Y tõe n vɩɩmda wakat sẽn pa sate

DŨNIYÃ zugu, tẽedb wʋsg sẽn be tũudum pʋsẽ ratame n wa vɩɩmd wakat sẽn kõn sa. Vɩɩm sẽn pa satã sẽn na n yɩ to-to wã wɛɛngẽ, tũudmã fãa pa zãmsd nebã bõn yɛng ye, la tũudmã fãa pʋgẽ, nebã saagdame tɩ b na n wa tõog n vɩɩmda su-noog pʋgẽ n pa kiidẽ ye. Yaa woto la yãmb me rat bɩ? La bõe yĩng tɩ dũniyã gill zugu, neb wʋsg tẽed woto? Rẽ yĩnga, nebã na n sɩd wa tõog n vɩɩmda wakat sẽn ka sɛt bɩ?

Biiblã wilgdame tɩ yaa Naandã sẽn wa n naand pipi rao wã la a pagã wakat la a ning vɩɩm sẽn ka sɛtã tʋlsem ninsaalbã yamẽ. Biiblã yetame tɩ Wẽnnaam “ninga wakat sẽn ka sɛt tagsg ninsaal sũur pʋgẽ.”—Koɛɛg Soaba 3:11.

Sẽn na yɩl n paam vɩɩm sẽn pa sɛtã, pipi raoa la a pagã ra segd n sak n deegame tɩ yaa Wẽnnaam n segd n wilg-b sẽn yaa sõma la sẽn yaa wẽnga. B sã n da sɩd maan boto, a Zeova ra na n basame tɩ b kell n vɩɩmd “wakat fãa” Edɛn zẽedẽ wã, sẽn dat n yell tɩ zĩig ning a sẽn da maneg n kõ-bã.—Sɩngre 2:8; 3:22.

B konga vɩɩm sẽn pa satã

Biiblã wilgdame tɩ Wẽnnaam sela “wẽng ne sõama bãngr tɩɩg” Edɛn zẽedẽ wã, la a yeel a Ãdem ne a Hawa tɩ b ra rɩ tɩɩgã bil tɩ sã n pa rẽ b na n kɩɩme. (Sɩngre 2:9, 17) A Ãdem ne a Hawa sã n da pa rɩ tɩ-kãng bilã, ra na n kɩtame tɩ Wẽnnaam bãng tɩ b saka a zu-sobendã. La b sã n da rɩ tɩɩgã bila, ra na n wilgame tɩ b pa sak Wẽnnaam zu-sobendã ye. A Ãdem ne a Hawa kɩɩsa a Zeova noyã n sak a Sʋɩtãan sẽn yaa malɛk ning sẽn da zoe n tõdg Wẽnnaam zu-sobendã. Woto yĩnga, Wẽnnaam yeelame t’a Ãdem la a Hawa pa segd n vɩɩmd wakat sẽn ka sat ye.—Sɩngre 3:1-6.

Wẽnnaam ra kõ-b la sor tɩ b tõe n yãk vɩɩm wall kũum. B kɩɩsgã waa ne kũum, la b pa na n tol n vʋʋg ye. Tɩɩm ra kae sẽn da na n kɩt t’a Ãdem ne a Hawa la b yagensã kell n vɩɩmd n pa ki ye. B ra pa tar sɩɩg sẽn pa kiid me ye. *

A Ãdem sẽn kɩɩs Wẽnnaamã yĩnga, a yagensã fãa namsdame. Tʋm-tʋmd a Poll wilga a kɩɩsgã sẽn wa ne bũmb ninsã n yeel woto: “Rao a yembr n wa ne yel-wẽna dũniyã tɩ kũum wa yel-wẽna yĩnga. Rẽ n kɩt tɩ kũum yõkd neba fãa, fãa sẽn maand yel-wẽna yĩnga.”—Rom dãmba 5:12.

Ãdem-biisã tõe n wa paama vɩɩm sẽn pa satã

Tʋm-tʋmd a Poll maka a Ãdem yagensã vɩɩmã sẽn yaa to-to wã ne pipi kiris-nebã wakatẽ yembsã vɩɩm. A Ãdem ne a Hawa yel-wẽndã yĩnga, kamba b sẽn doga fãa yaa ‘yel-wẽndã yembse,’ la b kiidẽ. (Rom dãmba 5:12; 6:16, 17) La a Zeova sã n da pa maanẽ bũmb n na n fãag a Ãdem ne a Hawa kambã yel-wẽndã yemd pʋgẽ, bũmb baa a ye ra pa be n tõe n sõng-b tɩ b põs ye. A Poll yeela woto: “Wa beegr a yembr [a Ãdem beegrã] sẽn wa ne bʋʋd sẽn yaa toog neba fãa yĩngã, woto me, tɩrlem tʋʋmd a yembr waa ne zemsgo sẽn wat ne vɩɩm neba fãa yĩngã.” ‘Tɩrlem tʋʋm-kãngã’ yaa a Zezi sẽn dɩk a meng vɩɩma sẽn zems zãngã n kõ tɩ yɩ rond neba fãa yĩngã. A Zeova sak n deega rondã, t’a yɩ bũmb ning sẽn na n fãag ãdem biisã ne kũumã la yel-wẽndã yembdo.—Rom dãmba 5:16, 18, 19; 1 Tɩmote 2:5, 6.

Yaa rẽ n so tɩ bãngdbã pa tõe n ges ninsaal yĩngã pʋgẽ n bãng vɩɩm sẽn pa satã sẽn paamd to-to wã. Sã n yaa ne Biiblã, pa b sẽn naan ninsaal to-to wã n kɩt t’a kiidẽ ye, yaa a sẽn kɩɩs Wẽnnaam noyã tɩ Wẽnnaam kao a bʋʋdã yĩnga. A Zezi sẽn kõ a vɩɩmã tɩ yɩ rond tõnd  yĩngã yaa bũmb sẽn zems ne Wẽnnaam noyã, sẽn na n kɩt tɩ d paam vɩɩm sẽn pa satã. Ronda le wilgda Wẽnnaam tɩrlem la a nonglem ne ãdem-biisã. Sã n yaa woto, ãnd dãmb n na n dɩ rondã nafã la b paam vɩɩm sẽn ka satã?

Neb sẽn pa na n tol n le ki

Wẽnnaam a Zeova vɩya “wakat sẽn ka sɩngr tɩ ta wakat sẽn ka sɛɛbo.” A pa kiid ye. (Yɩɩl Sõamyã 90:2) Yaa a Zezi Kirist n yɩ pipi n paam t’a Zeova kɩt t’a pa na n tol n le ki ye. Tʋm-tʋmd a Poll wilgame tɩ: “Kirist vʋʋgame, la b ka na n le ki ye, la kũum ka le tar pãng ne bãmb ye.” (Rom dãmba 6:9) Sɩda, a Poll wilgame tɩ b sã n na n mak a Zezi sẽn vʋʋg n yaa rĩm masã wã ne tẽng zug nanambsã, yaa a Zezi a ye bal n pa na n tol n ki yɛs ye. A Zezi na n kell n vɩɩmda “wakat sẽn ka sɛt” yĩnga. A vɩɩmã yaa bũmb sẽn pa sãamde.—Hebre dãmba 7:15-17, 23-25; 1 Tɩmote 6:15, 16.

Pa a Zezi a ye bal n paam n pa na n le ki ye. Kiris-neb nins sẽn paam-b vʋʋsem sõngã zaeeb n na n tɩ vɩɩmd saasẽ n yi rĩm dãmbã me paamda a Zezi vʋʋgrã buudu. (Rom dãmba 6:5) Tʋm-tʋmd a Zã wilgame tɩ yaa neb 144000 la a Zeova kõ zu-no-kãngã. (Wilgri 14:1) Bãmb me pa na n tol n le ki ye. A Poll goma b vʋʋgrã yell n yeel woto: “Nemd ne zɩɩm ka tõe n paam Wẽnnaam soolem tɩ yɩ b pʋɩɩr ye . . . Baorg na peebe, la kũum na vʋʋg n paam yĩng sẽn ka põogd ye, la tõnd na n paama tedgre. Tɩ bõe, yaa tɩlae tɩ yĩn-kãng sẽn põogda tek ne yĩng sẽn ka põogd ye, la yĩn-kiidg kãng na tek ne yĩng sẽn ka kiid ye.” Neb nins sẽn paamd vʋʋg-kãngã wã pa na n le ki ye.—1 Korẽnt dãmba 15:50-53; Wilgri 20:6.

Vẽeneg-kãngã sẽn yit Wẽnnaam nengẽ wã tara yõod wʋsgo. Baa tõnd sẽn pa tõe n yã malɛgsã ne nifã, Wẽnnaam naan-b lame tɩ b tõe n ki. Yaa rẽ n so tɩ malɛgs nins sẽn sak n tũ a Sʋɩtãan n kɩɩs Wẽnnaamã na n paam sãoongo. (Matɩe 25:41) La neb nins sẽn na n dɩ naam ne a Zezi wã pa na n tol n le ki ye, tɩ rẽ wilgdẽ t’a Zeova tara bas-yard hakɩk ne bãmb rãmba, b kɩs-sɩdã yĩnga.

D sã n dɩk neb 144000 sõor n mak ne neb milyaar dãmb a taabã, yaa bilfu. Rẽ yĩnga, yaa neb 144000 bal n na n paam n vɩɩm wakat sẽn kõn sa bɩ? Ayo. Bɩ d ges bũmb ning sẽn kɩt tɩ d leokd woto wã.

Vɩɩm sẽn pa sat Arzãnã pʋgẽ tẽng zugu

Wilgr sebrã sẽn be Biiblã pʋgẽ wã wilgda neb kʋʋng sẽn paam zu-noog n na n vɩɩmd wakat sẽn pa sat arzãn pʋgẽ, tẽngã zugu. Neb nins sẽn ki tɩ Wẽnnaam na n vʋʋg-b tɩ b paam yĩns keelem la pãngã me na n paama zu-no-kãngã. (Wilgri 7:9; 20:12, 13; 21:3, 4) B tall-b lame n tɩ wilg ‘vɩɩm koom kʋɩlg sẽn pɩnd wa vɛɛr n yit Wẽnnaam geerẽ’ wã. Kʋɩlgã noore, ‘vɩɩm tɩɩs n yas be . . . la b vãad yaa neb buud fãa bãas tɩɩm.’ Wẽnnaam a Zeova kãab-b-la koomã n yeel woto: “Ko-yũud sẽn tar a soaba, bɩ a wa. La ned ninga sẽn data, bɩ a reeg vɩɩm koom zaalem.”—Wilgri 22:1, 2, 17.

Tɩ-kãensã ne ko-kãensã pa tɩ-koom buud sẽn kɩtd tɩ ned pa kiidẽ ye. Leb n pa kʋɩlg koom ned sẽn tõe n yũ tɩ kɩt t’a pa kʋʋle, wa bãngdb kẽer sẽn da tagsd to-to wã ye. A makda segls nins Wẽnnaam sẽn maan ne a Zezi maasem n na n kɩt tɩ ãdem-biisã leb n paam vɩɩm sẽn zems zãng wa sɩngrẽ wã.

Wẽnnaam ket n datame tɩ nin-sakdbã paam vɩɩm sẽn ka satã tẽng zugu. Rẽ na n pidsame, bala a Zeova yaa kɩs-sɩd soaba. Yɩɩl Sõamyã 37:29 yetame tɩ: “Nin-tɩrs na n sooga dũniyã la bãmb na n zĩnda a zug wakat sẽn ka sɛta.” A Zeova sẽn pʋlem bũmb ningã kɩtdame tɩ tõnd ne neb nins sẽn na n tɩ vɩɩmd saasẽ n pa na n tol n ki wã yet woto: “Zusoaba Wẽnnaam Sẽn-tõe-fãa wã, yãmb tʋʋma yaa kãsemse, la b seka yɛɛsgo. Buud fãa Rĩma, yãmb sẽn maanda fãa yaa tɩrga la sɩda. Zusoaba, ãnda n ka na n zoe yãmba la a waoog yãmb yʋʋre? Tɩ bõe, yãmb bal n yaa sõngo.”—Wilgri 15:3, 4.

Rẽ yĩnga yãmb rata vɩɩm sẽn ka satã bɩ? Y sã n sɩd rat vɩɩm sẽn pa satã, y segd n yɩɩ kɩs-sɩd soaba, la y sak a Zeova sẽn yaa wakat fãa Rĩmã. Y segd n bao n bãnga a Zeova sõma, la a Zezi Kirist sẽn yaa ned ning sẽn kɩt tɩ d tõe n paam vɩɩm sẽn ka sɛtã. Neb nins fãa sẽn sakd n tũud ne Wẽnnaam noyã sẽn wilgd tõnd sõma la wẽng n bakdẽ wã na n paama “vɩɩm sẽn ka sɛta.”—Zã 17:3.

[Tẽngr note]