D zãag d mens ne bũmb nins sẽn pa tar yõodã
D zãag d mens ne bũmb nins sẽn pa tar yõodã
“Ned sẽn maand yel-yaals ka tar yam ye.”—YEL. 12:11.
1. Tõnd bõn-sõma wã kẽer la bʋse, la wãn to la d tõe n tʋm ne-b sõma n yɩɩda?
TÕND fãa tara bõn-sõma toor-toore. Bõn-kãens sʋka, d tõe n sõdga keelem, laafɩ, bãngr bɩ laogo. La tõnd sẽn yaa kiris-neb n nong a Zeova wã yĩnga, d rɩkda bõn-kãensã n tʋmd a tʋʋmdã. Woto wilgdame tɩ d tũuda yel-bũndã sẽn yet woto wã: “Waoog Zusoabã ne f paoongã la f koodã dẽenem biisi.”—Yel. 3:9.
2. Bõe la Biiblã yet bũmb nins sẽn pa tar yõodã wɛɛngẽ, la bõe n wilgd t’a sẽn yetã yaa sɩda?
2 La Biiblã gomda yɛl sẽn pa tar yõod me yelle, n keoogd tõnd tɩ d ra pʋg bõn-kãensã n sãam d sẽkã la d pãngã zaalem ye. Yelbũn 12:11 wã yeta woto: “Ned sã n kood a pʋʋgo, a tara rɩɩbo. La ned sẽn maand yel-yaals ka tar yam ye.” Sɩd me, ned sã n dɩk a sẽkã ne a pãngã n tʋm wʋsg n na n ges a zakã rãmb yelle, yẽ ne a zakã rãmb pa na n kong bũmb sẽn na n sõng-b tɩ b vɩɩmd ye. (1 Tɩm. 5:8) La ned sã n dɩk a pãngã la a sẽkã n pʋgd yel-yaalse, wilgdame t’a yaa ned sẽn pa tar yam, la ned sẽn pa tagsd sõma. Nin-kãng wat n kẽndame n pa tar baa fʋɩ ye.
3. Bõe n wilgd tɩ Wẽnnaamã tũub wɛɛngẽ me, Biiblã sẽn yet bũmb ning yɛl nins sẽn pa tar yõodã wɛɛngẽ wã yaa sɩda?
3 La Wẽnnaamã tũub pʋgẽ me, bõe n wilgd tɩ yel-bũndã sẽn yetã yaa sɩda? D mii vẽeneg tɩ kiris-ned sã n maand a sẽn tõe fãa n tũud a Zeova wakat fãa, a yamã na n gãeyã bãane. A tõe n kɩsa sɩd tɩ Wẽnnaam na n ning-a-la bark masã menga, la a paam saagr t’a na n sɩd ning-a-la bark beoog daar me. (Mat. 6:33; 1 Tɩm. 4:10) La kiris-ned sã n pʋgd bũmb sẽn pa tar yõodo, a tõe n sãama zood ning a sẽn tar ne a Zeova wã, la a tõeeme me n pa paam vɩɩm sẽn pa satã ye. La bõe n tõe n sõng-d tɩ ra wa yɩ woto? D segd n bao n bãnga bũmb nins sẽn pa tar yõod d vɩɩmã pʋgẽ wã, la d modg n zãag d mens ne-ba.—Karm-y Tɩt 2:11, 12.
4. Bũmb nins sẽn pa tar yõodã yaa bõe?
4 La bũmb nins sẽn pa tar yõodã yaa bõe? Yaa bũmb nins fãa sẽn tõe n gɩdg tõnd tɩ d pa tũ a Zeova ne d sũur fãa wã. Wala makre, tõe n yɩɩ reemã buud toor-toorã. Reemã pa wẽng ye. La tõnd sã n dɩkd d sẽkã wʋsg n kẽesd reemã pʋgẽ n pa le maand Wẽnnaam daabã, wakat kãngã reemã lebga bũmb sẽn pa tar yõodo, sẽn tõe n sãam zood ning tõnd sẽn tar ne Wẽnnaamã. (Koɛ. 2:24; 4:6) La sẽn na yɩl n gil rẽ, kiris-ned segd n gũusa ne a sẽn dɩkd a sẽkã n tʋmd to-to wã, bala kiris-ned sẽk tara yõod wʋsgo. A segd n maandame n zemsdẽ. (Karm-y Kolos rãmb 4:5.) La yɛl a taab me n be n pa tar yõodo, tɩ b wẽnemã yɩɩd reemã hal wʋsgo. Bõn-kãens sʋka, d tõe n sõdga ziri wẽnnaam dãmbã.
D zãag d mens ne wẽn-faadã
5. Biiblã verse rãmb wʋsg pʋsẽ, b sã n gomd bũmb sẽn pa tar yõod yelle, nong n yaa bõe?
5 Biiblã verse rãmb wʋsg pʋsẽ, b sã n gomd bũmb sẽn pa tar yõod bɩ bõn-faad yelle, nong n yaa ziri wẽnnaam dãmbã yell la b gomda. Wala makre, a Zeova ra yeela Israɛll nebã woto: “Da naan-y wẽn-faad n kõ y meng ye, da pees-y nin-naande, daoog bɩ kugri n waoog-a wa y wẽnd ye, da lugl-y kuga n yĩgimd b taoor ye.” (Maan. 26:1, Sebr Sõngo) Rĩm a Davɩɩd me gʋlsa woto: “Zusoaba yaa kãsenga la b zemsa pẽgr wʋsgo. Bãmb seka zoees n yɩɩd wẽnnaam dãmbã fãa. Tɩ bõe, buud a taabã wẽnnaam dãmbã fãa yaa zaalem, yaa Zusoabã n naan saase.”—1 Kib. 16:25, 26.
6. Bõe yĩng tɩ ziri wẽnnaam dãmbã pa tar yõodo?
6 Wala a Davɩɩd sẽn yeelã, kaset wʋsg beeme sẽn wilgd t’a Zeova yaa kãsenga. (Yɩɩl 139:14; 148:1-10) A Zeova ra maana kaool ne Israɛll nebã. Dẽnd Israɛll nebã ra tara zu-no-kãsenga. La b wa n basa a Zeova n wõgemded n pʋʋsd bõn-naands la ra-lugdsi. Woto ra yaa yalemd menga! Yell sã n da paam Israɛll nebã, b wẽnnaam dãmbã ra pa tar pãng n na n fãag b mense, tɩ pa sokd nebã ye. Dẽnd b wẽnnaam dãmbã ra sɩd yaa wẽn-faado. B ra pa tar yõod ye.—Bʋk. 10:14, 15; Ezai 46:5-7.
7, 8. Wãn to la arzɛkã tõe n lebg ned wẽnnaam?
7 Rũndã-rũndã, tẽns wʋsg pʋsẽ, neb n ket n pʋʋsd bõn-naandse. La wa sẽn da yaa to-to pĩnd wẽndẽ wã, rũndã-rũndã me, bõn-naandsã pa tar yõod ye. (1 Zã 5:21) Biiblã gomda wẽnnaam dãmb a taab yelle, sẽn pa bõn-naandse. Wala makre, a Zezi yeela woto: “Ned baa a yen ka tõe n sak zu-soben-dãmb a yiib ye. Bala a na n kisga a yen la a nong a to wã, walla a loe a meng ne a yen la a paoog a to wã. Yãmb ka tõe n sak Wẽnnaam la y sak arzegs me ye.”—Mat. 6:24, Kãab-paalgã Koe-noogo.
8 Wãn to la arzɛkã tõe n wa lebg ned wẽnnaam? D leb Israɛll nebã wakatẽ wã. D tags n ges kugr sẽn na n dɩg weoogẽ. B tõeeme n dɩk-a n naag n me roog bɩ lalga. La b sã n da rɩk-a n maan “bũmb makre,” a lebgda bũmb sẽn tõe n tudg nin-buiidã. (Maan. 26:1) Ligdã me pa wẽng ye. Sõngda tõnd tɩ d tõe n paam bũmb nins sẽn yaa tɩlae d vɩɩmã pʋgẽ wã. D leb n tõe n dɩkame n teel a Zeova tʋʋmdã. (Koɛ. 7:12; Luk 16:9) La ligdã baoob sã n wa pak tõnd n yɩɩd a Zeova tʋʋmdã, ligdã lebgda tõnd wẽnnaam. (Karm-y 1 Tɩmote 6:9, 10.) Rũndã-rũndã, yaa laogã baoob n tar yõod ne nebã n yɩɩd bũmba fãa. D segd n gũusame n da wa maan wa bãmb ye.—1 Tɩm. 6:17-19.
9, 10. a) Bõe la kiris-nebã tagsd karengã wɛɛngẽ? b) Karen-bɛdã tõe n waa ne yel-bʋgo?
9 Karengã me yaa bũmb sẽn tar yõodo, la a tõe n wa lebga bũmb sẽn ka yõodo. Tõnd fãa ratame tɩ d kambã karem sõma n wa tõog n get b mens yelle. Sẽn tar yõod n yɩɩd mengã, kiris-ned sã n karem n zãag bilfu, sõngdame t’a tõe n karemd Biiblã n wʋmd a võor sõma. Yell taoor me, a tõe n tagsa sõma n bãng n welg-a, la a tõe me n zãms nebã Biiblã tɩ b wʋm a võor sõma la b sak n tẽ. Sẽn na yɩl n tõog n karem sõma, rɩkda sẽka. La woto pa sẽk sãang ye.
10 La bõe la d segd n tags ne karen-bɛd nins b sẽn karemd inivɛrsite rãmbẽ wã? Neb wʋsg tagsdame tɩ f sã n dat tɩ f beoog-daar yɩ sõma, yaa tɩlae tɩ f karem karen-bɛda. La wʋsg sã n wa karem n baase, yaa tags-yaals sẽn na n sãam-b bal n pid b zutã. Yaool n yaa pãng ne keelem ning b sẽn da tar b bi-bɩɩlmã sasa n da tõe n dɩk n kẽes a Zeova tʋʋmdã pʋgẽ wã la b sãam zaalem. (Koɛ. 12:1) Tõe tɩ yaa rẽ yĩng la tẽns nins pʋsẽ nebã wʋsg sẽn karemd karen-kãens buudã, sẽn tẽed-b tɩ Wẽnnaam beeme wã sẽn pa le waoogã. La kiris-nebã pa teegd karen-bɛdã sẽn na yɩl tɩ b beoog-daar yɩ sõma ye. B teegda a Zeova.—Yel. 3:5.
D ra bas tɩ d yĩnsã ratem lebg d wẽnnaam ye
11, 12. Bõe yĩng t’a Poll yeel tɩ neb kẽer pʋs la b wẽnnaam?
11 Lɛtr ning tʋm-tʋmd a Poll sẽn gʋls Filip kiris-nebã pʋgẽ, a wilga bũmb a to me sẽn tõe n wa lebg ned wẽnnaam. A goma neb kẽer sẽn da yɩ kiris-neb pĩndã yell woto: ‘Mam dag n yeela yãmb naoor wʋsgo, la mam le yeta yãmb masã ne nintãm, tɩ wʋsg n be tɩ b kẽnd wilgdẽ tɩ bãmb yaa Kirist kũum [da-lukã] bɛɛba. Bãmb baoosg na n yɩɩ sãoongo, bãmb pʋsã n yaa b wẽnnaam, . . . bãmb ka tagsd bũmb tɩ ka dũniyã yell bal ye.’ (Fil. 3:18, 19) Wãn to la ned pʋg tõe n wa lebg a wẽnnaam?
12 Wõnda neb nins yell a Poll sẽn da gomdã basame tɩ b yĩngã ratem pidsg lebg bũmb ning sẽn tar yõod n yɩɩd b sẽn na n naag a Poll n tʋmd a Zeova tʋʋmdã. Tõeeme meng tɩ kẽer da rɩtame wall b yũud wʋsg hal n wa lebg yão-be-neb bɩ rã-yũudba. (Yel. 23:20, 21; ges-y Tõod 21:18-21.) Tõe tɩ kẽer me da rat n dɩɩ bũmb nins sẽn da be bãmb wakatẽ wã yõod wʋsgo, tɩ rẽ kɩt tɩ b bas a Zeova tʋʋmdã. Bɩ d ra wa tol n tʋlg nebã sẽn boond a soab tɩ vɩ-noogã abada, tɩ rẽ wa kɩt tɩ d pa le maand a Zeova raabã ne d sũy fãa ye.—Kol. 3:23, 24.
13. a) Zoe-bõn yaa bõe, la a Poll mak-a-la ne bõe? b) Wãn to la d tõe n lak d mens ne bõn-zoeendo?
13 A Poll leb n goma bũmb a to me sẽn tõe n lebg ned wẽnnaam yelle. A gʋlsa woto: ‘Dẽ yĩnga, bɩ y kɩɩs y yĩngã ratem dũniyã zug ka, sẽn yaa yoobo, la rẽgdo, la wẽng ratem, la tags-wẽnse, la zoe-bõn sẽn yaa bõn-naands pʋʋsgo.’ (Kol. 3:5) Ned sã n yaa bõn-zoɛta, a tʋlla ne a sũur fãa n paam bũmb a sẽn pa so, bɩ a sẽn pa segd ne. Tõe n yɩɩ laogã, bɩ pag ne rao lagengã menga. (Yik. 20:17) Sɩd zemsame tɩ d yeel tɩ tʋlsem kãensã buud ne bõn-naands pʋʋsg fãa yaa a yembre. A Zezi rɩka makr sẽn zems kɛpɩ n wilg tɩ tara yõod tɩ d maan d sẽn tõe fãa n yõk d mens n da tall tʋls-wẽns kãensã buud ye.—Karm-y Mark 9:47; 1 Zã 2:16.
D gũus ne goam sẽn pa tar yõodo
14, 15. a) A Zeremi wakatẽ wã, gom-vɩɩd bʋs n tudg neb wʋsgo? b) Bõe yĩng t’a Moiiz goamã ra tar yõodo?
14 Tõnd goamã me tõe n naaga bũmb nins sẽn pa tar yõodã sʋka. Wala makre, a Zeova ra yeela a Zeremi woto: ‘Bãngdbã rɩka mam yʋʋr n yag ziri. Mam ka tʋm-ba, la m ka kõ-b noor tɩ b gom ne-ba, la m ka gom ne bãmb me ye. Bãmb togsa yãmb ziri bãngr-gom-yaals sẽn yaa b mens tagsgo.’ (Zer. 14:14) Bãngdb kãensã ra yetame tɩ b gomda a Zeova yʋʋr yĩnga, la yaa b mensã tagsa la b mensã bãngr la b sẽn da wilgd nebã. Dẽnd b goamã ra pa tar yõod ye. Ra yaa gom-vɩɩd sẽn sãam Wẽnnaam nin-buiidã tẽebo. Yʋʋmd 607 sẽn deng a Zezi rogmã, Babilon sodaasã wa n kʋʋ neb nins fãa sẽn da kelg gom-kãensã wã.
15 La a Moiiz sẽn yeel Israɛll nebã bũmb ningã yẽ ra tara yõodo. A yeel-b-la woto: “Deeg-y ne y sũur m goamã fãa. . . . Goama ka goam sẽn ka tar yõod y yĩng ye. Yaa y vɩɩm goama, bãmb bal n tõe tɩ y yõor yɩ wok tẽng ning y sẽn na n dʋʋg Zʋrdẽ n soogã.” (Tõo. 32:46, 47, Sebr Sõngo) A Moiiz goamã ra yita Wẽnnaam nengẽ. Dẽnd a goamã ra tara yõod wʋsgo. B tũubã n da na n sõng Israɛll nebã tɩ b vɩɩmd sõma. Neb nins sẽn sak n tũ-bã yõy yɩɩ wogdo, la b paama arzɛk me. Bɩ d modg n zãag d mens ne goam nins sẽn pa tar yõodã, la d tũ goam nins sẽn yaa sɩd la tar yõodã wakat fãa.
16. Bãngdbã goam sã n kɩɩsd Wẽnnaam Gomdã sẽn yetã, ãnd n tar bʋʋm?
16 Rẽ yĩnga d wʋmda goam sẽn pa tar yõod rũndã-rũndã me bɩ? N-ye. Wala makre, bãngdb kẽer yetame tɩ tagsg ning sẽn yet tɩ bũmb fãa waa a toor n pa tar naandã, n paas bãmb mensã sẽn vaees n bãng bũmb nins yɛl a taab wɛɛngẽ wã wilgdame tɩ pa le tar yõod tɩ d tẽ Wẽnnaam, bala d tõe n wʋma bũmba fãa võor tɩ pa tũ ne Wẽnnaam ye. Rẽ yĩnga tõnd segd n tẽe gom-kãensã buud bɩ? Ayo! Ninsaalbã yam tõe n kɩɩsda Wẽnnaam yamã. (1 Kor. 2:6, 7) La d miime tɩ ninsaalbã sẽn zãmsd bũmb ningã sã n wa kɩɩsd Wẽnnaam sẽn yeelã, yaa ninsaalbã zãmsg n pa sɩda. (Karm-y Rom dãmb 3:4.) Baa ne bãngdbã sẽn vaees n bãng bũmb wʋsgã, Biiblã sẽn yet bũmb ning ninsaalbã yam wɛɛngẽ wã yaa sɩda: “Dũni kãngã yam yaa yalemd ne Wẽnnaam.” Wẽnnaam yamã sẽn pa tar tɛkã taoore, ninsaalbã yam yaa zaalem.—1 Kor. 3:18-20.
17. Kiris-neb ne yʋʋrã taoor dãmb la sɩdã kɩɩsdbã goam yaa gom-bʋs buudu?
17 Kiris-neb ne yʋʋrã taoor dãmb me togsda goam sẽn pa tar yõodo. B yetame tɩ b gomda Wẽnnaam yʋʋr yĩnga, la b sẽn zãmsd nebã bũmb ningã wʋsg pa yit Biiblã pʋgẽ ye. B sẽn yetã pa tar yõod ye. Sɩdã kɩɩsdb me gomda goam sẽn pa tar yõodo, bala b yetame tɩ bãmb tara yam n yɩɩd “tʋm-tʋmd sẽn tũud sɩd la sẽn tar yamã.” (Mat. 24:45-47) B yaool n togsda b mens goama. Gom-kãens pa tar yõodo, la b leb n tudgda neb nins fãa sẽn kelgd-bã. (Luk 17:1, 2) La bõe la d tõe n maan tɩ b ra tudgd-du?
D sẽn tõe n zãag d mens ne goam sẽn pa tar yõod to-to
18. Wãn to la d tõe n tũ saglg ning sẽn be 1 Zã 4:1 pʋgẽ wã?
18 Tʋm-tʋmd a Zã sẽn wa n kʋʋlã, a kõo saglg goam nins sẽn pa tar yõodã wɛɛngẽ. A yeela 1 Zã 4:1 Sebr Sõng pʋgẽ woto: “M kom-nongdse, maan-y gũusg ne neb kẽere, bãng-y b yama sã n sɩd yaa Vʋʋsem Sõng rẽnna, la tẽeg-y tɩ zirẽ-be-bãngdb ka tɛk n wa moogo.” Tõnd tũuda a Zã saglgã koe-moonegã wakate, n yet nebã tɩ b ges Biiblã pʋgẽ n bãng b sẽn zãms-b bũmb ningã sã n yaa sɩda. Tõnd mengã segd n maanda woto. Tõnd sã n wa wʋmd ned sẽn sãbsd sɩdã bɩ sẽn wɩt kãsem dãmbã bɩ saam-biig a to, d pa segd n tẽ a soabã n pa bao n bãng sã n yaa sɩd bɩ ziri ye. D segd n deng n soka d mens woto: “Rẽ yĩnga ned ning sẽn gomd woto wã tũudã Biiblã sẽn yetã bɩ? A sẽn yet bũmb ningã na n sõngame n kɩt t’a Zeova raabã pids bɩ? A goamã na n waa ne laafɩ tigingã pʋgẽ bɩ?” D sã n wʋm goam b sẽn gomd n na n sãam tõnd saam-biirã, bɩ d bãng tɩ gom-kãens pa tar yõod ye.—2 Kor. 13:10, 11.
19. Bõe la kãsem dãmbã maand tɩ kɩtdẽ tɩ b goamã tar yoodo?
19 Kãsem dãmbã me zãagda b mens ne goam sẽn pa tar yõodã. B sã n wa rat n sagl neda, b tẽegdame tɩ b pa mi fãa ye. B pa tikd b mengã bãngr zug n kõ saglg ye. B segd n tika Biiblã sẽn yetã zug wakat fãa. Tʋm-tʋmd a Poll sẽn yeel bũmb ningã tõe n sõng-b-la wʋsgo. A yeelame tɩ b ra “maan tɩ yõsg bũmb ning sẽn gʋlsã ye.” (1 Kor. 4:6, Kãab-paalgã Koe-noogo) Kãsem dãmbã pa togsd tɩ yɩɩg bũmb ning sẽn be Biiblã pʋgẽ wã ye. Sẽn paas me, b pa togsd tɩ zʋʋg sagls nins sẽn be sɛb nins tʋm-tʋmd sẽn tũud sɩd la sẽn tar yamã sẽn tikd Biiblã zug n yiisdẽ wã pʋsẽ wã ye.
20. Bõe n sõngd tõnd tɩ d gũusd d mens ne bũmb nins sẽn pa tar yõodã?
20 Bũmb nins sẽn pa tar yõodã fãa, wala makre ziri wẽnnaam dãmbã la goamã yaa wẽng hal wʋsgo. Rẽ n so tɩ d pʋʋsd a Zeova wakat fãa t’a sõng-d tɩ d bãng-b n welg la d zãag d mens ne-ba. D sẽn maand woto wã, d yeta a Zeova yɩɩl-gʋlsdã me sẽn yeel-a bũmb ningã. A yeela woto: “Bɩ y kɩt tɩ m wẽneg n da ges bõn-zaals ye, bɩ y kõ maam vɩɩm y sorã pʋgẽ.” (Yɩɩl 119:37) Sõsg ning sẽn pʋgdã pʋgẽ, d na n yãa a Zeova sor-wilgrã sẽn wat ne nafa ninsi.
Y tõe n wilga a võor bɩ?
• Bũmb nins sẽn pa tar yõod tɩ d segd n zãag d mens ne wã yaa bõe?
• Bõe n tõe n sõng tõnd tɩ ligdã ra wa lebg d wẽnnaam?
• Wãn to la yĩngã ratem tõe n wa lebg wa bõn-naands pʋʋsgo?
• Wãn to la d tõe n lak d mens ne goam sẽn pa tar yõodo?
[Zãmsgã sogsgã]
[Foto, seb-neng 12]
Kãsem dãmbã sagls tõe n sõnga tõnd wʋsgo