A Zeova sõngda neb nins sũy sẽn sãamã
A Zeova sõngda neb nins sũy sẽn sãamã
“Nin-tɩrg paamda tood wʋsgo, la Zusoaba yiisda yẽnda bãmb fãa pʋgẽ.”—YƖƖL SÕAMYÃ 34:20.
1, 2. Yel-bʋg n paam kiris-ned a yembre, la bõe yĩng tɩ yel-kãngã buud tõe n paam d fãa?
A KEIKO * yaa pʋg-bɩɩg sẽn yaa a Zeova Kaset soab sẽn na maan yʋʋm 20 la zaka. A yɩɩ wakat fãa so-pakd yʋʋm a wãna, sẽn dat n yeel t’a ra moonda Rĩungã koɛɛg wakat fãa. A ra nonga tʋʋm-kãng hal wʋsgo. La sẽn nan pa kaoose, a Keiko sɩngame n tagsdẽ t’a yaa a yembr tɩ tɩɩm kaẽ, tɩ sãamd a sũur wʋsgo. A yeelame tɩ yẽ ra yãbda wakat fãa. Sẽn na yɩl t’a sũ-sãamsã sa, a Keiko paasa sẽk ning a sẽn da rɩkd n zãmsd Biiblã. La ad a sẽn yeele: “Baasg zãnga, mam sũ-sãamsã pa boog ye. A pʋd n yãng n paasame, hal n kɩt tɩ m wa tagsdẽ tɩ m sẽn kiid n são.”
2 Yãmb me sũur zoe n sãamame hal tɩ ta woto bɩ? Tõnd sẽn yaa a Zeova Kaset rãmbã, d tara bʋʋm wʋsg n na n kɩdme, bala wẽn-sakrã “bee yõod ne vɩɩm ninga sẽn be masã wã, la vɩɩm ninga sẽn watã.” (1 Tɩmote 4:8) Masã menga, tõnd vɩɩ tẽeb arzãn pʋgẽ! La rẽ yĩnga rat n yeelame tɩ sũ-sãams buud baa a ye pa tõe n paam-d bɩ? Ayo! Biiblã yetame tɩ “nin-tɩrg paamda tood wʋsgo.” (Yɩɩl Sõamyã 34:20) Woto pa ling tõnd ye, bala “dũniyã fãa bee wẽng soab [a Sʋɩtãan] nugẽ.” (1 Zã 5:19) Sẽn yaa to-to ning fãa, tõnd ned kam fãa zoe n paama sũ-sãanga, dũni kãngã sẽn be a Sʋɩtãan nugẽ wã yĩnga.—Efɛɛz rãmba 6:12.
Sũ-sãamsã sẽn tõe n wa ne yɛl ninsi
3. Togs-y kibay sẽn be Biiblã pʋgẽ n wilgd Wẽnnaam sõgen dãmb sẽn paam sũ-sãams wʋsgo.
3 Sũ-sãams sẽn kaoosd tõe n wa kɩtame tɩ d tagsd tags-kɛga. (Yelbũna 15:15) D ges nin-tɩrg a Zoob makrã. A Zoob toogã sẽn wa n lebg wʋsgã, a yeela woto: “Ninsaal pag sẽn dogã vɩɩm yaa koɛɛg la toogo.” (Zoob 14:1) A Zoob sũ-noogã ra menemame. Wakat n wa n zĩnd meng t’a tags t’a Zeova bas-a lame. (Zoob 29:1-5) Pa a Zoob a ye bal n paam sũ-sãams wʋsg ye. Wẽnnaam sõgen dãmb a taab me paama sũ-sãamse. Biiblã yetame t’a Ana sẽn da pa tõe n paam biigã yĩnga, a “sũura sãamame.” (1 Sãmwɛll 1:9-11) A Rebeka zakã zu-loees wa n kɩtame t’a yeel t’a ‘yam yii ne a vɩɩmã.’ (Sɩngre 27:46) A Davɩɩd sẽn da wa n tagsd a yel-wẽnã yell wʋsgã, a yeela woto: “Daar fãa mam kẽnda ne sũ-sãoong wa m ned n ki.” (Yɩɩl Sõamyã 38:7) Woto yaa kibay a wãn bal sẽn wilgd vẽeneg tɩ rap la pagb sẽn da yaa wẽn-zoɛtb pĩnd wẽndẽ wã me ra paama sũ-sãams hal wʋsgo.
4. Bõe yĩng tɩ kiris-neb kẽer sẽn paamd sũ-sãams wʋsg rũndã-rũndã wã pa ling tõndo?
4 La kiris-nebã yẽ? Tʋm-tʋmd a Poll wa n yãame tɩ yaa tɩlae t’a yeel Tesalonik kiris-nebã tɩ b “bels sũ-sãoong rãmbã.” (1 Tesalonik rãmba 5:14) A Poll goamã wilgdame tɩ Tesalonik kiris-neb kẽer sẽn da paam vʋʋsem sõngã zaeeb sũy ra sãama wʋsgo. Rũndã-rũndã me, kiris-neb kẽer sũy sãamame. La bõe yĩng tɩ b tar sũ-sãamse? Bɩ d ges yɛl a tãab sẽn nong n wat ne sũ-sãamse.
Tõnd sẽn pa zems zãngã tõe n sãama d sũuri
5, 6. Goam nins sẽn be Rom dãmb 7:22-25 wã kõta tõnd bels-bʋgo?
5 Kiris-neb hakɩkã pa wõnd neb nins “wẽng fãa sẽn ka le sãamd b sũyã” ye. B sẽn pa zems zãngã sãamda b sũyã. (Efɛɛz rãmba 4:19) B tõe n wa tagsda wa a Polle. A gʋlsa woto: “Mam nonga Wẽnnaam tõog hal ne m sũur fãa. La mam yãta tõog a to mam yĩnga wila pʋgẽ sẽn maood ne mam pʋ-tẽer tõogo, la sẽn kẽesd maam yel-wẽnã tõog yembd pʋgẽ sẽn be mam yĩnga wila pʋsẽ.” Woto kɩtame t’a Poll yeele: “Mam yaa nimbãan ned bala.”—Rom dãmba 7:22-24.
6 Yãmb me zoe n tagsa wa a Poll bɩ? Tõnd sẽn mi tɩ d yaa neb sẽn pa zems zãngã, pa wẽng ye, bala rẽ tõe n kɩtame tɩ d ra tol n yĩm tɩ yel-wẽnã maaneg pa sõma, la kɩt tɩ d tʋlg n ket n lakd d mens ne wẽngã. La pa tar yõod tɩ d sã n wa maan sẽn pa segd bɩ d kell n sãam d sũur wakat fãa rẽ yĩng ye. A Poll sẽn togs goam nins sẽn wilgd a sũ-sãamsã poore, a paasa woto: “Bark Wẽnnaam tõnd Zusoab a Zezi Kirist maasem yĩnga.” (Rom dãmba 7:25) Vẽenega, a Poll ra kɩsa sɩd t’a Zezi zɩɩmã sẽn daagã tõe n fãag-a-la ne yel-wẽndã a sẽn dog ne wã.—Rom dãmba 5:18.
7. Bõe n tõe n sõng ned t’a ra wa bas t’a sũur sãam wʋsg a sẽn pa zems zãngã yĩnga?
7 Y sũur sã n sãam wʋsg y sẽn yaa yel-wẽn-maandã yĩnga, bɩ y bãng tɩ tʋm-tʋmd a Zã sẽn yeel bũmb ningã tõe n bels-y lame. A yeela woto: “Ned sã n maan yel-wẽna, tõnd tara sɛ-yõkda sẽn be tõnd Ba taoore, bãmb yaa a Zezi Kirist sẽn yaa tɩrlem soabã. Bãmb menga yɩɩ maoong tõnd yel-wẽnã yĩnga, ka tõnd yel-wẽnã yĩng bal ye, la dũniyã neba fãa yel-wẽnã yĩng me.” (1 Zã 2:1, 2) Yãmb sũurã sã n sãam y sẽn pa zems zãngã yĩnga, bɩ y tẽeg t’a Zezi kii yel-wẽn-maandbã yĩnga, la pa neb sẽn zems zãng yĩng ye. Vẽenega, neba ‘fãa maana yel-wẽna n kong Wẽnnaam waoogre.’—Rom dãmba 3:23.
8, 9. Bõe yĩng tɩ d pa segd n ning d mens taale?
8 La sã n mik tɩ yãmb ra maana yel-wẽn-kãseng pĩnda? Yaa vẽeneg tɩ y zoe n pʋʋsa a Zeova n togs-a yellã, la tõe tɩ y pʋʋsa naoor wʋsg menga. Sẽn paase, y paama tigingã kãsem dãmb sõngre. (Zak 5:14, 15) Y sɩd teka yam n kos sugr tɩ kɩt tɩ y ket n yaa tigingã neda. Tõeeme me tɩ y ra basa a Zeova siglgã, tɩ kaoosg poore y tek yam n kos sugr n lebg n wa, tɩ b ye reeg-yã. Sẽn yaa a soab fãa, tõe tɩ wakat-wakate, y pĩnd yel-wẽndã mi n lebgd n wata y yamẽ, tɩ namsd-y-yã. Sã n wa yaa woto, bɩ y tẽeg t’a Zeova kõta neb nins sẽn sɩd tekd yamã ‘sugr wʋsgo.’ (Ezai 55:7) Sẽn paase, a pa rat tɩ y wa tags tɩ yãmb nengẽ wã yẽ, sẽn maand kae yɛs ye. Yaa a Sʋɩtãan n dat tɩ y tags woto. (2 Korẽnt dãmba 2:7, 10, 11) B na n sãama a Sʋɩtãana, bala a segda ne rẽ. A ratame tɩ y tags tɩ yãmb me segda ne sãoongo. (Wilgri 20:10) Da bas-y t’a Sʋɩtãan tõog n sãam y tẽebã ye. (Efɛɛz rãmba 6:11) Zãgs-y-yã-a fasɩ wa y sẽn zoe n zãgsd-a yɛl a taab pʋsẽ wã.—1 Pɩɛɛr 5:9.
9 Wilgr 12:10 pʋgẽ, Biiblã boonda a Sʋɩtãan tɩ “tõnd ba-biisa rõata,” sẽn dat n yeel t’a rõta kiris-neb nins sẽn paam vʋʋsem sõng zaeebã. A rõt-b-la Wẽnnaam taoor ‘wĩntoog ne yʋngo.’ D sã n tags verse kãngã zug neere, na n sõng-d lame tɩ d bãng tɩ tõnd sã n ningd d mens taal la d kaood d mens bʋʋd t’a Zeova yaool n pa kao d bʋʋdo, a Sʋɩtãan sẽn yaa rõtã sũur noomame. (1 Zã 3:19-22) Bõe yĩng tɩ y na n ket n sidgd y yel-wẽnã yĩng hal n wa rat n bas Wẽnnaam? Da bas-y t’a Sʋɩtãan sãam y zoodã ne Wẽnnaam ye. Da tol-y n bas-y t’a Sʋɩtãan lud y yamã tɩ y wa yĩm t’a Zeova yaa ‘nimbãan-zoɛt la bark kõata, t’a sũur ka yikd tao-tao, la t’a nonglmã yaa wʋsg’ ye.—Yikri 34:6.
Tõnd sã n wa pa ye tõe n maan wa pĩndã, tõe n sãama d sũuri
10. Tõnd sã n pa le tõe n maan wa pĩndã, wãn to la rẽ tõe n koms d raoodo?
10 Kiris-neb kẽer sẽn pa ye tõe n tʋm Wẽnnaam tʋʋmdã wa pĩndã komsda raoodo. Rẽ yĩnga yãmb me yaa woto bɩ? Tõeeme tɩ yaa bã-kɛgenga, kʋʋlem bɩ yɛl a taab n kɩt tɩ yãmb pa le tõe n moon koe-noogã wʋsg wa pĩndã. Yaa sɩd tɩ b sagenda kiris-nebã tɩ b bao sẽk Wẽnnaam tʋʋmdã yĩnga. (Efɛɛz rãmba 5:15, 16) La bõe la y tõe n maane, sã n wa mik tɩ yɛl n sɩd gɩdgd yãmb tɩ y pa tõe n tʋm n paas koe-moonegã pʋgẽ tɩ komsd y raoodo?
11. Wãn to la a Poll saglg ning sẽn be Galat dãmb 6:4 pʋgẽ wã tõe n sõng tõndo?
11 Biiblã sagenda tõnd tɩ d ra yɩ kʋɩɩmb ye, la tɩ d “modg n yɩ neb nins sẽn paam kãabgo, tẽeb ne sũ-mar yĩnga togs-n-taase.” (Hebre dãmba 6:12) Yaa tõnd sẽn na n maag d yĩng n ges nin-kãensã mak-sõngã la d mogd n tall tẽeb wa bãmba bal la d na n tõog n dɩk b togs-n-taare. La tõnd sã n makd d mens ne neb a taabã n tagsdẽ tɩ tõnd sẽn maand a soab fãa pa seke, pa na n sõng-d ye. Rẽ n so tɩ d segd n tũ a Poll saglgã. A sagla woto: “Bɩ ned kam fãa mak a meng tʋʋma, dẽ, yẽ na yaool n maan sũ-noog a meng yĩng bala, la ka ne ned a to ye.”—Galat dãmba 6:4.
12. Bõe yĩng tɩ tõnd sẽn tʋmd a Zeova tʋʋmdã, d tõe n kɩdme?
12 Baa bã-kɛgeng sã n wa tar kiris-ned t’a pa tõe n le maan wa pĩndã, a tara bʋʋm n na n kɩdme. Biiblã kõta tõnd bas-m-yam tɩ “Wẽnnaam yaa tɩrga, la bãmb kõn yĩm yãmb tʋʋmdã ne y nonglmã yãmb sẽn wilg bãmb yʋʋra yĩnga” ye. (Hebre dãmba 6:10) Tõe tɩ yaa yɛl sẽn yɩɩd y pãng n kɩt tɩ y pa le tõe n maan a Zeova tʋʋmdã wa pĩndã. La ne a Zeova sõngre, tõe tɩ y tõog n tʋm sõma koe-moonegã nens a taab pʋsẽ, wala moon koɛɛgã ne telefõnnã la ne lɛta wã maasem. Bas-y y yam t’a Zeova na n ning-y-la barka, y sẽn tʋmd ne y sũur fãa la y wilgd tɩ y nong-a lame la tɩ y nonga y taabã yĩnga.—Matɩe 22:36-40.
Masã sẽn yaa toog wakatã tõe n komsa d raoodo
13, 14. a) Wãn to la masã sẽn yaa ‘toog wakatã’ tõe n sãam d sũuri? b) Rũndã-rũndã, bõe n wilgd vẽeneg tɩ nebã pa le nong taaba?
13 Baa ne tõnd sẽn gũud n na n wa vɩɩmd Wẽnnaam dũni paalgã pʋgẽ tɩrlem sẽn na n zĩndẽ wã, nananda d vɩɩ toog wakate. (2 Tɩmote 3:1) Tõnd sẽn mi tɩ yel-beed nins sẽn maand dũniyã pʋgẽ wã wilgdame tɩ tõnd fãagrã kolgdame wã kengda d raoodo. Baasg zãnga, vɩɩmã yɛl sẽn yaa to-to wã sãamda d sũur wʋsgo. Wala makre, tõe tɩ yãmb tʋʋmã sãamame, tɩ yɩl n paam tʋʋm yaa toogo. Sã n wa be-n-beẽ, tõe tɩ y sok y meng n ges a Zeova sã n nee yãmb farã la a sã n wʋmda yãmb sẽn pʋʋsd-a wã. Bɩ tõe tɩ nebã bak-y lame n pa nongẽ, bɩ b wẽgd-y lame. Baa zʋrno rãmbã gom-zut kareng meng tõe n kɩtame tɩ y yɩ wa nin-tɩrg a Lot sẽn da ‘sidgd wʋsg’ a wakatẽ nebã tʋʋm wẽnsã yĩnga.—2 Pɩɛɛr 2:7.
14 Bũmb a ye sẽn da segd n zĩnd yaoolem wakatã yell me la d pa segd n yĩmi. Biiblã da pĩnd n togsame tɩ neb wʋsg ra ‘ka na n tall nimbãan-zoeer’ ye. (2 Tɩmote 3:3) Zags wʋsg pʋsẽ, nebã pa le nong taab baa bilf ye. Sɩd me, sebr a ye (La violence au foyer [ãngil.]) wilgame tɩ kaset beeme n wilgdẽ tɩ f zak ned meng tõe n wẽneg n nams-f lame, n pogl-fo, n yõg-fo, bɩ n kʋ-f menga, n yɩɩd kɛɛng ned sẽn tõe n maan-fo. Sebrã paasame tɩ yaa zakã pʋgẽ la ned kam fãa segd n paam koglg la a paam tɩ b nong-a, la bʋko, kãsemb la kamb kẽer mikame tɩ wẽneg n yaa be la b yãt zu-loees n yɩɩda. Neb nins sẽn vɩɩmd zags sẽn da pa tar bãan pʋgẽ wã tõe n wa komsa raood kaoosg zugẽ, tɩ b sũy sãam wʋsgo. La sã n mik tɩ y tara zu-loe-kãngã buudu, bõe n tõe n sõng-yã?
15. Bõe n wilgd t’a Zeova sẽn nong tõndã yɩɩda ninsaal sẽn tõe n nong tõndo?
15 Yɩɩl gʋlsd a Davɩɩd ra gʋlsa woto: “Mam ba ne m ma sã n bas maam, Zusoaba na n deega maam.” (Yɩɩl Sõamyã 27:10) D sẽn mi t’a Zeova nonga tõnd n yɩɩd d roagdbã sẽn nong-dã sɩd kengda d raoodo! Baa tõnd roagd sã n bas-d bɩ a sã n nams tõnd tɩ zabd-d wʋsgo, rẽ pa tõe n kɩt t’a Zeova pa ges tõnd yell sõma ye. (Rom dãmba 8:38, 39) Ning-y y yamẽ tɩ Wẽnnaam boonda neb nins a sẽn nongã tɩ b wat a nengẽ. (Zã 3:16; 6:44) Baa nebã sẽn maan yãmb bũmb ning fãa, y saasẽ Ba wã nong-y lame!
D sẽn tõe n mao ne sũ-sãamsã to-to
16, 17. Ned sũur sã n wa sãam wʋsgo, bõe la a tõe n maan n kell n tall a tẽebã?
16 Yɛl kẽer n be y sẽn tõe n maan n tõog n mao ne sũ-sãamsã. Wala makre, kẽes-y y meng sõma kiris-ned tʋʋmã pʋgẽ. Bʋgs-y Wẽnnaam Gomdã zugu, sẽn tɩ yɩɩd fãa sã n wa wõnd y sũ-sãamsã paamda pãnga. Yɩɩl gʋlsda gʋlsa woto: “Zusoaba, mam sã n yeel tɩ mam naoora lakdame, yãmb nonglmã sẽn ka tekdã kogenda maam. Wakat ninga tagsg sẽn yaa toog sẽn yaa wʋsg ne maama, yãmb belsgã kõta maam sũ-noogo.” (Yɩɩl Sõamyã 94:18, 19) Y sã n karemd Biiblã wakat fãa, y na n yãa tagsa sẽn na n bels-y la keng y raoodo.
17 Pʋʋsgã me tara yõod wʋsgo. Baa yãmb sã n pa tõe n wilg y sũ-sãangã sẽn ta zĩig ning y pʋʋsgã pʋgẽ, a Zeova mii y sẽn dat n togs bũmb ningã. (Rom dãmba 8:26, 27) Yɩɩl gʋlsdã gʋlsa goam sẽn kõt bas-m-yam. A gʋlsa woto: “Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.”—Yɩɩl Sõamyã 55:23.
18. Zug bãas sã n kɩt tɩ ned tar sũ-sãamse, bõe ne bõe la a tõe n maane?
18 Neb kẽer nengẽ, yaa zug bãas n kɩt tɩ b tar sũ-sãamse. * Sã n mik tɩ yãmb nengẽ wã yaa woto, bɩ y modg n tags Wẽnnaam dũni paalgã sẽn watã yelle, la y tags sasa ning ‘ned baa a ye sẽn ka na n le yeel t’a ka laafɩ’ wã me yelle. (Ezai 33:24) La yãmb sũurã sã n nong n sãamda tao-tao zaalem yĩnga, tõe tɩ sẽn são yaa y sẽn na n tɩ yã logtore. (Matɩe 9:12) Leb n tara yõod tɩ y ges y yĩngã me yelle. Rɩt-y sõma la y wɩsgd y yĩnsã, tɩ rẽ tõe n sõng-y lame. Rɩkd-y sẽk wʋsg n vʋʋsdẽ tɩ sekdẽ. Ra get-y televiziõ wã n zʋʋgd zĩig ye. Ra nong-y n deemd-y reem sẽn tõe n kõ-y yaams ye. Sẽn tɩ yɩɩd fãa, ket-y n tʋmd-y tʋʋm sẽn tat Wẽnnaam yam! Baa ne wakat ning a Zeova sẽn na n ‘yẽes nintãmã fãa’ wã sẽn nan pa ta wã, a na n sõng-y lame tɩ y tõog n mao.—Wilgri 21:4; 1 Korẽnt dãmba 10:13.
Tõnd bee “Wẽnnaam sẽn yaa pãng soabã” nugẽ
19. Bõe la a Zeova kãab sũ-sãams rãmbã?
19 Biiblã kõta tõnd bas-m-yam tɩ baa nin-tɩrg sẽn paamd zu-loees wʋsgã, Wẽnnaam “yiisda yẽnda bãmb fãa pʋgẽ.” (Yɩɩl Sõamyã 34:20) Wãn to la Wẽnnaam maand rẽ? Tʋm-tʋmd a Poll sẽn pʋʋs naoor wʋsg sẽn na yɩl t’a ‘yĩng gõaagã’ yi n bas-a wã, a Zeova yeel-a-la woto: “Yaa pãn-komsem pʋgẽ la ned bãngd mam pãnga.” (2 Korẽnt dãmba 12:7-9) Bõe la a Zeova yeel a Polle, la bõe me la a yet tõndo? A pa yeel t’a na n yols-d-la zĩig pʋgẽ ye, a kãabame t’a na n kõ-d-la pãng tɩ d tõog toogo.
20. Baa tõnd zu-loeesã sẽn yaa to-to, bas-m-yam bʋg la b kõt tõnd 1 Pɩɛɛr 5:6, 7 pʋgẽ?
20 Tʋm-tʋmd a Pɩɛɛr gʋlsa woto: “Bɩ y sik yãmb mens Wẽnnaam sẽn yaa pãng soabã taoore, tɩ wakat sã n ta bãmb na zẽk yãmba. Bɩ y bas yãmb yɩɩra fãa ne bãmba; tɩ bõe, bãmb menga geta yãmb yelle.” (1 Pɩɛɛr 5:6, 7) A Zeova sẽn get tõnd yellã yĩnga, a pa na n bas-d ye. Tõnd zu-loeesã sẽn yaa a soab fãa, a na n sõnga tõndo. Ning-y y yamẽ tɩ kiris-neb nins sẽn yaa wẽn-sakdbã bee “Wẽnnaam sẽn yaa pãng soabã” nugẽ. D sẽn tũud a Zeova wã yĩnga, a kõt-d-la pãng tɩ d tõogd toogo. Tõnd sã n kell n sak-a fãa, bũmb ka be n tõe n sãam tõnd tẽebã wakat fãa yĩng ye. Bɩ d kell n sak-a, tɩ woto la d na n wa tõog n vɩɩmd wakat sẽn-kõn-sã dũni paalg ning a sẽn kãabã pʋgẽ, la d tõog n yã a sẽn na n sɩd wa sõng sũ-sãams rãmbã wakat fãa yĩngã!
[Tẽngr not rãmbã]
^ sull 1 Pa a yʋʋrã meng la woto ye.
^ sull 18 Zug bãas sẽn wat ne sũ-sãang ningã yɩɩda raood komsg sẽn wat ne a soabã. Yaa sũ-sãang wʋsg sẽn tõt saabo. Y sã n dat kibay a taab n paas rẽ wɛɛngẽ, bɩ y ges yʋʋmd 1988, zĩ-likr kiuug rasem 15 Gũusg Gasgã, seb-neng 25-9, yʋʋmd 1988, sɩpaolg kiuug rasem 15 Gũusg Gasgã, seb-neng 21-4, la yʋʋmd 1996, bõn-bɩʋʋng kiuug 1 daar Gũusg Gasgã, seb-neng 30-1.
Y tẽrame bɩ?
• Bõe yĩng t’a Zeova sõgen dãmbã me paamd sũ-sãamse?
• Yel-bʋs n tõe n kõ Wẽnnaam nin-buiidã kẽer sũ-sãamse?
• Wãn to la a Zeova sõngd tõnd tɩ d tõogd n maood ne sũ-sãamsã?
• Wãn to la tõnd be “Wẽnnaam sẽn tar pãngã” nugẽ?
[Zãmsgã sogsgã]
[Foto rãmba, seb-neng 18]
Baa ne zu-loeesã, a Zeova nin-buiidã tara bʋʋm n na n kɩdme