Tɩrlmã baoob na n kogl-d lame
Tɩrlmã baoob na n kogl-d lame
“Bɩ y reng n bao Wẽnnaam . . . tɩrlem.”—MATƖE 6:33.
1, 2. Yam-yãkr bʋg la pʋg-bɩɩg a ye sẽn yaa kiris-ned maan-yã, la bõe yĩng t’a maan woto?
AZI, pʋg-bɩɩg sẽn yaa kiris-ned n da kẽnd n tʋmd goosneema wã biru a ye pʋgẽ. A ra yaa sekretɛɛre. A ra wɩngda ne a tʋʋmdã sõma la a wat pĩnda. La sẽn mik tɩ b ra nan pa rɩk-a tʋʋmã yĩnga, tʋʋmdã taoor soab yeel-a lame t’a sã n dat tɩ b rɩk-a tʋʋm wakat fãa yĩngã, la b paas a naam menga, tõeeme, la yaa a sẽn na n sak n yo ne yẽ. La pʋg-bɩɩgã zãgsa fasɩ, baa ne rẽ sẽn da tõe n kɩt t’a tʋʋmã sãama.
2 Pʋg-kãngã sẽn maanã yaa bũmb sẽn pa zems bɩ? Ayo, a tũu a Zezi zãms-kãngã neere: “Bɩ y reng n bao Wẽnnaam . . . tɩrlem.” (Matɩe 6:33) Sã n yaa ne yẽ, no-tɩrsã tũub yõod ra yɩɩda yoobã sẽn da na n kɩt t’a paam bũmb ningã zĩig sẽn zãre.—1 Korẽnt dãmba 6:18.
Tɩrlmã yõodo
3. Tɩrlem yaa bõe?
3 ‘Tɩrlem’ baoodame tɩ d tall burkĩnd la pʋ-peelem. Biiblã pʋgẽ, Gɛrk la Hebre gom-biis nins b sẽn lebg tɩ tɩrlmã tara loees ne ‘sẽn zemse,’ bɩ ‘sẽn pa kɛgre.’ Pa f sẽn na n tik f meng noy zut n yeel tɩ f yaa nin-tɩrg ye. (Luk 16:15) Yaa tɩrlem sẽn zems ne a Zeova noyã. Yaa Wẽnnaam tɩrlmã.—Rom dãmba 1:17; 3:21.
4. Bõe yĩng tɩ tɩrlmã tar yõod ne kiris-neda?
4 Bõe yĩng tɩ tɩrlem tar yõodo? Bala, a Zeova sẽn yaa ‘tɩrlem Wẽnnaamã’ barkda a nin-buiidã, b sẽn tũud tɩrlmã yĩnga. (Yɩɩl Sõamyã 4:2; Yelbũna 2:20-22; Habakuk 1:13) Ned ning fãa sẽn maand kɛgr pa tõe n tall zems-n-taar ne Wẽnnaam ye. (Yelbũna 15:8) Yaa rẽ yĩng la tʋm-tʋmd a Poll sẽn sagl a Tɩmote woto wã: “Lak ne yãadem datem wẽnga, la f bao tɩrlem,” ne zʋg-sõma a taab sẽn yaa tɩlae. (2 Tɩmote 2:22) Yaa woto yĩng me n kɩt t’a Poll sẽn wa n sõdgd tẽebã zab-teed buud toor-toorã, a paas ‘tɩrlem sẽn yaa gãntikã.’—Efɛɛz rãmba 6:14.
5. Wãn to la neb sẽn pa zems zãng tõe n bao tɩrlem?
5 Yaa sɩda, ninsaal baa a yembr pa tɩrg zãng-zãng ye. Nebã fãa rogda ne yel-wẽnã sẽn yit a Ãdem nengẽ wã, rẽ n so tɩ nebã fãa yaa yel-wẽn-maandba. La a Zezi yeelame tɩ d segd n baoa tɩrlem. Wãn to la rẽ tõeyã? Tõeeme, bala a Zezi kõo a vɩɩmã sẽn zems zãngã tɩ yɩ rond tõnd yĩnga, la tõnd sã n wilg d tẽeb ne maoong kãngã, a Zeova sakdame n kõ d yel-wẽnã sugri. (Matɩe 20:28; Zã 3:16; Rom dãmba 5:8, 9, 12, 18) D sã n tẽ woto, n zãms a Zeova no-tɩrsã la d modg n tũ-ba, n pʋʋsd n kot a sõngr sẽn na yɩl n tõog d pãn-komsmã, a Zeova sakda d balengã. (Yɩɩl Sõamyã 1:6; Rom dãmba 7:19-25; Wilgri 7:9, 14) Ad woto sɩd kengda pɛlga!
D yɩ tɩrse, dũni sẽn pa tɩrg pʋgẽ
6. Bõe yĩng tɩ dũniyã ra yaa yell ne pipi kiris-nebã?
6 A Zezi sẽn da wa n bobl a karen-biisã tʋʋmd ning sẽn yaa yɩ a kaset rãmb “dũniyã tɛk fãa” wã, b sɛga zu-loɛɛga. (Tʋʋma 1:8) Zĩig ning fãa b sẽn kõ-b tɩ b moona ra “bee wẽng soab [a Sʋɩtãan] nugẽ.” (1 Zã 5:19) Dũniyã ra pida ne wẽngã tʋlsem a Sʋɩtãan sẽn da tusd nebã tɩ b tallã, tɩ tʋlsem kãng ra tõe n bẽeg kiris-nebã. (Efɛɛz rãmba 2:2) Dũniyã ra yaa yell ne bãmba. Ra yaa b sẽn na n bao Wẽnnaam tɩrlmã bal la b ra na n tõog n kell n tall b burkĩndã. Pipi kiris-neb wʋsg sɩd tõog n talla b burkĩndã, la neb kẽer n bas ‘tɩrlmã sore.’—Yelbũna 12:28; 2 Tɩmote 4:10.
7. No-bʋg la kiris-nebã segd n tũ tɩ kɩt tɩ b segd n kɩɩs yɛl nins sẽn tõe n kʋɩɩb-bã?
7 Dũniyã yaa zĩig sẽn ka yell ne kiris-nebã rũndã-rũndã bɩ? Ayo! Dũniyã wẽnem yɩɩda a sẽn da yaa to-to pipi kiris-nebã zãmaanẽ wã menga. Sẽn paase, b riga a Sʋɩtãan t’a sig tẽngã zugu, t’a zabd zab-toaag ne kiris-neb nins sẽn paam vʋʋsem sõng zaeebã, sẽn yaa “paga yagensa sẽn kellã la sẽn sakd Wẽnnaam noore la sẽn tar a Zezi kasetã.” (Wilgri 12:12, 17) A Sʋɩtãan zabda ne neb nins fãa sẽn teend “pagã yagensã” me. La kiris-nebã me la sẽn yaool n pa tõe n solg b mens ne dũniyã la. Baa ne b sẽn pa maand wa dũniyã nebã, yaa tɩlae tɩ b vɩɩmd dũniyã pʋgẽ. (Zã 17:15, 16) Sẽn paase, b segd n moona dũniyã pʋgẽ, sẽn na yɩl n bao sẽn tar-b yam-sõngã n zãms-b tɩ b yɩ Kirist karen-biisi. (Matɩe 24:14; 28:19, 20) Rẽnd kiris-nebã sẽn pa tõe n lak b mens fasɩ ne dũni kãngã sẽn tar yɛl sẽn wat ne kʋɩɩbgã yĩnga, b segd n yalsa kãn-kãe a kʋɩɩbgã taoore. D ges zĩis a naas pʋsẽ kʋɩɩbgã sẽn tõe n zĩndi.
Yoobã yaa bẽdgo
8. Bõe yĩng tɩ Israɛll nebã wẽneg n balem Moaab wẽnnaam dãmbã?
8 Israɛll nebã yʋʋm 40 yeebg we-raoogẽ wã sẽn wa n kolg saabo, bãmb wʋsg bʋdg n basa tɩrlmã sore. B ra maana kaset ne fãagr tʋʋm wʋsg nins a Zeova sẽn maanã, sẽn paase, ra keta bilf bal tɩ b kẽ Kãabg Tẽngã. La sasa kãng sẽn pa reem yellã wakate, b kedgame n balem Moaab wẽnnaam dãmbã. Bõe yĩnga? B saka ‘yĩngã ratem wẽngã.’ (1 Zã 2:16) Biiblã yetame: “Neba sɩng n maanda yoob ne Moaab pagbã.”—Sõdbo 25:1.
9, 10. Rũndã-rũndã, bõe n kɩt tɩ tar yõod wakat fãa tɩ d kell n bãng tɩ yĩngã ratem wẽns tõe n kʋɩɩba neda?
9 Yel-kãngã wilgda yĩngã ratem wẽnsã sẽn tõe n kʋɩɩb sẽn pa gũusd-bã to-to. Yel-kãngã segd n zãmsa tõnd bũmbu, sẽn yɩɩd fãa, nebã sẽn get yoobã zĩig fãa wa bũmb sẽn sakdã yĩnga. (1 Korẽnt dãmba 10:6, 8) Kibar sẽn yit Etazĩni yetame: “Sẽn deng yʋʋmd 1970 wã, b ra geta pag ne rao sẽn vɩ ne taab n pa kẽ kãadmã wala bũmb sẽn kɩɩsd laloa wã Amerik soolmã tẽns fãa pʋsẽ. La masã a yaa minung sẽn piuugi. Neb nins fãa sẽn gʋls b kãadmã kãdengẽ wã sʋka, sẽn yɩɩd bãmb pʋɩ-sʋk yaa neb sẽn da reng n vɩ ne taaba.” Vɩɩmd ne taab n yaool n pa kẽ kãadem la yoob manesem a taabã pa tek tẽng a yembr ye. Yaa bũmb d sẽn ne dũniyã gill zugu, la zu-bʋko, kiris-neb kẽer tũu manesem kãngã, hal tɩ b wa yiis-b kiris-neb tigingã pʋgẽ.—1 Korẽnt dãmba 5:11.
10 Sẽn paase, zĩig fãa, b tusda nebã tɩ b yo. Filim dãmbã la televiziõ wã kɩtdame tɩ nebã tags tɩ kom-bɩɩs sã n yo tɩ b nan pa kẽ kãadem, yaa bũmb sẽn sakde. B geta rap ne rapa, la pagb ne pagb sẽn gãe taabã wa bũmb sẽn zemse. Sẽn paase, b wilgda yoobã yɛl wʋsg tɩ yaa vẽeneg n paasdẽ. Yoobã yɛl wilgr leb n yaa bũmb b sẽn tõe n yã nana-nana ẽntɛrnetã pʋgẽ. Wala makre, zʋrnall gʋlsd a yembr togsame tɩ yẽ yʋʋm a yopoe biribl n yi lekoll n wa yiri, n yɩ tao-tao n wa togs yẽ t’a karen-bi-taag n ges ẽntɛrnetẽ wã n yã pagb sẽn yaa zaal sẽn gãe taaba. A ba wã sũur sãama wʋsgo, la sẽn sãamd sũur n yɩɩdã yaa tɩ kamb wʋsg n get bõn-kãensã n pa togsd b roagdbã ye. Sẽn paase, roagdb wʋsg pa mi video reem nins b kambã sẽn getã sẽn yaa bũmb nins ye. Reem wʋsg sẽn wae wilgda yoob tɩ ka neer baa bilfu, n paas zĩn dãmb yɛl la nen-kɛglem tʋʋmã.
11. Wãn to la zak neb tõe n kogl b mens ne yoobã sẽn pid dũniyã?
11 Wãn to la zak neb tõe n zãgs reem-wẽns kãensã? Yaa b sẽn na n baood Wẽnnaam tɩrlmã nanda, n zãgsd n pa get bɩ n da maand bũmb baa a yembr sẽn tar loees ne yoobã. (2 Korẽnt dãmba 6:14; Efɛɛz rãmba 5:3) Roagdbã segd gũus n gesa b kambã sẽn maand bũmb ninsã neere. Sẽn paase, b segd n zãmsa b kambã tɩ b nong a Zeova la a no-tɩrsã. B sã n maan woto, b paamda pãnga, sẽn na yɩl n da ges yoobã yɛl sɛbã zutu, video wã la filim dãmbã pʋsẽ la bõn-wẽns a taab me ye.—Tõodo 6:4-9. *
Sak n tũ zãma wã raab yaa bẽdgo
12. Yel-bʋg n maan pipi kiris-nebã zãmaanẽ?
12 A Poll sẽn da wa n be Listr tẽngã sẽn be Azimineerã, a sãooga rao a yembr ne Wẽnd pãnga. Biiblã yetame: “Kʋʋnga sẽn yã bũmb ning a Poll sẽn maanã, bãmb zẽka b koeese n gom ne Likaoni rãmba goam n yeele: ‘Wẽnnaam dãmb dɩka yĩns n sig n wa tõnd sʋka.’ Bãmb boola a Barnabas tɩ Zes la a Poll tɩ Hɛrmes yẽ sẽn yaa koɛɛgã soaba yĩnga.” (Tʋʋma 14:11, 12) Rẽ poore, nin-kãens wa n wẽneg n dat n kʋʋ a Poll ne a Barnabas. (Tʋʋma 14:19) Ra yaa vẽeneg tɩ nin-kãensã ra sakda nana-nana n pʋgd zãma wã raabo. Yaa wala bab-kãngã neb kẽer sẽn wa n lebg kiris-nebã menga, b ra ket n pa bas b tẽeb ziri wã ye. Rẽ n kɩt t’a Poll gʋls Kolos kiris-nebã lɛtr n keoog-b tɩ b gũus ne “malɛk rãmb pʋʋsgo.”—Kolos rãmba 2:18.
13. Rog-n-migs kẽer bʋs la kiris-ned segd n lak a meng ne, la wãn to la a tõe n paam pãng n maan woto?
13 Rũndã-rũndã me, kiris-neb hakɩkã segd n laka b mens ne rog-n-migs nins sẽn tik tũudum wẽnsã zãmsg zut tɩ neb wʋsg sakd-bã, bala zãms-kãens kɩɩsda noy nins b sẽn kõ kiris-nebã. Wala makre, tẽns kẽer pʋsẽ, yɛl wʋsg nebã sẽn nong n maand biig rogmẽ, la ned kũum poorã tika ziri ning sẽn yet tɩ ninsaal tara bũmb sẽn ket n vɩ a kũum poorã zugu. (Koɛɛg Soaba 9:5, 10) Tẽns kẽer me n be tɩ b minim n kẽesd kompugli wã bãngo. Woto yaa wẽnem meng-menga, la pa zems ne nonglem ning kiris-neb sẽn segd n tall ne b kambã ye. (Tõodo 6:6, 7; Efɛɛz rãmba 6:4) Wãn to la kiris-nebã tõe n zãgs zãma wã sẽn datã, la b bas rog-n-migs sẽn yaa wẽns woto buudã? Yaa b sẽn na n teeg a Zeova zãng-zãnga. (Yɩɩl Sõamyã 31:7) Tɩrlem Wẽnnaamã na n kõo neb nins sẽn teeg-a ne b sũy fãa wã pãnga, la a kogl-ba, bala b yet-a-la woto: “Yãmb yaa zĩ-lilldga la mam pãng zĩiga la mam Wẽnnaam mam sẽn dellda.”—Yɩɩl Sõamyã 91:2; Yelbũna 29:25.
Ra yĩm-y a Zeova ye
14. Keoog-bʋg la a Zeova kõ Israɛll nebã, bilf sẽn deng tɩ b kẽ Kãabg Tẽngẽ wã?
14 Bilf sẽn deng tɩ Israɛll nebã kẽ Kãabg Tẽngẽ wã bala, a Zeova yeel-b lame tɩ b gũus n da wa yĩm yẽ yell ye. A yeelame: “Gũus-y-yã la y ra wa yĩm Zusoab a Wẽnnaam yell n bas bãmb goama ne b minunda la b tõod nins mam sẽn kõt yãmb dũnda wã ye. Yãmb sã n dɩ n tɩge, la y me ro-sõama n kẽ, tɩ y rũm-bɛda ne y rũm-bõonega fɩɩgdẽ, tɩ y wanzuri wã ne y sãnema paasdẽ tɩ y paoonga lebg wʋsgo, bɩ y gũus n da wuk y mens n yĩm Zusoab a Wẽnnaam . . . yell ye.”—Tõodo 8:11-14.
15. Wãn to la d tõe n kɩs sɩd tɩ d pa yĩmd a Zeova?
15 Bũmb sẽn wõnd woto tõe n zĩnda rũndã-rũndã bɩ? N-ye. D sã n lʋɩɩs yel-faad taoor d vɩɩmã pʋgẽ. La tõnd sã n baood Wẽnnaam tɩrlmã nanda, baleng hakɩkã na n yɩɩ bũmb ning sẽn tar yõod n yɩɩd d vɩɩmã pʋgẽ wã. Wala a Poll sẽn sagl-d tɩ d maanã, d na n baoa sẽka, la d ning d yamẽ wakat fãa tɩ koe-noogã mooneg yaa yãgb bũmbu. (Kolos rãmba 4:5; 2 Tɩmote 4:2) La tõnd sã n bas tɩ tigissã kẽnd ne koe-noogã mooneg leb poorẽ, tɩ pemsmã kokr la yõ-noogrã lʋɩ taoore, tõe n kɩtame tɩ d yĩm a Zeova, sẽn dat n yeel tɩ d na n lebs-a-la poorẽ d vɩɩmã pʋgẽ. A Poll yeelame tɩ yaoolem wakate, nebã na n “nonga dũniyã sũ-noog n yɩɩd Wẽnnaam.” (2 Tɩmote 3:4) Kiris-neb nins sẽn yaa pʋ-peelem dãmbã feesda b mens wakat fãa sẽn na yɩl n kɩs sɩd tɩ pa tags-kãngã buud n so b vɩɩmã ye.—2 Korẽnt dãmba 13:5.
Gũus-y n da wa tall-y soog-m-meng yam ye
16. Yam-wẽng bʋg la a Hawa tall-yã, tɩ neb kẽer tall-a a Poll wakatã?
16 Edɛn zẽedẽ wã, a Sʋɩtãan tõog n kɩtame t’a Hawa tʋlg n soog a menga. A Hawa ra ratame n bao n bãng sẽn yaa sõma la wẽng a toor n yãke. (Sɩngre 3:1-6) Pipi kiris-nebã zãmaanẽ, kẽer sẽn da be Korẽnt tigingã pʋgẽ da tara soog-m-meng yam woto. B ra tagsdame tɩ b miime n yɩɩd a Polle, t’a bool-b tɩ tʋm-tʋmd-kãsemse, b tɩtaamã yĩnga.—2 Korẽnt dãmba 11:3-5; 1 Tɩmote 6:3-5.
17. Wãn to la d tõe n maan n da wa tall soog-m-meng yam?
17 Dũni kãngã pʋgẽ, neb wʋsg yaa “wuk-m-mens rãmba,” la manesem kãngã bẽega kiris-neb kẽere. Kẽer lebga sɩdã bɛɛb menga. (2 Tɩmote 3:4; Filip rãmba 3:18) D Wẽnnaamã baleng pʋgẽ, tara yõod wʋsg tɩ d bao Wẽnnaam a Zeova sor-wilgri, la d sak “tʋm-tʋmd sẽn tũud sɩd la sẽn tar yamã” la tigingã kãsem dãmb saglse. Yaa woto la d tõe n bao tɩrlem, la rẽ sõngda tõnd tɩ d ra tall soog-m-meng yam ye. (Matɩe 24:45-47; Yɩɩl Sõamyã 25:9, 10; Ezai 30:21) Kiris-neb nins sẽn paam vʋʋsem sõng zaeebã fãa sẽn lagem taab yaa ‘sɩdã ra-luk la a yẽbgre.’ Yaa a Zeova n kɩt tɩ b beẽ, sẽn na yɩl n kogl-d la b wilg-d sore. (1 Tɩmote 3:15) D sã n sak n deeg tɩ tigingã tara yõod wʋsg ne-do, na n sõnga tõnd tɩ d ra maan bũmb baa a yembr ne rat-m-yembr yam, la d na n sika d mens n sak a Zeova raabã sẽn yaa tɩrgã.—Filip rãmba 2:2-4; Yelbũna 3:4-6.
D rɩk a Zezi togs-n-taare
18. B sagenda tõnd tɩ d rɩk a Zezi togs-n-taar zĩ-bʋs wɛɛngẽ?
18 Bãngr-gomd pʋgẽ, Biiblã reng n togsa woto a Zezi zugu: “Yãmb nonga tɩrlem n kis wẽnga.” (Yɩɩl Sõamyã 45:8; Hebre dãmba 1:9) Ad a sɩd talla manesem sõngo, tɩ d segd n dɩk a togs-n-taare! (1 Korẽnt dãmba 11:1) A Zezi ra mi a Zeova no-tɩrsã, a ra nong-b lame me. Rẽ n so t’a Sʋɩtãan sẽn wa n mak-a rasempʋɩɩgẽ wã, a Zezi pa leok-a ne sãmb-sãmb ye. A leoka a Sʋɩtãan vẽeneg n wilg t’a pa na n bʋdg n bas tɩrlmã sor ye.—Yelbũna 8:20; Matɩe 4:3-11.
19, 20. Tɩrlmã baoob yõod yaa bõe?
19 Yĩngã ratem tʋlsem wẽns tõe n talla pãnga. (Rom dãmba 7:19, 20) La tɩrlmã sã n tar yõod tõnd nifẽ, a na n kõo tõnd pãng tɩ d kɩɩs wẽnem. (Yɩɩl Sõamyã 119:165) D sã n nong tɩrlmã wʋsgo, na n yɩɩ koglg n kõ-d wẽng taoore. (Yelbũna 4:4-6) D tẽeg tɩ wakat buud fãa d sẽn lʋɩ kʋɩɩbg pʋgẽ, yaa a Sʋɩtãan la d sõng t’a tõoge. Rẽnd ad sẽn sɩd são n yɩɩd yaa d sẽn na n yals kãn-kãe n sõng n kɩt t’a Zeova tõoge.—Yelbũna 27:11; Zak 4:7, 8.
20 Kiris-neb hakɩkã sẽn baood tɩrlmã yĩnga, b ‘pida ne tɩrlem biis sẽn yit a Zezi Kirist nengẽ Wẽnnaam waoogr la a pẽgr yĩnga.’ (Filip rãmba 1:10, 11) B ‘yeelgda nin-paalgã Wẽnnaam sẽn naan wa bãmb wẽnego, ne tɩrlem la pʋ-peelem sẽn wat ne sɩda.’ (Efɛɛz rãmba 4:24) B yaa a Zeova rẽnda, la b vɩɩ a balengã yĩnga, la pa sẽn na yɩl n maan sẽn noom bãmb mens ye. (Rom dãmba 14:8; 1 Pɩɛɛr 4:2) B gãda rẽ b yamẽ wã wakat fãa, tɩ rẽ wilgd-b sor b tʋʋmã fãa pʋsẽ. Ad woto sɩd noogda b saasẽ Ba wã sũuri!—Yelbũna 23:24.
[Tẽngr note]
^ sull 11 Roagdbã sã n dat sagls a taab n tõog n kogl b kambã ne yɛl nins sẽn tõe n kʋɩɩb ned n kẽes yoob pʋgẽ wã, b tõe n gesa sebr ning sẽn yaa Zak pʋgẽ sũ-noogã kʋɩlen-biiga, a Zeova Kaset rãmbã sẽn yiisã.
Y tõe n wilga a võor bɩ?
• Bõe yĩng tɩ tɩrlmã baoob tar yõod wʋsgo?
• Wãn to la kiris-ned sẽn pa zems zãng tõe n bao tɩrlem?
• Yɛl kẽer bʋs sẽn be dũniyã pʋgẽ la kiris-ned segd n lak a meng ne?
• Wãn to la tɩrlmã baoob kogend tõndo?
[Zãmsgã sogsgã]
[Foto, seb-neng 28]
Dũniyã ra yaa yell n kõ a Zezi karen-biisã
[Foto, seb-neng 29]
Kamb nins b sẽn zãms tɩ b nong a Zeova wã na n paama pãng n zãag b mens ne yoobã
[Foto, seb-neng 30]
Israɛll neb kẽer sẽn kẽ Kãabg Tẽngã n paam arzɛkã, b yĩma a Zeova
[Foto, seb-neng 31]
Wala a Zezi, kiris-nebã kisa kɛgre