd tɩ ned sẽn dat vɩɩm sẽn kõn sa wã wa sak koɛɛgã.—Tʋʋ. 13:48, NW; Heb. 6:1.
17. Biisã sã n wa bɩ tɩ lebg kẽebgo, ãnd dãmb me n naagd n kɩdem sũ-noogo?
17 Bõn-buudã sã n wa bɩ tɩ lebg kẽebgo, bõe la ka-koaadã na n paame? A Zeova sã n wa kɩt tɩ koe-noogã bɩt karen-bi-paalg sũur pʋgẽ, a soabã sẽn nong-a wã yĩng kɩtdame t’a sak n dɩk a meng n kõ-a, la a reeg lisg n wilg rẽ. Saam-biig sã n wɩngd ne Wẽnnaam bãngr la a raabã maanego, a wat n tõog n paama zu-noog n ges tigingã tʋʋm kẽer yelle. Woto na n nooga saam-biig ning sẽn sõng-a t’a sak koɛɛgã sũuri. La tigingã neb a taabã me sũur na n yɩɩ noogo, baa ne sẽn pa yɩ bãmb n zãms a soabã Biiblã. (Karm-y Zã 4:36-38.) Vẽenega, “sẽn bʋt-a wã ne sẽn tigisd-a wã fãa na n lagem n paama sũ-noogo.”
Yel-bũn-kãensã sẽn zãmsd tõnd bũmb ninga
18, 19. a) Wãn to la a Zezi yel-bũnã keng yãmb mengã raoodo? b) Bõe la d na n bao n bãng sõsg ning sẽn pʋgdã pʋgẽ?
18 Yel-bũn a yiibã sẽn be Mark sak a 4 pʋgẽ wã d sẽn vaeesã wilg-d-la bõe? Kɩtame tɩ d ne vẽeneg tɩ d tara tʋʋmd sẽn wõnd ka-koaad tʋʋmd n segd n tʋme. D pa segd n bao pademse, bɩ n bas tɩ zu-loees nins d sẽn tõe n paamã kɩt tɩ d bas koɛɛgã mooneg ye. (Koɛ. 11:4) D nee vẽeneg tɩ d sẽn paam n yaa Wẽnnaam tʋmd-n-taasã yaa zu-noog tɛkẽ. Tẽeg-d lame me tɩ yaa a Zeova n kɩtd tɩ ned lebg a Zezi karen-biiga, la t’a ningda tõnd la neb nins sẽn sakd koɛɛgã modgr barka. D bãngame me tɩ d pa tõe n modg ned t’a lebg a Zezi karen-biig ye. Sõng-d lame tɩ d bãng me tɩ d pa segd n koms raood bɩ n sãam d sũuri, d moonegã sã n pa womd biis tao-tao, bɩ sã n pʋd n pa womd biis ye. D leb n bãngame tɩ yaa d sẽn modgd wakat fãa n moond Rĩungã koe-noog sẽn na yɩl tɩ yɩ kaset buud fãa yĩngã la a Zeova geta. D sẽn bãng me tɩ pa tʋʋmdã sẽn wom biis ninsã la a getã sɩd kengda d raood wʋsgo.—Mat. 24:14.
19 Bõe me la a Zezi le yeel Rĩungã koɛɛgã mooneg la karen-biisã sõor wɛɛngẽ? Yel-bũn a taab n be evãnzill dãmbã pʋsẽ n leokd sok-kãnga. D na n vaeesa yel-bũn-kãens kẽer sõsg ning sẽn pʋgdã pʋgẽ.
[Tẽngr not rãmbã]
^ sull 8 Wala makre, saam-biig a Georg Fjölnir Lindal sẽn moon Islãnd t’a kibarã be Annuaire des Témoins de Jéhovah, 2005 seb-neng 210-211 pʋgẽ wã. D sã n ges Annuaire des Témoins de Jéhovah, 1988 seb-neng 82-99 wã pʋgẽ, d na n yãa saam-biis sẽn modg n moon Irlãnd yʋʋm wʋsg tɩ b tʋʋmdã pa wom biis sõma me kibay.
^ sull 14 Pĩndã, Gũusg Gasgã ra wilgame tɩ bõn-buudã makda ned zʋg a sẽn segd n toeemd bilf-bilf hal tɩ wa lebg sõma. La a paas tɩ sẽn na yɩl n toeeme, bee ne a soabã sẽn vɩ zĩig ninga, neb nins a sẽn vɩ ne wã, la yɛl a taab me. La yaa d bãng tɩ yel-bũndã pʋgẽ, a Zezi pa yeel tɩ bõn-buudã wat n sãamame bɩ n wom bi-põaas ye. A yeelame tɩ yitame hal n wa bɩ tɩ b kẽebe.—Ges-y yʋʋmd 1980 bõn-bɩʋʋng kiuugã rasem 15 Gũusg Gasgã, seb-neng 17-19.
Y tẽrame bɩ?
• Wãn to la bõn-buud fẽrgr ne Rĩungã koɛɛg mooneg wõnd taaba?
• Bõe la a Zeova get n bãng tɩ d moona koɛɛgã sõma?
• Bõe la a Zezi yeel tɩ wilgd tɩ bõn-buudã sẽn bɩt to-to wã ne karen-biisã maanegã wõnda taaba?
• Wãn to la sẽn bʋt-a wã ne ‘sẽn tigsd-a wã fãa lagemd taab n maand sũ-noogo’?
[Zãmsgã sogsgã]
[Foto rãmba, seb-neng 21]
Bõe yĩng t’a Zezi mak Wẽnnaam Rĩungã koe-moond ne ka-koaada?
[Foto rãmba, seb-neng 23]
Neb nins b sẽn mak ne zĩ-sõng sẽn womd biisã moonda koɛɛgã tɩ zemsd ne b yɛlã sẽn yaa to-to wã
[Foto rãmba, seb-neng 24]
Yaa Wẽnnaam n kɩtd tɩ bɩtẽ