Ket-y n maand-y nebã neere
Ket-y n maand-y nebã neere
“Ket-y . . . n maand-y neere.”—LUK 6:35, NW.
1, 2. Bõe yĩng tɩ naoor wʋsgo, yaa toog ne-d tɩ d maand nebã neere?
YƖL n maand d taabã neer pa nana ye. F tõe n maana ned neer t’a lebs-f wẽnga. Wala makre, baa d sẽn modgd n dat n sõng nebã tɩ b wʋm “Wẽnnaam sẽn be barkã naam koe-noog” la a biigã koe-noogã, kẽer n pa rat n kelg-do, wall b maand b toor kae. (1 Tɩm. 1:11) Kẽer meng tolg n wilgdame tɩ b yaa Kirist kũum da-lukã bɛɛba. (Fil. 3:18) Tõnd sẽn yaa kiris-nebã, d manesem segd n yɩɩ wãn-wãn ne neb a woto?
2 A Zezi Kirist yeela a karen-biisã woto: “Nong-y yãmb bɛɛbã la y maan-b neere.” (Luk 6:35) Bɩ d bao n bãng d sẽn tõe n tũ sagl-kãngã to-to. Sẽn paase, d na n goma sagls a taab a Zezi sẽn kõ maan f to neerã wɛɛngẽ tɩ na n sõng-do.
“Nong-y yãmb bɛɛbã”
3. a) Wilg-y bũmb ning a Zezi sẽn yeel Matɩe 5:43-45 wã koɛɛg-koɛɛga. b) Zʋɩf rãmbã tũudum taoor dãmb da wa n tagsdame tɩ ãnda la b yaka, tɩ b bɛ yaa ãnda?
3 Sõsg ning a Zezi sẽn sõs tãngã zugã pʋgẽ, a yeela a kɛlgdbã tɩ b nong b bɛɛbã la b pʋʋsd neb nins sẽn namsd-bã yĩnga. (Karm-y Matɩe 5:43-45.) A Zezi sẽn sõs ne neb ninsã sẽn da yaa zʋɩf rãmbã yĩnga, b ra mii Wẽnnaam no-kãngã: “Ra rok f sũur ne f buud ned ye, la bɩ f ra sak tɩ sũ-toog kaoos foom ne f buud sʋk ye. Bɩ f nong f yak wa f menga.” (Maan. 19:18) Pipi kiris-nebã wakate, zʋɩf rãmbã tũudum taoor dãmb da wilgda nebã tɩ b sẽn yeel ka tɩ “f buud ned” la “f yak” bɩ f to wã yaa b zʋɩf-taag bala. Yaa sɩd t’a Moiiz tõogã pʋgẽ, Wẽnnaam yeela Israɛll nebã tɩ b welg ne bu-zẽmsã. La yaa bãmb n wa n tẽed tɩ noorã rat n yeelame tɩ bu-zẽng ned fãa yaa b bɛ, tɩ b segd n kisg-a.
4. Manesem bʋg la a Zezi karen-biisã ra segd n tall ne b bɛɛbã?
4 La a Zezi yeela a karen-biisã woto: ‘Nong-y yãmb bɛɛbã la y pʋʋs neb nins sẽn maand yãmb wẽng la sẽn namsd yãmbã yĩnga.’ (Mat. 5:44) A yeelame t’a karen-biisã ra segd n nonga neb nins sẽn kis-bã. Evãnzill gʋlsd a Luk wilgame t’a Zezi yeela woto: “Mam yeta yãmb sẽn kelgd maamã, nong-y y bɛɛbã, la y maan neb nins sẽn kis yãmbã neere. Ning-y neb nins sẽn tʋʋsd yãmbã zut barka, la y pʋʋs Wẽnnaam neb nins sẽn maand yãmb wẽngã yĩnga.” (Luk 6:27, 28) Tõnd me tũuda a Zezi saglgã wa pipi kiris-nebã, n maand sẽn kis-b tõndã neere. D ningda neb nins sẽn tʋʋsd tõndã zut barka, d sẽn bʋkd d sũy n gomd ne-bã yĩnga. D ‘pʋʋsda Wẽnnaam neb nins sẽn namsd tõndã yĩng’ me, rat n yet tɩ sẽn pãbd-b tõnd wall b tʋʋd tõnd la b paoogd-d ne manesem buud toor-toorã. D wilgda ne pʋʋs-kãens tɩ d nonga sẽn namsd-b tõndã, bala d kota a Zeova t’a sõng-b tɩ b toeem zʋg n tõog n ta a yam.
5, 6. Bõe yĩng tɩ d segd n nong d bɛɛbã?
5 Bõe yĩng tɩ d segd n nong d bɛɛbã? A Zezi wilga rẽ võor n yeel woto: ‘Tɩ yãmb tõe n yɩ yãmb Ba sẽn be saasẽ kamba.’ (Mat. 5:45) D sã n tũud sagl-kãngã, d rɩkda Wẽnnaam togs-n-taare. Woto d sɩd na n yɩɩ wa a “kambã,” bala Wẽnnaam “kɩtdame tɩ bãmb wĩntoog zẽk nin-wẽns la nin-tɩrs yĩnga, la bãmb tʋmda saaga nin-tɩrs la nin-wẽns yĩnga.” Wa a Luk sẽn wilg a sebrã pʋgẽ wã, Wẽnnaam “maanda zɩ-beoog rãmbã ne nin-wẽnsã neere.”—Luk 6:35.
6 A Zezi wilga bũmb ning sẽn kɩt t’a karen-biisã segd n nong b bɛɛbã n yeel woto: “Yãmb sã n nong neb nins sẽn nong yãmbã, yãmb keoor yaa bõe? Yõor yaood dɛɛgdbã me ka maand woto sɩda? La yãmb sã n pʋʋsd yãmb ba-biisã bala, yãmb maandame n yɩɩd neb a taabã bɩ? Neb sẽn ka pʋʋsd Wẽnnaam me ka maand woto bɩ?” (Mat. 5:46, 47) Woto wilgdame tɩ sã n yaa neb nins sẽn nong tõndã bal la d nonga, pa sek Wẽnnaam na n keo-d ye. Bala, yõor-yaood dɛɛgdbã neb wʋsg sẽn da kisã me ra nonga sẽn nong-b bãmbã.—Luk 5:30; 7:34.
7. Bõe yĩng tɩ sã n yaa d saam-bi-taasã d sẽn nongã bal la d pʋʋsda, d pa maand tɩ yɩɩd neb a taabã?
7 D rɩk makr ne zʋɩf rãmbã sẽn da pʋʋsd taab to-to wã. Zʋɩf sã n da na n pʋʋs a zʋɩf-taaga, a yeta a pʋʋsgã pʋgẽ tɩ “laafɩ” zĩnd ne-a. (Luk 10:5; Zã 20:19) Woto rat n yeelame t’a kota Wẽnd t’a kõ a sẽn pʋʋsd a soabã keelem, t’a kɩt t’a yɩ neer la a ning-a barka. La sã n yaa d saam-bi-taasã d sẽn nongã bal la d pʋʋsda, d pa maand tɩ yɩɩd neb a taabã ye. Bala, a Zezi wilgame tɩ baa neb nins ‘sẽn pa pʋʋsd Wẽnnaamã’ me maanda woto.
8. A Zezi sẽn yeel a karen-biisã tɩ b segd n zemsa zãngã rat n yeelame tɩ bõe?
8 Ãdem-biisã fãa sẽn dog ne yel-wẽndã yĩng kɩtame tɩ Kiristã karen-biis me yaa neb sẽn pa zems zãnga, n kongdẽ. (Rom 5:12) La baa ne rẽ a Zezi yeel-b-la woto: ‘Bɩ yãmb zems zãnga, a wa yãmb Ba sẽn be saasẽ sẽn zems zãngã.’ (Mat. 5:48) A ra rat n wilga a kɛlgdbã tɩ b segd n modg n dɩka b “saasẽ ba” a Zeova togs-n-taare, n nong hal ne b bɛɛbã. Tõnd me segd n maana woto.
Bõe yĩng tɩ d segd n yɩ sug-kõtba?
9. A Zezi sẽn yeelã wilgdame tɩ maan f to neerã baooda bõe me maanego?
9 D sã n sak n kõ ned sẽn beeg-d sugri, d wilgdame tɩ d maand-a-la neere. Sɩd me, a Zezi yeela pʋʋsg ning a sẽn wilg a karen-biisã pʋgẽ woto: “Bɩ y kõ tõnd sugr tõnd beegrã yĩnga, a wa tõnd me sẽn kõt d bɛɛgdba sugrã.”—Mat. 6:12.
10. Sugrã wɛɛngẽ, wãn to la d tõe n dɩk Wẽnnaam togs-n-taare?
10 D segd n dɩka Wẽnnaam togs-n-taare, n sakd n kõt neb nins sẽn kot tõnd sugr b beegr yĩngã sugri. Tʋm-tʋmd a Poll yeela woto: “Bɩ yãmb maan taab neere, la paam sũ-bʋgsem, la kõ taab sugr wa Wẽnnaam sẽn kõ yãmb sugr Kirist yĩngã.” (Ef. 4:32) Yɩɩl-gʋlsd a Davɩɩd me yeela a yɩɩll pʋgẽ woto: “[A Zeova] yaa nimbãan-zoɛta, la bark kõata, bãmb sũur ka puugd tao-tao ye, b tara nonglem wʋsgo. . . . Bãmb ka maand tõnd wa sẽn zems d kongrã ye, la bãmb ka lebsd tõnd wa sẽn zems d yel-wẽnã ye. . . . Bãmb zãaga tõnd kongrã ne tõnd wa yaang sẽn zãr ne taoore. [A Zeova] zoeta b zoɛtbã nimbãaneg wa kamb ba sẽn zoet a kambã nimbãanegã. Tɩ bõe, bãmb mii bãmb sẽn yãk bũmb ning n naan tõndo, bãmb tẽegdame tɩ tõnd yaa tẽng tom.”—Yɩɩl 103:8-14.
11. Ãnd dãmb n tõe n paam Wẽnnaam sugri?
11 Ned sã n dat tɩ Wẽnnaam kõ-a sugr a beegr yĩnga, a soab me segd n kõta a taab sugri. (Mark 11:25) A Zezi wilga rẽ vẽeneg n yeel woto: ‘Yãmb sã n kõ nebã sugr b beegrã yĩnga, yãmb Ba sẽn be saasẽ me na n kõo yãmb sugr y beegrã yĩnga. La yãmb sã n ka kõ nebã sugr b beegr yĩnga, yãmb Ba me kõn kõ yãmb sugr y beegrã yĩng ye.’ (Mat. 6:14, 15) Sɩd yaa neb nins sẽn sakd n kõt b taabã sugrã bal n paamd Wẽnnaam sugri. A Poll kõo saglg tɩ d sã n tũ rẽ me bɩ na n kɩt tɩ d tõogd n maand d taabã neere. A yeela woto: “Wa [a Zeova, NW] sẽn kõ yãmb sugrã, bɩ yãmb me kõ taab sugr woto.”—Kol. 3:13.
Da le kao-y taab bʋʋd ye
12. Kao f to bʋʋdã wɛɛngẽ, a Zezi yeelame tɩ bõe?
12 A Zezi sẽn sõs ne nebã tãngã zugã, a wilg-b-la bũmb a to me b sẽn tõe n maan tɩ wilg tɩ b maanda neere. A yeel-b lame tɩ b ra le kao taab bʋʋdo, la a rɩk makr sẽn wilgd rẽ võor vẽenega. (Karm-y Matɩe 7:1-5.) Bɩ d bao n wʋm a Zezi gomdã võore.
13. A Zezi yeela a kɛlgdbã tɩ b segd n maanda bõe?
13 A Matɩe wilga a evãnzillã pʋgẽ t’a Zezi yeela woto: “Da [le, NW ] bʋ-y ned bʋʋdo, tɩ Wẽnnaam da wa bʋ yãmb bʋʋd ye.” (Mat. 7:1) La a Luk evãnzillã pʋgẽ, a yeela woto: “Bɩ y ra [le, NW ] bʋ ned bʋʋd ye, la Wẽnnaam me kõn bʋ yãmb bʋʋd ye. Da mong-y ned bʋʋm ye, la b kõn mong yãmb me bʋʋm ye. Bɩ y kõ sugri, la yãmb me na paam sugri.” (Luk 6:37) Pipi kiris-nebã wakate, fariziẽ rãmbã ra tũuda b rog-n-mik noy sẽn pa be Biiblã pʋgẽ n kaood nebã bʋʋd ne wẽnem. A Zezi ra rat n yeela a kɛlgdbã tɩ neb nins fãa sẽn maand wa fariziẽ rãmbã segd n basa nebã bʋʋd kaoobo. A sẽn yeel tɩ b ‘kõ sugrã’ rat n yeelame tɩ ned sã n kong bɩ b bas taale. Tʋm-tʋmd a Poll me kõo saglg sẽn wõnd rẽ.
14. A Zezi karen-biisã sã n yɩ sug-kõtba, na n kɩtame tɩ nebã maan bõe?
14 A Zezi karen-biisã sã n yɩ sug-kõtba, na n kɩtame tɩ nebã rɩk b togs-n-taare, n yɩ sug-kõtba. A yeel-b-la woto: “Yãmb sẽn na n bʋ ned bʋʋd bũmb ninga, yãmb na n paama bʋ-kãnga. La ne makdg ninga yãmb sẽn na n mak n kõ nebã, b na n mak n lebsa yãmb woto.” (Mat. 7:2) Tõnd sẽn maand nebã bũmb ningã, yaa rẽ la b na n lebs-do.—Gal. 6:7.
15. Wãn to la a Zezi wilgẽ tɩ d pa segd n nong d taabã wɩdga?
15 Tẽeg-y tɩ sẽn na yɩl n wilg tɩ d pa segd n nong n wɩt d taabã, a Zezi soka woto: “Yaa bõe tɩ fo get moog sẽn be fo ba-biigã nifẽ wã n ka get daoogã sẽn be fo mengã nifẽ wã? La raoog sã n be fo nifẽ, fo na n yɩɩ wãn n yeel f ba-biigã: ‘Bas tɩ m yãk moogã sẽn be fo nifẽ wã?’ ” (Mat. 7:3, 4) Ned sã n nong n wɩt a taaba, yaa wa a geta bũmb sẽn pa zem fʋɩ sẽn be b ninẽ. A yetame t’a sẽn wɩt a soabã pa ne sõma, bɩ t’a yamã ludame. Baa bũmb bɩ yell sã n paood wa moogo, a yetame tɩ b ‘bas t’a yãk-a,’ tɩ wõnd a rat n sõnga a to wã t’a yã sõma, tɩ yaool n yaa ziri.
16. Bõe yĩng tɩ d tõe n yeel tɩ “raoog” n da be fariziẽ rãmbã nifẽ?
16 Yaa zʋɩf rãmbã tũudum taoor dãmb n da nong n wɩt nebã la b paoogd-ba. Ad makr a ye sẽn wilgd rẽ: Kiristã sẽn da puk rao a ye sẽn dog ne zond nin tɩ kɩt tɩ raoã yeel t’a Zezi segd n yii Wẽnnaam nengẽ wã, fariziẽ rãmbã leok-a-la ne sũ-yikr woto: “Fo roga ne yel-wẽna, fo ka tõe n zãms tõnd ye.” (Zã 9:30-34) Fariziẽ rãmbã sẽn da mi Wẽnnaam noyã la b baas n pa get yɛlã wa a Zeova sẽn get-b to-to wã yĩnga, ra yaa wa raoog n bee b ninẽ wã n kɩt tɩ b pa neẽ ye. Rẽ n so t’a Zezi yet sẽn wɩt-a a to fãa woto: “Zãmb soaba! Reng n yãk raoog ninga sẽn be fo nifẽ wã, n yaool n yã n yãk moogã sẽn be f ba-biigã nifẽ wã.” (Mat. 7:5; Luk 6:42) D sã n sɩd nong d tẽed-n-taasã la d rat n maand-b neere, d pa na n gẽesd b sẽn kongd zĩis ninsã n na n paamd n wɩt-b ye. Sã n pa rẽ, yaa wa tõnd me yet-b lame tɩ moog n be b nifẽ. Wall tɩ d wɩt-bã, d na n sak n deegame tɩ tõnd me yaa koangdba, la tɩ d segd n basa d taabã wɩdbo.
D manesem ne d taabã sẽn segd n yɩ to-to
17. Bõe la Matɩe 7:12 wã sagend-d tɩ d maane?
17 A Zezi sõsgã pʋgẽ, a wilgame tɩ Wẽnnaam maanda a nin-buiidã wa ba sẽn maand a biig to-to wã, n deegd b pʋʋsgã wa ba me sẽn deegd a biig kosgã. (Karm-y Matɩe 7:7-12.) D tẽeg tɩ baraare, a Zezi kõo saglg tõnd manesmã ne d taabã wɛɛngẽ t’a sõmblmã ka to ye. A yeela a kɛlgdbã woto: “Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.” (Mat. 7:12) Yaa d sã n maand d taabã woto la d wilgd tɩ d yaa a Zezi Kirist karen-biis hakɩka.
18. Bõe yĩng tɩ d yetẽ tɩ “tõogã” wilgdame tɩ d segd n maanda d taabã wa d sẽn dat tɩ b maan-d to-to wã?
18 A Zezi sẽn yeel tɩ d segd n maanda nebã wa d sẽn dat tɩ b maan tõnd to-to wã poore, a paasame tɩ rẽ “yaa tõogo, la Wẽnnaam no-rɛɛsdbã noore.” Sɩd me, d sã n maand d taabã wa a Zezi sẽn wilgã, yaa “tõogã” la d tũuda. B sẽn boond tɩ “tõogã” ka wã yaa Sɩngr sebrã n tall n tãag Tõod sebrã. Seb-kãens pʋgẽ, a Zeova sẽn pʋlem tɩ yageng n na n wa kɩt tɩ wẽng buud fãa sa tẽngã zugã toor sẽn ka be, a kõ a Moiiz a tõogã t’a taas Israɛll nebã sẽn da yaa buud a sẽn so wã. (Sɩng. 3:15) Wala makre, tõogã pʋgẽ, b ra wilga Israɛll nebã vẽeneg tɩ b segd n yɩɩ tɩrse, tɩ b ra bak ned n sõnge, la tɩ b segd n maanda naong rãmbã la sãambã neere.—Maan. 19:9, 10, 15, 34.
19. Wãn to la “no-rɛɛsdbã” wilgd tɩ d segd n maanda neere?
19 Tõe t’a Zezi sẽn gom “no-rɛɛsdbã” yellã, yaa Biiblã bãngr-goam sɛb nins b sẽn gʋls ne hebre wã yell la a sẽn da gomdã. Seb-kãens ra pĩnd n goma Mesi wã yelle, tɩ sɩd pids Kiristã zugu. B yaa sɛb sẽn wilgd me tɩ Wẽnnaam nin-buiidã sã n tũud noyã la b maand b taabã neere, a ningd-b-la barka. Wala makre, a Ezai bãngr-goamã pʋgẽ, b sagla Israɛll nebã woto: “Zusoaba yeelame: ‘Sak-y bũmb nins sẽn zemsã la y maan sẽn yaa tɩrga. . . . Ned ninga sẽn maand woto wã tara sũ-noogo. Yaa ninsaal ninga fãa sẽn yaa sakda . . . n ka rat t’a nug maan wẽngã.’ ” (Ezai 56:1, 2) Wẽnnaam sɩd ratame t’a nin-buiidã maand neere.
Maand-y nebã neere
20, 21. A Zezi sẽn sõs ne nebã tãngã zug n sa wã, b manesem yɩɩ wãna, la bõe yĩng tɩ d segd n bʋgs a goamã zugu?
20 D sõsa sagl-sõma nins a Zezi sẽn kõ nebã tãngã zugã bãmb b wãn bal zutu. La baasgo, d wʋma a kɛlgdbã manesem sẽn yɩ to-to a sõsgã poorã võore. Kibarã pʋgẽ, b yeela woto: “A Zezi sẽn togs bõn-kãens n sɛ, kʋʋngã yɛɛsa bãmb karengã yĩnga. Tɩ bõe, bãmb zãmsa nebã wa ned sẽn tar noore, la a ka wa bãmb gʋlsdbã ye.”—Mat. 7:28, 29.
21 Sãmbg sẽn ka be, nebã bãnga vẽeneg t’a Zezi n sɩd yaa “Sagend sẽn yaa sõma wʋsg” ninga Wẽnnaam sẽn da togs tɩ watame wã. (Ezai 9:5) A Zezi sõssã fãa sʋka, yaa tãngã zug soabã n wilgd t’a sɩd mi a saasẽ ba wã sẽn get yɛlã to-to wã n yɩɩda. A sõsgã sagls nins yell d sẽn gomã toor sẽn ka be, a kõo sagls me sẽn tõe n sõng-d tɩ d paam sũ-noog hakɩkã, tɩ d gil yoobo, la d tõog n yɩ tɩrse. B kẽer me wilgda d sẽn tõe n maan to-to tɩ beoog daarã yɩ sõma ne-do. D pa tõe n sõdg saglsã fãa ye. D sagend-y lame tɩ y reng n pʋʋs la y lebs n karem Matɩe sak a 5 n tãag a 7 wã neere. Y sã n bʋgs Kiristã sagl-sõma nins sẽn be a sõsgã pʋgã zut la y tũ-ba, na n sõng-y lame tɩ y tõog n ta a Zeova yam, tɩ y zĩid-n-taar yɩ noogo, la kɩt me tɩ y ket n maand neere.
Y na n leokame tɩ bõe?
• D manesem ne d bɛɛbã segd n yɩɩ wãna?
• Bõe yĩng tɩ d segd n kõt taab sugri?
• F to bʋʋd kaoobã wɛɛngẽ, bõe la a Zezi yeel-yã?
• Matɩe 7:12 wã yeelame tɩ d segd n maana d taabã bõe?
[Zãmsgã sogsgã]
[Goam sẽn tar pãngã, seb-neng 14]
Y mii a Zezi sẽn yeel tɩ ‘da le bʋ-y ned bʋʋdã’ võor bɩ?
[Foto, seb-neng 12]
Bõe yĩng tɩ d segd n pʋʋs sẽn namsd-b tõndã yĩnga?
[Foto, seb-neng 15]
Yãmb maanda y taabã wa y sẽn dat tɩ b maan yãmb me to-to wã bɩ?