A Zeova Gomdã vɩɩme

Yelbũn sebrã tags-kãsemse

PĨND wẽndẽ Israɛllã rĩm a Salomo ra tõe n “wẽe yelbũn tus a tã.” (1 Rĩm dãmba 5:12) Rẽ yĩnga tõnd tõe n paama a goamã n karem bɩ? N-ye, d tõeeme. Yelbũn sebrã b sẽn gʋls n sa yʋʋmd 717 sẽn deng a Zezi rogmã pida ne a Salomo yelbũn wʋsgo. Yaa sebrã baasg sags a yiibã bal la a Aguur sẽn yaa a Zake biigã ne rĩm a Lemuɛll gʋls-yã. La neb kẽer tẽedame tɩ Lemuɛllã yaa a Salomo yʋʋr a to.

Goam nins Wẽnnaam sẽn vẽneg tɩ b gʋls Yelbũn sebrã pʋgẽ wã tara nafa a yiibu. Yaa sẽn na yɩl tɩ ned bao yam la a sak n deeg kiblgu. (Yelbũna 1:2) B leb n sõngd-d lame tɩ d paamd yam. Yam sõngda ned t’a mi yɛlã võore, la kɩtdẽ t’a tõe n tʋm ne a bãngrã n welg zu-loeese. Ne yelbũn-kãensã maasem me, d paamda kiblg bɩ zãmsgo. D sã n kelg la d tũ Yelbũn sebrã saglse, b tõe n kẽe d sũuri, la sõng-d tɩ d paam sũ-noog tɩ d vɩɩmã tall barka.—Hebre dãmba 4:12.

D BAO YAM LA D SAK N DEEG KIBLG N DA BAS-A YE

(Yelbũna 1:1–9:18)

A Salomo yeelame tɩ “yam kelemda sor zugu.” (Yelbũna 1:20) Bõe yĩng tɩ d segd n kelg a koɛɛgã? Sak a 2 soabã wilgda yam sẽn tõe n naf ned to-to wã. Sak a 3 soabã pʋgẽ, b wilgda d sẽn na n maan to-to n paam zood sõma ne a Zeova. Rẽ poore, a Salomo yeela woto: “Yam yɩɩda bũmba fãa, bɩ f bao-a. Rɩk bũmb nins fãa fo sẽn tarã n bao bãngre. Bɩ f tall zãmsgã n da bas-a ye. Sak-a t’a yaa f vɩɩm.”—Yelbũna 4:7, 13.

Yoobã sẽn piuug dũni-kãngã pʋgẽ wã, bõe n na n sõng-d tɩ d tõog n da yo? Yelbũn sebrã sak a 5 soabã leokda woto: Yaa d sẽn na n tagsd sõma, la d bãng dũniyã sẽn tudgd nebã ne sɩlem ningã. D segd n gesa yoobã sẽn wat ne bõn-wẽns ninsã me. Sak ning sẽn pʋgdã keoogda tõnd ne tʋʋm la manesem buud toor-toor sẽn tõe n sãam d zoodã ne a Zeova.  Sak a 7 soabã wilgda yoaad sẽn tʋmd to-to wã vẽenegã. B tũnuga ne bilgr sẽn be yamleoog wʋsg sak a 8 soabã pʋgẽ n wilgdẽ tɩ yam tara yõod wʋsgo. Sak a 9 soabã baasda Yelbũnã bab-kãngã. B sẽn gʋls-a t’a be yamleoog to-to wã kɩtdame tɩ d tʋll ne d sũur fãa n bao yam.

Sogsg sẽn tik verse rãmb zut n paam leokre:

1:7; 9:10—B sẽn yet t’a Zeova zoees ‘yaa bãngr la yam sɩngrã’ võor yaa bõe? Sẽn yaa a Zeova la bũmba fãa Naand la a so Gʋlsg Sõamyã yĩnga, ned sã n pa zoet-a, a soab pa tõe n paam bãngr hakɩk ye. (Rom dãmba 1:20; 2 Tɩmote 3:16, 17) Bãngr hakɩkã yita a Zeova nengẽ. Woto yĩnga, bãngr hakɩkã paoong sɩngda ne a Zeova zoeese. Wẽnnaam zoees leb n yaa yam sɩngre, bala, ned sã n pa tar bãngre, a pa tõe n tall yam ye. Sẽn paase, ned sã n pa zoet a Zeova, baa a sẽn tar bãngr ning fãa, a pa na n dɩk-a n pẽg Naandã ye.

5:20; 7:5—Bõe yĩng tɩ b boond pʋg-yoodr tɩ ned a to pag bɩ pʋg-sãanga? Yelbũna 2:16, 17 wilgdame tɩ pʋg-yoodrã yaa ned sẽn ‘yĩm wẽeneg a sẽn da wẽen ne Wẽnnaam.’ B ra boonda ned ning fãa sẽn pʋʋsd ziri wẽnnaam dãmb wall a pa tũud a Moiiz tõogã la pʋg-yoodr buudã fãa tɩ sãana.—Zeremi 2:25; 3:13.

7:1, 2—Wãn-wãn la d segd n wʋm Yelbũna 7:1, 2 goamã võore? Yaa zãmsg ning sẽn yit Biiblã pʋgẽ wã ne noy nins roagdbã sẽn gãneg b zagsã rãmb nafa yĩngã yell la b sẽn gomdã. Kambã segd n tũu no-kãensã la zãmsg nins sẽn yit Biiblã pʋgẽ wã, b roagdbã sẽn zãmsd-bã.

8:30—“Tʋʋm-mitã” yaa ãnda? Yaa yamã b sẽn mak ne nedã la b sẽn boond ka tɩ tʋʋm-mitã. B sẽn mak yamã ne nedã pa sẽn na yɩl n wilg yam sẽn yaa bũmb ning bal ye. A makda Wẽnnaam pipi Biribl a Zezi Kirist a sẽn da wa n be saasẽ wã. Hal sẽn kaoose, nand t’a Zezi wa tẽng zug n yɩ ninsaala, Wẽnnaam ‘reng n naana yẽ la a yaool n naan bũmba fãa.’ (Yelbũna 8:22) A Zezi naaga a Ba wã wala ‘tʋʋm-mita,’ n naan bũmb a taabã fãa ne yẽesem.—Kolos rãmba 1:15-17.

9:17—“Wagdem koomã” yaa bõe, la bõe yĩng tɩ b yet t’a yaa “noogo?” Biiblã makda sũ-noog ning pag ne a sɩd sẽn lagemd taab sẽn paamdã ne bulg ko-maasg b sẽn yũuda. Dẽnd wagdem koomã makda yoob sẽn solge. (Yelbũna 5:15-17) B sẽn tõog n solg n yoodã yĩng kɩtame tɩ b tagsdẽ tɩ yaa noogo.

Zãmsg tõnd yĩnga:

1:10-14. D segd n gũusame n da bas tɩ yel-wẽn-maandbã belg-d tɩ d sã n naag bãmb n maan wẽnga d na n paama arzɛgs ye.

3:3. D segd n nanda nonglem la sɩd wʋsgo, la d wilgd rẽnda d manesmã pʋgẽ wa kĩndf sẽn tar yõod wʋsg ned sẽn pid a kokorẽ. D segd n kɩtame tɩ zʋg-sõma kãensã kẽe d sũurã sõma n yɩ vẽeneg d manesmã pʋgẽ.

4:18. Yaa bilf-bilf la d paam vẽenem ning sẽn yit Biiblã pʋgẽ wã. Sẽn na yɩl n pa vẽenemã pʋgẽ, d segd n ket n modgd n sikda d mens la d sakdẽ.

5:8. D segd n zãaga d mens ne bũmb ning fãa sẽn tõe n kɩt tɩ d yo. Wala makre, mizik kẽere, reem sãnda, d sẽn wat n kokd pemsmã, ẽntɛrnetã, sɛb la zʋrno rãmb kẽere.

5:21. Rẽ yĩnga ned sẽn nong a Zeova na sak n sãam zood ning a sẽn tar ne-a wã wakat bilf yõ-noogr yĩng sɩda? Abada! Bũmb ning sẽn kɩt tɩ d pa na n yo wã yaa d sẽn mi t’a Zeova nee d tʋʋmã, la t’a na n sok-d lame wã.

 6:1-5. D sã n dɩk sard ne ned n pa tõog n pidsi, wall d pʋlem tɩ d na n yao samd ned a to sẽn dɩ n pa tõoge, sagls nins sẽn be verse kãensã pʋsẽ wã tõe n sõng-d lame. D sã n maan vaeesg n mik tɩ d sẽn maan bũmb ningã pa sõma, d segd n bõosa a soabã t’a bas d taale, la d maan d sẽn tõe n fãa n maneg yellã.

6:16-19. Yel-kãensã b yopoeyã fãa yaa yel-wẽn toor-toor d segd n modg n kisgi.

6:20-24. B sã n zãms ned Biiblã hal a yãadmẽ, tõe n sõng-a lame t’a ra lʋɩ yoob pʋgẽ ye. Roagdbã segd n modg n zãmsa b kambã Biiblã n da maan yam-kaalg ye.

7:4. D segd n modg n nanda yam la bãngre.

YELBŨN A TAAB D SAGLG YĨNGA

(Yelbũna 10:1–29:27)

A Salomo yelbũn a taabã sẽn kellã yaa koees-koeese. B sẽn gʋls-b to-to wã kɩtame tɩ b taasd-d zãmsg sẽn yaa sõma wʋsgo. B kõt-d-la sagls d tʋʋmã, d no-goamã la d yel-manesmã wɛɛngẽ.

Sak 10 n tɩ tãag sak 24 wilgda Wẽnnaam zoees hakɩk yõodo. Yaa “Zida naab a Ezekɩas nebã” n gʋls Yelbũnã sak 24 soabã n tɩ tãag sak 29 soabã. (Yelbũna 25:1) Yelbũn-kãensã sagend-d lame tɩ d teeg a Zeova la b kõt sagls a taab sẽn tar yõodo.

Sogsg sẽn tik verse rãmb zut n paam leokre:

10:6—Wãn to la “nin-wẽng goam lut a zʋgo”? Nin-wẽng tõe n goma gom-nood sẽn na yɩl n solg wẽng ning a sẽn dat n maanã. Tõe t’a maanda woto a sẽn mi tɩ nebã kisa nin-wẽng wʋsgã yĩnga.

11:31—Bõe yĩng tɩ b segd n yao nin-wẽng tɩ yɩɩg nin-tɩrga? Zĩ-kãngã, yaoobã yaa sɩbgre. Nin-tɩrg sã n tudg n maan kɛgre, b na n kiblg-a lame tɩ rẽ yɩ yaood a kɛgrã yĩnga. La nin-wẽng maanda kɛgr ne yamleoogo, la a tõdgd n pa rat n maan sẽn yaa sõma ye. Rẽnd b segd n sɩbg-a lame tɩ rẽ yɩ a yaoodo.

12:23—Wãn to la ned solgd a bãngre? Woto pa rat n yeel tɩ nin-kãng pa wilgd t’a tara bãngr abada ye. A soab gũusdame bal n pa maand wilg-m-meng a bãngrã yĩng ye.

18:19, Sebr Sõngo—B sẽn yet tɩ ‘ma biig sẽn paam paoogr ka le tõe n ta, la t’a lebga tẽng sẽn tõe n zab n fãag a mengã’ võor yaa bõe? Walla tẽn-kãseng b sẽn deeg ne pãnga, nin-kãng buud tõe n tõdga sugr deegre. Mo-yõsr ning sẽn be yẽ ne a bɛɛgdã sʋkã tõe n lebga kɛgeng wa kʋɩleng sẽn pag tɩ b pa tõe n kẽ ye.

Zãmsg tõnd yĩnga:

10:11-14. Sẽn na yɩl tɩ d goamã kengd neb a taabã raoodo, d segd n pidsa d yamã ne bãngr hakɩkã la d nong nebã. Yaa yam kãng n segd n kɩt tɩ d bãngd goam nins d sẽn segd n gome.

10:19; 12:18; 13:3; 15:28; 17:28. D pa segd n gomd wʋsg ye, d segd n tagsdame n yaool n gomda.

11:1; 16:11; 20:10, 23. D sã n maanda  leebgo, a Zeova ratame tɩ d yɩ pʋ-peelem soaba.

11:4. Ned sã n bas a meng Biiblã zãmsgo, tigissã kẽngre, pʋʋsgã, la koe-noogã mooneg n pʋgd laogo, pa yam tʋʋmd ye.

13:4. D sã n tʋll n paam taoor-sobend tigingã pʋgẽ bɩ n wa n paam n vɩɩmd dũni paalgã pʋgẽ bala, pa sek ye. D segd n modg n pidsa bũmb nins sẽn yaa tɩlae ne rẽ paoongã me.

13:24; 29:15, 21. Roagd sẽn nong a biig pa põogd-a wall a mumd a nin a biigã pãn-komsem zug ye. A segd n kibind-a lame, sẽn na yɩl t’a pãn-komsmã ra kɩ yẽg ye.

14:10. D pa tõe n togsd bũmb nins sẽn be d sũur pʋgẽ wã wakat fãa, bɩ n togs bõn-kãens ned t’a wʋm b võor zãng ye. Rẽ kɩtame tɩ belsg ning nebã sẽn tõe n kõ-dã tar koaka. Wakat ninga d segd n teega a Zeova a ye bal n tõog n mao ne d zu-loees kẽere.

15:7. Ka-koaad pa rɩkd a ka-buud fãa n bʋd zĩ-yend ye. Tõnd me pa segd n togs ned bũmb nins d sẽn mi wã fãa wakat yɛng ye. Yam soab togsda a sẽn mi bilf-bilfu, la wakat ning rẽ sẽn segde.

15:15; 18:14. D sã n tar yam-sõngo na n sõng-d lame tɩ d paam sũ-noogo, baa zu-loees la sũ-sãams pʋsẽ.

17:24. D segd n bao n wʋma yɛlã võor n tõog n tʋm ne yam la d ra yɩ wa yalma, bala yalem nin la a tagsa yeebdame n pa yaas bũmb sẽn tar yõod zug ye.

23:6-8. D pa segd n deeg sãamb d zakẽ tɩ yaool n pa ta d yam ye.

27:21. B sã n pẽg-do, tõe n kɩtame tɩ d wilg d sẽn yaa ned ninga. Pẽgrã sã n kɩt tɩ d sak n deeg tɩ d ket n tara a Zeova samd la sõng-d tɩ d ket n dat n maand a raabã, wilgdame tɩ d yaa sik-m-meng soaba. La pẽgr sã n kɩtdẽ tɩ d tẽed tɩ d yɩɩda d taabã, wilgdame tɩ d pa sik-m-meng soab ye.

27:23-27. Bũmb ning b sẽn yet ka wã wilgdame tɩ d segd n nooga d sũur ne bũmb nins d sẽn tʋmd wʋsg n paamdẽ wã. Gom-kãensã segd n kɩtame tɩ d bãng tɩ d segd n teega Wẽnnaam. *

28:5. D sã n tũnug ne pʋʋsg la Biiblã zãmsg n bao a Zeova, d na n bãnga bũmb nins fãa d sẽn tog n maan n tõog n ta a yam.

KOEES SẼN TAR PÃNGA

(Yelbũna 30:1–31:31)

Yelbũn sebrã baasda ne koees a yi sẽn tar pãnga. (Yelbũna 30:1; 31:1) A Aguur dɩka makr sẽn kɩtd tɩ d tags n wilg tɩ tʋlsem sẽn loog noor pidsg yaa toogo, la wilgdẽ tɩ b pa tõe n bãng pʋg-roaad sẽn maand to-to n paamd pa-kulã ye. * A leb n keoog-d lame tɩ d gũus ne wuk-m-meng la sũ-puugri.

A Lemuɛll ma wã sẽn taas-a koɛɛg ning sẽn tar pãngã kõta sagls sẽn yaa sõma. Sagl-kãens keoogd-d-la ne rãamã la rã-toosã yũubu, la b wilgd b sẽn tog n kao bʋʋd tɩ yɩ tɩrg to-to. B sẽn bilg pʋg-sõng sẽn yaa to-to wã, b baasa ne gom-kãensã: “Waoog-a a tʋʋmda nafr yĩnga. La f bas t’a tʋʋma pẽg-a tẽnga pʋgẽ.”—Yelbũna 31:31.

Yelbũn sebrã sagend-d lame tɩ d bao yam, tɩ d sak kiblgu, la tɩ d zãms Wẽnnaam a Zeova zoeese, la d teeg-a. Ad sagl-kãensã sɩd tar yõod wʋsgo! Bɩ d maan d sẽn tõe fãa n tũ sagls nins sẽn be Yelbũn sebrã pʋgẽ wã la d paam sũ-noog ning ned ning sẽn zoet a Zeova sẽn tõe n paamã.—Yɩɩl Sõamyã 112:1.

[Tẽngr not rãmbã]

[Foto rãmba, seb-neng a 8]

Bãngr hakɩkã yita a Zeova nengẽ

[Foto, seb-neng 10]

Wãn to la d segd n wõneg ka-koaad d goamã pʋgẽ?